ZKIZ Archives


投資香港股市,外國股市,地產,樓市之(壹壹肆)發達三大要素之:買甚麼?(第九十九回) 阿牛

http://hk.myblog.yahoo.com/yomagyomag/article?mid=1608

投資港股:阿牛揀股法(十)

要講分散投資,最出名嘅名言,就喺   don’t put all your eggs in one basket。真喺五年班小學生都識;之但喺我地一方面不停引用呢句說話,另一方面就從來都唔做,淨喺咁買蛋嘅。

                      

既然名言都喺講一套做一套,充滿矛盾;咁阿牛都唔爭在,講過唔算數喇。我八月八號講過:

唔好揀未發育股,揀已經考驗過嘅,參考番上次牛市三期嘅情形,決定買唔買。

咁而家阿牛冇左個地產板塊,就唯有講過唔算數,焗住改改句說話佢攞番嚟用。

呢個喺阿牛真實嘅心理歷情。到今時今日,阿牛自然好清楚已經冇左地產板塊,但喺當日揀南航嘅時候確實喺未知,所以今日喺Blog呢度就照寫出嚟,按時間過程,諗法嘅改變,俾大家參考。

其實啲未發育股,當中亦有啲好嘢嘅,嚟緊嘅日子可以升幾倍都唔定,佢地最大嘅問題,喺唔知邊隻會升,因為全部都未經過大牛市。我地先睇吓半新股,裡面亦有好掂嘅,例如750興業太陽能,上市一年,就已經升幾倍。

       

相反,好唔掂嘅,亦大有人在,大家睇吓1638佳兆業,上市半年就跌左幾倍。

       

點解呢?

阿牛唔知。

我亦唔相信有人知;因為剛上市,大家見到嘅業績都喺嗰一兩季,駛唔駛咁認真,炒高幾倍,或者質低幾倍呀!我亦唔信上市時個PE估得咁差,差幾倍,要個市場調節得『咁激』。

咁即喺點呀?

即喺人為囉。

根 本股票市場,幾乎全部都喺人為,同房地產市場唔同,房地產市場喺有實用價值嘅;例如一隻舖,你唔好信我值三千萬,但喺我個個月用佢搵廿萬,個租值就走唔甩 嘅,有數計。所以一舊磚頭,跌到盡有個譜,但更重要嘅喺,升到盡都有個譜,你夾硬炒到剛才間舖五千萬,佢嘅賺錢能力點谷上三十五萬一個月呀?所以咪爆煲 囉。相反,十隻股票,九隻唔派息,話值幾多錢,講嘅啫;PB點正斗,又喺講嘅啫,你明日可以攞佢去折骨賣咩?但炒起上嚟就反而冇束縛,話升幾倍就升幾倍。

我地又睇吓一隻人人都識嘅股票,1211比亞廸。

      

佢上市後,經歷多年都喺咁上下,2007年 就跟大隊升左三倍幾,都算有交代,後來跟隨著海嘯下跌,仲跌破埋上次牛二佢自己條底線;牛二都有廿蚊咁滯,熊市就得番十零蚊。如果攞嚟同早兩日我地睇各種 股票熊市反彈嘅力度比較,例如康師傅,國航等等,咁阿牛就唯有俾佢評級喺『惡劣』,同招金嘅走勢,差唔多衰。之但喺過左半年,阿李錄先生介紹巴菲特先生買 入比亞廸,於是乎市場上平地一聲雷,升價十倍。

你話點解間公司可以忽然叻八倍吖?你教我。

升在乜呢?

一個『口實』

口實即喺乜呢?即喺人人眾口一詞都話:『冇理由咁平喎,應該貴啲』

就喺要呢句說話。

要人講得出呢句說話,得兩個理由。第一,就喺信個人,巴菲特先生就喺人版,大家都唔喺買比亞廸,買巴菲特而已。第二就喺信事實,例如有間公司佢賣啲貨,去年值六十皮,今年市場公價賣百二,你話個股價應該點吖?都未計生意好做,會搏晒老命去增產,賺多左嗰啲。

有冇咁筍嘅嘢呀?

啱啱又有喎,就喺賣呢舊嘢喇。

                  

有『口實』,就有希望。


投資 香港 股市 外國 地產 樓市 壹壹 壹肆 發達 三大 要素 甚麼 第九 九十 十九 九回 阿牛
PermaLink: https://articles.zkiz.com/?id=17314

投資香港股市,外國股市,地產,樓市之(壹貳壹)發達三大要素之:買甚麼?(第一零六回) 阿牛

http://hk.myblog.yahoo.com/yomagyomag/article?mid=1741

投資港股:中信泰富(一)

中國鐵鈦講左幾日,大家都會感覺到,佢喺可能得,但唔喺實得嘅嘢。如果佢得,閒閒地升五六倍,如果佢唔得,只喺升一倍半倍都唔定;咁究竟買唔買好呢?

阿牛有一個提議,就喺將佢綑縛式,同另外一隻股票一齊買。今次嘅目標要搵隻百份百一定升嘅股票,咁兩隻一齊買就拉上補下;例如搵隻一定升嘅,假設升三倍,隻鐵鈦如果升五倍,打和之後就有四倍,隻鐵鈦如果只升一倍,打和之後都仲有兩倍。

咁有乜嘢股票一定升嘅呢?

穩陣嘅大企業囉,即喺大藍籌。但喺個唔好處就喺,升就一定升,但喺唔升得多。

今時今日,最落後嘅藍籌有四隻:和黃,富士康,招商局,中信泰富。

富士康,愛莫能助。招商局,落後唔多。和黃,唔好攪我。

                                             

大家睇吓中信泰富幅圖,你估吓下次牛市個高位喺幾多呀?

         

 

喺咪$50呀,都冇乜研究囉。

中信泰富,喺五百八十億嘅企業,比對先前嘅鐵鈦只喺五十八億,南航喺三百億。仲得人驚嘅喺,中信泰富只喺母公司中國中信嘅『一忽仔』;中國中信資產喺萬幾億。

中國中信喺鄧小平伯伯1979年改革開放的最早制成品;由他自己親手策劃,並指派紅色愛國資本家榮毅人先生創辦。

                      

 

業 務範圍主力『 非銀行性的金融事業,並兼營任何可以想象的業務』,廣東話就叫做『汁都撈埋』。當時中信喺全國最具規模嘅企業,所以曾幾何時,成為眾矢之的,話佢『官 倒』,即喺官商勾結,利益輸送。之但喺當時中國仲喺未有商營企業,只有國營企業;忽然話要攪個商業體制,又話要俾佢生存壯大,咁點先算『適當咁』幫助佢, 又點先算利益輸送呢?

後來大家都習慣左,知道開放改革喺有啲尷尬情況,漸漸就冇乜嘢喇。

 

中國中信喺以金融事業為主,於1990年來港,收購了一間叫泰富發展的公司,改名為中信泰富,注資上市。中信在香港的業務只有少量金融投資,反而是以鋼鐵業為主,包括在澳洲採鐵礦和運送回國生產鋼材;其他業務包括物業投資,海底隧道,國內的發電廠,電視衛星,和澳門電訊。

阿牛喺咪睇中佢嘅鋼鐵業呢?

唔喺。

                  


投資 香港 股市 外國 地產 樓市 壹貳 貳壹 發達 三大 要素 甚麼 第一 一零 零六 六回 阿牛
PermaLink: https://articles.zkiz.com/?id=17468

投資香港股市,外國股市,地產,樓市之(壹壹伍)發達三大要素之:買甚麼?(第一百回) 阿牛

http://hk.myblog.yahoo.com/yomagyomag/article?mid=1645

投資港股:中國鐵鈦(一)

 

中國每年用鐵甚多;去年的用量是9億噸。中國本身的鐵礦石的儲存量是全球的14%,主要蘊藏在東北和西南地區。西南的鐵礦主要在四川省的攀枝花地區,該區已探測及開發中的鐵礦有31億噸。全國去年鐵礦產量2.73億噸,如果用9億噸的用量相減,就需要進口6.27億噸。

全球其他高蘊藏量地區,包括澳洲,南美和印度。各地開採鐵礦和外銷鐵礦,都是 巨無霸的大公司。點解要大公司,而細公司做唔到呢?就喺因為鐵礦石喺數以億噸咁開采嘅,而且礦石笨重,運輸是極麻煩和極大工程的,唔講得笑嘅。如果同其他 礦物相比,例如煤礦就一樣喺咁大量,但喺煤就輕身很多,容易運送;再對落下面的鋁礦,產量只喺講緊幾多千萬噸,而且鋁金屬只有鐵嘅三份一咁重。跟著啲銅、 銀、金之類就只喺講幾多十萬噸。所以總括嚟講,鐵礦石:『 質重量大 』 。

中國是進口鐵礦石的頭號買家,從前是有個類似進口鐵礦石組織咁嘅東西:中鋼協,負責主持同外國三間大公司,巴西的淡水河谷,澳洲的力拓,同埋必和必拓公司,分別議價、議量,以每年為單位,定出買賣價和大概承擔的買賣量;為之『年度定價方式』。

 呢個辦法其實自1981年 開始,已經用左三十年。簡單來說,就喺每年三月,由中國、日本、歐洲、三大用家,集體同淡水河,力拓,必和必拓、三大供應商議價,由四月一號,生效至翌年 三月底。協議相當簡單,就是對幾大鐵礦石,磁鐵礦、赤鐵礦等,作出定價,成為當年全世界的公價;其他細節如品質上的輕微差別,各地運費差別等等,一律省 略,各出口商『多除少補』,差額自付,即喺『食自己』。

 

               

咁形式嘅合約,其實喺有利買家多於有利賣家,所以當需求一年復一年咁上升,呢個制度終於在2008崩潰了,不能再維持。當年,日本的新日鐵,和淡水河谷首次作出較明細的定價,把不同品質的兩種粉礦價格區分了,給予一個6%的差異,開了『同品種,不同漲幅』的先例。『粉礦』就是已經研碎了的精礦,礦石粒直徑在6mm或以下。此例一開,澳洲嘅力拓首先退出集體議價,向中國買主徵收額外的運費,從而獲得更高的售價。

 

         

 

2009年就是更糟的一年,因為建立了三十年的模式已經給打破了,遊戲的規則需要從新建立。這年的談判異常艱苦,直到五月底才達成協議。到了2010年,本年的情況就只能用『失控』來形容!

 

上述三大公司佔全世界出口鐵礦石的海運量70%以上;由於三大公司的壟斷,去年年底開始,三間公司聯合抬控價格,紛紛拋棄年度定價方式,並步步逼迫全球的鋼企,逐步從年度定價走向季度定價,再走向月度定價,再走向『指數定價』。所謂指數定價,即喺海鮮價。

 

凡喺呢啲可加可減基制,就梗喺有加冇減喇,今年第一季度,三大礦山仲用緊年度定價時,仲賣緊61美元一噸,從四月開始,拋棄年度定價之後,開始季度定價,二季度價格約每噸123美元,三季度定要價更升至每噸147美元。情況惡劣。

跟住我地中國人發揮民族特性,使出渾身解數;就喺『一盤散沙,各自為政』,一窩蜂各自去敲門,各出奇謀。

結果喺點?

咪衰多二錢重囉!

        


投資 香港 股市 外國 地產 樓市 壹壹 壹伍 發達 三大 要素 甚麼 第一 一百 百回 阿牛
PermaLink: https://articles.zkiz.com/?id=17469

投資香港股市,外國股市,地產,樓市之(壹壹陸)發達三大要素之:買甚麼?(第一零一回) 阿牛

http://hk.myblog.yahoo.com/yomagyomag/article?mid=1653

投資港股:中國鐵鈦(二)

我們鏡頭一轉,去到千里以外的澳洲。

         

喺個幾月前,遙遠嘅澳洲,發生了政治風波。五十三歲的總理兼工黨黨魁,Kevin Rudd 陸克文,黯然辭職;由副總理,四十八歲的 Julia Gillard 吉拉德接任。

這一樁小小的,本來關我地叉事嘅新聞,卻輾轉關係到我地嘅投資。

                    

陸克文,祖藉英國,小時候因為患左風濕性心臟病,佢父母決定在郊區的農莊生活,希望良好嘅天氣會給兒子帶來健康。在陸克文弱冠時,他父親因車禍去世,之後一家人的生活漸趨困苦。他在大學時主修中文和中史,能說得一口流利的中文,2007年上任總理後,澳洲和中國的關係達到史無前例的和洽。至2009年,中澳雙邊貿易額達七百五十億澳元,佔澳洲總貿易額的 17%。但是陸克文終於在新的礦務稅上觸礁下台;事源澳洲政府,因種種開支,財政上十分吃緊,所以希望在2012開始,徵收新礦務稅,對賺到盤滿砵滿的礦商,收取 40% 的暴利稅。此舉當然不受歡迎,最終引發礦商串同工黨內部份人發起『迫宮』,去掉陸克文,扶植副總理吉拉德。

                            

吉拉德,出生於英國威爾斯,孩提時因小兒久咳,她父母於她七歲時移民澳洲,希望女兒身體較佳。大學時吉拉德修法律,畢業後成為律師,據說她和礦商關係很好,對中國就好感欠奉。她上台後幾天已經和礦商達成共識,把 40% 稅率降為 30%,又增加多種寬免,皆大歡喜。

澳洲的礦商如此神通廣大,實在何許人也?

      

必和必拓,BHP Billiton 是全澳洲最大的公司,也是全世界最大的礦務公司。他是兩個龐然大物,BHP Billton 2001年合併而成。BHP是地道的澳洲公司,創於1885年,而 Billiton 則是英國背境公司,創於1860年;必和必拓現在是倫敦富時指數的成份股。

                        

力拓,Rio Tinto 是英資公司,相比必和必拓,也是歷史悠久,始創於 1873年, 是全世界第四大礦務公司,也是倫敦富時指數成份股。力拓於2009年,可能需要資金週轉,於當年二月和中國鋁業達成一項1500億人民幣的入股和建立戰略 伙伴關係。但是,到了四個月後,同年六月,力拓單方面終止和中鋁的協定,過橋抽板。後來更爆出力拓四個高層人員,牽涉入洩露中國國家機密,被拘捕及定罪, 大家攪得很不愉快。跟著,力拓就傳出轉和必和必拓尋求合作。

力拓和必和必拓在幾個月內達成了中國最不願見到的共式:就是合併了澳洲的礦務,組成了一間50:50的新公司。將來不論營運上,和討價還價上的能力,都更上一層樓。

中國對於近月澳洲的種種轉變,束手無策。但可以肯定的是:

1) 2012年 開始,鐵礦石肯定會更貴;我們不能有任何奢望,澳洲礦商們會把30%的新稅啃掉。羊毛,永遠是羊身上出來的。

2) 新澳洲政府的親中情度和舊政府比較,相去甚遠。

3) 力拓和必和必拓,將會越來越惡,對中國的入口企業越來越兇。

4) 新政府的30%稅可能是緩兵之計,到財政緊迫時自然會再增加上去。尤其是如果這增加的份數,是由中國人乖乖的付鈔的話………

       


投資 香港 股市 外國 地產 樓市 壹壹 壹陸 發達 三大 要素 甚麼 第一 一零 零一 一回 阿牛
PermaLink: https://articles.zkiz.com/?id=17470

投資香港股市,外國股市,地產,樓市之(壹壹柒)發達三大要素之:買甚麼?(第一零二回) 阿牛

http://hk.myblog.yahoo.com/yomagyomag/article?mid=1691

投資港股:中國鐵鈦(三)

尋日去完澳洲,今日時空倒流,番去三千五百年前,嗰陣中國喺商朝。

《西京賦》話:『殷人屢遷,前八後五』。

殷人,商朝也。屢遷,多次搬動咁解;搬乜?首都也。前八後五,共十三次。

當時雖然冇而家咁多家電,工廠,寫字樓要搬;但喺當時冇『人人搬屋』,只有『人手搬屋』,所以搬國都極為大鑊。

咁點解仲要搬呢?

因為要追逐銅礦。

當時之最新科技,就喺煉紅銅;紅銅用嚟造兵器,同儀仗禮器;當其他人仲用緊木矛竹劍,同埋掟石頭,銅刀銅劍嘅威力就同飛機大炮差唔多。邊位知道下面隻秘密武器:銅戈,究竟點樣用,阿牛請佢食嘢。

       

每當一個地方嘅銅礦採完,商人就情願搬國都,去一個有礦源嘅地方,方便開採,古人選擇移船就墈,寧把國都搬近礦場,都不選擇把礦石老遠搬回來。

礦石,自古都難搬運,今日亦然。

鐵礦石開採之後,運至港口,然後下船,海運至交貨港口,貨主就要自己負責把礦砂運至冶煉廠。例如四川的鐵廠,就要從廣東湛江,或廣西防城港把礦沙接走;運輸費一般由港口運送至廠裡都要每噸 RMB200 至 RMB300

        

如果買賣由國內生產的礦砂,相對就簡單得多,可以在自己廠房最就近的火車站收貨,稍為搬動一下就可以運送回廠了。 加上最近進口礦砂以『海鮮價』計算,和以前的年度價格比較,就很難確保每一次都和同一礦商買貨,而每一次換貨種之後都要從新適應煉制的時間和成份,因為每種礦砂的精細成份都不同。如果能夠跟同一個國內礦主進貨,買進同一種礦砂,實在有很多的方便。

今年初,春節前後,雲南地區的鐵礦砂價格,曾經一度炒高至全國市場價的1.4倍。雖然只維持了短短兩星期,但也間接指出煉鋼廠的保守政策,寧可硬接一批貴貨,也不願到外省找新貨源,証明煉鋼業他們自己有一套準則,不足為外人道。

       

說了三天,都是在推銷同一個東西:國產鐵礦股。

現在整個市場只有一隻:

                           893      中國釩鈦磁鐵礦業有限公司


投資 香港 股市 外國 地產 樓市 壹壹 壹柒 發達 三大 要素 甚麼 第一 一零 零二 二回 阿牛
PermaLink: https://articles.zkiz.com/?id=17471

投資香港股市,外國股市,地產,樓市之(壹壹捌)發達三大要素之:買甚麼?(第一零三回) 阿牛

http://hk.myblog.yahoo.com/yomagyomag/article?mid=1709

投資港股:中國鐵鈦(四)

893中國鐵鈦在去年九月中上市,上市後由 $3.5 最高升至今年一月時的 $5.59。股價跟著反覆上落,直至四月九日開始顯著下瀉,直至七月十五日的 $2.25最低位。

 

        

呢啲叫做『嚴重超賣』。

簡單嚟講,叫做走勢惡劣,或者話,平一平都冇人買。

咁仲制!

 

即喺咁:中國鐵鈦一向都有兩個大股東,一個叫做『合創』,一個叫做『Green globe』。合創喺鐵鈦嘅原始股東,即喺創辦人,大老闆。Green globe喺第二大股東,佔9.9%股權;背後喺洋鬼子,在美國非主版上市,喺投資公司,據說對買賣資源股頗有心得。阿牛睇過Green globe 嘅資料,唔喺好鍾意佢地咁對住我笑,覺得佢地喺『奸』嘅。

http://www.greenglobeint.com/about/history/

         

網頁一開始就講啲乜嘢環保,乜嘢環保旅遊概念,不過又同時喺個投資機構,好似有啲虛浮。

好喇,呢個 Green globe 在鐵鈦上市前已經入股,股份成本低至$2.2 ;在六個月禁售期後,Green globe就開始拋售股份,好像想把手上的9.9%,全數賣出,於是股價開始插水,由五元以上一直估售到二元多。

 

大股東合創都講得啱,人地Green globe有權賣喎,而且事前已經咨會左,咁賺到錢,人地想到此為止都好合理啫。

在這幾個月當中,另外又添左變數,就喺因為殺出左多一個程咬金:景順投資。正當Green globe開始賣出,景順就開始買入,最多時景順持有8.7%股權,但喺買入又點托得住Green globe拋售吖,景順結果坐左艇。景順今次可以算冷手執個熱煎堆,跟著發覺『辣親手』,隻手起曬水泡,唯有又將手上煎堆拋掉,表演一幕高買低拋嘅尷尬場面。

 

        

 

呢個喺四月十五日嘅事,呢頭Green globe話減持,景順在四月十六日就話增持,跟著頂左幾個禮拜頂唔到,接住就沽埋一份,同Green globe齊齊沽;結果股價就一路從五蚊跌到落去兩個二。

但喺另一邊廂,其他投行,例如交銀、德銀就仍然相當睇好鐵鈦,維持買入評級,德銀睇$4.1,交銀睇$5.4。

所以:

1)   如果唔喺有減持風波,股價而家應該在四、五蚊上上落落。

2)   股價在兩個二應該喺底價,大概冇乜人會有興趣在兩個二樓下沽貨嘅 

3)   股價要等呢一朝平服晒,先有得再向上。要靠牛市三期的帶動。不過都喺好似下面隻牛咁,舉步為艱。

        

4)   佢因為喺初次發育股,所以走勢會好飄忽,升得慢,跌得快,會好令你失望,要到牛市接近尾聲先會有顯著升幅。到時喺好短時間內就要睇到實,見頂就要走貨,大 家睇番早幾日,講南航上一朝個走勢就會略知一二。最尾嗰幾蚊,幾日內就要攪掂,好似打邊爐淥龍蝦咁,分秒必爭。

                  

阿牛就決定到時乜都唔做,搵個地方呢埋,坐定定喺度睇住佢,同佢惡鬥。

大家個心臟頂唔頂得到呀?


投資 香港 股市 外國 地產 樓市 壹壹 壹捌 發達 三大 要素 甚麼 第一 一零 零三 三回 阿牛
PermaLink: https://articles.zkiz.com/?id=17472

投資香港股市,外國股市,地產,樓市之(壹壹玖)發達三大要素之:買甚麼?(第一零四回) 阿牛

http://hk.myblog.yahoo.com/yomagyomag/article?mid=1718

投資港股:中國鐵鈦(五)

 

昨天講完,隻中國鐵鈦好似都好多波折,而且暫時股價都疲弱,上次年初業績又喺升嗰幾個%,點解仲要諗佢呢?

首先,我地要攪清楚自己想點。

我地喺睇緊下一次牛市,唔喺睇緊呢兩個月,所以乜嘢股權變動,邊個買邊個賣引起短期震蕩,喺唔關我地事嘅,反而俾到個機會我地平啲入到貨。

 

如果你問Green globe點解要出貨,阿牛就真喺唔知,亦都冇可能查到,因為喺冇人會披露嘅。但喺你叫我估,我會估喺正常商業決定,短期獲利,跟著換投資項目。

再講到鐵鈦公司的穩健程度,阿牛就相當滿意:

1)   公司多次表明,礦場選擇以『表礦』為 主。所謂表礦就是地面下很淺的礦脈,可以露天開採;即喺通地挖掘就可以,無須礦洞,無礦井,亦唔會有礦難。這樣比起有些礦務公司,天花龍鳳,話自己嘅安全 措施點好點好,以為真係可以杜絕礦難,中國鐵鈦優勝得多。佢地都忘記左,最好嘅安全措施,其實喺『唔好做危險嘢』。

        

2)   再進一步,公司的礦場,全部都外判俾人做開採,自己唔做,進一步減低風險。礦物運輸和部份初級提煉,亦喺外判。

3)   公司揀嘅礦場,都極接近鐵路,方便運輸。

4)   公司的發起人,王勁先生,人如其名,喺礦業界元老,無人不識,所以對公司買入新礦及業務發展,幫助極大。亦因為咁,集團先做到四川的最大鐵礦業民企,規模僅次於國營的攀枝花礦業。

5)   公司上市所得,皆用於業務發展,不是用來還債。公司負債甚輕,有十七億現金在手,可作發展新礦場及加工廠用。

6)   公司對細節東西,亦有留意,例如選礦需要大量用水,就情願在礦廠當地,和鎮政府合作,花三千萬建一個水庫,確保將來有足夠工業用水,免至乾旱的日子,影響生產。

7)   四川自大地震後,重建需要大量鋼筋,加上國家眼見從前的樓房不堪一震,把建房標准提高,引發省內鋼鐵業無限商機。

其實大家知唔知四川有幾勁呢?單喺一個重慶直轄市就有幾千萬人,五個香港咁大。人地三個月就要出一份新地圖,因為城市不斷澎漲,幾個月張圖已經out。

 

香港,借歪喇!

        


投資 香港 股市 外國 地產 樓市 壹壹 壹玖 發達 三大 要素 甚麼 第一 一零 零四 四回 阿牛
PermaLink: https://articles.zkiz.com/?id=17473

投資香港股市,外國股市,地產,樓市之(壹貳零)發達三大要素之:買甚麼?(第一零五回) 阿牛

http://hk.myblog.yahoo.com/yomagyomag/article?mid=1724

投資港股:中國鐵鈦(六)

你可能會話,就算公司冇問題,業績賺多左,快速增長嘅公司大有人在吖,點解要揀中國鐵鈦呢?

啱。

其實業績好同股價一啲關係都冇:

 

                        業績好,不等如派息多,不等如股價升

大家睇吓上星期公報嘅業績;長實公報,盈利增加4%,跟著第二、三日,股價逆市升幾個%。

       

調番轉,騰訊又喺嗰兩日公佈業績,盈利增加40%,跟著第二、三日,股價反而下跌!

 

            

點解呢?

 

因為市場感覺唔同,長實公報業績,照例搵齊傳媒,做場大騷,李嘉誠蓮子蓉咁口面談天說地,跟著又有和黃話3G就嚟有錢賺;跟著霍建寧第二日高調增持和黃,做戲做全套;大家於是眾口一詞,猛話好呀好呀,咁就買上去。其實4%增長,算把喇。

 

騰訊又唔同,早輪俾人洗倉,喺咁跌跌跌;大家都唔喺真心睇佢業績,一心沽佢。其實40%增長,好靚喇。

所以要買著啲有運行嘅股票,就要有以下嘅基本條件:

1)  行業要無懈可擊,前景要秀麗。

2)  一般股民要睇得明你嘅好處。你兜兜轉轉講得復雜,佢地唔做功課,唔明嘅;反而喺唔喺咁實在就唔太緊要,佢地明同埋肯信就得。大行話有分析員,其實都喺一樣。

3)  一定要耐唔耐見報,如果你幾個月都唔見一見報,隻股票冇人識,就識飛都冇用。隻和黃早前就喺喇,提都冇人提,咁唔掂嘅;所以呢次公報一下業績,如果遲少少冇聲冇氣,無以為繼,個升勢一樣唔掂嘅。

 

4)  公司又唔好太大,太搶眼。騰訊就喺好好嘅例子,佢個QQ,同啲遊戲真喺好成功,但喺『發育過早』,牛市一、二期已經發育,早幾個月升左一大截。咁你想牛市三期點好呀?再可以升幾多呀?其他股票都仲浮吓浮吓,佢已經升完,仲俾基金洗埋倉,將來冇人知佢跟住會點,咁點炒呀。

 

喺呢方面,鐵鈦就優勝,一來個行業前景真喺極佳。二來佢優點一目了然,喺因為 鐵礦石貴,原全唔駛証明間公司要有乜嘢過人嘅能力,如果有能力就更佳。三來佢曝光唔錯,每一兩星期就有人提吓;仲有,唔駛一定講到佢隻股票,只要一講到鐵 礦,立即關晒佢事,因為香港得一隻鐵礦股。而家佢未hit就仲好,阿牛可以平平地買到,到牛三時,市場四圍搵藉口炒作,我唔擔心佢冇份。

 

原來鐵礦物喺今年中國no. 1話題之commodity, 國內已經廣泛同頻密咁討論,報張,雜誌不停見報,完全唔喺乜嘢秘密。香港嘅報刊就冇乜點講,我都未見過有任何有份量嘅討論,其實我地報刊嘅水準我真喺唔敢 恭維,連咁嘅話題都走漏得。但喺到左明年,鐵礦石價再升,全國嘩然,我地就遲早都要講到,到時大家就好『聰明』咁諗到,鐵礦股喺寶嚟。

大家有冇認真諗過點解坑渠蓋會有人偷嘅呢?

        


投資 香港 股市 外國 地產 樓市 壹貳 貳零 發達 三大 要素 甚麼 第一 一零 零五 五回 阿牛
PermaLink: https://articles.zkiz.com/?id=17474

投資香港股市,外國股市,地產,樓市之(壹貳貳)發達三大要素之:買甚麼?(第一零柒回) 阿牛

http://hk.myblog.yahoo.com/yomagyomag/article?mid=1945

投資港股:中信泰富(二)

今日講吓中信泰富嘅技術分析。阿牛經研究後嘅結果喺:

                                                     

真嘅。就喺得個『?』。

中信泰富喺最早一批『窗口公司』,例如392北京控股,就喺北京市嘅窗口公,363上海實業就喺上海市嘅窗口公司,咁大家覺得中信泰富喺乜嘢嘅窗口公司呢?冇錯,就喺國家嘅窗口公司。

 

                                          

國家嘅窗口公司,基本上唔喺一間正常嘅公司,因為公司的業務方向,唔喺淨喺商業考慮,一定有其他考慮,例如:

 

1) 國家長遠利益的考慮

 

2) 外交的考慮

 

3) 國防的考慮

 

4) 種種形式的必需商業活動,而又不適宜由中央政府直接運作的考慮

也就是說,有很多東西我們不知道的,亦不適宜知的。在這裡阿牛都要表明自己並不知道任何機密,亦從來沒有嘗試查探任何機密;阿牛只想說,我選擇中信泰富,純粹是信任:

        

阿牛相信,連中信泰富的高級職員亦不會知道公司很多的東西;每個人都只知道自己需要知的東西,各部門之間亦一定有相當的自主性,只有極少數的幾個人知道全部的東西。

我們作為投資者又應如何定位呢?

明天說壓力測試。

                                           


投資 香港 股市 外國 地產 樓市 壹貳 貳貳 發達 三大 要素 甚麼 第一 一零 零柒 柒回 阿牛
PermaLink: https://articles.zkiz.com/?id=17608

投資香港股市,外國股市,地產,樓市之(壹貳參)發達三大要素之:買甚麼?(第一零八回) 阿牛

http://hk.myblog.yahoo.com/yomagyomag/article?mid=1951

投資港股:中信泰富(三)

 

最近,中國銀監會建議商業銀行進行房價下跌60%的重度壓力測試,業界叫晒救命。其實跌六成就真喺好尷尬,應該都冇乜金融機構可以企得住;咁耐以來阿牛見過兩次真實的60%測試,一次由董建華個X人,幫我地香港人做『人體測試』,攪到日日有人燒炭,幾年間死千幾人,數以萬人家破人亡,有人肚餓到偷麵包,搶飯盒。

第二次就喺2008年10月,中信泰富炒燶澳幣。當時熊市剛過,中信泰富成間公司先淨番唔夠三百億,跟住話因為買澳元  Accumulator 蝕左一百五十億;單嘢出街,第二日中信泰富跌55%,剩番$6.5。尷尬嘅喺之前不久,公司先公報左話一切正常,跟住蝕咁多錢。更尷尬啲喺,揸旗嘅『疑似』喺榮家小姐榮明方,於是大家憎人富貴厭人貧,想人地再尷尬啲。

              

但喺:

 

不可不知中信泰富在澳洲有鐵礦,當時正在開發而未投產之際,需要用唔少澳元;買定啲澳元,lock死個價,方便控制成本喺好合理嘅,而且當時澳元一升再升,榮小姐看漲喺好合理嘅,而買 Accumulator 亦喺正常手段。簡單嚟講,等如lock死個兌換價同數量,再慢慢供款而已;點知個澳元會急跌喎!

側聞榮小姐做大生意好有膽色,私下更喜歡『跑夜馬』;唔喺我地啲小男人星期三去快活谷嗰隻,喺騎住隻馬,夜晚通山跑喎;兄弟,你有冇咁膽色呀?阿牛就冇喇。

好喇:

戲肉就喺,北京中信母公司兩星期內已經落實俾一百一十五億備用信貸香港中信泰富。一場風波,迅速落幕。証監側側膊唔多覺,中信泰富繼續做指數成份股。

買中信泰富,好過你攞住張報紙,左度右度啲壞鬼鱔稿,搵啲所謂實力股。

有乜嘢勁得過蝕得起吖,中信先喺 power 嘛!

                    

                        * * * * * * * * * * * * * * * * * * *

阿牛又想起啲肥皂劇:

老豆:咁夜呀,仔。

阿仔:嗯……

 

老豆:咪行住……食左飯未?

阿仔:嗯……

老豆:呢輪你好忙咩,成日唔見人。

阿仔:嗯……

 

老豆:叫廚房開飯你食左先喇……我晏晝入左錢落你戶口填晒條數喇……你下次小心啲呀。

阿仔:嗯……

 

老豆:你阿媽話成個禮拜冇見過你,呢兩日又話唔舒服,你食完飯上去同阿媽請安喇……我乜都冇同你老母講過。

去喇。


投資 香港 股市 外國 地產 樓市 壹貳 貳參 發達 三大 要素 甚麼 第一 一零 零八 八回 阿牛
PermaLink: https://articles.zkiz.com/?id=17609

投資香港股市,外國股市,地產,樓市之(壹貳肆)發達三大要素之:買甚麼?(第一零九回) 阿牛

http://hk.myblog.yahoo.com/yomagyomag/article?mid=1954

投資港股:中信泰富(四)

今日要講嘅兩個問題,阿牛嘅答案都喺:no

首先,睇完尋日個阿牛劇場,大家有冇覺得個仔,喺咪敗家仔嚟㗎?

阿牛答案喺:no

唔一定,老實講,邊個做生意未失過手吖。個老豆咁 cool ,佢以前唔喺一樣試過衰過,套劇冇講啫。你可能會話,個老豆可能衰過,不過衰少少,無個仔咁大鑊,會唔會呢?

會,因為當時佢老豆副身家冇咁大,同埋未必有老豆個老豆照吖嘛;其實 每個生意人做決定之前都喺諗住賺嘅,唔喺做嚟把鬼咩。而佢落疊之前,一定都會計過輸唔輸得起,包括有冇老豆幫佢埋單都喺考慮因素之一,全部佢都會計算在 內。所以阿仔衰一鑊,而佢老豆找得到數嘅,絕對合情合理,根本輸得起。

仲有,你估佢老豆唔知咩,甚至乎心知肚明,未必關個仔事,或者佢老人家親自出手,戰果可能都喺一樣。

從前90年代有間上市公司叫兆峰陶瓷,由一個後生仔叫李兆峰白手興家攪嘅,高峰時買埋南灣嘅別墅,住喺李嘉誠隔離,連李嘉誠都話佢叻仔;後來 2001 年公司擴張過度,一下週傳唔嚟,執埋笠。

                             

李嘉誠點?唔通幫佢呀,都叫大家弄肋而為,冇咁大個頭就咪帶咁大頂帽喇。白手興家一個唔小心,就喺咁嘅下場。你買佢股票,咪陪葬囉。

衰左,最緊要有人找數,咁就喺叻。冇人找數,就唔叻。未衰過唔算叻,你『未』啫,唔表示你唔會。

跌底爬番起嚟?呃細路就得。

                

冇左份八千蚊嘅工,梗爬得番起身喇,搵過份九千嘅都得呀。冇左八十億,你赤手空拳搵番九十億我睇吖!

跌在那裡,就趴在那裡。

不過,李兆峰先生好嘢,而家轉戰上海,雖然冇以前咁大,一樣企得住。但喺個樣就蒼桑好多囉。

           

阿牛誠心祝福佢。李生,加油!

                      * * * * * * * * * * * * * * * * * * *

第二個問題,中信泰富公報業績,純利急增一倍,阿牛喺咪好開心呢?

阿牛答案都喺:no

點解?

因為時候都未到,公報業績都唔會炒上嘅,最近放榜潮:

建行盈喜 ,股價跌

袞煤盈喜,股價又跌

鐵鈦盈喜,股價都喺跌

因為都未到牛三,個市要到牛三,個市場氣氛好,盈喜先有藉口炒上。

但喺,亦有異數嘅,早輪隻999 I.T. ltd 公報業績,當然喺好好,結果由一蚊炒上三蚊,仲唔跌番落嚟。所以好難講,天時地利人和一夾埋,炒高左就買唔番,陣腳大亂好尷尬。所以點解隻鐵鈦,阿牛咬實 牙根都要而家入貨,明知佢多數要等幾年,都未必有嘢睇。就喺怕佢『萬一』,忽然受市場重視,升倍零兩倍,唔湯唔水,咁就大劑,你話仲買唔買落去好吖。

咁買 I.T. 咪得囉!

你知唔知I.T.今年賺多左幾多呀?比舊年多五倍咁多。你話炒高三倍喺咪合理呢。咁你又知唔知南航今年賺多左幾多呀?喺八十倍呀!結果咪升左一毫子咁大把。

你話我聽下一個喺邊隻股票,盈喜之後會升幾倍嘅。


投資 香港 股市 外國 地產 樓市 壹貳 貳肆 發達 三大 要素 甚麼 第一 一零 零九 九回 阿牛
PermaLink: https://articles.zkiz.com/?id=17610

投資香港股市,外國股市,地產,樓市之(壹貳伍)發達三大要素之:買甚麼?(第一一零回) 阿牛

http://hk.myblog.yahoo.com/yomagyomag/article?mid=1973

投資港股:中信泰富(五)

 

                        

                                           榮毅仁 (1916-2005)

故事由1865年說起。那年是同治四年歲次乙丑,是殿試之年,也就是三年一度考狀元的日子。當年的一甲第一名的狀元是滿洲鑲黃旗人崇綺,不過今天說的不是崇綺的故事,而是一個『交白卷』的人,無錫人薜福成。

薜福成當日並沒有作答,而是用答案紙寫了一封長信給曾國藩;當大家還在為八股文,破題,承題,起股,束股之際,薜福成已經在表達他的世界觀。他和很多無錫人一樣,已經具備了當時人沒有的『世界視野』。

其中的要點是無錫人早已擺脫了重儒輕商的傳統觀念,他們有自己一套『義利兼顧』的營商理念。無錫又因為靠近上海,兼收太湖水道運輸和滬寧鐵路之便,在清末就和常州和南通,成為中國新興的工業重鎮,以巢絲,紡紗和麵粉加工為三大經濟支柱。

        

榮毅仁先生的伯父和父親就是做茂新麵粉公司賺了第一桶金,跟著就兼做振新紗廠,一直到解放前,合共辦了幾十間工廠和錢庄,成為中國最大的民族資本家族。到了1949年,榮毅仁先生做了重要的決定,就是堅持留在大陸,不隨國民黨撤退台灣。

解放後中央已經留意到這批留國商人,翌年1950年,榮毅仁三十四 歲,獲邀和國家領導人吃飯,認識了周恩來總理,周總理笑說榮毅仁是『少壯派』,也就是『少壯派』三個字的由來。1956年察量當時的形勢,榮毅仁把榮家名 下的商業帝國,包括紡織廠,麵粉廠和銀行,無償交給了國家。上海市長陳毅尊他為紅色資本家,又助他選上海副市長,紡織工業部副部長。

文革開始後,榮家得周恩來總理一力保全,安然渡過。文革後的十一屆三中全會後,在鄧小平的支援下,1979年10月成立了一個投資機構—中國國際信托投資公司,CITIC

 

(China International Trust and Investment Company),由榮毅仁任總裁。請留意,公司是直屬國務院的, 後來就易名為中國中信集團。公司第一年就接待了四十多個國家來洽談業務的四千多人,和國內企業的三千多人,連前美國的國務卿基辛格也受聘為CITIC的顧 問。CITIC以其獨一無二的國家背景,觸角伸進所有的經濟領域以及承擔起國家在國際經濟合作方面的發展。

 

80年代尾,CITIC發動了‘收購香港之戰’,1987年1月購入國泰航空12.5%股權,又收購港龍的38.3%股權,以及香港電訊公司20%股權。1990年中信購入泰富投資,翌年借殼上市,改名為中信泰富。

 

1993年,榮毅人年屆76,他把中信交給了助手魏鳴一和王軍,自己則回到政治圈,當國家副主席。

 

2005年榮毅人以89歲高齡逝世。


投資 香港 股市 外國 地產 樓市 壹貳 貳伍 發達 三大 要素 甚麼 第一 一一 一零 零回 阿牛
PermaLink: https://articles.zkiz.com/?id=17611

投資香港股市,外國股市,地產,樓市之(壹貳陸)發達三大要素之:買甚麼?(第一一一回) 阿牛

http://hk.myblog.yahoo.com/yomagyomag/article?mid=1991

投資港股:中信泰富(六)

講完榮毅仁先生,就講吓中國中信嘅歷屆董事長及總經理。

1979年10月-1993年3月 榮毅仁任董事長兼總經理

1993年3月-1995年4月 魏鳴一任董事長,王軍任總經理

1995年4月-2000年7月 王軍任董事長,秦曉任總經理

2000年7月-2006年7月 王軍任董事長,孔丹任副董事長兼總經理

2006年7月-孔丹任董事長,常振明任副董事長兼總經理

習慣上都喺董事長退休就由總經理接任。

 

                                             

王軍:湖南人,是中共元老王鬍子,王震的次子。1966年畢業於哈爾濱軍事學院,進入船廠業務及海軍,直至1979年加入中信公司。從前有一段時間,喜歡稱他為太子黨。

                                                

魏鳴一:湖北人,1947年燕京大學物理系畢業,1949年獲美國布朗大學科學院碩士,同年回國,任職國院部工程師,官至電子業部副部長。曾參加研發中國的中、遠程導彈的電子系統,是微波技術專家。

                                             

秦曉:1975年率業於山西礦業學院機械工程系,1983年同校獲經濟管理碩士,畢業後工作於煤炭及石油部,1986年加入中信,2001年借調招商局集團,一直扶搖直上,現任招商集團董事長,及招商銀行董事長。

                                        

孔丹:江西人氏,父親是中央調查部部長,母親是周恩來總理的秘書。文革時頗吃了一點苦,1981年畢業於中國社會科學院經濟系,1983年加入光大集團直至1995年升任光大信托總經理。2000年調至中信集團,06年任董事長至今。

                                              

常振明:奇人也。父親常迵是清華大學教授,文革時,賦閑在家,開始下圍棋;十五歲已成國手,和聶衛平成為圍棋代表隊友,1982年被定為圍棋七段。1983年畢業於北京第二外國語學院,主修日文;畢業後進入中信工作,1989年獲紐約保險學院MBA2004年調任建行行長;20094月接替榮智健成為香港中信泰富主席。

         

榮智健:榮毅仁兒子,1965年天津大學電子工程系畢業,文革後於1978年移居香港,任職尚未上市的香港中信及後來的中信泰富主席,直至2009年澳元事件後,和二把手范鴻齡辭職引退。榮智健十多年來都是胡潤中國百富榜的前十名常客,在香港交遊廣闊,尤其喜歡馬匹,是香港賽馬會活躍馬主。

                                     

范鴻齡:寧波人,是天一閣書樓范欽的後人,羅范椒芬胞兄。早年偷渡來港,1969年畢業於港大,自修成為律師。1990年加入中信泰富,輾轉升至總經理,2007年董事酬金高達5600萬元。范鴻齡更身兼不能想像咁多嘅公職,有公職王之稱。甚至有傳他對2012特首一位頗有興趣角逐;但是在2009Accumulator事件中,范隨榮智健辭職後,轉趨低調。

大家睇完呢幾篇一疋布咁長嘅中信泰富介紹之後,喺咪開始『意會』到呢間公司喺乜嘢一回事喇?


投資 香港 股市 外國 地產 樓市 壹貳 貳陸 發達 三大 要素 甚麼 第一 一一 一回 阿牛
PermaLink: https://articles.zkiz.com/?id=17612

投資香港股市,外國股市,地產,樓市之(壹貳柒)發達三大要素之:買甚麼?(第一一二回) 阿牛

http://hk.myblog.yahoo.com/yomagyomag/article?mid=1996

 

投資港股:關於做功課

大家睇完早幾日啲Blog,都會覺得我地做小投資者,買中信泰富,好似都冇乜保障,只喺講個信字。 中信泰富講左六日,一個實質數據都冇講過,淨喺講吓啲古仔;聽完之後,好似乜都唔喺好知,好唔放心。喺咪應該多做功課呢?

啱。

好多媒體都叫我地小股民,買股票前要多做功課,巴菲特先生直情叫我地唔好買啲唔識嘅嘢。

但喺我地做左功課,自以為知好多,扮醒目,唔喺又喺『乜Q都唔知』。啲嘢都喺一知半解。一般㩒吓個yahoo,佢彈乜出嚟乜咪睇乜囉,睇唔明就跳過佢,睇下一段,連段嘢邊個寫嘅都唔知,寫嗰個可能仲低B過我地,兼且寫嘅時候必然『心懷目的』咁去寫;信佢一半都死呀。

       

你又知唔知阿牛喺邊個,同點解寫Blog吖?

收錢嘅書同雜誌會好些少,不過又未必寫啱我地要睇嘅嘢,大家又孤寒唔捨得買咁多書報嚟睇,香港人嘅閱讀速度又慢,我見啲人坐地鐵,攞住張免費報紙,架車行左幾個站,佢地睇嚟睇去都仲睇緊嗰頁,吸收知識根本就唔喺現代人嘅強項。

咁學巴菲特先生去明查暗訪得唔得呢?我都想呀,我研究隻鐵鈦嗰陣夠想 去四川考察番兩個月,順便搵個四川姑娘做響導囉,牛嫂肯俾先得㗎。 所以,大家如果諗清楚,就會知道,我地本身追求知識時喺有好大限制嘅。等如三十年前,啲人以為自己識嘢,問清楚啲佢,先知道佢話識嘅嘢,原來睇電視學嘅; 我地而家就識笑佢地蠢,但而家啲人以為自己識嘢,問清楚啲佢,唔喺又喺上網睇番

投資 香港 股市 外國 地產 樓市 壹貳 貳柒 發達 三大 要素 甚麼 第一 一一 一二 二回 阿牛
PermaLink: https://articles.zkiz.com/?id=17613

投資港股:250天線 阿牛

http://hk.myblog.yahoo.com/yomagyomag/article?mid=2024

 

投資港股:250天線

早上星期,港股去到21800,差唔多碰到兩萬二千點,之後又調整番5%,落番20600。如果阿牛冇估錯,呢20600已經去到調整嘅底部,下一樣會發生嘅,就喺單日轉向,跟住升升升,連升兩星期,升上去兩萬兩千四百。

        

 

呢幾日跌市,其實連250天線都穿埋,不過已經唔喺好多人提250天線呢樣嘢,因為唔講尤自可,一講就要討論喺咪又番番去熊市。上幾個月,250天線仲同50天線死亡交叉;上次都有人講吓,不過之後連升千五點,攪到啲討論過死亡交叉嘅人,全部俾人交叉,於事乎今次大家咋咋帝當睇唔到條250天線算數。

 

所謂250天線其實喺攞過去一年,嗰個平均數。因為一個禮拜開五日市,一年52個禮拜,所以一年就260日,放多十日公眾假期就喺250日。

 

咁點解唔用220日,又唔用290日,我相信啲『古人』,都喺隨手拈來,用落又好似幾好,咪由得佢喺度囉。所以我地啲後人睇呢啲線,都可以用咁嘅心情去睇,唔駛真喺斤斤計較。

尋日見到BGC financial嘅Michael Purves話而家個股市又唔喺牛,又唔喺熊,所以叫佢做『狼市』wolf market,阿牛就覺得好啱聽。一來搵多啲動物熱鬧啲,二來指出呢個世界,邊有咁簡單吖。我地而家睇戲都千奇百怪,乜角色都有喇;你估仲喺卅年前都得兩種角色:奸嘅同忠咩。

              

 

相反,喺最瞬息萬變同奸詐嘅財經領域,就居然仲喺用緊牛/熊,向好/向淡,咁原始嘅區分,仲有人咁戇居去討論而家喺牛定喺熊,過唔過時左啲呀!

呢兩隻動物喺咪應該攞去動物園,俾佢地安享晚年呢。

           

阿牛好耐以前當個契女仲喺好細嘅時候,千鎚百練咁,度左句好精景嘅名言同佢講,希望佢明白呢個世界嘅複雜性。

我話:阿女,呢個世界嘅人,喺唔可以用好人同壞人嚟簡單區分,人喺好複雜㗎。

佢碌大對眼啤住我。

其實我都知道,要小朋友明白啲咁高深嘅理論喺好難為佢嘅。

跟住佢話:你好幼稚,而且好煩呀。

        

 


投資 港股 250 天線 阿牛
PermaLink: https://articles.zkiz.com/?id=17614

投資香港股市,外國股市,地產,樓市之(壹參贰)發達三大要素之:買甚麼?(第一一七回) 阿牛

http://hk.myblog.yahoo.com/yomagyomag/article?mid=2072

投資地產:國內樓市

最近上海樓價又發癲,喺踏入『金九銀十』之前,偷步成交大增,樓價更一周上漲了5.69%。北京同廣州亦有蠢蠢欲動嘅形勢。中銀監統計部立即出嚟講嘢,副主任葉燕婓話;要嚴格執行宏觀調控政策,堅決遏制投機,在控制風險的前提下支持保障性住房建設。佢又話;房地產市場同房地產貸款對國民經濟、國計民生至關重要。

          

先旨聲明,上面呢幅喺葉生舊年嘅相。呢幾日咁熱,如果佢仲著住羊毛衫番工,肯定令人懷疑佢精神有問題。

人民日報又有文章表態,話房價仍然處於歷史高位,遠高於普通購房者嘅購買力;當前房地產調控已到關鍵時刻,必須繼續堅持調控,目前推出進一步的調控措施,條件適宜,而且銀行對樓價下跌進行的壓力測試比較樂觀,減輕政府調控時的壓力。

呢段嘢原來講左三件要事,

第一,就喺即將有進一步調控出台。

第二,就喺早輪國家叫銀行做壓力測試,原來唔喺靠嚇同埋玩嘅,喺要知道調控時落重藥得唔得;會唔會連銀行都隊冧埋。而得出嚟個答案喺,銀行頂得到嘅,可以嘅。

第三,喺國家唔喺想個樓市平穩,喺想『隊冧』個市,要佢下跌,而壓力測試已經講左,預左最惡劣時跌四成。

我地祖國而家崛起,準備要行嗰條路,喺從來都未有人行過嘅,所以毫無章法可言,千祈唔好諗話外國都冇乜乜乜,又或者人地都乜乜乜,我地國家將唔會跟隨任何一條人地走過嘅後路去走嘅,而阿牛都好佩服領導層做嘅決定。一言蔽之,so far so good。我有啲感覺,國家直情喺想將樓房產業,好似德國咁做,永久推倒,作為一種社會穩定嘅基礎。喺德國,炒賣樓宇屬犯法,要罰嘅。

 

點解國內要走咁極端嘅一條路呢?我認為,首先喺國內從未試過大規模冧樓市,唔知冧起嚟有幾杰,搏唔過。其次喺國內冇公屋俾啲冇能力嘅人住;啲窮人租唔起,買唔起樓住,就只可以瞓街,所以樓價一失控向上,貧富懸殊就會好凸顯,有機會天下大亂。

咁點解國內炒家冇呢個insight呢?照計佢地了解國情,一定多過阿牛,點解仲去炒呢?

1)因為佢地見慣國家攪運動,以為運動過後,就炒樓照舊。

2)因為地方政府都唔願意見到當地樓價跌,亦都希望捱過左個運動就一切照舊。所以可能會派啲定心丸俾炒家。

3)佢地未見過樓價大跌,對經濟同民生嘅沖擊,所以唔明點解國務院咁有決心。

阿牛又喺度諗緊,會唔會國家調控國內樓市,一劑重過一劑之後,上面樓市顯著下跌,跟住拖累香港樓市順便爆埋,成為駱駝背上的最後一根稻草呢?

       

       

       


投資 香港 股市 外國 地產 樓市 壹參 參貳 發達 三大 要素 甚麼 第一 一一 一七 七回 阿牛
PermaLink: https://articles.zkiz.com/?id=17779

投資香港股市,外國股市,地產,樓市之(壹參參)發達三大要素之:買甚麼?(第一一八回) 阿牛

http://hk.myblog.yahoo.com/yomagyomag/article?mid=2077

 

投資樓市:唔賣地,可以點?

如果政府明白阿牛尋日嗰個論點,就知道齋賣地喺唔掂嘅。等如你成家都肚餓,你去攞晒啲珍藏鮑魚,花膠俾老婆,又話啲靚嘢點計點計,扣番幾多家用,咁冇用㗎喎,你喺度做緊乜嘢呀?

要有用就要老婆盡快煮啲嘢俾大家食。鮑乜嘢魚啫!

問題就在於『盡快』兩個字。

要發展商盡快,就要學祖國;俾個限期佢起屋,如果過左期起唔到,就當屯積土地,輕則罰錢,重則收番塊地。

一招攪掂。

政府一賣左塊地,就應該立刻公報,呢塊地兩年後有幾多千個單位供應。最好連土 地可建多少單位都粗略固定,而且起好仲要攞晒出嚟賣,唔准留貨尾,唔准擠牙膏;例如平均八百呎一個單位,除到條數,假設塊地可以起千五個單位,賣地時附帶 條件,就喺規定佢起夠千五個。如果發展商鍾意起大單位,咪由得佢起囉,咁佢咪起番啲四百呎嘅細單位,戥勻條數,總之起好就要啱數。

發展商如果唔肯投地,咁仲好,等個樓市知道唔喺咁向好,自然就會冷卻少少;如此類推。

今時今日,死喇,賣左地,人地 hold 住等下一朝再高啲樓價先推出,咪又喺遠水不能救近火。

日本學者大前研一話,香港人個大問題,喺『原全冇遠見,淨喺睇到前面三呎,再遠啲嘅嘢,完全唔睇,完全唔諗。』。

靚地就買少見少,我睇你將來點。

阿牛都冇嘢好再講囉,所以今日篇Blog到此為止

明日篇Blog好長,敬請收看。

謝謝。

下面隻蟹喺留番明日用嘅。

        


投資 香港 股市 外國 地產 樓市 壹參 參參 發達 三大 要素 甚麼 第一 一一 一八 八回 阿牛
PermaLink: https://articles.zkiz.com/?id=17780

投資香港股市,外國股市,地產,樓市之(壹參肆)發達三大要素之:買甚麼?(第一一九回) 阿牛

http://hk.myblog.yahoo.com/yomagyomag/article?mid=2078

 

投資地產:仲有乜招數

喺乜?

息口。

港幣要甩鈎喇。

當年信心危機,英國人將港元掛鈎美元,至為明智。當時人民幣不成氣候,不能掛。英鎊瓜田李下,不能掛。歐洲未有歐羅,散收收不能掛。一籃子貨幣太複雜,趕唔切安排。美元最穩定,最流通,最有公信,所以喺首選。

但針冇兩頭利,掛鈎之後,匯價同利率都要跟足人地,無自主權。1997嗰朝已經首先試過喇,亞洲就金融風暴,美國就經濟繁榮,所以最優惠利率喺十幾厘;如果唔喺掛鈎,當年港元就可以減息嚟救經濟。但當時剛回歸,有實際困難,呢樣嘢唔怪得董建華

呢兩年,美金不停跌,幾年間對人民幣已經跌左二十幾%。我地衣食住行都靠用國貨,即喺啲日常生活品貴左二、三成,對低下層市民影響尤深。啲嘢一喺加價,冇加到二、三成嘅嘢,就即喺換左低質素啲嘅次貨俾我地用,生活質素無論如何喺低晒。但喺呢個道理因為複雜少少,冇人提起,政府就當冇事,提都唔提,話知你水深火熱,橫豎啲低下層都唔知發生左乜嘢事。唔知,咪即喺冇事囉。

所以幾多錢最低工資都冇用喇,如果一甩鈎,大家啲錢就升幾成;你唔甩鈎,美金有排跌呀。如果你開間茶餐廳,一甩鈎,啲食品價格就跌幾成,毛利升番;俾多少少人工洗碗呀嬸都冇所謂。洗碗阿嬸亦覺得啲日用品平番,生活好左。

相反,而家鈎住美金,對人民幣不停跌。老闆成本貴,賺得少,加人工就一定冇可能,只好將兩個洗碗嘅炒咁一個,留番一個一腳踢。洗碗阿嬸亦冇好日子過,攞左最低工資,喺多左少少錢,番工就做到抽筋,但啲日用品就不停貴,生活艱苦。到下年最低工資又檢討,又話要加,啲食品來貨又加,佢老細自然會發覺開餐廳又辛苦,又冇錢賺,就會執埋檔嘢,炒埋洗碗阿嬸,租埋間舖俾美聯物業做地產。

當然,貨幣眨值,有利出口。但喺你話阿牛知,香港出口乜嘢?

影響旅遊業?円又夠貴喇,你去唔去日本吖?仲有,你希望個樓市爆煲吖,定喺少幾個嫌貴,唔嚟香港玩嘅遊客吖。

如果而家港幣有自主權,加番3/4厘息,我估個樓市立刻冷卻。乜都唔駛攪。香港其實比較容易,銀行放嘅款大部份同物業有關,工商貸款唔喺主流。其他地方就話驚加息,拖冧埋工商業啫,香港驚乜呀?話加息就可以加息。

咁樓市咪唔駛爆,捱耐啲,希望長玩長有囉。

香港史料披露,當年信心危機,英國人兩日就拍板將港幣掛鈎 ;而家我地政府攬住個 7.8 當正金科玉律,唔好話甩鈎,叫佢改高改低都驚到賴尿。話唔駛改嘅理由就梗喺多喇,但喺退一萬步諗吓,有冇可能香港貨幣同美金嘅比例,二十年來乜都冇變過,一模一樣唔駛調整吖?

其實當年個 7.8 喺隨便定出嚟;阿牛睇過電視專訪,始作俑者話:定做 8 又好似齊頭冇乜科學性,咪整個小數點大家覺得高檔啲囉!呢啲先叫做氣魄加幽默感。

你睇吓我地富士康,人地郭先一陣風搬晒去河南,當地政府倒履相迎,問題迎刃而解。你睇吓朱鎔基總理,上任時千頭萬緒,七萬幾個問題;佢話乜都唔怕,最多訂定棺材,同大小問題惡鬥,大不了最多喺死!可敬也。

香港,真喺一蟹不如一蟹囉。

         


投資 香港 股市 外國 地產 樓市 壹參 參肆 發達 三大 要素 甚麼 第一 一一 一九 九回 阿牛
PermaLink: https://articles.zkiz.com/?id=17781

投資港股:少年得志 阿牛

http://hk.myblog.yahoo.com/yomagyomag/article?mid=2295


 

                    

中國人有句好奇妙嘅說話,叫做:少年得志,家門不幸。

有好多人根本只聽過上截,未聽過下截;亦有好多人聽完下截唔知點解。

原來說話嘅意思好嚴重,就喺話如果一個人太細個已經成功不特止唔恭喜佢,而且仲要戥佢屋企擔心,因為對佢自己,對佢屋企直情達到災難嘅地步。

呢句嘢用喺炒股票上一樣適用。

話說去年國家攪家電下鄉,於是乎各家電股紛紛在熊市都未完結就爆升。

當中以751創維同1169海 爾最勁。創維的消售以影音器材為主,海爾就各種大小家電都有;嚴格來說,各自的地盤是有分別的。個人覺得,影音的市場比家電市場優勝,因為睇電視,是生活 質素的重要里程碑,比較用雪櫃,冷氣,要實際得多。而且農民們慳儉,對用電量大的雪櫃,冷氣,不無抗拒,對他們來說,雪櫃,冷氣無大用處,因為他們吃的是 新鮮蔬菜,不用雪櫃保鮮著吃剩的食物;冷氣也是一樣,無乜大用,反正他們戶外工作時都大汗疊細汗,也不需要多花幾元電費,開冷氣睡一個清涼的夜晚。

自去年七月開始,賣電視的創維由兩蚊升左五倍,升上十蚊。

       

海爾就由個幾升四倍,升上六蚊。

       

論業績,其實海爾反而增長比創維更勁;海爾增長了170%而創維只增長60%,不過由於創維毛利較高,有20%,比海爾的15%高四份之一,所以創維的純利升了120%而海爾只有90%。但股價方面,創維於今年四月創新高之後,就逐步下跌,到今個月最差時只剩四蚊,五個月之內,跌足六成,可算傷亡慘重。相對海爾,在四月創新高之後,上上落落於四至六蚊之間,現在也維持到六元。

以賺錢能力和業績來說、只能說各有千秋,無可能解釋到創維下調六成的原因。雖然一說就是創維生產過剩,以至庫存太多,減過吓價,但是海爾何嘗又冇咁情形吖?五十步笑百步而以。

唯一解釋到的理由就喺根本半年升四,五倍,喺唔健康嘅,搵個藉口就可以下跌嘅喇。在呢個熊尾牛初時,如果買嘅股票攪啲咁嘢,阿牛就冇本事賺佢錢喇。

今年四月,牛市先剛剛進入牛市二期,正在建倉,守倉之際,點諗到家電股已經油盡燈枯,要緊急走貨!

由高位跌六成,根本就喺由牛市三期,爆煲,急傳入熊市的行為。

在牛二攪啲咁嘢,點handle呀?

家電股少年得志,買嗰個就家們不幸喇。

       

9/15 6:00PM   剛收到有心嘅Blog友提供左條link俾阿牛,講啲企業點樣做假,各位讀者都適宜睇吓,順便多謝提供資訊嘅朋友。

投資 港股 少年 得誌 阿牛
PermaLink: https://articles.zkiz.com/?id=18076

投資港股:夕陽無限好 阿牛

http://hk.myblog.yahoo.com/yomagyomag/article?mid=2300

投資港股:夕陽無限好

我地中學時候學計代數,大家怕且都仲記得少少,就喺要求啲未知數,unknowns,出嚟。要求到unknowns就一定要俾一啲已知數值,knowns,俾我地。冇左呢啲已知數,就唔駛計,冇得計㗎喇。

炒股一樣,來來去去都喺嗰四樣unknown:

1)幾時買

2)買乜

3)最高會喺幾多

4)幾時賣

幾時買,就喺最簡單嘅一條,答案就喺最平嗰時買。但因為我地唔知幾時最低,所以只好熊市最低嗰陣買。

買乜,就喺上幾星期阿牛之之坐坐,講左成個月嗰啲嘢,邊隻好,點解好,點好法。簡稱揀股。

最高喺幾多,冇人知。呢條問題有啲人撈埋第四條來答,就喺如果唔知幾時應該 賣,就自訂一個高位,賺夠就賣。呢個辦法有兩個唔好處;第一,就喺賣左之後如果佢繼續升,就會唔開心;一次就冇所謂,兩次,三次,四次,終於就失去理性, 到價唔捨得賣,或者賣完高追。第二個危險更仆街,就喺價未到,市已經冧左。

所以呢條橋唔得,幾時出貨就靠答第四條好過。因為第四條嘅答案就喺等到牛市三期臨尾,就爆之前沽貨。咁就乾手淨腳。

少年得志股』,衰就衰呢度,就喺佢冇辦法等到牛三,同大市同步,跟大隊收工。佢自己『彈性上下班』,所以炒佢地,就要作出幾時賣貨嘅正確決定。呢個決定喺冇人capable嘅!最大嘅可能性喺買又買得貴,到頂又唔知賣,結果坐喺度睇戲,睇住佢上上落落,南柯一夢。

 

你可能會話,咁牛三末期點睇?咪一樣會睇錯唔識落車。

唔啱。

機會好微,因為啲跡像會好清晰,睇唔到喺自己唔信自己雙眼啫。正如而家個樓市一樣,唔信佢會爆就純喺『唔想信』而已,邊個唔覺得佢高吖,唔通真喺好似啲agent咁講,最多靜兩個禮拜,跟住個市又上過?

夕陽無限好,點會唔知太陽即將下山吖!

 

                                      《登樂遊原》                       李商隱

                                           向晚意不適

                                           驅車登古原

                                           夕陽無限好

                                           只是近黃昏

                          

李商隱,晚唐詩人,與杜牧合稱小李杜,相對唐初的李白,杜甫的大李杜。樂遊 原,喺唐初盛世時,首都長安郊外的一片燈影樓檯,遊樂之地。即喺長安嘅廸士尼樂園。但到唐末李商隱時,兵禍連年,樂遊園早已荒廢,已成廢園。李商隱黃昏跑 到這裡,走上小山,望番落嚟呢個廢墟,心情可想而知。佢個心十二分明白,唐朝實在已經病入膏肓,冇得救㗎喇。

股市、樓市一樣,時候一到,夕陽無限好。

      


投資 港股 夕陽 無限 阿牛
PermaLink: https://articles.zkiz.com/?id=18077

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019