|
||||||
|
講嘢叻嘅人，通常都好嘴刁。好似恒隆地產（101）主席陳啟宗咁，渣打銀行大廈恒隆總壇29樓會客室，就係佢嘅私人飯堂，隔籬就係佢嘅「御廚房」，由喺鳳城酒家學師、後嚟去英國深造嘅廚神盧偉權師傅坐鎮。 鳳城酒家應該算係香港至出色嘅順德菜酒樓，金錢雞、野雞卷、大良炒鮮奶呢啲考功夫嘅刁鑽菜式，盧師傅可以話樣樣耍家。 至於盧師傅本人，喺鳳城學完師後走去英國深造，跟住去咗台灣餐館做嘢，雖然俾Ronnie私有化，但後嚟又去咗英國茲徹斯特（Chichester）修讀酒店同西式餐飲營運，返嚟香港之後都係離唔開Ronnie。 前兩個星期，恒隆請一班股評人去「御廚房」食飯，盧師傅仲特登炮製咗個八寶冬瓜盅幫佢哋解暑祛濕。坐上客之一嘅黃敏碩話，唔係好記得有邊度菜特別好味，只可以講，係一餐極高水準嘅中餐……唔知華華幾時有機會上去見識見識呢？ |
||||||