講膠所手記：沽爆「保龍一族」
1 :
GS(14)@2012-02-28 23:13:31http://www.sharpdaily.hk/article/index/15307/20120228/59657
特首跑馬仔進入大直路！噚日我哋嘅姊妹報《蘋果日報》A1頭條爆料話「梁振英當選在望」，報道一出街，星島集團嘅老闆第一時間跳出嚟教誨各大傳媒兼真情剖白，跟手「豬肉成」話退選唔玩，掃帚頭就繼續垂死掙扎，如果最後小圈子選舉唔流產，好難唔買重龍豬要收皮！
正所謂政經不能脫鈎，咁由阿狼跑出會有乜嘢後果？中環友噚日議論紛紛，話敢講一句，嗰378個「保龍一族」Big Pan了！就算阿狼唔秋後算賬，但小不免都要同呢班友計一計數（人之常情啫），若果呢班友同阿狼仍然Friend唔到補唔到鑊，佢哋嘅上市旗艦應該都會風高浪急。
咁「保龍一族」到底有乜嘢成員？根據已公開嘅資料，包括四大家族（即係四大地產佬）誠哥、四叔、彤叔、郭氏「巴打」，仲有次一級嘅地產佬祥哥、和哥、大劉細劉細細劉合家，當然唔少得，鍾意用遊艇、私人飛機送朋友一程嘅柱哥喇！
到阿狼坐正嗰陣，除咗東方海外（316），睇怕上述字頭都可以沽佢一沽囉！
YY
講膠所手記：香港真係僭建之都！
1 :
GS(14)@2012-02-29 22:38:26http://www.sharpdaily.hk/article/index/15307/20120229/60298
2 :
GS(14)@2012-02-29 22:38:55真係聽他一席話，勝挖十年料！前日，星球老闆「星球有錢人」出嚟盡訴心中情，絕對係星球人語錄，句句入肉！
不過，各位行家、同僚記住，大笑之餘，快啲起步鬥快摷啲有乜嘢僭建Case，因為據星球老闆講，成個香港通街都係僭建，夠大家寫至少一年半載云云。YY唔知星球老闆講真定講笑，但睇佢「兇」有成竹咁對住全港傳媒嘅鏡頭咁「兇」大家，似乎唔係講笑囉！
其實正如YY之前講過，好多有錢人家嘅豪門大宅，留意，係「吼屎」（House）喎，都好興向下發展，冇畀人踢爆or暫時未畀人踢爆，皆因仲未同朋友反枱、未夠班做黑材料，又或者本身冇乜朋友冇招呼人返屋企玩咋！
向上發展呢？梗有啦！聽講，南區某有錢人屋苑，裏面嘅「吼屎」就僭建到好張揚，其中一間係靚仔明星嗰間，唔知係咪用咗放佢嘅巨型機械人公仔嘅呢？咁點解冇乜人知？梗係啦！因為嗰個位只會係後排嗰幾幢Apartment嘅住戶望到㗎咋！
講膠所手記：合埋眼Go Go Go！
1 :
GS(14)@2012-03-01 22:59:44http://www.sharpdaily.hk/article/index/15307/20120301/60886
人生有個「曾」正朋友的確好極！Yeah！大至租豪宅，細至借跑步機，老友都會幫到手，無得頂！其實，貪心，乃係人之常情，舉個例，六合彩中咗三個字收40蚊，你就會話點解唔中多一個字可以收320蚊呀？又或者沽咗隻股票之後佢升，你就會嫌自己贏得少，而絕大部份嘅人，係可以控制自己心底裏嘅貪婪，唔會犯法，亦唔會衰到連一部舊款爛鬼跑步機都貪嘅。
無「曾」朋友關照唔緊要，大家可以搵「真」朋友研究吓有乜嘢股票，可以令到自己收入增加（此乃正常人嘅貪心，唔犯法架！）。
睇番個市，好耐之前已經炒股唔炒市喇！除咗Buy on rumour，呢排當然炒業績啦！而且，個Market已經係近乎係盲炒（盲目咁炒也！），好似隻玖紙（2689）咁，孭200幾億債，份業績瓣瓣唔掂，但仲話有得炒。
之不過，炒股其實似打牌，叻嗰個輸嗰個，合埋眼唔理其他三家反而有十番食，呢排咁嘅氣氛，都係繼續合埋眼Go Go Go把啦！
YY
講膠所：大孖沙需要關公！
1 :
GS(14)@2012-03-02 22:39:30http://www.sharpdaily.hk/article/index/15307/20120302/61553
呢個月係一年一度業績高峯期，亦係新舊特首最多新聞嘅一個月，正所謂政商掛鈎（正確學名應該係官商勾結），各大孖沙嘅字頭夠膽開業績記者會嘅，下場都會同新地（016）郭氏兄弟一樣，將個波交畀公關阿頭。
之但係呢一水唔同以往嗰啲家事、緋聞、爭產，純八卦，呢鋪係講緊香港嘅聲譽、香港嘅前途，所以，行家們一定會咬實唔放。
但亦有個別業績會可能會好爆嘅！YY個人心水係長實（001）、和黃（013）、新世界（017）、華人置業（127），因為呢三個字頭嘅話事人一向講啲既有Guts又奔放，畀傳媒屈機咁耐（佢哋係咁諗），應會盡情還拖，所以，有幾強嘅公關都無用，講乜都唔會兜得番，照YY睇，大孖沙們最需要嘅唔係公關而係關公，因為惟有關公先可能救到佢哋一命──如果佢哋真係如佢哋所講咁正氣嘅話。
By the way，新地嘅「以心建家」口號唔知會唔會改為「要跑步機，要搵新地」呢又？
YY
講膠所手記：眾怒難犯呀，李小加！
1 :
GS(14)@2012-03-06 22:47:41http://www.sharpdaily.hk/article/index/15307/20120306/62876
一片媽叉聲之下，港交所（388）第二階段延長交易時段噚日如常啟動，之前大家絕食、遞信、上街遊行做咗咁多嘢，全部都係枉然！
又再一次證明，香港特區政府由上至下，由政治到經濟，話得事嘅嗰啲人，都係唔鍾意聽取民間嘅聲音！
半粒鐘成交僅38.5億
咁李小加講到加時呢單嘢咁大義凜然又同阿爺接軌咗，噚日結果又點呢？經紀老友話，溫總「棄八」港股係應聲跌一跌，但如果延長交易堅係李小加講到咁有用，「棄七」都未使驚喇！
市場預期咗㗎喇！反之，點解唔係多半個鐘可以將壞消息消化好啲嘅咩？
睇番噚日收市埋單嘅數字，新加嘅半粒鐘，成交只係得嗰38.5億，全日成交就得577億，創半個月新低。
咁可能有人會話，第一日啫，唔可以咁就判佢死刑嘅！但YY想講嘅係，「官迫民反、眾怒難犯」，為官（又或者係做阿頭嘅）若然連呢兩大天條都唔曉，最快收皮嘅相信會係佢哋自己。
李小加，明白嗎？
YY
講膠所手記：香港人一定要「保八」！
1 :
GS(14)@2012-03-07 22:29:03http://www.sharpdaily.hk/article/index/15307/20120307/63433
我哋寶寶總理一句「唔保八」，加埋AIG嘅鬼子佬反口唔認數，話買又唔買兼仲要賣隻1299，兩棍就扑裂個金魚缸，經紀老友話，如果唔係呢兩條友反口，大家仲可以炒作多一陣子咁話。
即係咁，阿爺過去8年係慣性咁「保八」，無話應承過大家乜嘢喎！所以，唔存在唔認數，但AIG主席Steve Miller就堅係反口嘞！明明1月嗰陣向外界放風，話隨時會增持友邦嘅，一個「屈尾十」折讓7%喪掟套現，豈止反口，直頭係有托價之嫌喇！如果我哋嘅監管機構真係如佢哋咁講咁做到嘢兼係有牙老虎，咁YY覺得唔會唔查一查個鬼佬囉！
監察大話精
之不過，真係放風做價又如何？相比起我哋嘅現任特首、候選特首，日日講大話日日唔認嘢，單單都大鑊但都無事，托價？濕碎喇！
所以，雖然呢一刻我哋做唔到啲乜，但一定要「保八」──保持八卦，監察住呢班大話精，終有一日，我哋嘅八卦，一定可以發揮作用㗎！
YY
講膠所手記：唐唐啟示錄
1 :
GS(14)@2012-03-10 12:16:40http://www.sharpdaily.hk/article/index/15307/20120309/64722
特首選戰風起雲湧，最新進展，除咗開始有社團人物出現，更大突破係唐唐噚日終有郁到香港經濟嘅言論，仲係即講即郁，突然間市場中人覺得唐唐又唔一定輸硬喎！
是咁的，噚日唐唐接受《華爾街日報》訪問，話如果佢跑出做咗特首，佢就會對調整港元兌美元嘅交易區間持開放態度（即係港元可以擴闊波幅）。不過，佢重申，港元係有必要保持同美元掛鈎嘅；佢仲話，聯繫滙率已經服務咗香港近三十年，香港已經獲得咗肯定，好多香港出口商都獲得咗利益，所以唔使考慮滙兌風險。
咪以為唐唐又豬噏喎，下晝四點九，外電彈呢單新聞出嚟，港元即刻急彈，市場中人似乎係炒港元升值，中環一帶仲話應該係有所啟示，無他嘅，唐唐堅係做過財爺，加埋金管局前莊主「白頭任」幫佢助選，關於經濟政策嘅嘢，應該唔堅唔講。咁都好啲，堂堂選特首，講啲嘢有深度，同香港前途有關嘅嘢，先至有建設性、先至似樣㗎嘛！難道要大家日日估佢有幾多個私生仔女咩！
YY
講膠所手記：每位100蚊嘅海鮮餐
1 :
GS(14)@2012-03-13 23:03:48http://www.sharpdaily.hk/article/index/15307/20120313/65950
特首跑馬仔，仲精彩過娛樂版，個個滿口謊言，個個都係大話精，o依家最搞笑嘅進展係，原來去流浮山食海鮮，每人只需要夾一舊水，呢個價錢真係平過你屋企個業主立案法團、住戶俱樂部搞嗰啲乜乜海鮮團一日遊、筍過《爽報》嘅《筍購》﹗
By the way，line up呢個飯局嘅，真夠江湖地位﹗
咁平搞局夠噱頭
公關老友們話，如果流浮山江湖海鮮飯局可以俾佢哋做搞局budget指標就發達嘞，事關個個老闆都口爽荷包
講膠所手記：真係大陸佬造市嗎？
1 :
GS(14)@2012-03-20 23:33:26http://www.sharpdaily.hk/article/index/15307/20120320/68888
多謝唐唐上星期五又賜香港人年度金句！YY最鍾意係佢嗰句小學雞式「我係主場！」，連小學一年級嘅學生都覺得好笑就知唐生堅有料到！家陣特首跑馬仔已搞笑到不能再搞笑，流選一啲都唔出奇，亂成咁，某人嘅人格係咪堅畀某人謀殺？唔知，但噚日港股先畀人桶兩嘢就肯定嘅！
明明無乜嘢好淡友拉鋸緊嘅，臨收市半個鐘港股插二百幾點，仲無情情有兩萬幾張期指彈咗出嚟，傳聞話係大陸佬喪開淡倉，因為西環嗰邊落Order話要防大鱷借特首跑馬仔一戰搵食云云。
但大陸佬真係咁叻造市嗎？未必，會唔會係港股無乜力水上，淡友乘機發難咋？有時，有啲嘢未必要諗得咁複雜囉！
YY
講膠所手記：股市唔會仆直囉！
1 :
GS(14)@2012-03-24 15:03:00http://www.sharpdaily.hk/article/index/15307/20120323/70823
星期日，特首跑馬仔開標，兩隻英邊隻跑出，還是兩隻都跑唔出，真係五五波，但呢個禮拜嘅股市已經係畀政局左右，尤其係商家佬話振英win出，佢哋會「震驚」，分分鐘引發資金流走，股市首先仆直云云，唔係無根據嘅，但應該唔使咁淆底啩？
o依YY呢個小市民嘅分析，港股係跟大陸股市衫尾嘅，咁溫總話明中國未來係靠內需，咁要谷起內需，先要谷起市民個荷包，而要谷起荷包，就先要令大家有收入贏吓股票贏吓炒樓，咁樓市調控不能鬆，唔保樓唔保八，保住個股市係咪好合理呢？仲有，無錢就無政治，股市仆直，咁乜都無得玩喎，試問，阿爺點會畀中港股市倒下來呢？
ps.昨日同大家提及嘅中銀「大炮筒」已到手，竟然出到銀行門口，出價買嗰班友只係出價五皮，仲要係港紙！YY嘅十皮橫財暫時落空，「大炮筒」已放咗嚮屋企，所以，堆田區各友好，你哋餐茶，爭住先喇！
YY
Next Page