不少年輕人出來工作數年，可能還在摸索將來的路向，今年26歲的Timothy（嚴天恩），大學畢業後即從事保險行業，入行1年便已躋身百萬圓桌(MDRT)，至今工作4年多，已成為AXA安盛最年輕的區域經理，年薪過百萬，帶領着二十多人的團隊，他希望憑着自身的努力可以走得更高更遠。 今年26歲的Timothy是現時AXA安盛最年輕的區域經理，他已建立了二十多人的團隊，「保險本身冇問題，亦真係具有保障嘅功效，只不過有人想搵快錢，無所不用其極搵人簽單，令到社會唔少人對保險產生誤解，呢啲事好難一時三刻去改變，我會盡量做好自己，至少希望令身邊嘅人對呢行會有少少改觀。」在港大修讀經濟及金融系的Timothy，當初亦與不少人一樣，對保險業抱有負面的想法，「本身outgoing，鍾意識朋友，讀大學時有師兄覺得我適合做保險業，想叫我入行，但當時覺得做保險好low，要求朋友搵親戚，形象唔太好，所以冇考慮到。」直到12年畢業，一直有意創業的Timothy，反而踏入保險業一行，「讀書時有同朋友喺動漫節及年宵擺攤位，都賺到錢，呢啲創業體驗令我一心想搞一門生意，但畢業後過咗一排都未諗到咩好橋，當時有朋友去聽個理財策劃嘅職業講座，拉埋我去陪佢，聽到個人分享原來成功唔一定要sell親戚朋友，而且同創業差唔多，多勞多得、點運營、工時都係自己安排，令我對保險呢行改觀唔少，之後考慮咗1個月就決定入行。」 份人唔輸得 初入行時，Timothy也是跌跌踫踫地走過來，「自己唔係出身喺大富之家，住公屋，父母好大年紀先生我，又係獨子，經濟壓力大，會想賺到錢改善屋企嘅生活質素。頭1、2個月一張單都開唔到，但我份人唔輸得，反而激起鬥心，會睇啲心理書及問前輩，睇有咩改善地方，發現自己雖然對計劃熟悉，但只係識sell佢有幾好，忽略咗對方嘅需要，之後掌握到，開始開到單。」理財策劃主要是提供退休、儲蓄、保險及投資基金等服務計劃讓客人選擇，入行1年，Timothy已奪得業界的最高榮譽MDRT，「而家啲人對保險持開放態度，佢哋買保險當係一份需要，佢哋會同邊個買，就要靠自己努力。自己定咗一日一定要約到一個客，9成嘅單都唔係sell身邊朋友，反而係靠朋友介紹其他有興趣嘅人畀我，之後就要睇你有冇準備。」 從事保險業有人會擔心破壞朋友間關係，Timothy表示不想這樣，公私分明就十分重要，「我都會約朋友出嚟講保險，但會開宗明義咁約，我都係咁教啲新人，唔好約嗰陣講好耐冇見出嚟聚舊，點知出到嚟係咁講保險，不如一開始講明自己做緊呢行，問佢有冇興趣聽呢方面嘅訊息，反而畀到人覺得你踏實嘅印象，容易介紹身邊朋友畀你。」 管理團隊另一挑戰 達成MDRT的目標後，Timothy亦升為分行經理，同時開始建立自己的團隊，「拎到MDRT係一種肯定，同時表明自己個套係work，可以教埋其他人，一齊跑數，佢學到嘢，我又可以有commission，呢樣都係吸引我入行嘅原因。管理團隊係另一個挑戰，要同佢練習說話技巧、陪佢出去見客，要花唔少心機時間，但見到同事最後可以立足，都係值得嘅。」經過不斷的努力，Timothy在今年1月時升為區域經理，他亦定下新的目標，「想團隊及個人嘅成績都做到並駕齊驅，拎到今年嘅MDRT；另外，雖然擴充團隊係有難度，但定一個目標畀自己，做嘢就更有動力。」 點入行？ 現時為AXA安盛區域經理的Timothy指他有意擴充團隊，歡迎有興趣的人士加入，「要任職理財策劃師必需考獲Insurance Intermediaries Qualifying Examination嘅證書，而家公司有大專生計劃，大專以上畢業嘅新人可以有$8,000或以上嘅底薪，會視乎面試再議，希望畀少少支援啲新人，可以安心發展。有意應徵者可致電6633 7801或電郵[email protected]聯絡我。」身為區域經理的Timothy現時月入約10萬。 撰文：曾志恒攝影：葉偉豪（部分圖片由被訪者提供） | ||