📖 ZKIZ Archives

女神tea time：韓星托高港租金 Fifi

1 : GS(14)@2013-04-12 00:41:24

http://hk.apple.nextmedia.com/financeestate/art/20130411/18223868

                  南韓流行曲《可愛頌》（Gwiyomi Song）旋律簡單，加上有如「少女十式」嘅手指舞，令唔少青春少艾（甚至是夏蕙姨）齊齊拍片扮cutie大跳Gwiyomi。不過韓流影響力，又點止係網上洗版咁簡單，連香港物業價都推高埋。
菲菲早排經過行sweet路線嘅中低價韓國化妝品牌Etude House銅鑼灣新舖，一條由少女組成嘅蛇餅長到你唔信。新舖逼爆，最重要原因唔係產品質素好、包裝靚，而係開幕當日向客仔大派南韓男子組合SHINee新碟，搞到粉絲蜂擁而至，人龍變相成宣傳工具。
查實Etude House勁在識揀代言人，炒熱品牌，單係南韓就有400間分店。上年11月打韓星牌攻入香港後極速擴張，至今有3間分店，以銅鑼灣舖為例，月租60萬元，比上手租客高近倍，變相推高銅鑼灣舖租。
其實娛樂產業做得好，絕對可以推動經濟。好似上年大熱嘅《江南style》，成功令南韓文化娛樂產業首錄順差。睇番香港娛樂圈，唉……相形見絀。

                  Fifi
本欄逢周二、四刊出                                                        
PermaLink: https://articles.zkiz.com/?id=282486

女神tea time： 買樓花送媽媽？ Fifi

1 : GS(14)@2013-05-10 01:39:56

http://hk.apple.nextmedia.com/financeestate/art/20130509/18254062

                  中原集團創辦人施永青最近接受訪問時講到，傳媒網上新聞用字越來越俗，已經走火入魔。查實傳媒行通俗路線唔係錯，都係想讀者一睇就明，易於消化。至於通俗到乜嘢程度而又不失真，就要靠記者判斷。
其實地產代理為sell盤，舞文弄墨功力都唔弱，想當年用「窮人恩物」形容荃灣410萬銀單位，金句就成為全城焦點。近月樓市死寂，代理絞盡腦汁度金句吸睛，好似「業主求死」、「收租好過打劫」，寥寥數字，一語道破現實的殘酷，觸動冇錢上車人士嘅弱小心靈。
至於一味靠語出驚人幫助有幾大，大家心照，連施永青都預期，今年第二季代理都要蝕錢。美聯（1200）及中原為求自保，亦開始拓展海外樓盤市場。美聯發SMS邀請菲菲去香港嘅英國樓盤展銷會，首句係「母親節買樓花好過送花」，果然又才子上身。
有能力嘅，送樓花有乜所謂，慘在後生仔連上車盤都買唔起，唔使媽媽操心助交首期已算好叻仔，仲講送樓？

Fifi
本欄逢周二、四刊出                                                        
PermaLink: https://articles.zkiz.com/?id=282763

女神tea time：一蘭熱與IPO Fifi

1 : GS(14)@2013-07-19 00:43:31

http://hk.apple.nextmedia.com/financeestate/art/20130718/18338552

                  一蘭開張，一時間，報紙、fb，一碗又一碗拉麵「玉照」湧現。到底由幾時開始香港人成為「拉麵精」，竟甘心用睇兩場戲嘅時間去排隊，就為咗一碗麵？
不過最令人詫異係政府新聞處於一蘭開張當日，都特別發新聞稿祝賀。菲菲為此向發稿嘅投資推廣署八卦過，話說一年前，九州經濟產業局轉介一蘭畀佢哋，其間投資推廣署就為一蘭提供資料，幫手搞牌照、搵舖頭咁。所以一蘭成功落戶香港，佢哋都有功勞。
香港人貪新忘舊嘅程度一向驚人，熱潮往往來得快，去得仲快。想當日逼餐懵都要一親A&F男香澤、一索誠品的書卷味，今日你仲會唔會？明明早兩個月先話「I Love一風堂」，今日就變成萬水千山食一蘭。聽講一蘭或會開兩間分店，唔係潑冷水，但真心勸佢唔好對「後市」期望太大。
香港人核心價值係趁墟，往往海外名店到港，有如一隻大熱新股掛牌，幾日內見頂，之後股價係點，就要見真章睇公司表現造化。
之前傳過一風堂會來港發IPO，雖然唔知會唔會成事，但相信到上市日，拉麵潮早已退潮，話唔定會係而家日本好興嘅pancake店頂上。

                  Fifi
本欄逢周二、四刊出                                                        
PermaLink: https://articles.zkiz.com/?id=283493

女神tea time：百麗變身做辣妹 Fifi

1 : GS(14)@2013-08-06 23:47:21

http://hk.apple.nextmedia.com/financeestate/art/20130806/18365635

                  百麗（1880）噚日公佈收購Baroque Japan逾三成股權。菲菲即時上網八吓呢間被點燈嘅公司有乜咁巴閉，先發現原來公司旗下品牌包括moussy同sly，當堂嚇一跳。
身旁有男同事問，單刁有乜咁出奇。奇就奇在百麗同上述兩個品牌嘅style，可以話係天與地。moussy同sly係涉谷系嘅代表品牌，wild得來又有女人味，簡單來講即係台灣辣妹style。縱然百麗旗下有12個品牌，但普遍都係行OL路線，着上辣妹身上，似乎怪怪哋。
不過做生意合作，冇話襯唔襯嘅，目標一致就得啦。Baroque喺中港市場，有絕對的野心。
公司曾傳過於香港發IPO，而公司CEO於網頁宣言，要致力做中國人生意。目前Baroque中港日三地，共有348間分店，當中有21間喺內地，9間喺香港。觀乎淘寶網無限件呢兩個牌子嘅老翻，你就知內地女仔幾buy佢哋，所以Baroque嘅內地生意應該唔差。
至於百麗，全年業績雖已比同業好，但與其喺鞋業苦苦掙扎，開拓新業務可能仲有前途。以百麗嘅網絡，加上Baroque Japan嘅名氣，今次百麗應有所作為。

                  Fifi
本欄逢周二、四刊出
PermaLink: https://articles.zkiz.com/?id=283636
Next Page
ZKIZ Archives @ 2019