ZKIZ Archives


人生在世不稱意 左丁山


2010-05-27  AD





 

美國加州有一位 十三歲少年登上珠穆朗瑪峯,創下最年輕攀山成功的紀錄,澳洲有一位十六歲少女個人駕駛帆船環繞世界一周,返回雪梨受到英雄式歡迎。香港有十五歲的男女學生 疑因情感問題,一同跳樓;一位十七歲中四男生在全校老師同學面前自學校天台跳下自殺。

睇呢啲新聞,着實令人煩悶、不安,為乜我哋香港啲年青 人好學唔學,唔去爬山划艇,而私自怨這怨那,好似全世界人都唔明白佢哋咁,一死了之?香港學生在課堂上究竟除咗考試之外,仲有冇學習人生及倫理,唔通又係 社會嘅錯?老師之中,邊一科嘅老師會對學生講授人生道理o架?想落,老師已要應付新學制、新課程、防學生濫藥,居然又有教育官僚話學校可以自編教材,唔使 出版商送教材。請問老師沒有三頭六臂可以做得幾多嘢?逼學校做呢啲嘢,受唔住壓力嘅老師亦會跳樓。

沙田陳太睇到呢啲新聞,喟然而嘆曰:「我 在寶血之時,國文老師區公最鍾意教書之時,講解人生道理,現在回想起嚟,區公對我哋班女孩子灌輸咗好多倫理意識及人生處世道理。有一首詩我仲識背,但唔記 得詩名,係李白作嘅:「棄我去者,昨日之日不可留,亂我心者,今日之日多煩憂,長風萬里送秋雁,對此可以酣高樓,蓬萊文章建安骨,中間小謝又清發,俱懷逸 興壯思飛,欲上青天攬明月,抽刀斷水水更流,舉杯消愁愁更愁,人生在世不稱意,明朝散髮弄扁舟。」

 

用iPhone老早下載 咗《唐詩三百首》,立即搜尋,知道呢首係李白嘅七言古詩《宣州謝眺樓餞別校書叔雲》,左丁山在中學時亦讀過。沙田陳太話:「區公教詩之後,就會同我哋講: 小朋友,人生失意之事十常八九,千祈唔好受到少少挫折就放棄一切,最多咪學吓李白,第二朝起身就去划艇散心囉。我哋根本唔明白大人點解咁多煩憂,區公話我 哋跌倒之後就要爬番起身,佢每教《論語》、唐詩、宋詞都會有一番勉勵人生嘅說話,今日嘅老師唔知會唔會咁樣教書呢?」真係唔知,今時今日,中學唔會教古文 要學生背詩吖嘛?陳太大概係Out晒嘅老餅,啲九十後,二千後會聽唔入耳,但啲新派新人又點樣教與學呢?



PermaLink: https://articles.zkiz.com/?id=15795

Next Page

ZKIZ Archives @ 2019