| ||||||
上月內地爆發H7N9禽流感，疫情擴散，人人聞雞色變，海天堂集團主席吳耀明就冇有怕，繼續每星期北上，返惠州佢個自家農場養雞種菜，招呼來參觀的團友，「我養嘅係龜苓雞，旅行團都排住隊嚟食。」 龜苓雞 鬍鬚佬吳耀明利用惠州的舊廠房空地，開了個環保農場，種了十多種瓜菜和飼養數百隻雞，他無懼禽流感威脅，拎住菜葉入棚邊餵雞邊說：「呢度養嘅雞好健康，食菜同藥渣，仲食埋龜苓膏。」鬍鬚佬搞這個環保農場，原本純粹給自己打發時間，用藥渣來種菜養雞，食真正冇農藥的菜和健康走地雞，後來瓜菜愈種愈多，於是送給朋友吃，大受歡迎，「生產線每日都有好多藥渣，又唔想浪費，加埋雞糞曬乾，可以變成肥料，又環保又減少污染。」興之所至，他索性搞大個環保農場。這天他就帶埋正修讀中醫的細女吳苑冰（Christita）到農場，他手執已曬乾的肥料，教女兒如何用視、嗅、觸來分辨藥渣。負責公司食品品質安全的Christita說：「有部分包裝唔合格的龜苓膏，同埋龜的內臟加埋粟米煮熟後，都會用來餵雞，所以啲雞叫做龜苓雞，比食一般雞隻食得更健康。」 招呼旅行團 由於不少人慕名想食龜苓雞，鬍鬚佬在新廠房預留地方，發展成旅遊觀光點，「新廠房有個容納過百人的飯堂，剛開放了幾個月，暫時只接待一些團體來參觀和食有機龜苓雞火鍋。」飯堂樓下設有展覽館，展示世界各地不同品種的龜標本，「全亞洲都無邊個地方，有咁多、咁齊嘅龜資料。」有諗頭的鬍鬚佬更自製了大批T恤當紀念品發售，「我啲員工都係著呢啲T恤。」將廠房變成旅遊點，以為鬍鬚佬可以賺多筆，點知佢話：「其實無錢賺，我哋只接待團體來參觀，無收任何入場費，只想俾大家睇嚇生產過程，食都食得安心，而且想帶出環保概念，藥渣都唔會嘥可以循環再用，我哋目標想做到零污染、零垃圾。」 | ||||||