ZKIZ Archives


「舉腳」回應李小加 宗菁華


2013-05-09  NM  
 

 

港交所行政總裁李小加,一番雄心壯志,誓要改革港交所,繼早排延長交易時段,推出期貨夜市,上星期四再推四招改革期權市場。但夜期交投淡靜,推出一個月,平均成交量只有日間的百分之三,成績麻麻。行內華資經紀對小加搞改革,扼殺生存空間,早已不滿。近排擺和頭酒,小加反而同議員張華峰吵大鑊,啲火「發發聲」,要靠主席周松崗幫口撲火。

不過,啲火已燒埋入港交所內部。小宗聽聞,李小加為幹呢一番事業,將以前喺投行摩根大通嘅工作模式,搬埋入港交所,起勢咁捽數,搞到一班高層不堪壓力,齊齊跳船。小宗回顧番呢一年辭任名單,唔經唔覺,竟然水蛇春咁長,離職嘅極高層不下十個人,當中包括集團財務總監、行政管理總監、上市科、風險管理科以及人力資源部等主管。其中前財務總監馬超,年薪過四百萬,但做咗半年一樣走。港交所去年盈利倒退兩成至四十一億,表現仲差過○八年金融海嘯。揼咗百六億去收購倫敦交易所,支出大咗,但收入全線下降,只有投資收益淨額上升。年報解釋,係因為銀行存款利率上調喎。改革未見成績,難怪小加咁強硬,不過小宗奉勸一句,有時軟攻的效果更妙。

壹週圖片

左邊係基隆及桃園,右邊係高雄,中間仲有新竹?原來呢度唔係台灣,係東莞一個科技園。話說幾年前,唔少台灣佬去咗投資,開發呢個科學園,故以台灣地方命名,此乃政治正確乎?(關永浩攝)

Give me a break中環夜消磨

港交所推出期貨夜市,很多中環人十一點才收工,自然去食吓消夜。其實除了翠華,午夜的中環,美食多的是。就如位於機利文新街的新源興燒臘茶餐廳,廿四小時營業,負責人黃太話,每晚十點後最多人,不少夜期交易員放工後都鍾意去啤吓,撚手小菜有椒鹽魷魚同小炒皇,兩道菜都夠香口,送酒一流,而且大大碟都是五、六十元。夜期後的晚市外賣都明顯多了,但無奈最低工資下,時薪四十元都請不到人,唯有抬高價,買滿一百蚊先送,「依家阿伯應徵都照請呀!寧願佢屹下屹下行慢啲送囉!」老闆說。不想吃中菜的,都有其他選擇,位於奧卑利街的Flying Pan,同樣是廿四小時營業的,成間餐廳只賣早餐,對於剛收工的夜期人應該有另一番體會,侍應話最多人叫Full English Breakfast,貪佢夠大份,但其實最出名是他們的Egg benedict,在烤過的鬆餅上加上煎香的火腿或三文魚,再加隻水煮蛋,最後淋上荷蘭酸醬。咬一口,濃濃的蛋汁流在外脆內軟的鬆餅上,嗰種滋味,小宗諗起都想再食。想高檔一點,可考慮威靈頓街的來佬餐館,星期日至四收凌晨兩點,星期五、六延長至五點,出名的菜式有來佬汁炒牛河及脆皮乳鴿,侍應話來佬汁,是廚師用乾瑤柱等材料自家製造,小宗就覺得味道似瑞士汁,每晚九點半後,更有點心推出。

金融界不老傳說

上期小宗講到富豪元配的當年今日,即刻有忠實讀者回應,指郭炳湘太太Wendy可以駐顏有術,與其弟Daniel李天澤係整容醫生不無關係。小宗唔敢講,但金融圈中貪靚者不少,當中亦不乏男士。好似詹培忠,俾同行張華峰踢爆打回春針。早前出席證券商協會晚宴,望落又真係臉容飽滿,魚尾紋都少兩條;對比兩年前舊照,老人斑仲絕跡埋。聽到小宗大讚,佢笑到四萬咁口,但一笑就膠膠地!佢承認年前開始做幹細胞療程,打針落手臂度,慢慢滴啲精華,諗起仲有少少痛。傳聞金勞詹「整容」,係因為有份投資相關生意,所以「以身試法」,做埋代言人。佢對此大賣關子:「呢啲生意唔係咁簡單!」金勞詹要做手腳保青春,睇番另外兩個出名嘅俊男——滙豐亞太區行政總裁王冬勝同瑞安房地產主席羅康瑞,十幾二十年來都無變過咁!真係得天獨厚。

金牙大狀講嘢獨愛rubbish重口味

唐唐、李少光到梁振英,不約而同,但凡有唔啱聽嘅嘢,即以rubbish窒人,好似唔講英文,就無以顯示其權勢地位咁嘅款。咁有本事就講晒成句英文吖,笨!使乜用單字啫。英文詞彙豐富,鬧人一派胡言,何須只用rubbish一字而已?美國佬常用之crap又豈不更加勁度十足?好啦,唔去到咁盡,英國佬之nonsense一樣唔弱o架。甚至乎bullshit、trash、junk、garbage都得;而借力打力,境界至高者,則莫若that's silly矣。何苦淨係用rubbish一字耶?對rubbish有偏好,一係班權貴藉此展示其英文發音純正,既識得讀捲脷音rrrrrrrrrrr,又讀得到sh sh聲,以此自高身價!再唔係班友仔就係黔驢技窮,佢哋嘅英文就得rubbish咁有限公司啦。水陸草木之花,宋周敦頤獨愛蓮,愛佢「出淤泥而不染,濯清漣而不妖,中通外直,不蔓不枝,香遠益清,亭亭靜植,可遠觀而不可褻玩焉」。香港班權貴咁多英文字唔用而獨愛rubbish,莫非好似時下嘅講法,班大帝夠晒重口味!


舉腳 回應 李小 小加 菁華
PermaLink: https://articles.zkiz.com/?id=55387

火雞姐 八婆PPAP舉腳玩

1 : GS(14)@2016-09-28 05:04:31

■火雞姐向來唔怕醜化自己,今次更反晒眼拍片。互聯網圖片



由日本搞笑藝人古坂大魔王扮成「PICO太郎」創作、日本洗腦歌《Pen-Pineapple-Apple-Pen》(PPAP)最近熱爆網絡,雖然全首歌歌詞唱來唱去只有pen、pineapple、apple三個英文單字,但卻深受日本年輕人歡迎,不少網友都模仿PICO太郎自拍短片。



■PICO太郎最近紅遍網絡,熱潮更吹到亞洲區。互聯網圖片

■火雞姐投入到高舉雙腳對着鏡頭。互聯網圖片

■蘇麗珊都拍片唱洗腦歌《Pen-Pineapple-Apple-Pen》。互聯網圖片

■泰國網絡「女神」Happy Polla拍片唱洗腦歌,超過300萬人次觀看。互聯網圖片

蘇麗珊響應

有得玩,最近成為網絡紅人的「火雞姐」丁可欣當然不放過機會,她拍片時除再反眼及擺出八婆樣,更提起雙腳響應PPAP熱,而吳若希及Super Girls的Heidi與Kabee都孖住拍片,蘇麗珊、台灣魏如萱及4ever等等都拍短片上載Instagram娛人娛己。除了火雞姐以八婆樣落力演出外,泰國網絡「女神」Happy Polla(快樂寶拉)的演繹亦相當重口味,她穿上菠蘿連身裙扮成人形菠蘿,再將蘋果藏於胸前,配合PPAP節奏翩翩起舞及誇張肉緊表情,搞笑程度爆燈,上載短片短短一小時已超過29萬人次瀏覽。而PPAP熱潮越吹越熾熱,在YouTube瀏覽人次已有約500萬。撰文:小米




來源: http://hk.apple.nextmedia.com/entertainment/art/20160928/19783714
火雞 八婆 PPAP 舉腳 腳玩
PermaLink: https://articles.zkiz.com/?id=310440

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019