操盤手札記：入市要睇實DXY線
1 :
GS(14)@2018-01-07 16:00:57新年伊始，祝大家旗開得勝！香港兩個賭場──馬會同港交所（388），新一年都有新嘢玩，前者嘅從化馬匹訓練中心將於下半年啟用，玩上斜跑道；後者就最快下半年批准同股不同權嘅創新公司、蝕緊錢嘅生物科技公司喺主板上市！講到尾，為爭生意不惜加重賭味！據彭博統計嘅中資科技新股資料，打算今年境外上市、集資額以十億美元計嘅公司就有6間。當中，營運支付寶嘅螞蟻金服、產銷手機嘅小米，尋求上市估值更高達五、六百億美元。港交所修例，無非為食呢啲大茶飯。炒新股賭彩數，但就不妨買定啲港交所責倉，分番啖食。至於今年投資大環境，要睇一條線！咩線？DXY線！美國稅改、加息早已被市場消化，美匯指數（DXY）近日不升反跌，營造「頭肩頂」嘅見頂形態，2017年收92.3，失守頸線92.6，以量度跌幅計，有機下試90大關。亞洲貨幣指數（ADXY）則回升，2017年收109.78，創兩年新高。美元轉弱、亞幣轉強，反映資金流出美國，轉投新興市場，包括港股。此外，人民幣蓄勢再展升浪，進一步增加港股，尤其中資股嘅吸引力。人民幣兌美元中間價前年貶值6.4%，舊年則升值6.2%，扭轉過去三年頹勢，並創九年最大升幅。展望今年，始終係中國故事最吸引。
A股年中入摩，可望帶動H股向上。港股之中，內銀股嘅H股相對A股普遍折讓兩成，勢將受惠。事實上，內銀最壞時刻已過，一來內地經濟增長回穩，未見債務危機；二來受惠供給側改革，信貸質素改善；三來國債息率上升，利好息差表現。中金估計，今年上市銀行純利按年增長7.2%，增速加快2.1個百分點，結束過去四年嘅調整。揀邊隻好？四大內銀最穩陣，話晒係國有銀行，阿爺直接持有，有事阿爺會救。當中，建行（939）突破三角形頂部，中行（3988）造頭肩底，前者可候回至50天線吸納，後者則候回至20天線。割柑人本欄逢周二刊出
來源:
https://hk.finance.appledaily.co ... e/20180102/20262523