📖 ZKIZ Archives

營運人生（９）陸羽仁

營運人生（１０） 陸羽仁

雖然「高盛欺詐案」 仍然陰霾密佈，歐洲風起雲湧，不過，美國3月份領先經濟指標指數升幅超預期且創出歷史新高，以及花旗集團、杜邦及 麥當勞等企業業績亮麗的利好消息頂住，美股昨日初段大抵上已穩定，杜指整個上午在上日收市位置爭持。午後有傳美國證監會內部對是否起訴高盛，出現分歧意 見，消息刺激投資者撈底，高盛及金融股午後見底回升，杜指臨近收市1小時發力，以全日最高位收市，上漲73點至11092點；標普500指數回升5點，收 報1198點。

港股美國預托證券跟隨大市反彈，ADR港比指數收 報21562點，比香港收高157點或0.7%。匯控收82.76元，比香港收市高1.1%，中移動收報77.99元，比香港收市高0.4%。

有媒體報道，在決定 是否對高盛採取法律行動的表決過程中，美國證監會(SEC)的委員因黨派不同而分裂為兩個陣營：兩個民主黨委員投 了贊成票，但另外兩個共和黨委員則反對指控高盛欺詐，最後由SEC主席Mary Schapiro投下贊成一票。分析員認為證監會對郁高盛態度唔係咁一致，預測事件有機會可通過和解方式解決。

消息出街後，高盛股 票收市前1小時見底回升，由下跌3.5%倒升1.3%收市。金融股亦跟隨造好，成為推動大市向上的主要動力。杜瓊 斯金融服務指數漲0.8%，跑贏大市。

「高盛欺詐案」喺美國 本土似有略為降溫跡象，但在歐洲就越搞越大。懷疑係高盛間接「受害人」的德國和英國政府表示，考慮對高盛展開調查並採取更多行動。咁又係，你美國自己都郁 啦，無理由德國和英國唔郁啫。

據SEC的訴狀稱，英國蘇格蘭皇家銀行在2008 年8月曾向高盛支付8.4億美元，以解除旗下收購的荷蘭銀行手中持有的相關債務抵押證券（CDO）頭寸。英國政府係RBS的大股東，持有84%的股權；德 國產業投資銀行（IKB），亦係有關的CDO的三家投資者之一，虧損了約1.5億美元並瀕臨破產，德國政府向該行提供了上百億歐元援助。

英國首相白高敦話， 他對「這一道德淪喪感到震驚。這可能是我們所見過的最惡劣的案件之一。」並稱在高盛一案中，英國將與美國證監會合作。德國則表示，將考慮對高盛採取法律行 動。

　        不過，有專家指出，但凡碰到類似高盛這種大機構的欺詐事件，一 般都會和解收場，被指控人賠錢了事，而不是打官司打到尾。首先係並非很多人認同SEC的舉措，「因為牽涉到的問題不是那麼具體可辨」，而且大家都擔心後續 牽連太廣。另外，SEC內部對是否起訴高盛出現分歧，而遲遲沒有動作，很容易出現道德風險。瑞士信貸經濟學家陶冬認為，高盛事件已犯眾怒，為當局大幅收緊 監管提供了口實，銀行的盈利空間必然會受到影響。但在同時，高盛是美國核心競爭力所在，人脈遍佈政壇及商界各個角落。高盛不會像豐田那樣被美國政府追打， 最終可能「炒人罰款了事」。陶冬認為，高盛事件將會使投資銀行和對沖基金收縮借貸杠杆，進而影響風險資產的供求關係，即係少咗資金買風險資產。

亞太及歐洲市場避險 情緒明顯升溫。全球股市和各類大宗商品紛紛大跌，前期受追捧的新興市場貨幣全線回吐。美元和美國國債則獨領風騷，重拾「避風港」本色，而作為套利交易目標 貨幣的日圓也大幅反彈。

昨日提到養車和養仔的問題，網友廸廸仔問起：「陸sir, 照你所言, 從資產管理角度去看, 其實是不應該買車同生仔, 因為基本上這兩個項目都係消費, 仲要係非常奢侈的消費哩!」

人要理財，但理財非 一切，又唔好因為理財的原因，唔去做一啲本來應該做的事。車當然唔一定要養，但消費得起，都唔係一定唔可以養車，試想你月入5、6萬，想買架車揸吓，又有何不可? 但你月入1萬，仲要去養車，就會相對捉襟見肘啦，所以養唔養車都係相對、唔係絕對。

仔女更比車重要1萬倍。香港好多人議論生唔生仔，我係「生仔派」，認為養兒育女的愛和喜悅，只能親身體會，不可言傳，所以唔好因為要理財而 唔生仔，養仔平有平養，貴有貴養，有錢人的仔女，未必教得好過窮人的仔女，關鍵係父母有無教，而唔係有無錢。

昨日講起仔女讀書， 只是想講一個觀念:「貴不一定等如好」。早前和一個瑞士名表高層談起，佢話佢地啲錶，好唔好賣竟然同敢唔敢定價有 關，只要敢定個高價，銷情反而會好，因為好多人其實唔識錶，買貴錶只是跟風，所以佢地一定個天價，呢批跟風客就以為係好。N年前又聽一間私立學校的高層談 起，佢地就係要定高啲學費，最好全港最貴，咁就成為一個品牌，好多家長都以為貴就係好嘢。

貴唔一定等如好，家 長代仔女「購買」教育服務時，要留意學校是否物有所值。好多又貴又新的學校，其實物無所值，校長又新，老師又新，大家都在學習，學生就如白老鼠，俾新老師 做試驗品。我曾聽一個負責教育的高官分析，校長就如公司的CEO，校長好，間學校就會搞得好，不少新進地區名校， 就係因為一個好校長將間學校搞好。歷史悠久的名校，校長在任時間長，離任時也較易搵到好接班人，延續學校的好傳統。但一些新或半新學校，即使收取頗高的學 費，都唔敢包一定搵到好校長，入去讀就要博一博。問題係點解要俾咁多錢去博呢? 俾咁多錢係想為個仔搵到「實贏」(sure win)的方法，但現實上貴的解決方案好多時並不等如好的解決方案。當你為子女搵咗又貴又無乜用的教育服務時，那筆開支就變成龐大而長久的經常性開支了。

即使學校好，也要家 長配合，好多國際、私立、直資學校都標榜開放式教育，要啟發孩子的自學能力，但家長並不明白，自己不讀書不看報，那能叫仔女培養讀書看報的習慣? 仔女無讀書看報的興趣，根本無法應付課業的要求，仔女要做project時，在小學時很多都由爸媽完全代勞，到升上中學爸媽都無法應付時，仔女也無從入手 了。西方開放式的教育，係培養學生自學和解難的能力，若學校出的功課深到學生唔識做，係學校的問題，但家長代學生做功課，學生唔會學到嘢。家長生活方式能 否配合學校的教育，根本同錢無關。

我總覺得，養大一個仔 女，即使要俾佢較好的學習機會，都唔一定要花400萬，唔好信哂啲廣告呀。錢應使則使，否則人生太刻苦了，但花錢 要花得物有所值。

陸羽仁

營運人生 (１１） 陸羽仁

美股喺原油價格反彈以及實耐寶 (Snap-On Inc.)等公司的季度業績提振下，第二日造好，不過在「高盛欺詐案」的陰霾及IBM同可口可樂等巨企的業務前景麻麻的 拖累，美股升幅有限，杜指微漲25點或0.2%，造11117點；標普500指數就好啲，重上1200點，漲0.8%，收1207點。杜指期貨最新報11073點， 比現貨低水44點。

港股美國預托證券微跌，ADR港比指數收報21590點，比香港收低34點或0.2%。匯控收82.72元， 比香港收市高7仙，中移動偏軟收報78.7元， 比香港收市低1.9%。

高盛昨日公佈首季業績，利潤飆升91%，至接近35億美元。但有消息指英國金融服務管理局(Financial Services Authority) 已公開表示，將對高盛集團涉嫌欺詐案的相關問題展開正式調查。高盛股價繼上週五暴挫13%，週一反彈1.5%，昨日再跌2.1%，股價仍在水底徘徊，拖住大市後腿。

昨日壓住大市升勢嘅還有IBM及可口可樂，公佈的首季度業績雖然 都不俗，利潤分別上升13%及20%，都好過市場預期。但IBM新服務合同 簽約量下降令投資者感到失望；而可樂嘅北美市場銷售額持續下滑。IBM及可樂股價分別逆市下跌1.9%及1.5%。

至於支持大市嘅主力係能源股。歐洲航空業近期受冰島火山灰影響，好多班次都要停飛，損失慘重，油價亦連跌 三日。昨日，有消息指取消的部分歐洲航班陸續重新恢復，加上美國企業財報成績不 俗，提振了投資者對原油需要增加的期望。原油價格昨日反彈2.5%至 每桶83.45美元。最新報84.21美 元，再漲近1%。消價上升，油股造好，Exxon Mobil及Chevron都升約1%。 製造業巨頭3M是表現最好的杜指成份股，幅了1.6%。

            再講吓營運人生的課題，要營運好自己的人生，同營運一盤生意一樣，要有目 標，有計劃，一步步按計劃去做。

  從理財的角度講營運人生，目標自然 是中年之後，到55歲退休之時，可以到達財務自由。在香港這個社會，計及未來的物價水平，不 計自住的物業之外，至少要有500萬元或以上的淨資產，才算有一點自由，若有1000萬 以上自然更佳。

        當然，不同家庭背景的人，對生活的要求不同，若是草根階層，身住公屋，消費 水平不高，每月用4000、5000 元就夠皮的話，退休時有100萬、200萬淨資產，都可以生活都相當舒泰。但若你享受慣中產或以上的生活，每月起碼要花2、3萬，你 會發覺500萬未必夠，因為你一年開支都要36萬，退休後沒有 日常收入，靠500萬去投資食息，一年就算有5厘， 都只係收25萬，唔 夠開支，要從積蓄倒貼，咁本金就會不斷減少，你愈長命，就愈有老來唔夠食之險。所以不同人要睇自己的生活水平，來 決定自己的理財目標。

假設你的目標中中地係500萬，要在55歲達成，而家你30歲，兩公婆夾埋月入4萬，有幾十萬儲蓄剛用咗 嚟買樓，用咗家庭3、4成收入去供樓，手頭上得番10萬現金，生咗兩個仔女，開支咁多， 就會開始懷疑自己有無能力到退休時達到財務自 由。

        呢種擔心係合理的，好多人都唔去諗，以為船到橋頭自然直，以為搵得來使得 去，以為將來有機會升職加薪，總之有好多個以為，但美好的 將來，要由自己計劃出來，而定計劃要由自己的現實情況出發。人到30，自己事業 去到點大大約 約都有一個感覺，到底自己屬於「飛升族」、「中游族」抑或「平庸族」，若果係「飛升族」，仲可以輕鬆啲，因為人工會有得加，錢會繼續 嚟，但呢類人只佔少數，可能同一輩只有10%，其餘有3、4成係「中游族」，捱捱吓可以捱到一個中層位置，但人到中年後飯碗已經唔係 咁保證，仲有5成或以上係「平庸族」，佢地係更可以替代的一群，人工加到咁上下後，經濟環境一唔好，老闆可以用二分一人工 請個新人來取代佢。

        知道自己屬於邊一族，就要用合自己的身份方式去消費，「飛升族」可以鬆的， 因為佢地收入那一邊增長較快，就唔使咁唔嚴格去控制開 支，反正是收入增長快過開支增長，淨現金流還會增長; 若是最差的「平庸族」，就真係要為 將來打算，唔好咁太使啦，因為錢會生錢，而家多儲一點，合理投資，練好投資基本功，成為一個成功的 「投資的我」，一個普普通通的打工仔，老來除了自住樓之外，有500萬以上的自由淨資產，不是天荒夜談。但要一步步來，先由儲10 萬、20萬、30萬投資本金開始。

陸羽仁

營運人生（１２） 陸羽仁

營運人生（１3） 陸羽仁

希臘政府拍晒心口話要削債、減赤字，但歐盟統計局(Eurostat)昨 日卻將希臘2009年赤字佔GDP比例由12.9%向上修正至13.6%，仲話可能仍會繼續向 上。與此同時，穆迪將希臘評級下調1級至A3。 希臘將需付出比之前預期更高的代價才能使本國債務狀況恢復穩定，市場對希臘或者可以通過國際市場融資，而免於尋求歐盟及IMF救助的希望最終泡湯，對希臘債務問題的憂慮捲土重來。希臘債券大幅走軟，元歐洲主要股市全線向下，跌幅超 過1%。美匯指數亦上漲了0.5%。

受消息影響，杜指開市即急插近110點至接近20天移動平均線，不過，星巴克(Starbucks)和萬豪國際集團(Marriott)公佈了強勁的首季度業績報告，股價猛漲，刺激非必需消費品類股急升，加上電 腦程式驅動的炒底買盤推動，杜指見底回升，跌幅逐步收窄，最終收復全日失地，有驚無險。杜指收市倒升9點，收11134點；標普500指數 3點或0.2%，造1209點。杜指期貨最新報11059點，比現貨低水75點。

港股美國預托證券偏軟，ADR港比指數收報21394點，比香港收低61點或0.3%。匯控收81.85元， 比香港收市低0.7%，中移動靠穩，收報78.62元， 比香港收市微升2仙。

       我昨天提到的儲錢投資基本法，為大家計一計數，話頭10年每月平均儲5000元，之後的年份每月平均儲1萬元，儲21年就有500萬，儲28年就有1000萬元。可能有人覺得這個數字儲得太多，有人認為儲得太少，其實唔緊要，多少各人自己決定，我只係計一條 數，話俾大家聽，要到中年有1000萬，唔係咁遙不可及，起碼我講的儲蓄目標，都唔係咁離譜，好多 人都可以做得到，可以俾大家一個目標去努力。

但呢條漸進增長的數字成程式，一啲都唔快，保證唔可以一朝發達，但亦不會永 遠到不了站，當中的關鍵是每年10%回報的複式增長，過程中唔可以點輸 錢，一輸得多，就會大大拖後目標實現的日子。

網友花大柑有一個留言值得注意，佢話:「陸sir:多謝你的營運人生系列，真的，對我 這些30出頭，曾經係股市贏過大錢，之後輸 突的人來說，是一個好大好大的警惕。輸的不單是金錢，而且更輸掉了黃金的十年。一切都還原基本，短短的幾年就好 似發場夢(發達夢)，現在該是夢醒的時 候！」

花大柑的經驗，相信也是不少爛炒網友的經驗，遠的不說，以07年為例，只要夠膽去買，真係盲俠都 可以贏大錢，但殺紅了眼，又有多人能保持清醒，在適當時候離場呢? 10萬炒到變20萬，20萬變40萬，40萬變80萬，80萬變160萬........贏 錢的快感可以留住所有人，感覺距離千萬富翁只是幾個月之遙，確實無乜邊個走得到，最後就一網打盡。好似花太柑咁講，最後還原基本，咁就唔見咗10年的儲蓄，等如浪費咗10年。

所以呢個積蓄加投資的計劃，投資的 部份，要比較保守，要知道回報和風險成正比例，無乜可以在短期內倍升的投資，唔係存在相當的風險，所以呢個計劃只容許「投資的我」參加，唔啱「投機的我」 玩，「投機的我」會認為，我炒隻股仔，咁啱係大升股，真係會成倍成倍咁上，你要求一年回報10%的回報，有乜味道呀，咁買法點會發達架? 的而且確，這種方法不可以一朝發 達，但亦唔會一舖輸清，低回報，低風險是也。

我唔反對人投機，但認為要量力而為，一般人搵錢能力唔太高，唔係有太多條件 輸錢，因為輸咗大錢好耐都搵唔番，所以唔好瞓身做「投機的我」，撥一部份錢，俾「投機的我」，細細注玩吓算啦。我會咁同「投機的我」講，既然你咁醒，買親啲嘢都成倍咁升，咁我都唔使俾太 多本金你，反正你炒幾炒都可以搵到番嚟。「投機的我」係唔係咁叻，試吓就知。

我建議呢個「投資的我」，既然目標係賺10%一年，低買高賣，升到10%可以離場，博佢升到咁上下會回吐， 回番咁上下又可以再買過，博佢走多一轉，一年搵到20%都講唔定，有好的年頭，就可以補吓 無咁好的年頭，因為一定有個別年份賺唔夠10%回報，但有好年頭拉上補下，最後都 有10%的年均回報，不要睇少呢10%，股神巴菲特都唔係賺多好多咋。唔怕行得慢，只要能到站。

我覺得只要你做得10年、8年「投資的我」，對股份好有研究 時，回報絕對可以多過10%好多，但這是練好武功的後話，功夫 仔未得時，要投大錢，都係要保守啲好。

 

營運人生（１４） 陸羽仁

希臘政府正式向歐盟及國際貨幣基金會(IMF)申請啟動450夥億歐元的援助貸款，美國3月份耐用品訂單亦不及預期，美 股開市偏軟，不過新屋銷售大增27%，創下自1963年4月以來新高，加上美國運通業績表現強勁，美股在房屋建造股及金融股領漲下，反覆攀升至17個月新 高收市，杜指連續第八個星期上漲。

杜指漲70點至11204點，係2008年9月 19日以來最高收市位。標普500指數漲9點，收1217點；納指升11點，造2530點。杜指期貨最新報11130點，比現貨低水74點。總結全周，杜 指漲1.7%，標普500指數升2.1%，納指漲1.97%，值得留意嘅係，綜合性較強、涵蓋有巨大增長潛力的小型公司的羅素2000小型股指數本周累計 上漲3.8%。而全年漲幅已接近一成九！跑遠跑贏藍籌股指數。

港股美國預托證券做 好，ADR港比指數收報21441點，比香港收高196點或0.9%。匯控收81.71元，比香港收市高 0.8%，中移動收79.07元，比香港收市高0.7%。

美國3月份的新屋銷售環比大漲27%，創下了1963年4月以來新高，年化的銷售總量增至41萬幢，遠超市場預期的33.5萬幢。 新屋銷售大升主要得益於減稅政策即將到期、抵押貸款利率較低和天氣明顯改善。升幅咁大，主要係2月的新屋銷量依然處於有統計記錄以來的最低點，而3月的 41.1萬幢的銷量為去年7月以來之最，明顯超過經濟學家平均預期。

　3月的未售出新屋庫存較上月下降5000幢，至22.8萬幢，創下39年來新低，跌幅為2.1%。依據3月的銷售速度計算，這 些庫存可滿足市場 6.7個月的需求，存銷比創下2006年12月以來新低。新屋售價的中位值為21.4萬美元，較上年同期增長4.3%。較便宜房屋的銷售狀況好於較昂貴房 屋。連最郁唔到美國樓市都有啲起色，又難怪美股再創新高。

我寫呢個營運人生系 列，主要目的係刺激大家思考，去睇吓自己營運人生的方法，特別係理財的方法啱唔啱。我話最緊要定下目標，然後朝自己訂立的目標努力，訂出計劃，盡力執行。 結果我計一輪數，話俾大家聽，一個普通打工仔，唔使人工太高，只要有計劃打工兼投資，50幾歲時有1000萬不是 奇事。

    咁啱得咁橋，講講吓就遇啱有段新聞，話東華三院一位退休護士何若幻，透過多年積蓄 及投資，令她成為千萬富婆，去世時有4600萬資產，主要是用儲蓄買股票致富，佢雖然家財近半億，但生活並不奢華，遺願盡捐財產作善事遺愛人間。正如網友 潘記所講，何若幻的個案有辦你睇，儲蓄加投資，絕對可以置富，唔係吹牛。

    不過要把人生營運得好，不是說兩句那麼容易，一定要付出努力，要努力控制自己懶惰、散漫、縱慾(包括想一朝發達 的慾望)等壞習慣。我的理論是人人皆可成功，問題是你願唔願意付出努力。若想唔付出努力就成功，我呢度唔係幾識教你。

    網友kym的留言挺有意思，值得一記。佢話:「儲一千萬好似好易,其實好難,數就咁計。香港以前咁好景,現在每 一百人先有四個有一百萬浮動資產。人心肉做,七情六慾少不了,首先自己無不良嗜好,身邊人又要無,又要父母兄弟家姐細妹個個生性,難上難呀。以前當差夠人 工高,幾多破產欠人周身債。書局咁多理財書,財務公司就越開越多, 難難難難。」

後來kym再留言:「或者我講番我屋企,你地就知點解咁睇淡。我老豆以前做印刷工人,最叻個時成四十幾萬一年,現在七十歲人銀行連 一萬蚊都無。佢好賭馬,買十蚊收六蚊,成世人都唔知輸左幾多。又多乞衣親戚,鄉下前前後後借埋三十萬一蚊都無還過,生仔罰錢,急病呀,起地基呀,讀書呀, 總之有去無還。好彩無係九七買樓,不過係九五買一樣死,今日都未見家鄉。用左十五萬係鄉下起左兩間屋,自己十幾年加埋都唔知有無住過一百日。科網熱學人第 一次入市,結果又無埋, 再加上平時大洗, 當年香港相信成堆人同佢一樣,你身邊總會搵到一兩個,老闆變看更,師傅食老綜, 火紅年代咁好搵都係咁, 我睇得灰都唔可以怪我。」

kym留言講述香港的 情況，相當現實，就係好多香港人的寫照，不少人曾經搵到錢，不過搵得嚟使得去，老來光棍一條。我有個親戚後生時做貨櫃車司機，你知80、90年代香港貨櫃 碼頭世界最強，連帶揸貨車的司機也受惠，好景時搵2萬幾一個月閒閒地，一年賺30萬以上(你睇Kym的爸爸做印刷工人都賺過40幾萬一年，就知道揸車賺 30幾萬一啲都唔離譜)，不過佢就唔生性啦，嫖賭飲吹樣樣好，最後在深圳包埋一件二奶，老婆明知佢咁，但為咗幾個仔女，唔想離婚，佢仲請埋律師，逼老婆離 婚(應該係二奶叫佢咁做)，律師教佢禁子女出境老婆就會就範，結果仔女次次離境都要俾入境處問話，搞到仔女顏面無存，恨佢入骨，結果如佢所願，妻離子散。

好啦，好境不常，香 港貨櫃碼頭的生意慢慢俾深圳塩田搶走，佢收入大減，深圳二奶都跟佬走埋，佢到60幾變番一條光棍，仔女家庭乜都 無，週身無文，佢當日咁對啲仔女，而家仔大女大，佢打電話去搵仔女，仔女都唔肯接電話。

    一般人眼光會好窄，佢今日搵到好多錢，就以為成世都係咁，錢會繼續嚟，變得好大花筒，變得不可一世。好似Kym 的老豆，單計佢賭馬一項，一個月輸幾千，30年、40年下來，你話輸幾多? 輸個條數，已經足夠我所講每月儲蓄之數，唔賭去儲錢投資，廿零年後有500萬好輕鬆，佢當年搵40幾萬一年時，港島屋邨樓亦只是200、300萬一間，佢 一年人工夠俾首期，揸到而家隨時過千萬，唔賭去買樓都發啦。我同專業賭馬集團中人傾過，佢地唔怕馬會抽水，馬會抽完水，佢地同散仔對賭，仍然係年年贏，你 話馬會又贏，賭馬集團又贏，邊個輸? 唔知賭仔有無搵本簿記吓佢輸幾多，唔信試吓，記一年半載睇完你會出一身汗。

    　唔講賭馬，講包二奶，你估花錢少? 等如養多一個家庭，開支雙計，即使不論對老婆仔女的情感和責任，單計開支，都足夠吸乾一般人所有原本可儲蓄的資金，認真係蝕本生意，包二奶包得幾年，又變 咗另一個老婆，如果結婚是戀愛的墳墓，包二奶會令你為自己堀兩個墳墓，夠死未? 南韓男人較少包二奶，據南韓的「阿豬媽」(即係師奶)所講，佢地結婚時要送厚禮俾未來婆家，但入門之後，就由佢地控制老公的收支，由於控制了老公的收入， 隻男人袋內無多餘錢，就無經濟能力包二奶。所以香港的「阿豬媽」可以學吓，借個名義話跟我學咗要每月定額投資，乘機抽乾老公的閒錢，咁就家庭太平啦。

我只係討論吓中低階 層的個案，都廢事講我識一啲高收入專業人士，都係咁亂花亂使，搞到40幾歲時借到一身債，係負資產，即係你有一毫 子身家，都有錢過佢。無論kym的老豆抑或我的親戚，佢地唔知道有句話叫「好景不常」，邊個行業都好，若果好好搵，頂多10、20年就玩完，因為你咁好 搵，代表工人工資高，這個地區工人工資高，慢慢就會俾其他低工資地區搶去生意，那個工種慢慢就會在你個地方消失。所以要好天搵埋落雨柴，好好搵的時候，唔 係要瘋狂的嫖賭飲吹，合理消費之餘，要收埋一啲，計劃將來。

    　只要你肯博，即使現時在香港，都會搵到啲，真正的挑戰係搵到啲錢後，究竟剩唔剩到錢。你主要對抗自己的心魔。

陸羽仁

營運人生（１５） 陸羽仁

營運人生（１６） 陸羽仁

歐洲債務危機有越搞越 大鑊的跡象，標準普爾調低希臘及葡萄牙的信貸評級後，昨日又下調西班牙評級，歐洲股市昨日繼續向下，跌至7個星期低 位。不過美股昨日反彈，主要原因係美國聯儲局議息會議後，重申會維持基準利率不變，並對經濟前景的看法維持向好，緩和了投資者對歐洲債務可能違約的一些憂慮。

杜指朝早在11000點 爭持，中午開始發力，尾市又開始無乜力水，但仍企穩11000點上方。杜指收市升53點或0.5%， 報11045點；標普500指數收高8點,或0.7%，報1191點；納指原地踏步。杜指期貨指數最新報11021點， 比現貨低水24點。,

港股美國預托證券略弱，ADR港 比指數收報20891點，比香港收低58點或0.3%。 匯控靠穩，收79.1元，比香港收市低9仙，中移動收77.43元， 比香港收市低0.8%。

聯儲局結束為期兩天 的利率會議，會後宣佈利率將在「較長時間」維持在0至0.25%的基準利率不變。此舉符合市場的普遍預期。聯邦公開市場委員會(FOMC) 的政策聲明表示，「勞工市場開始 改善」，比3月話「勞工市場在穩定中」的講法，樂觀咗少少，但對經濟整體判斷依然謹慎，即使輕微調升經濟前景預測的調子都無，令市場為失望，或者因為咁就顯示長時期不會加息，所以吸引資金在股市上日急回後入市撈底。

但野村證券的分析師團隊認為，自聯儲局今年3月召開最 近一次利率會議以來，經濟數據表明美國經濟在許多方面取得了進展，其中包括零售銷售強勁增長，不過房地産市場就有些例外，並未見到明顯的改善。對歐元區國 家財政的擔憂，令全球市場在過去數月受壓。一些投資者表示聯儲局在編寫政策聲明時已考慮到了歐洲的情勢。巴克萊資本的分析師團隊指出，「當前情況下聯儲局 只會穩健行事」。太平洋投資管理公司的高級副總裁Tony Crescenzi認為，聯儲局當然唔想自己的言行困擾金融市場進而 影響經濟的復甦步伐，聯儲局維持低利率對股市有一定的安撫作用。

聯儲局對於經濟的評 論以及維持低利率一段長時間的承諾提振銀行股, 杜瓊斯金融指數漲了1%。BKW 銀 行股指數上漲1.4%.其中摩根大通上揚2.5%,美銀反彈1.8%。

歐洲情況唔靚仔，尚 幸無進一步影響美股，標準普爾昨日將西班牙的信貸評等由「AA+」 下調至「AA」, 評級展望為負面, 即係話如果西班牙的財政狀況較標普目前預期惡化, 評級可能會進一步下調。原因係該國經濟成長遲滯期比原先預期得要更長。

歐盟各國政府在援助 希臘的談判中遲遲未能達成一致，市場對於這場財政危機將蔓延至歐元區其他國家的擔憂情緒不斷增強。在德國選民的強烈反對下，默克爾已經推遲了德國政府批准 援助希臘計劃的時間。標準普爾相繼下調了希臘、葡萄牙和西班牙的主權債務評級，其中希臘評級被下調至“垃 圾級”，導致歐元兌美元匯率在今天的交易中跌至一年低點，這給予德國伸出援手越來越大的壓力。

歐盟中央銀行行長和 國基會高層去咗德國，大力游說德國總理默克爾及早同意援助希臘方式，默克爾昨日終於向 國基會作出承諾，稱其將加大努力來克服希臘財政危機。話「目前的情況 已經十分明朗，即希臘政府、歐盟委員會和國際貨幣基金組織需要加快速度來解決希臘財政危機。如果總額450億歐 元的援助貸款計劃不能盡快實施，則歐元區的穩定性將會面臨風險。」因為歐元區唔掂，德國都難以獨善其身。

網友一草一木早前問 起如何有較穩定的10%回報，呢個 問題值得詳細研究，佢話:「陸老師 您好,曾向師兄師姐討教,不過回覆未能盡解疑惑.就陸老師 的人生計算法, 小民年近40,總儲蓄為200萬(包括30萬強績金),有幸小民沒有家庭負擔.不過由於身體關係,未來兩年 都不會有任何入息.。雖然有聞6年就能翻一倍,不過所指只為年回報20%才成.小民想 老師給予一些意見,10%的回報聽來容易達到,不過小民的現金,長線及短 炒各佔1/3.現金不能有增長,又不能所有都用來進出以取10%的 回報.所以不知如何能大致整體有10%的回報。如何能在十年內邁向500萬 呢?」

首先從數學上答一答你的問題，你話要6年翻一 倍，每年要20%增長才成，其實應該唔使咁高。有一個說法叫「72律」， 即係每年增長10%，7.2年已可翻一倍，唔使20%回報咁高。

想每年有10%回 報，有兩個方向，一個係死揸某種優質投資產品，第二是游水進出，捕捉一年一兩次的升浪。先講死揸，記住我地要求一年只是升10%， 不是100%，並希望下跌風險較低，投資的對象萬一跌咗落去，過 一、兩年可以無事兼升番突，所以要避開高風險高回報的東西，如二三線股。我講呢個營運人生的系列，係針對大多數散戶，假設大家投 資水平一般，唔太識揀股票，所以盡量建議你地一啲唔使揀股票的方法，以免揀錯股票，所以就揀指數基金，特別係國企指數基金和A股指數基 金。

作這個選擇有些假 設，我係假設未來5至10年，中國經濟還能維持8至10%高速 發展，上得市做得成份股的國企，平均盈利有15%至20%年增長，佢地而家的年盈利增長率係20%以 上，未來打少少折，起碼未來頭5 年都應該做到15%年增 長以上，做唔到呢個增長的 企業，除非係好穩陣的巨股，否則按道理慢慢會被淘汱出成份股之林。

如果企業盈利有15%以上年增長，長線睇股價加派息亦應有15%以上增長才合理，所以拉長少少睇，要求平均一年有15%的回報，並不算太過 份。唯一餘下的問題就是買入的價位了，如果你在好熱時入市，股價在50、60倍市盈率時買(如07年上證綜指6300點時)，由於股價太貴，已提前反映了 未來的表現，所以最後下跌就係不可避免的事了。

反觀而家A股今年預測2010年市盈率只有17倍幾，買入的長線風險相對細，若股價唔升唔跌，A股又維持到20%的盈利增長率，一年 之後變成14倍市盈率，再過一年變12倍，無乜理由會咁，所以要麼中國經濟轉差，A股盈利大跌，要麼就內地股市再跌一排，由17倍市盈率跌到15倍都唔 奇，但最後會升番上去，起碼去番20幾倍的市盈率，試想如果好少少升到25倍預計市盈率，即係升47%，由而家2900點，升番到4200點樓上，回報都 幾和味，即使我地唔好咁樂觀假定一年可以達到此水平，我估兩年都有機會做到，兩年有47%回報，都相當好噃。萬一又出現黑天鵝，環球大市大插，中國股市再 跌，跌到2000點好未? 只要經濟唔散，我估坐一年半載，都可以坐番上去現價以上。

所以入市價位好重 要，只要入市價較平，抗跌力就較大，可以揸長啲。在價位較低時入市長揸 A股或H股指數基金，目標坐長啲，兩三年基本上唔郁都得，希望平均有10%以上的年回報，唔係太難，好運少少有20%年回報。雖然基本上唔郁，但萬一大市 太熱，內地股市升到市盈率50倍以上之時，長揸之貨都可以減持，鎖定利潤，呢個亦都係我平時所講的「投資的我」的基本策略。明天續談游水進出的方法。

陸羽仁

營運人生（１７） 陸羽仁

營運人生（１８） 陸羽仁

美股一插完又大彈，美 國3月消費者支出增長總額創歷史新高，4月份ISM製造業指數亦高於市場預期，加上航空業並購消息刺激投資氣氛，美股5月份第一個交易日強勁反彈，三大股指齊漲約1.5%，收復了上日大部份失地。杜指大漲143點，報11152點；標普500指數重上1200點水準，升16點，報1202點；納指漲38點至2499點。杜指期貨最新報11097點，比現貨低水55點。

美國商務部宣佈，在汽車和其他耐用品消費的推動下，3月份美國的實際消費者開支增長0.5%，總額創歷史新高，終於超越了 2007年在經濟衰退前創下的歷史峰值。而同期稅後個人所得增長只有0.2%，增幅遠低於個人支出。消費者個人儲蓄率亦降至2.7%，創下2008年9月以來新低，美國人又慢慢回復先使未來錢習性。個人消費開支價格指數(PCE價格指數)增長0.1%。核心通脹，不計波動較大的食品和能源價格亦增長0.1%。過去的12個月中，整體通脹攀升2%，核心通脹漲1.3%。反映通脹依然保持在較低水準。這使聯儲局更有理由將基準利率維持在0-0.25%的歷史超低水準。

美國兩大航空公司，聯 合航空(United Airlines) 與大陸航空(Continental Airlines) 昨日宣佈正式合併，協議金額約31.5億美元。新成立後的航空公司規模，將超越達美航空(Delta Air Lines)，並擁有由上海至南美的班機航線。聯合航 空的名稱將繼續沿用，不過班機機身將置換成大陸航空的顏色，商標亦然。

美股一跌就彈，表現 強勢，好到你唔信，杜瓊斯交通指數更率先創了新高。美國資深交易員話，美股與世界其他股市正出現一個「脫鹇（decoupling）現象，人跌佢升，近期歐洲信貸危險衝擊、中國不斷推出壓抑樓市及防止經濟起泡，全球股市下 跌，由上月15號至今，歐洲股市已累計下6.8%，中國仲衰，大挫9.3%，但美國標普500指數只係微跌0.5%，反映中小型細股走勢的羅素2000指數更逆市上升了1%。不過美股上鰦高位，希臘危機又唔係咁定，美股走勢變得非常飄忽，波動好大，好似杜指最近兩日 咁，上日跌158點，昨日又反彈143點，結果連大基金都採取短線策略，部份是炒「即日鮮」賺錢，跌得多撈纒睇一兩日，彈得多又會沽 番鱓貨出街。

早前一直講營運人 生，講建立自己的長線投資組合，可能大家都會留意到，我提到投資優股質股時，主要講指數基金，無乜講其他股票，結果網友「貧窮終結者」就問起「10倍股的迷思」，佢問「陸 sir，在中長線的投資中, 就算買中了10倍股, 也好容易在中途波動中放了(遊走了), 我想除了被仆暈外, 是要用做生意的心態去持有。但這須要深入認識那門生意和其他的知識, 才不會被波動影響到, 可有其他方法去增加回報?　又可否介紹一下如何用做生意的心態去分析股票。」

貧窮終結者問的問題， 其實也是我想講的課題，話要長線投資優質的股票，當然不止是低吸指數基金，股市內的確有不少好股，尚待大家發掘，但我先要說明一個「級數問題」。我假定大 多數散戶對股票了解不多，對上市公司的運作所知甚少，股齡亦較淺，我稱之為「股市小學生」，股場上充斥著大量股市小學生，呢班人一臉稚氣，但係又覺得買股 好易發達，成日聽埋人講，話買中隻10倍股就發， 呢批想發達的人，其實就是真正發達的大戶之獵食對象，佢地造出一隻又一隻神仙股的假象，吸引散戶落繍，然後圍而食之。

所以我就叫大家若有自 知之明，知道自己是「股市小學生」，就唔好從搵10倍股的角度出發，要從平價買大股、買指數股的方向出發，練好吐納，學好基本功，先至去學九陰真 經，唔好想一步登天，到本經書練一個月就成為天下第一，睇小說就可以，現實無咁簡單。所以我叫大家低價買指數股，唔使煩，指數騙唔到你，只要唔好買得太 貴，坐纒等幾年較易有可以預期的收穫，唔好望發大達，但買三幾年望一年平均有10%回報，只要入貨價較低，多數人可以做到，「投資小學生」亦可以做到，絕無秘密，人人皆得。

好了，你不滿足於咁簡 單的招式，覺得股場還有很高深的功夫，當然有，但唔係個個人可以掌握，特別係唔想努力做功課的人更難掌握。你可能自細讀書都係遊魂，上堂唔聽書，放學走去 玩，而家20幾、30歲，突然叫你俾心機讀書，努力做功課，睇纒公司悶到暈的年報、通告，睇各種類型的消息，你竟然 話你肯去做，你可以為求發達咁樣去改過自新，努力做功課，我唔阻你，不過你要真係做得到至好，這等如叫你由「投資小學生」，修練成「投資大學生」，唔係話 咁容易。要搵10倍股，唔係睇纒報紙就搵到，要花 好大力氣去搵，而且搵到可能的對象，還要長期跟進研究，對辦一路投資落去，唔對辦就要走人。

不過，股市之內亦的 確有真正的10倍股，等「股壇大學生」去發掘。 但又要記住，唔係真正的大學生，就一定係「股壇大學生」，我見過唔少大學畢業生，甚至讀經濟、財務、會計的大學生，買股一樣係亂咁炒，直情係股壇幼稚園 生，所以你即使無讀過大學，唔等如你唔可以做「股壇大學生」，唔好氣餒。

要做「股壇大學生」，要搵10倍股，第一件事就係借腦思維，借公司管理層個腦，去睇一間公司做緊乜№，而唔係用散戶的角度，去 睇公司的包裝形象。公司成熟了，生意上軌道了，已經做到好大，你就好難期望佢股價可以升10倍，買指數股就係典型，我地唔會期望佢幾年升10倍，所以倒過來說，有可能升10倍的公司，只能是新成立的公司，或是傳統公司轉型搞了新業務的公司，新上市的公司，或是新借殼上 市的公司，我地就要代入這些在某個意義還是新的公司的管理層角度，睇纒佢點諗，佢有乜計劃，係唔係想搞大盤生意，結果盤生意是否能搞大，一步一步又睇佢點 搞。追擪一間「新」公司點搞，唔係三幾個月的事，起碼是三幾年的事。(明天再續)。

陸羽仁