ZKIZ Archives


江系下馬內銀風暴

2015-02-12 NM  
 

 

習總打老虎愈打愈有勁,仲燒到去港人至愛嘅內銀股。最新一隻被打嘅係民行行長毛曉峰,傳聞話佢同女員工私通、追女星送奧迪都係小兒科,致命一擊卻係佢在民行搞「夫人俱樂部」,好似令計劃老婆谷麗萍等高官夫人,都掛個名在民行出糧。以現時中共權鬥嘅形勢,同得令計劃扯上關係,相信都永不超生。

民行內部七國咁亂,除了毛曉峰,幾個董事都各有醜聞。好似一手提拔毛曉峰嘅前民行行長董文標,傳聞話佢為令計劃的朋黨提供經費支持,博訊網又話佢勾結前人行行長戴相龍女婿車峰,違規貸款近七億元人民幣。 戴相龍家族過去已多次被中、外媒體揭發利用內幕消息炒股。不過這天津幫後台夠硬,至今屹立不倒。另一民行副董事長張宏偉,傳聞佢賄賂咗周永康的兒子周斌,以賤價從中石油手上取得油田,又幫周永康洗黑錢。當年將垃圾資產打包再排隊上市嘅一堆內銀,幾乎都係江系,又會唔會逐個排隊打柴?睇番往績,打咗柴嘅公司如中石油等,管理層下馬時股價都會跌一跌,但過後往往企穩甚至再創新高。照咁睇,入市好時機噃!

養和醫院星級煲仔飯

Touch wood講句,冇病邊個去醫院食飯?但去得醫院食飯當然想慰勞吓自己。養和醫院就一向多名人富豪出入,連李超人和彤叔都睇呢間,唔知係咪咁,飯堂的大廚都要由香港麗嘉酒店挖角過來,果然走富豪級醫院路線。一向嘴刁加寸嘴的蘇施黃都讚話:「養和煲仔飯係全港最好食嘅!」為咗這句,小宗決定去試試,飯堂就喺養和四樓,街外人都可以來食,未到餐廳門口,已有職員埋位開門,再帶位入座,「不如坐窗邊呀,可以望到馬場,幾靚o架。」今時今日咁嘅服務水準算係唔錯。哇 ,一個煲仔飯,都要一百零八元,要再豪啲,加兩隻五蚊銀大嘅鮑魚,盛惠一百九十八蚊。不過味道真係唔錯,鮑魚夠鮮、雞夠滑、飯焦都夠脆。餐牌見仲有天然放養的雞胸和鮑魚海味撈飯,各一百八十八元,連海南雞飯都要一百零八蚊,而飲嘅礦泉水係來自紐西蘭,二十八元一支,真係要夠「發」先會喺度食。咦!餐牌上面寫住就算係菜譜以外的菜式,都可以order喎,小宗打電話去問,佢哋就話要營養師轉介。之前栢芝住養和生第二個仔時,七日就用咗上百萬,唔通餐餐都由大廚燉花膠燕窩?

唔做劇烈運動

上星期突然爆咗四個買亞視嘅準買家名單,其中一個係老虎仔邱達昌。仲記得當年佢老豆邱德根搞亞視,傳出限令員工如廁只能用四格廁紙;慳慳埋埋,結果賺咗大錢。 今次仲唔「子承父業」?咪住!老虎仔老友特登搵小宗講,老虎仔根本唔想入標。佢近年養尊處優,肥得滯,行得慢,血壓高,近年身體情況已唔做到「劇烈運動」。佢口中嘅劇烈運動,意思咪就係買亞視囉!呢個只係政治任務,佢都唔願中咁話。但佢唔買,大把人想買,據知大把富豪向港澳辦排隊話要拯救亞視,不過阿爺一句:「按既定方案,入標啦!」結果入標者出現九唔搭八嘅「人頭」。話時話,一間咁嘅爛公司竟然咁多人爭,真係亞洲亞洲嘅奇跡!

江系 下馬 內銀 風暴
PermaLink: https://articles.zkiz.com/?id=132130


ZKIZ Archives @ 2019