ZKIZ Archives


重型龍鳳鈪襯3D裙褂杏兒千萬婚禮 喊住嫁

1 : GS(14)@2015-12-29 08:43:33

【杏福滿瀉】■胡杏兒昨穿上3D立體龍鳳刺繡裙褂,戴上閃爆金飾嫁Philip,笑到四萬咁口。



演過無數角色的視后胡杏兒,昨日上演人生最重要的一台戲,與男友李乘德(Philip)拉埋天窗。新郎以勞斯萊斯、法拉利和保時捷等9部名車接新娘,氣派十足,而杏兒穿上逾20萬的3D立體龍鳳刺繡裙褂襯以全身逾40両金飾,閃爆全場。杏兒在婚禮上宣讀誓詞時,一度感動落淚,喊住出嫁。對於婚禮豪花千萬,杏兒未肯透露,只笑謂:「老公話今次結婚係大出血!」


祝李杏福!36歲胡杏兒昨與拍拖一年的金融才俊李乘德(Philip)舉行千萬婚禮,正式升呢李太。昨日婚禮中西合璧,新郎哥於早上7時半先着住中式禮服,前往杏兒大埔道郝德傑山寓所接新娘,隨行23名兄弟團陣容龐大,新郎更出動勞斯萊斯、法拉利、保時捷和寶馬等9部名車接新娘。姊妹團成員胡定欣、姚子羚和李施嬅等,昨日錫住新郎,接新娘儀式時未加以留難,讓Philip輕鬆過關及宣讀愛的宣言後,成功接新娘。



【甜蜜咀嘴】■杏兒與老公Philip應傳媒要求咀嘴。

【拖實行禮】■杏兒跟Philip十指緊扣,二人攜手邁向另一旅程。互聯網圖片



收20多隻金鈪

杏兒昨日穿上逾20萬的3D立體龍鳳刺繡裙褂及一身金飾步出女家,並應傳媒要求跟新郎甜蜜咀嘴,繼而出發往尖沙嘴Ritz Carlton酒店向男家父母斟茶。由於Philip是沙頭角禾坑村原居民,親友眾多,杏兒收金器收到手軟,昨日她離開男家往上水雙魚河鄉村會所註冊時,身上佩戴了10多對龍鳳鈪、大金豬頸鏈、金戒指、金耳環等金器,保守估計全身逾40両金。婚禮於下午1時半於會所露天草地舉行,杏兒換上自家店舖Kevolie的白色婚紗,在父親帶領下進場,一直笑容滿面的她,以英語宣讀誓詞時,終忍不住感動落淚,之後雙方簽紙及交換婚戒,在現場200親友見證下深情一吻,杏兒正式升呢李太。婚禮後,一對新人再往Ritz Carlton酒店準備晚上婚宴,筵開56席。杏兒於傍晚6時許穿婚紗襯以一身閃爆鑽飾接受傳媒訪問,問心情是否緊張時,杏兒笑說:「好開心,冇想像中咁緊張,都OK呀,都好順利。」杏兒自爆之前緊張到連續兩晚失眠,問老公愛的宣言內容,她甜絲絲說:「都係照顧你一生一世呀,愛你呀……好肉麻呀,都係唔好講喇!」杏兒昨日戴上的婚戒由Philip設計,將求婚戒指及結婚戒指合併為一。記者指她所收金器十分重型,杏兒笑謂:「長輩好錫我哋,自己都好意外,有20幾隻金鈪。」



【跪地斟茶】■一對新人恭敬地跪下向杏兒父母斟茶。《新浪娛樂》圖片

【簽紙升呢】■換上婚紗的杏兒跟白馬王子look的Philip簽紙,杏兒從此升呢李太。

■婚宴期間,場內播放杏兒和Philip的甜蜜短片。



冧老公畀滿分

杏兒表示未知會否返圍村擺酒,而問到給老公幾多分時,她冧爆說:「滿分!籌備今次婚禮我哋經歷好多,要作好多安排。」婚禮是否花費千萬?杏兒未肯透露,只說:「我哋真係未計,不過辛苦老公,要努力再搵錢,老公話今次結婚係大出血,好開心。」問到造人計劃,杏兒說:「真係要傾吓,結婚會放兩個半月假,籌備婚禮瘦咗,要養肥自己,想要少少二人世界。」採訪:卓寶花、曹家誠、朱志聰攝影:黃曉程、仇志德





來源: http://hk.apple.nextmedia.com/entertainment/art/20151229/19430069
重型 龍鳳 3D 裙褂 褂杏 杏兒 兒千 千萬 婚禮 喊住 住嫁
PermaLink: https://articles.zkiz.com/?id=294052

林心如粉紅裙褂敬酒 着Elie Saab婚紗狂咀

1 : GS(14)@2016-08-07 02:03:50

霍建華繼峇禮婚禮後,日前台北歸寧宴再次當眾捧住老婆林心如的面珠狂啜,甜蜜溫馨。當日林心如入場時,着了釘珠刺繡白色婚紗,白紗來自公主設計師Elie Saab手筆,設計焦點在肩膊及腰位,飾滿細緻花朵釘珠,俏麗又高貴。而中式禮服方面,林心如著了一紅一粉紅的摩登中式長裙,全都來自台灣品牌「夏姿·陳SHIATZY CHEN」出品。林心如敬酒時的粉紅裙,腰間加入寬腰帶及立體大蝴蝶結裝飾,喻意「永結同心、締結良緣」。





來源: http://hk.apple.nextmedia.com/entertainment/art/20160805/19723785
林心如 粉紅 裙褂 敬酒 Elie Saab 婚紗 狂咀
PermaLink: https://articles.zkiz.com/?id=304592

【港女喜訊】Hello Kitty出水晶裙褂 「貓」龍陪出嫁

1 : GS(14)@2016-09-24 23:31:32

Hello Kitty距離攻陷世界又邁進一大步。繼中菜廳、麻辣鍋、化妝品、手袋之後,最新搞作係Hello Kitty水晶中式裙褂!



裙褂由Sanrio與香港的鴻運繡莊合作推出。鴻運繡莊是傳統婚俗裙褂界的龍頭老字號,有四十多年歷史,堅持自設廠房,以人手製作金銀線、造自家褂。Hello Kitty水晶中式裙褂系列將於9月24日正式面世,首批會有四個款色,傳統大紅裙褂上,以金線繡上Hello Kitty圖案,配上傳統彩花與金龍。
Kitty連裙褂都出埋,一眾Kitty迷以後由出世到出嫁都可以有Kitty陪住,Hello Kitty伴妳成長、常伴生活左右不是夢。不過,裙褂繡龍鳳,本有龍鳳「呈祥」與「情長」的寓意,如今變成披上「貓」龍出嫁,新郎哥同奶奶係咪接受到,就係另一回事嘞。資料來源:鴻運繡莊-裙褂專門店記者:李珮禎


Model親身示範Kitty裙褂,少了一份端莊,多了一份活潑cutie。

款式齊全,連頭巾都有。



來源: http://hk.apple.nextmedia.com/su ... t/20160924/19779971
港女 喜訊 Hello Kitty 出水 晶裙 裙褂 龍陪 出嫁
PermaLink: https://articles.zkiz.com/?id=309900

【準新娘注意】裙褂繡吉蒂貓怕相沖?反肚龍吊腳褲唔老黎

1 : GS(14)@2016-10-28 06:24:19

玲玲師傅話卡通人物冇靈動力,大家可以放心着卡通褂喇。



本地裙褂店老字號鴻運繡莊,喺上個月首次推出Hello Kitty裙褂系列,有Kitty陪住出嫁,真係夠晒破格!Hello Kitty就話係貓,唔屬於十二生肖,但如果遲啲喺裙褂繡上布甸狗、Melody等,又狗又有兔,怕唔怕同新娘子八字相沖呀?動新聞請來堪輿學家麥玲玲,仲有資深裙褂師傅黃國興同我哋破解裙褂禁忌同迷思。



因為阿囡嘅一句話,黃師傅決心要設計Hello Kitty褂,認真喺廿四孝爸爸!

Vi首次擔任裙褂設計師,話之前冇諗過原來將Kitty放上褂喺咁有難度o架。

Hello Kitty裙褂系列一套四款,呢款行和風路線,別樹一格。

對於將吉蒂貓繡上裙褂,玲玲師傅叫大家唔使擔心,「係玄學上嚟講,卡通人物始終冇靈動力,唔需要介意,好似犯太歲嘅話,戴卡通公仔飾物都幫唔到,飾物要真係顯示到動物形象先有殺傷力!」但師傅話唔少人容易忽略穿着裙褂嘅禁忌,例如訂造裙褂千祈唔好造袋,因為有袋就代表袋走娘家或者夫家嘅錢。試褂唔會全套一齊試,多數會上下分開試;仲有新娘着裙褂前,記得要以紅色睡衣打底。講到裙褂,唔少人會聯想到褂等於昔日產物,兼且講究傳統,偏偏鴻運繡莊黃師傅鍾意打破規限,設計具時代感嘅裙褂。點解師傅會萌生設計Hello Kitty裙褂嘅念頭呢?原來係因為一個人--黃師傅嘅囡囡!十幾年前,囡囡同師傅講,「我好鍾意Hello Kitty,你又話識造褂,咁我第日嫁會唔會有套好特別嘅褂呀?」就係咁,呢位爸爸將阿囡嘅說話放喺心上,去年付諸實行,同Sanrio公司接洽。對方對Hello Kitty裙褂構思非常受落,一拍即合,點知做落先知道原來一啲都唔容易!



舊版本嘅Kitty只用銀線繡上,後來設計師改用金線,再喺蝴蝶結加上日本布料同水晶,更Kitty更突出。

金銀線褂再加上水晶Kitty,好閃呀!

側襟設計令Kitty喺褂上出現嘅位置更有彈性。

Hello Kitty裙褂系列設計師Vi解釋,單係構思Kitty擺喺裙褂邊度已經有難度:「傳統裙褂喺中間開(對襟設計),如果將一對Kitty放係褂上方,就變咗副眼鏡;放下面又會變咗兩個袋。」最後佢哋就諗到側襟設計,令Kitty唔使畀拉鏈割開。黃師傅仲話,繡Kitty嘅針法同繡傳統圖案嘅方法好唔同,國內刺繡師傅都花咗好多時間,重新研究點樣繡一個合乎官方嚴格標準嘅靚靚Kitty。由設計、配色到研究刺繡方法,團隊足足準備咗九個月,推出一套四款嘅Hello Kitty裙褂系列。啲褂靚到連未定婚期嘅曾小姐,都要豪洗近四萬蚊,買定等嫁!曾小姐話最鍾意系列裏面和風味最濃嘅裙褂,裙腳有Bling Bling水晶之餘,上身褂邊仲有蕾絲點綴,唔會老土。問到佢覺得價錢如何,佢就話:「第一吓見到個價錢都冇諗住買,不過佢(未婚夫)話見我鍾意,咁就買啦。」好彩未來老公李先生話唔肉痛,「我覺得自己地位比Kitty高少少嘅,鍾意嘅嘢好難講,我覺得OK。」



曾小姐自6歲起就係Kitty迷,直到o依家結婚都有Hello Kitty陪住出嫁,好彩未來老公李先生冇呷醋!

坊間盛傳裙褂水波腳代表有波折,師傅話其實應該解作圓滿先啱。

裙褂又叫龍鳳褂,龍鳳要一雙一對出現,龍亦唔可以細過鳳。

擺隻貓貓上裙褂話唔介意,但係有啲習俗,各位準新郎新娘都要注意!黃師傅提醒,新娘着裙褂時,裙邊一定要到腳背。而裙褂、馬褂上嘅龍唔可以反天,既唔美觀又唔合乎傳統;褂上如果有龍鳳,就要一雙一對,龍亦唔應該細過鳳。坊間有唔少關於裙褂嘅傳言,但師傅澄清有啲講法並唔正確,例如裙褂衫腳要平,代表婚姻路平坦,水波腳就有波折,師傅話其實荷花邊解圓滿,波浪係指褂上嘅拉鏈位,「拉鏈位千祈唔可以手工差,如果彎彎曲曲,意頭就唔太好。」又有人話褂只可以出嫁嗰日着一次,到晚上唔好再着第二次,師傅指以前裙褂係飲衫,擺酒、斟茶可以着,甚至新年着都冇問題,你鍾意就得。其實着裙褂出嫁係喜慶之事,跟足傳統都係想攞個好意頭,無需過分介意,最緊要大家開心!



裙邊要到腳背先合乎標準。

師傅提醒準新娘,試褂時記得留意拉鏈位要順滑平坦。

採訪:何宛珊(表妹)攝影:馮峰、Neo後期:Roy編審:Kaman、仙




來源: http://hk.apple.nextmedia.com/entertainment/art/20161028/19814150
新娘 註意 裙褂 褂繡 吉蒂 貓怕 怕相 相沖 反肚 肚龍 吊腳 褲唔 唔老 老黎
PermaLink: https://articles.zkiz.com/?id=313841

【全靠楊千嬅】潮着褂王人人跟風 無香港無裙褂

1 : GS(14)@2016-10-28 06:24:19

原來千嬅係裙褂業嘅救星,2009年佢身穿褂王同丁子高影結婚相,令好多人重新留意裙褂。(資料圖片)



今年娛圈喜事重重,藝人鍾嘉欣、楊怡、林心如、陳妍希等紛紛出嫁,有冇發現佢哋除咗着靚靚婚紗,都有跟返中國傳統着褂或者繡和服呢?原來喺90年代,個個對婚紗趨之若鶩,十個都無一個着褂,搞到裙褂業差啲沒落!全靠楊千嬅喺2009年結婚嗰陣,着褂王影婚紗相,先救返裙褂業!



黃師傅第一份工作就係造褂,直到o依家仲非常有熱情。(受訪者提供照片)

不經不覺,師傅造褂已有45年,喺佢眼中,裙褂絕對係藝術品。(受訪者提供照片)

「嘩!原來褂咁靚o架喎!」鴻運繡莊老闆黃國興師傅話,楊千嬅著褂王就畀外界有呢種感覺。除咗千嬅本身個人靚,褂王亦靚在手工。黃師傅話褂王係要人手每針每線咁繡,至少整一年半,因為褂上嘅金銀線冇穿過塊布,而係靠唔同顏色嘅繡花線定住,叫盤金手藝!造裙褂造咗45年,接近半世紀,原來呢份係黃師傅一生中暫時做過嘅唯一工作。喺佢眼中,無論工藝或者設計上,每件褂都係一件藝術品。佢話褂上每針、每線、每幅圖都充滿無限祝福,「好似牡丹代表牡丹富貴,龍鳳就係龍鳳呈祥,五隻蝠鼠即係五福臨門,其實每位新娘着嘅褂一啲都唔簡單!」以前,裙褂仲有傳承嘅意義,媽媽會將自己嘅裙褂好好保存,送畀個女,代表將祝福傳落去。



以前媽媽會親手為女兒繡裙褂,送上溫暖心意。(受訪者提供照片)

黃師傅緊貼潮流,千禧年代已首創水晶褂。

師傅亦係將金魚元素加入裙褂嘅第一人,每套褂有十尾金魚,喻意十全十美。

黃師傅希望呢份情唔好消失,唔好因為傳統同老套而令裙褂沒落,又參考婚紗可以不斷有新款,覺得裙褂都唔可以一成不變,所以力求創新。除咗諗到Hello Kitty褂,黃師傅早喺09年就設計水晶褂,攞埋專利,仲新增咗金魚呢個元素。佢話最初好簡單咁諗咗四個字「十全十美」,所以就繡十尾金魚喺褂,祝新人十全十美!從開頭對裙褂冇咩興趣,到後來愈做愈起勁,黃師傅對褂充滿熱情,仲申請將裙褂納入非物質文化遺產。佢話香港人喺保存裙褂方面,具有重大意義,如果冇香港,裙褂就會失傳。故事要講到60年代文化大革命嗰陣,黃師傅話:「當時裙褂因為繡咗條龍而畀內地禁制,所以其實上海、北京等地,之前係未接觸過裙褂係咩嚟!」佢話慶幸香港係一個特區,能夠一路保存裙褂文化,「我要話畀人聽,裙褂真真正正係香港嘅褂!」



裙褂上的大小圖案各有特別意思,代表着對新娘的祝福。(受訪者提供照片)

如果冇香港呢個地方,裙褂今日未必會出現喺我哋眼前。(資料圖片)

採訪:何宛珊(表妹)攝影:馮峰、Neo後期:Roy編審:Kaman、仙




來源: http://hk.apple.nextmedia.com/entertainment/art/20161028/19814218
全靠 靠楊 楊千 千嬅 潮著 著褂 褂王 人人 跟風 香港 無裙 裙褂
PermaLink: https://articles.zkiz.com/?id=313842

香香今穿裙褂出嫁

1 : GS(14)@2016-12-18 11:04:28

「香香公主」岑麗香今日出嫁喇!不少香港傳媒專登飛到加拿大,直擊香香的婚禮,記者昨日到過香香與強強(Joshua)舉行婚禮的Fairmont Hotel,但暫時未見到有任何佈置,據悉香香都會跟中國傳統儀式,穿上裙褂向長輩斟茶,之後再會換上婚紗會見傳媒。昨日有周刊指香香一向好鍾意聖誕節,所以希望與一班親朋友好,一齊見證同慶祝。而今次婚宴將會筵開40席,花費過百萬舉行童話式婚禮。而香香前日現身時戴上的閃爆婚戒,原來是由老公強強親自設計,代表團團圓圓,她甜笑稱老公做甚麼都開心。採訪:黃曉程、羅德光




來源: http://hk.apple.nextmedia.com/entertainment/art/20161218/19868788
香香 今穿 穿裙 裙褂 出嫁
PermaLink: https://articles.zkiz.com/?id=319494

陳嘉寶見家長睇裙褂

1 : GS(14)@2017-02-08 22:31:37

■陳嘉寶與男友家人食飯,席上睇裙褂相(小圖)。



陳嘉寶與富二代男友黃頌祈(Epaphras)拍拖兩年多,最近傳出好事近,前晚陳嘉寶和男友現身中環歌賦街一間西餐廳,原來是見家長,陳嘉寶與男方父母傾得投契,氣氛融洽。點完菜之後,陳嘉寶爭取時間和男友去對面的傢俬店睇家品,兩人睇得好投入,對好多家品都好有興趣,逛了半小時才返回餐廳。



■陳嘉寶被問是否好事近,否認時表現尷尬。

一頓飯的兩個多小時,Epaphras的手沒離開過女友的膊頭,認真黐纏,其間見陳嘉寶拿出手機給男方父母看照片,相中疑似是中式裙褂。她離開餐廳時被問到是否見家長談婚事細節,她一臉尷尬說:「唔係,同男友屋企人食個便飯箒!」採訪、攝影:徐錦池、畢紹基




來源: http://hk.apple.nextmedia.com/entertainment/art/20170208/19920882
嘉寶 家長 睇裙 裙褂
PermaLink: https://articles.zkiz.com/?id=326004

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019