ZKIZ Archives


浪漫月巴睇舊戲 - 月巴氏 一個慘不忍睹的城市,四個特警 2013年11月29日

1 : GS(14)@2013-11-30 13:39:19

http://www.am730.com.hk/column-183937
係老友都知我是李子雄粉絲——假的。但我的確鍾意睇李子雄做戲。首次睇佢,自然是《英雄本色》那個陰險(得來收收埋埋的出類拔萃)死奸仔。陰險和死奸仔不難演,TBB一眾小生只要摵吓堂眉都應付到,但收收埋埋 & 出類拔萃,呢下難。

杜琪峯首部現代城市警匪片
李子雄憑那個陰險(得來收收埋埋的出類拔萃)死奸仔跑出後,好彩沒有被安排keep住奸落去——即使奸角還是走唔甩,但依然被安排演繹不同類型個性造型的角色。像《城市特警》裡的他,就是一個沉鬱冷靜總督察。
但我不是為了欣賞李子雄沉鬱冷靜演出而睇這部1988年的戲,而是為了杜琪峯。
純計電影。1988年前的杜琪峯,只拍過《碧水寒山奪命金》、《開心鬼撞鬼》和《七年之癢》,一部古裝武俠兩部喜劇,《城市特警》是他首部有份執導的現代警匪電影——這部戲還有另一個導演,金揚樺。
這是公司給予當年的杜琪峯一個機會,去試拍這類題材。如果你想在《城市特警》找尋一點「杜Sir簽名式風格」的話,基本上,是完全搵唔到的。

打到開巷慘無人道
《城市特警》好唔好睇?好難答。事實是有人視為一部完全非理性的廢片,亦有人覺得那種非理性,好cult。
1.就像那年代大部分警匪片,其實就是動作片——所謂動作,包含了拳腳交加和槍戰,如果有budget就加埋飛車和爆破啦——《城市特警》有齊以上各項,而且是由頭到尾打到開巷。
2.有兩場最精彩:A.醫院大混戰——壞人頭目為殺死對自己不利的證人,以喬裝 + 潛入方式殺進醫院,成功殺死證人後卻被李子雄得力助手郭追悉破,雙方展開大型攻防槍戰,只能說一句:傷亡慘重。這場戲令我想起幾年後吳宇森《辣手神探》,最後一場超巨型混戰也是發生在醫院,而咁啱兩部戲的動作指導都是郭追。B.Lift糟摸黑槍戰——壞人嘍囉搭Lift走佬,郭追熄了大廈總掣令Lift停低,然後李子雄和手下攻入Lift槽,但你點會諗到一個連名都冇的壞人嘍囉,竟然會未雨綢繆到隨身帶備夜視鏡(即Tom Clancy原作遊戲《Splinter Cell》Sam Fisher長期戴住嗰種)!這一場,未見誇張的駁火,雙方純在鬥智——無奈聰明的壞人嘍囉最後都要死,死相慘無人道。
3.慘無人道。有兩個角色的死法我呢世都銘記於心。A.壞人嘍囉甲:在逃避警方追捕時,被李子雄架車撞出天橋,飛落下面一條馬路,臨落地再被另一架車撞,撞完後再被一架車高速輾過,然後鏡頭影住一大pat血潑在馬路邊。這麼一個面目模糊不左右劇情的壞人嘍囉甲,其實是否需要這麼一個慘烈兼冗長的死法?——完全不需要,但《城市特警》就是不嫌麻煩地拍俾你睇,我欣賞這種不嫌麻煩的態度。B.隱藏頭目:他是誰?不公開了。唯一可以說的是,以前成日聽人話邊個邊個俾人射到蜂巢咁,這名隱藏頭目最後真的變成了人形蜂巢,不過,I Love It,因為佢絕對死有餘辜。是的,對付真正的奸人,有時只有這種慘無人道慘不忍睹的死法才足以一洩心頭之恨。
4.連場動作經過設計,角色也有特別設計。李子雄是沉鬱型幹探,而為了凸顯他的沉鬱,身邊三個拍檔自然不能同樣玩沉鬱:郭追是絕對火爆型粗漢,但粗中有細愛錫年老阿媽;遠道來港幫手查案的吉隆坡幹探,長期戴黑超,狀甚冷酷,其實純為有型……不過佢是正義的。最後一個是典型菜鳥,做乜都廢廢哋嗰隻,但在事件中他成長了,到最後更成為破案關鍵,可惜……唉。
5.就像那年代港產片,戲裡存在不少擺到明「恐同」的設定,但奇在描寫郭追和吉隆坡幹探的惺惺相惜時,竟然有著濃厚同志味;其中一場,合力成功阻止了一場爆炸後,二人情深對望——直覺話俾我知是但一方好想咀對方。
6.OK咁究竟《城市特警》講乜?引用朱江一段對白:「摩洛托夫先生,香港仲有幾年就交收嘞,而家有好多人等住去做移民,佢哋好需要錢。只要我哋俾得起錢,唔好話運毒品吖,成個香港運去你祖家都得吖……我交咗嗰份名單俾你,上面係政府嗰啲重要人物,雖然係嘥啲錢,但係比起我哋嘅利潤,今次嘅投資只係雞碎咁多啫。」明晒啦。結局,李子雄說成功打擊了這個運毒管道,可惜始終得唔到那份神秘的名單。於是這班人得以繼續潛伏搵著數……
一部咁非理性的戲,一個理性的現世側寫。
2 : GS(14)@2013-11-30 13:39:51

info
浪漫 月巴 巴睇 睇舊 舊戲 巴氏 一個 不忍 睹的 城市 四個 特警 2013 11 29
PermaLink: https://articles.zkiz.com/?id=284167

浪漫月巴睇90s - 月巴氏 愛在深秋,個膊頭。 2016年01月22日

1 : GS(14)@2016-01-24 23:05:40

http://www.am730.com.hk/column-299291
一睇條題,係咪立即感到一份性感的詩意?

1.某一夜,我再次亂咁在YouTube搵舊歌聽。天意,竟然讓我唔覺意碌到去一首90年代舊歌,《海潮》。噢,一首好有畫面的舊歌。
2.你我之間任愛意沖淡,卻似今天遺忘浪漫~
3.就是這兩句副歌,令我立即遙想起一個畫面,畫面中一個身世悲苦但性格堅強過大把男人的女子,正在以slow motion的姿態走難(嚴格來說是導演正在用慢鏡來呈現這個走難女子的艱險),而因為是慢鏡,我清楚看到,該名走難中的女子件衫是,跌膊的。
4.這是一個刻在我腦袋多年的震撼畫面。


5.如果你(有幸或不幸地)同我差唔多大,應該睇過《火玫瑰》。說穿了,不外乎又是另一個恩怨情仇的故事,但編劇巧妙在借用了《長腿叔叔》的意念,劇中的長腿叔叔名叫Uncle Rain,由(仲未會因為見到某國國旗而異常激動的)溫兆倫飾演,而孤兒院的苦命女子,是溫碧霞……故事大概係咁啦:(件衫熱愛跌膊的)溫碧霞離開孤兒院後,終於知道當日是邊個害死自己一家,而呢個邊個咁啱就是溫兆倫老竇王偉,中間又再攝入溫兆倫細佬羅嘉良;(件衫熱愛跌膊的)溫碧霞為搜集王偉犯罪證據,假意同羅嘉良結婚,偏偏呢個羅嘉良遺傳了老竇的邪惡DNA,搞到已經好慘但又不失美艷動人(兼件衫熱愛跌膊)的溫碧霞更加慘,慘到流落戰火中的越柬邊境,(件衫)成日都要(跌膊)走難……願傾出心裡愛的溫兆倫遠赴當地營救,咁最後(件衫熱愛跌膊的)溫碧霞究竟報唔報到仇?而溫兆倫同(件衫熱愛跌膊的)溫碧霞又能否修成正果?好緊張呀~

6.Well,故事,問心,並不是甚麼劃時代巨獻,但因為一班演員,為故事add上大量value,王偉演技是毫無疑問的好,溫兆倫唔做奸仔做癡心男,一樣掂(喬立這角色也成為當年一個經典角色);至於羅嘉良,OK啦——但由始至終最最最最最重要的,是海潮的化身,溫碧霞。(這裡要俾個credit想出「海潮」這名字的編劇,大佬吖點樣先可以諗到這麼一個浪漫的名字?)
7.溫碧霞早在80年代頭出道,在《靚妹仔》做配角,從未受過演技訓練的她,已相當自然地演繹了一個反叛少女應有的感覺,簡單來說就是:有實感。但當時大家更留意的是主角林碧琪。然後,溫碧霞繼續拍戲,就是再遇不上叫人難忘的角色(但這同當年香港電影情況有關,從來只會集中塑造男角。女角?靚就得),唯一難忘是關錦鵬《地下情》那個model,在香港盛世下keep住冷眼旁觀的美艷model。

8.直至1992年的《火玫瑰》,不得了。我清楚記得當年這齣劇所掀起的迴響係幾咁大,就好似我班同學,大家明明將要面臨主宰前途生命的中五會考,但我們還是拚命追劇,以方便討論——同女同學主要傾劇情,同男同學主要傾海潮,個膊頭。這絕對是很奇妙的一回事。古今中外美艷動人女星大把,最主流的自然是憑藉天賦美貌,更主流的是憑天賦美貌與身材,只有溫碧霞一人,是.靠.膊.頭(再配合埋那永恆微鬈的亮麗長髮),咁講,並不是話佢不夠靚或甚麼,而是溫碧霞強在能夠另闢蹊徑,達到一個肯定前無古人更加後無來者的「見膊如見人」之境!

9.一切,全靠《火玫瑰》。當時,還是電視強世,一齣成功的劇,足以讓出道超過十年、明sell嫵媚的溫碧霞成功進入尋常百姓家;而90年代初的主流女性形象,絕對是玉女,溫碧霞卻能在玉女淹沒的情況下,找到自己位置,奇妙。90年代的溫碧霞,也拍了(唯一一齣)三級片《驚變》,但嚴格來說,這比較似是一齣展示人性陰暗面的驚情片,一個嫵媚美艷(兼愛露膊的)女子,周旋在一個臭男人世界,唔算好好,叫做OK啦。但無論點,一個女演員能夠演繹一個事隔多年後人哋依然講得出名的角色,是極度難得的——尤其在香港,這個普遍不尊重、重視女演員的地方。
10.你對我說句也許是緣慳?這推測我早已慣~Sorry我又情不自禁忍唔住唱。

月巴氏~90年代,可能是我們最後的快樂時代。

撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk
浪漫 月巴 巴睇 90s 巴氏 愛在 深秋 個膊 膊頭 2016 01 22
PermaLink: https://articles.zkiz.com/?id=294981

浪漫月巴睇90s - 月巴氏 愛是永恆當所愛是里~~美 2016年02月05日

1 : GS(14)@2016-02-09 02:59:57

http://www.am730.com.hk/column-301329
如果你是永尾完治,你會揀赤名莉香還是關口里美?

1.在去年1月9日那篇「永遠的赤名莉香」,我曾問過這條問題。
2.基於時間迫切下星期又是拜年時,我決定將問題調校得較具新年氣氛:如果你是永尾完治,你會揀赤名莉香還是關口里美同你一齊拜年?
3.如果你帶莉香去親戚家拜年,你面對的情況可能是:在眾目睽睽之下,莉香隨時興之所至突然狠狠地咀你一啖——當你深感大時大節在姨媽姑姐面前被狠狠地咀唔多好意思吧,莉香卻不是咁諗,她堅持:真愛從來不分時間地點人物,所以不論任何時候任何場所以及在任何人等面前,她的愛都(應該)能夠無限制兼無限量地輸出——同時,她亦要求你咁做。

4.如果你帶里美去親戚家拜年,你面對的情況大概是:低羞著頭保持淺笑的里美keep住坐定定,面對姨媽姑姐的無聊問題(例如「幾時生番個馬騮仔吖?」,她依然是低羞著頭保持淺笑keep住坐定定,把發言權留給作為男人的你;就在你唔知點答之際,里美突然跪低,在親戚圍觀的情況下為你綁好甩咗的鞋帶……這也是愛的輸出,眾目睽睽得來夠晒低調含蓄(而又人人都能親睹)。
5.但無論帶邊個拜年,總之求神拜佛千祈唔好遇見三上。堪稱全世界男人公敵的三上,只會令你相形見絀……囉。

6.寫這篇前,我曾考慮翻炒一次電視版《東京愛的故事》,但最後,我冇咁做,有些感情我實在不想也不能夠再承受多一次(即使明明是虛構的)——但我還是(忍著淚)看了最後一集的最後10分鐘:莉香出走洛杉磯三年後,完治與(低羞著頭保持淺笑的)里美走在街上,期間里美發現完治甩鞋帶,便二話不說在大街大巷跪低為完治綁好,這時候,莉香突然出現在完治面前,兼擦身而過——其實莉香沒有看見完治(扮睇唔到定真係睇唔到?),是完治大聲嗌她,她才停下腳步。時間啱啱好,里美為完治綁好鞋帶了,企番起身,嘩面前的不就是(那個曾經同我爭仔的臭貨)莉香?但她依然低羞著頭保持淺笑,只笑說自己想去第二度行吓,擺明製造機會讓二人相聚一刻(我心地差,始終認為這是里美費事眼冤但又要懶大方的舉動)。
7.如果你有睇原著漫畫,應該知道完治和莉香根本沒有遇上,完治遇上的只是一個乍看貌似莉香的人。論處理,漫畫版的留白自然更有餘韻,電視版的偶遇再聚其實OK俗套,但由於飾演莉香的是鈴木保奈美,我極度願意接受這個OK俗套的結局處理。

8.回看,《東京愛的故事》並沒有甚麼驚天動地設定,不過是幾個住在鄉下由細玩到大的同學,長大後到東京搵食的故事,能夠令人永遠難忘,是柴門文對每一個角色的描寫入血入肉入埋骨,獨特得來兼具說服力;電視版的濃縮改編恰到好處,拍出了一份泡沫經濟下的都市感性,Yes,東京是構成整個故事的必備元素。而不能或缺的絕對是鈴木保奈美。她就是赤名莉香就是她。即使塵世間絕少男人能夠抵得住莉香這名「愛的100億能量戰士」的強攻,但都不介意望多兩眼鈴木保奈美,她把原著中的莉香完美化,收歛了她的缺點放大了她的優點。(鈴木保奈美演繹下的)莉香讓我們(呢班臭男人)明白到,如能在一生中遇上這麼一個女人才算不.枉.此.生——即使到最後我們揀的只會是(低羞著頭保持淺笑的)里美。里美這類人,才是在愛情上最挑通眼眉、搵到可持續發展之道的聰明人。

9.最後,要多謝當年的亞視。全靠當年亞視買入,才讓我在面對殘酷A-level前得以看到這一個東京愛的故事,認識到鈴木保奈美。然後,還有《101次求婚》、《愛情白皮書》推波助瀾,香港正式掀起了一片日劇風潮(但這又是另一個故事了)。
10.最後最後,要感謝小田和正獻上了一首《突然而來的愛情故事》。每當前奏響起,我便不期然遙想起90年代初的美,想起鈴木保奈美,美得令我眼濕濕。

撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk
90年代,可能是我們最後的快樂時代。
浪漫 月巴 巴睇 90s 巴氏 愛是 永恆 當所 所愛 2016 02 05
PermaLink: https://articles.zkiz.com/?id=295536

浪漫月巴睇90s - 月巴氏 古惑仔產生的歷史和社會原因,係乜? 2016年03月04日

1 : GS(14)@2016-03-07 03:06:45

http://www.am730.com.hk/column-304475
Well,不妨參考以下解說。


1.「一九五六年,石硤尾大火,香港政府為安置貧民,大量興建徙置區。隨著戰後一代迅速成長,數以萬計家庭生活在狹小單位中,加上父母為口奔馳,填鴨式教育又不完善,很多少年因此走上歧途,徙置區球場是他們發揮精力的英雄地,也是培養古惑仔的溫床。」我終於明白屋企人唔准我落樓下球場踢波的原因了。
2.上述原因可不是我作的,而是來自《古惑仔之人在江湖》一開波的字幕。
3.究竟有幾多觀眾有留心這段字幕?我不知道,只知道這一齣《人在江湖》(唔覺意兼成功地)把香港黑幫電影作了一個延續,或變奏——出嚟行的,不再像上世紀八十年代的Mark哥,大熱天時還西裝筆挺打晒呔外面再笠多件大褸,係唔係都雙槍持手,浪漫(及慢動作地)把無盡的子彈射向敵人身上兼且例不虛發……反而是:以窄身MK look,拎著老牛,在大街大巷或橫街窄巷,一刀一刀地劈。槍?在《人在江湖》我好似只見到一把槍,持有人是差人,用來在最尾射瓜大奸狗僆坤。江湖恩怨,最後由執法者埋單。
4.有些處理倒是不能話變就變的。無論是八十年代黑幫片抑或1996年《人在江湖》,盲嘅都會接收到一個訊息:即使出嚟行或行古惑,當中也有正義和不義之分,正義的古惑仔,有責任去剷除不義的同門。
5.邏輯真的是這樣嗎?不重要了,最重要是《人在江湖》在香港電影市道衰緊的1996年相當收得,然後,續集《猛龍過江》在兩個月後立即上映;再然後,第三集《隻手遮天》拍得慢咗啲——要等到三個月後才上映。
6.只需半年,浩南山雞與大飛,便成為了正義聯盟。正義在我手,永不低頭。
7.就像八十年代尾的賭片風潮&九十年代初的古裝武俠片狂潮,好快地,古惑仔成為了大家爭住拍的題材(當然,以古惑仔做主角的電影一直存在,九十年代初便有《天若有情》、《阿飛與阿基》、《都市情緣》等,分別只是沒有形成一股風潮)。《人在江湖》後,我記得的就有《龍虎砵蘭街》、《金榜題名》、《洪興十三妹》、《紅燈區》、《江湖大風暴》(還未計一些我唔記得的)……大家都在努力鬥快呈現另一個九十年代香港,一個從古惑仔/女視點出發的香港。但講堅,我冇睇晒——我冇能力睇晒。太多的刀光劍影,令我睇到身心疲累。
8.或許真的存在了一個辯證過程。當市場湧現了一大堆高舉古惑價值的電影後,自然會有一些質疑這種價值的「反古惑片」出現。像《旺角揸Fit人》。明刀明槍把僆坤變成叻君,再搵番吳鎮宇來演,借佢把口,描述一個人怎樣由大好青年被呃做古惑仔但不失善良點知被連環迫害最後變身成江湖大奸狗——Sorry,這不是事實之全部,甚至根本不是事實(不排除你未睇而有朝一日又可能會睇,不講真實劇情了)。《旺角揸Fit人》借敘事手法,完美示範了一次為古惑仔「塗脂抹粉」(叻君用語)的過程,暗寸(其實都好明寸的了)當時的正統古惑仔電影。到了《去吧!揸Fit人兵團》,主角甚至不是甚麼揸Fit人,而只是一個在人生中從來冇諗過揸Fit的馬伕、一個根本唔輪到佢揸Fit的CID,以及一個誤以為自己可憑一把刀殺出市區正式揸Fit的屯門古惑仔。三個小人物被牽連進一單(因小事而引發的)江湖大風暴,故事發生在一日一夜之間……有人可能嫌散亂,但我認為比《旺角揸Fit人》更好,有餘韻。
9.當然還有葉偉信《旺角風雲》,超低成本地交代了一個茶記侍應參與江湖的事前事後,到最後,英雄奸狗,不過是觀點與角度,江湖原來可以好虛無。
10.電影是否反映了現實?總有啲嘅,所以我們會看見《生化壽屍》的古惑仔根本冇劈過友,真正工作是賣老翻;金融風暴後的《收數王》,古惑仔甚至冇啖好食……關鍵時刻,道義(暫且)放兩旁,利字(長期)擺中間。講到尾,搵食啫。


90年代,可能是我們最後的快樂時代。
撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk
浪漫 月巴 巴睇 90s 巴氏 古惑 惑仔 產生 歷史 社會 原因 係乜 2016 03 04
PermaLink: https://articles.zkiz.com/?id=297060

浪漫月巴睇90s - 月巴氏 你的鼻環是如此的難以忘記~ 2016年09月02日

1 : GS(14)@2016-09-04 18:17:40

http://www.am730.com.hk/column-328137
兩個問題:1.梁朝偉唱歌好唔好聽?2.梁朝偉戴鼻環好唔好睇?
1.瀟瀟灑灑的給我瀟灑的相機——吓?相機?相機點瀟灑法?
2.Oh I’m so sorry,不是「相機」是「上機」。這一句來自梁朝偉名曲《一生一心》。
3.唔知點解地,梁朝偉唱歌總是令我感到怪怪哋。像他第一首名曲《朦朧夜雨裡》,每逢唱Live,硬係覺得他入慢了半拍或四分一拍——總之就慢咗啲啦,但聽得多,又覺得,入慢咗又點啫?好大問題咩?冇計,因為唱的是偉仔。我自細就鍾意偉仔——全因《新紮師兄》的杰仔。我不知怎樣形容當年《新紮師兄》給我的震撼,而我萬料不到,梁朝偉唱歌給我的震撼,竟然是《新紮師兄》的十二萬倍。
4.嗱嗱嗱我唔似其他人咁,覺得梁朝偉唱歌難聽,我只是覺得怪,一種好難形容的怪,一種愈聽下去會慢慢習慣甚至迷上的怪。
5.怎樣才算唱歌好聽?曾幾何時,有人把喉核好似有靈性咁識得郁上郁落,視為唱歌好聽的附帶表象;也有人認為,唱歌稱得上好聽的歌手,就是無論聽錄音帶/黑膠/CD抑或現場,佢把聲都要一樣。以上,一概被統稱為唱功。
6.那麼梁朝偉肯定冇乜唱功。我好似從未見過他唱歌時喉核會生性地郁上郁落。而聽他唱現場,又同錄音室版本唔多同(例如唱《朦朧夜雨裡》硬係好似入慢咗)。
7.離奇是他在上世紀90年代出過多張專輯。不計1993年的粵語精選《難以忘記的你》,同年就先有張國語大碟《一天一點愛戀》(係呀,一個被認為唱廣東歌都唱不好的人竟然挑戰國語歌);跟住,1994年,《重慶森林》上映那一年,直情出夠三隻你歎,《一生一心》、《為情所困》、《日與夜》(《一生一心》是EP)。而自小就鍾意偉仔的我,自然三隻買晒!尤其愛《一生一心》和《為情所困》——歌暫且不說,單是封套已經無可抗拒!《一生一心》上的朝偉大頭,幾執頭髮在有點偏色的情況下,有意無意間垂在他雙眼之間,心心眼!《為情所困》,不玩大頭,玩一格格電影菲林,格內除了他,還有周嘉玲——兩位就像在重演《重慶》中的激情,心心心心眼!我可以好大膽咁講:即使以今時今日目光去看,這兩個封套依然經典,依然贏晒市面上九成廣東專輯封套(嗰九成簡直完全喪失美學觀念的核突噁心示範)。
8.咁,啲歌呢?Well,歌曲本身,其實都是很典型的中慢板情歌套路,但全仗朝偉的深情和深情及深情,每一首,都被add了無盡的深情value,明明再直白再冇嘢的一句歌詞,由他去唱,定必化成情深的一句:《為情所困》的「這一生為情所困/只為當初妳的心太真」(你睇,強如朝偉都會為情所困!);《一天一點愛戀》的「一天一點愛戀/一夜一點思念/給我一句真的誓言/讓我可以期待永遠」——把聲已夠深情,睇埋個MV,全程就咁影住朝偉獨坐木凳,Keep住把不羈的髮揈嚟揈去,有時又含吓條頸鏈……最後,望住你,甜笑,完。連性好AV的我都被打動。
9.要唱live時,朝偉就以一身當年的我難以名狀的時裝風格示人(後來才知道源自Grunge),而最最最最最最最最最最最最勁的是:他.戴.鼻.環。今天回看,你或者會笑,但在當年,是多麼的出類拔萃驚世駭俗——連四大天王都冇個敢戴。可以說,90年代的朝偉以歌聲和衣著(別忘記他還有著裙!),創造了一個只有他自己才carry到handle到的歌手形象。前無古人,也應該後無來者。
10.回到一開頭兩個問題。1.好聽。好聽不基於喉核識唔識郁呢啲門面嘢,而在於看不見的感情,我們是聽人唱歌而不是聽machine唱歌。2.好睇——肯定比你同我以及大部分男歌手戴得好睇。
(9月4日投票日,且讓我借《朦朧夜雨裡》憑歌寄意:在朦朧時局裡,這一票怎可是但~)
浪漫 月巴 巴睇 90s 巴氏 你的 鼻環 如此 難以 忘記 2016 09 02
PermaLink: https://articles.zkiz.com/?id=307484

浪漫月巴睇女星 - 月巴氏 貞子式詛咒,不絕如縷…… 2016年10月07日

1 : GS(14)@2016-10-09 23:17:24

http://www.am730.com.hk/column-332321



「上個世紀末有一段我的短片,引起大家的興趣,問我是不是貞子?」

1.「片中人確實是我,因為家中有人壞了心腸……我當日被老竇掟落井,順便將自己的澎湃怨念灌注在一餅錄影帶。睇帶後的程序,是你先會失驚無神接到一個恐怖來電,收到來電確認後到第七日就死。睇過餅帶的人不少,人人都要死,應該的。」
2.以上,是貞子悲慘過去&《午夜凶鈴》基本設定的極度省略版。
3.1999世紀末你如何度過?我記得其中一天,是與沙田UA其中一間House的人共同度過——共同睇《午夜凶鈴》。
4.那是電影市道極度疲弱的年份。要坐爆一間戲院,比起政府搵地起公屋更難(事實證明,要搵地起公屋其實唔難,只要夠夾硬);但當日沙田UA播放《午夜凶鈴》的嗰間戲院,竟然全院滿座……除了集體撞邪,我想不到其他原因。
5.大家都中了貞子降。即使仲未有Facebook推波助瀾,唔知點解地,社會瀰漫著一股氣氛:一.定.要.入.場.睇.貞.子.啊。我應該是其中一個受詛咒的人,無奈太難買飛,結果拖到齣戲上咗幾星期後才買到飛。

6.而當我屏息靜氣一心期待之後的連場驚叫,Why我會keep住笑?而且不止我一個笑,係成場都笑?喂大佬這不是一齣恐怖片嗎?當大家千辛萬苦終於等到貞子千辛萬苦從電視機爬出嚟,成場人都冇乜反應——畢竟大家都預咗佢會出現,而且是用這種方式出現——當年各大雜誌早就將這一幕公告天下,大家亦明顯溫定書,有晒心理準備,所以冷靜到得人驚。但公道啲講,依然有兩個位真心寒:A.當畫面影住瀨嘢一家人那幅面容扭曲的相片,全場明顯有點騷動;B.(好靚女的)松嶋菜菜子睇了那餅被詛咒錄影帶後,電話失驚無神響起——嗰下電話鈴聲真的超級大聲,大聲到成場人都被嚇驚,有人被嚇到嗌出來,有人被嚇到不期然踢前面張凳(亦即我的椅背),亦有牛高馬大的成年觀眾被嚇到大聲爆粗:「嘩唔X係吖……」
7.一種離奇的共同體驗。一大群萍水相逢的人機緣巧合下,一齊欣賞一齣J-Horror,一齊驚(兼且一齊笑),一起經歷了一場(本應)恐懼的歷程。感覺,就像電影的設定:坊間流傳著一個都市傳說,相傳只要你睇過一餅被詛咒的錄影帶,就會收到一個來電,證明你瀨了嘢,七日後你就死……這個似層層但又難辨真假的都市傳說從此濃罩日常,社會上三唔識七的人均或多或少受到影響。

8.這也是《午夜凶鈴》成功地方。要找死,不需要你專程遠赴甚麼好猛嘅地方,只要你八卦,睇過餅帶(而錄影機又幾乎是居家必備)——貞子現身地方也很親民,就係你屋企——就算你住的明明不是凶宅,她也會親身上門再由你部電視機爬上嚟,等你唔使出門就可以撞鬼,非常方便。但電影同時提供了一個解咒良方:只要你將餅帶dub俾人睇,而對方又真係死去睇,你瀨的嘢,便可成功轉贈對方。這設定,性質同以前流行過的「幸運信」一樣——你有幸收到信,如不在限期內轉寄給十個人,你就注定不幸(你有冇收過?有人俾我睇過;當睇住信上的字,是真的會不期然心生寒意)。一種陰濕的恐懼,在暗地裡滋長、蔓延、擴散。
9.也像今時今日的我們。我們都在面對各種都市傳說:非繁忙時間(如果有的話)搭港鐵都切勿坐關愛座?身處人潮中無事無幹都隨時俾警棍扑?有幾日假好唔好去一轉泰國?……我們可能瀨嘢,也可能不瀨嘢,而最大鑊是我們都不能清楚明確把握瀨嘢嗰條界線。
10.貞子,只要我唔睇餅帶,就不會遇上妳。有啲人,平日明明不蒲頭,但又總會在某些特定時刻來臨前,不時閃出嚟,叫我避無可避。我好唔想見到你。


撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk
最自豪是能夠獨排眾議欣賞王小鳳的美。更自豪是夠膽獨排眾議周圍宣揚鄺美寶的美。
浪漫 月巴 巴睇 女星 巴氏 貞子 子式 詛咒 不絕 絕如 如縷 2016 10 07
PermaLink: https://articles.zkiz.com/?id=311100

浪漫月巴睇90s - 月巴氏 如果香港冇咗信和,你不如一刀捅死我~ 2016年10月14日

1 : GS(14)@2016-10-17 03:51:14

http://www.am730.com.hk/column-333275
借問聲,如果我第時死咗,骨灰可否撒在信和?
1.如果骨灰真的承載著所謂靈魂,與其永遠屈在那些好悶(而且好貴)的骨灰龕場,不如撒在信和,讓我留守信和直到永遠好了。
2.第一次踏足信和,90年代初。當時我好迷高橋由美子,但不知道哪裡可以找到高橋由美子(的Product),好心同學專誠在某個放學後,帶我去一個我從未去過的商場。
3.WOW,當我一聞到陣除就好肯定咁同自己講:這將會是我餘生都Keep住行的場所。
4.正如食Buffet有既定步驟,我行信和,一樣有。咁多年來,都是先落地庫——90年代的我,習慣先巡視日本Idol的CD和雜誌,當時有三、四間舖頭專售這類產品,我買開的是《Bomb!》(貪佢夠平,又細本,易收藏),但真正鍾意睇的是《Up To Boy》,顧名思義,就是一本內容專為男孩而設、既健康(Idol們都穿上健康水著)又有益(青春期)身心的雜誌。而真真正正最想睇的其實是《Video Boy》,一本網羅大量一手「愛情動作片」資訊的高級成人影視雜誌,可惜,唔夠膽買囉(不過又真係有買過噃)……這時候,為平息充塞著內心的澎湃鹹意,我會去Comic Box睇美國漫畫。90年代,香港突然興起睇美漫,我唔執輸睇埋一份,但主要睇公仔,啲英文太深。
5.然後上三樓(嚴格來說是二樓,因其中一層是閣樓)——我的頭立即擰向右邊——上到三樓第一間舖頭的櫥窗永恆地展示大批寫真集的火辣封面!天真無邪(就奇)的我從來只敢隔住玻璃,望實那性感迷人風景,始終不敢行入去買番本嚟睇……望夠了望到連自己都覺得唔好意思了,就去中間條巷第二間舖頭,一間叫做「漫畫之森」的舖頭;在這間舖頭,你不會搵到《龍珠》和《叮噹》,而只會搵到花輪和一及丸尾末廣——我第一本(也是最後一本)丸尾末廣漫畫,便在這裡入手。我記得店主(抑或是店員?)是一名文質彬彬四眼青年,幾Nice(現址專售日本雜誌,店主同樣咁Nice)。
6.然後落一層去漫畫市場。那是日本翻譯漫畫最興旺的年代,我當時合共追緊十五套漫畫,同時又不停發掘新書,每次入漫畫市場,都必定跌錢……偶然心血來潮,會去賣明星相的舖頭,選購心愛的蘇慧倫靚相。至於一樓(即閣樓),我好少行,記憶中,去親,都是為了Book度假屋。90年代過暑假,梗係(男男女女一齊)去Camp啦。
7.有幾年我少去咗(所謂少去,是一星期才捨得去一次)——翻版碟最盛行那幾年。就算去,三樓有一大忽我都專登唔行過去——成大忽都賣三和四仔。Yes,我鹹,但冇呃你,咁多年來我只在其中一間光顧過一次,而且是陪朋友買(朋友找我壯膽),實在難以置信(到講出嚟都冇人信)。當後來嚴厲打擊翻版,那一大忽舖頭經常落閘,成個Area猶如死城,卻依然殘留著一大陣煙味,散唔去。
8.有人總是說,90年代才是信和最好的時光,如今風光不再;我卻認為,信和根本從來冇所謂風光不風光,而只是一直緊隨潮流,一直是潮流反映和縮影——出面興乜,便自然在信和出現:明星相、翻版碟、格仔舖、Game舖……就連地庫那間專賣日本Idol產品的,現在也因應潮流兼售大量韓星Product。難得是,在被潮流Keep住支配下,場內又總有些比較特立獨行的舖頭能夠繼續開門營業。
9.如果你跟我一樣蒲信和多年,其實已參與了一段發生在香港、但範圍覆蓋日本、台灣、韓國、時間幅度接近三十年的流行文化史。成個香港,唯獨信和,體現了這段歷史。
10.唉!原來已有兩星期冇去信和。信和或許不需要我,但我需要信和,過去的信和煉成了今天的我,這是構成我生命的重要場所。如果香港冇咗信和,你不如一刀捅死我。
(寫這一篇,全因看到一條短片「香港.信和中心と旺角の電気街 1994年 Sino Centre and Mong Kok - Hong Kong 1994」https://www.youtube.com/watch?v=MjBA22yrkZg&feature=youtu.be,附圖統統cap自呢段片)

01:只要你在90年代行過信和,一定見過呢張酒井法子海報(不排除你甚至想據為己有)。
02:一到三樓,頭擰向右,嘩! 便是這一個性感迷人的櫥窗。
03:飯島愛,一個代表了90年代的名字。
04:除了信和,當年銅鑼灣中心和彌敦道近弼街的一幢大廈也有漫畫市場。那時候,港漫興盛,日漫輝煌,美漫新興。


90年代,可能是我們最後的快樂時代。
撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk
浪漫 月巴 巴睇 90s 巴氏 如果 香港 冇咗 信和 你不 如一 刀捅 捅死 死我 2016 10 14
PermaLink: https://articles.zkiz.com/?id=312311

浪漫月巴睇90s - 月巴氏 有得揀,你都唔係你人生的老闆。 2016年11月11日

1 : GS(14)@2016-11-13 22:17:41

http://www.am730.com.hk/column-337084

「Choose Trump. Choose Hillary. Choose a president——Sorry,呢啲唔輪到你去Choose。」

1.當我們唔知點解地被掟落呢個塵世,就面對一個情況:有啲嘢死都冇得揀/有啲嘢死都要你揀。
2.死都冇得揀的包括:你父母、你的國籍、你家族是顯赫定貧窮還是普普通通——以上,先驗地決定了你的身份。你的身份主宰了你很多,但又(似乎)主宰唔晒。
3.死都要你揀的就大把:生活,工作,事業,家庭,電視機,洗衣機,車,CD,電動開罐器,健康,低膽固醇,牙醫保險,定息貸款,屋,朋友,衫,行李箱,各種布料的西裝……以上,是《Trainspotting》一開波就由男主角Mark所提及到的。
4.選擇,令我們(誤)以為擁有了自由,而快樂地投入地去揀;但Mark不同,這個(天生便注定是蘇格蘭人的)青年,面對大量選項,索性統統唔選,又或懶得去選。
5.「I chose not to choose life. I chose something else. And the reasons? There are no reasons. Who needs reasons when you’ve got heroin?」——我選擇不去選擇人生。我選其他。原因?冇原因。有了海洛英還需要甚麼原因?Mark如是說。1996年,當坐在戲院、將面對畢業後揀乜工(嚴格來說是揀寄求職信去邊度等人哋揀)的我,看著電影那超級精彩的開場,我茫然,茫然在讀咗咁多年書,竟然從來冇一本教課書、冇一個搣時或阿Sir,能夠如此準確指出真正關乎我整個人生的事。
6.當然我不是說海洛英及各類軟性毒品才是人生必需品——真正重要是,原來我絕對有權唔去揀,乜都唔揀。當然,我冇咁做,1997年5月交埋最後一份Paper,我就快手寄出5封應徵信,等人哋揀我去In……但很多同學比我更快手,早在一年前已經摸熟就業市場,選定未來事業方向,然後寄信,In定先。
7.1996年香港,還沒有「廢青」這稱呼,但我心知肚明如果畢業後不立即搵到一份穩定工作,就同廢人無異。回看《Trainspotting》裡的Mark,何只廢,仲吸埋毒,毒品令佢誤以為全蘇格蘭最污糟廁所內屎塔的屎水,是一個寧靜澄藍的海洋,可以暢游其中。他多次試圖戒毒,但戒極戒唔到,他總能想出一個完美原因說服自己食番;直至有一天,把毒針打進血管後,昏迷,入廠(這時候配樂竟然是Lou Reed的《Perfect Day》);出院後,對他不離不棄的老竇老母決定鎖佢喺房,用最原始方法令佢遠離毒品——他成功搣甩毒癮。然後,健康的Mark恍如新造的人,到了光鮮整潔的倫敦做地產經紀,過著世人眼中健康進取的資本主義式生活,直至佢班豬朋狗友搵佢參與一宗賺硬的毒品買賣……
8.二十年前,是甚麼原因驅使我睇《Trainspotting》?是被雜誌介紹吸引:A.Danny Boyle拍攝技巧極度有型;B.片中穿插大量英國經典搖滾金曲(當時正值我學聽歌):C.男主角Ewan McGregor型到痺(還有我自行發現的D.——首次拍戲的Kelly Macdonald靚到爆)。只是點估都估唔到,齣戲給我的竟是如此深邃的人生反思。
9.二十年後,我看到朋友Share的《Trainspotting 2》Trailer,看見那個在二十年前給我演繹了一次生命選擇的Mark,以及佢班別來無恙的豬朋狗友,還有步入中年依然美豔動人的Kelly Macdonald……我感動到想即刻喊出嚟,同時諗緊好唔好撳個Share掣——最後,冇。我專登揀唔撳,在愈來愈多嘢唔到我揀的景況下,我要確保自己還擁有這麼一個微小而卑微的選擇(前設當然是:我選擇了成為Facebook用戶)。
10.有得揀嗎?有,大前提是在一生不可自決下,選擇做一個努力返工以便買樓結婚得閒去旅行散心的人——買邊度娶(或嫁)邊個以及去邊度旅行?全部由你話事。


90年代,可能是我們最後的快樂時代。
撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk
浪漫 月巴 巴睇 90s 巴氏 有得 得揀 你都 都唔 唔係 係你 人生 老闆 2016 11
PermaLink: https://articles.zkiz.com/?id=315390

浪漫月巴睇90s - 月巴氏 夢遺大師,不麻木的夢。 2016年11月25日

1 : GS(14)@2016-11-28 00:01:28

http://www.am730.com.hk/column-339150

在劉以達Facebook專頁,看見他和明哥的一張合照:二人身後的馬路沒有天使,只見多條行車線,都塞滿了目的地不同的迷惘夜車。
1.2016年,達明出道30周年。
2.回到二十年前的1996年。「達明」拆夥後,黃耀明已推出了他個人音樂代表作《愈夜愈美麗》,劉以達也大膽呈獻了他演藝事業堪稱最重要的一句對白——「大~夫~」
3.那是農曆新年。記得我在沙田娛樂城唔知邊間戲院裡聽到這句「大~夫~」(配合埋那個擘開雙髀的動作)時,真的,笑到嘔電(我專登用番一個比較90年代的形容)。
4.講真,即使沒有了劉以達的情報人員角色,依然無損《大內密探零零發》的好笑(我一直認為這是完成度最高的周星馳電影),但有咗,又的確Add了Value——這肯定是90年代香港電影名場面之一,也構成了很多人記憶中的「劉以達」形象。
5.是的,一位在80年代中寫下那麼多動聽有型(兼且而家聽番依然不過時)歌曲的音樂人,在很多人記憶中,就只剩低一句「大~夫~」(以及那個擘開雙髀的動作)。
6.你可能會立即補充:Hey,仲有一代高僧「夢遺大師」喎。千萬不要數漏,因為方丈好小器……Yes,同年年尾,又是沙田娛樂城,又是唔知邊間戲院,當我睇見呢位夢遺大師怎樣令食神度一切苦厄,頓悟,終於煮出一碗集合一切塵世悲苦的黯然銷魂飯時,我再一次,笑到嘔電……而「夢遺大師」,也成為了香港電影史上其中一位最重要角色。從此得出了一條算式——(大~夫~+擘大對髀)x「夢遺大師」=劉以達。劉以達的音樂人身份,彷彿消散了。可悲嗎?外人如我看在眼裡,是戥佢可悲的。
7.同一年,在《大內密探零零發》和《食神》之間,在哀怨地叫「大~夫~」和變身成「夢遺大師」之間,劉以達推出了一張極.重.要專輯,《麻木》。
8.《麻木》不是劉以達在「達明」拆夥後第一張音樂作品。1993年,他就以「劉以達與夢」名義推出了一張《末世極樂》,此外又為《誘僧》配樂,並獲頒香港電影金像獎最佳電影配樂以及台灣金馬獎最佳原創電影音樂(90年代初,香港電影曾經頗重視電影配樂,重視到會專誠推出收錄配樂的Soundtrack)。音樂上,《末世極樂》是劉以達多元音樂範疇的一次延續,而且,有極明確主題——不是談情說愛,而是(竟然)在回應97來臨,甚至把將這個將來臨的時刻,與末世連上。無奈,那位單字一個「夢」的女聲,實在承載不了這主題,跟劉以達式音樂也夾不來,好似你有你彈佢有佢唱咁。
9.《麻木》不再由一個人唱晒。歌者包括:關淑怡、王菲、胡蓓蔚及黃秋生等——以及劉以達本人。音樂上,以東方樂器x西方搖滾結合成不能被輕易分類卻又好聽而絕不媚俗的歌曲(王菲《流星》和關淑怡《繾綣28800 BPS》好聽到核爆);而主題,則由《末世極樂》的香港處境,擴展到生活世界與人的關係:(當年冇歌手會唱的)環保議題、人類永恆(滿足不了)的慾望、人的自處等等;有些主題處理,事隔廿年後聽,是有點稚嫩(例如對環保問題的切入,不過歌詞唔係由劉以達填),但置放於1996年香港,超前,廿倍。
10.誰不想Keep住有型?回看《麻木》裡、黃秋生主唱的《變身》,劉以達的歌詞這樣寫道:「變換無定世事難料/轉換形象最後睇你」——當你明明很嚴肅,但世人似乎懶理你的嚴肅,何妨轉換一個搞笑形象,畢竟嚴肅還是搞笑,都可以是認真的表現。外人點睇,理唔到;最重要是,由始至終,自己沒有變得麻木。(至於日後劉以達信了教,推出福音音樂,則是另一種回應世界的方式。)


90年代,可能是我們最後的快樂時代。
撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk
浪漫 月巴 巴睇 90s 巴氏 夢遺 大師 麻木 的夢 2016 11 25
PermaLink: https://articles.zkiz.com/?id=317258

浪漫月巴睇90s - 月巴氏 明哥,原諒我們快樂不知時日過! 2016年12月02日

1 : GS(14)@2016-12-04 23:36:52

http://www.am730.com.hk/column-339856

寫一篇時,我正在聽《四季歌》,一首我不知道已經聽咗幾多次的歌。

1.《四季歌》,收錄在1993年《借借你的愛》,黃耀明第二張個人專輯。
2.呢隻碟,好聽到Crazy。講堅,收錄的每一首歌都是極品,如果你要我推薦,我會諗都唔諗地推薦晒全隻碟;如果你話只能推薦五首,那麼,我會答你冇可能囉,因為至少都要推薦六首囉:不計《四季歌》,還有《每天你愛多一些》、《不夜情》、《邊走邊唱》、《愛比死更冷》、《忽爾今夏》。
3.不像對上一年的專輯《信望愛》,歌曲涉及較多主題,《借借你的愛》表面上,就是一張情歌專輯。上世紀90年代初,這取向很正路,畢竟人人都在唱情歌,每個歌手都在(懶係)深情地演繹由別人寫下的怨憎會愛別離——四大天王任重而道遠,自然要唱;二三線歌手,也要唱;男唱時,女亦有需要唱……總之,成個樂壇各式人等都在製造情歌唱情歌。聽歌的人,就在那一大堆情歌中找到(似是而非的)共鳴。
4.實際這歌怎可替你感覺?取向這麼單一的樂壇又有冇問題?——Sorry,根本冇人得閒理,因為市道好景。在一片好景中,人通常變得麻木,不會反思。


5.黃耀明卻有反思。不是等到事過境遷才反思,而是當整件事正以現在進行式發生時已經反思,《借借你的愛》就是他對當年那片情歌氾濫景象的一次反思。專輯名字,改自劉華名曲《謝謝你的愛》,一個「借」字,明指借用了別人的歌,暗指樂迷集體借用別人的歌去表達自己。《借借你的愛》也是一首歌,歌詞跟《每天你愛多一些》相同(只是編曲不同),《每天你愛多一些》,一望就知是改自學友名曲《每天愛你多一些》;周耀輝填的詞,也擺明借用了某些天王情歌:「是不是這夜晚/今夜你來不來」,就是呼應黎天王《今夜你會不會來》;「一生不變幻的真心/學友多麼讚頌愛」,就擺明唱緊學友《一顆不變心》……配合埋黃耀明刻意甜美的唱腔,成件事,已不是單純的低層次抽水,而是曲線地叫大家反思:反思音樂人持續而密集地輸出情歌&聽眾持續與來者不拒地接收情歌,究竟是甚麼一回事。睇埋個MV,黃耀明更穿上當時天王最愛著的那些鮮色西裝,加上甜到漏水的笑容……事隔多年後睇番轉頭,當年那個所謂音樂盛世,原來好滑稽好荒謬。
6.無奈是,當世人都掛住沉溺在那片一望無際的情歌汪洋,唔係咁多人留意到黃耀明的反思,他在音樂工廠時期的歌也成為了滄海遺珠(去iTunes都搵唔到);直到1995年《春光乍洩》這一首(其實暗寫情慾的)情歌,才吸引到大眾去聽黃耀明的聲音。(之前已寫過《愈夜愈美麗》這專輯,如有興趣,可睇番「浪漫月巴睇90s」第十篇《當世界無玫瑰,下世紀再嬉戲……》)


7.到了1997。講堅,我已經唔記得那一年邊首歌Hit、邊個同邊個攞最受歡迎男女歌手,但點都記得,黃耀明專登揀了不同年代的著名廣東歌翻唱(其實在《愈夜愈美麗》他已Cover《風雨同路》),不是單純改了編曲換了唱腔,而是在那一個特別的年份,他為那批歌唱出了另一重意義,一種指涉著港人共同命運的時代意義。
8.《輪流轉》是人在世事紛陳兜兜轉轉局面下的無奈;《最後一夜》由浮世男女共度最後一夜,變成港人共度殖民地統治最後一夜;《血染的風采》以咆吼式唱腔渲染一個大時代的癲狂;《友情歲月》把視野狹獈的江湖情擴大成無所不包的香港情,唱出了一種鄭伊健永世也唱不出的深邃層次。
9.流行曲,在其他人手上可能只為賣錢,在明哥眼中,卻可以用作反思——既反思同時代社會現象,也可以把一首舊的歌置放進新的場域,賦予另一重意義,審視、反思歷史。會這麼做的,成個樂壇,得明哥一個。
10.而其他人就快樂不知時日過,又或失驚無神公開作出不可背祖忘宗的醒覺。


撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk
90年代,可能是我們最後的快樂時代。
浪漫 月巴 巴睇 90s 巴氏 明哥 原諒 我們 快樂 不知 時日 2016 12 02
PermaLink: https://articles.zkiz.com/?id=318258

【食完先減】喪食韓燒唔怕「月巴」韓妹一晚爆食五餐

1 : GS(14)@2017-01-06 02:07:52

李聖經飾演舉重選手金福珠,身形有份量,仲有返咁上下食量。(《舉重妖精金福珠》截圖)



【三個粉絲追韓劇】李聖經喺韓劇《舉重妖精金福珠》飾演舉重選手,除咗身形有份量,仲有返咁上下食量!為咗食到盡,金福珠喺烤肉店教後輩一招「生、料、炒、冷」,話係最高效率食法!金福珠話:「喺烤肉店亂咁食,好快就會飽,生、料、炒、冷就減少呢種錯誤,產生最高效率食法!」生,即係首先食原味肉;料,第二食醃肉;炒,第三食炒飯;冷,最後以冷麵收尾。原來呢種食法唔止係舉重選手嘅策略,普遍韓國人都係咁食!



佢提出「生、料、炒、冷」,話係最高效率食法!(《舉重妖精金福珠》截圖)

大部份韓國人話,佢哋都係咁食法!

韓男Kim Sang Hyeon話以冷麵收尾,就好似食「Dessert」。

三個粉絲喺街頭做訪問,發現所有韓國人都贊同呢種食法,話按呢個順序會好味啲、食多啲、唔會​​膩。韓女Son Hyeoun Ji話先食原味肉,再食醃肉,仲可以避免鐵板會因為醃料而燶。韓男Kim Sang Hyeon就話以冷麵收尾,就好似食「Dessert」。唔好誤會韓國人所講嘅​​Dessert係甜品或者糖水,佢哋嘅Dessert係韓文嘅「후식」,即「後食」嘅意思,就係一餐埋尾嘅食物。後食除咗有冷麵,仲可以係糕點、生果等。而韓國人覺得食烤肉,後食應該係冷麵,咁先最滿足。其實「生、料、炒、冷」呢種食法,份量真係唔少嘢,究竟係咪真係可以食多啲,食得晒?動主播阿仙同Viu韓劇導賞員阿愁就親身試過,測試結果係點?即刻睇片!



動主播阿仙同Viu韓劇導賞員阿愁親身測試咁食法係咪真係食多啲,食得晒,結果係點?即刻睇片!

韓仔韓妹話有時一餐食好多,或者一晚轉幾場,最勁食五餐!

除咗一餐喪食,韓國人仲好興轉場,一晚食幾餐,尤其係Happy Friday,就算韓女都話自己可以食3至4餐,Lee Sa Yun更加話自己一晚可以食5餐!咁多餐係食啲咩?包括食烤肉、飲咖啡、飲酒、唱K等,韓男Kim Sang Hyeon話自己去5場,5場都係專門飲酒嘅地方!咁食法,韓男O Min Woo笑住話:「係好飽,但係都繼續食!」韓女Cho Hyeoun Jung都話係「飽到爆」!不過咁多餐其實係慢慢食,以Happy Friday為例,放工開始食,食到凌晨都差唔多4至5個鐘,加上中間可能去唱K,消耗咗啲體力,又可以再食過!不停食嘅後果,當然係會肥,劇中金福珠就試過畀錢去減肥中心瘦身。韓女Lee Ji Young就話減肥係​​成日都做緊,唔會畀錢去減,只係自己節食,例如選擇唔食早餐,或者早午餐食得簡單啲,同埋多啲行路。而Viu韓劇導賞員Ruby就對食極唔肥有套特別理論,「我嘅朋友食烤肉,會用生菜包肉又包飯,我就只會食肉,聽韓國朋友講,可能我食肉同食飯係分開,所以食好多都唔肥。」係唔係真係得?咁就要你自己測試下喇!



咁食法,梗係肥死啦,劇中金福珠畀錢去減肥中心瘦身。(《舉重妖精金福珠》截圖)

韓女Lee Ji Young(左)就話幾時都減緊肥,唔會畀錢去減,只係自己節食。

場地提供:Pork University(돼지대학교)地址:首爾市麻浦區合井洞413-26(서울시마포구합정동413-26)電話:02-338-8293主持:動主播阿仙、Viu韓劇導賞員Ruby和阿愁記者及繙譯:卓惠媛(Joyce)攝影:陳家文、李錦鏵《舉重妖精金福珠》片段由Viu提供:
https://goo.gl/7etgRS【三個粉絲追韓劇】
http://hk.apple.nextmedia.com/enews/animation/kfans/




來源: http://hk.apple.nextmedia.com/entertainment/art/20170105/19886604
食完 完先 先減 喪食 食韓 韓燒 燒唔 唔怕 月巴 韓妹 妹一 一晚 晚爆 爆食 食五 五餐
PermaLink: https://articles.zkiz.com/?id=321509

浪漫月巴睇90s: 月巴氏 賭俠陪我歡度「後金融風暴聖誕」 2016-12-23

1 : GS(14)@2017-01-24 03:33:53

https://www.am730.com.hk/column/ ... aa%95%e3%80%8d-5107

1998年聖誕,我已是個返緊工的成年人。當年每一個成年人,都需要面對金融風暴(所招致的後果)。


1.但,又到聖誕喎。佳節當前,點都要開心吓。要開心,自然要搵節目。
2.於是我去了看《賭俠1999》。散場,我唔算好唔開心,但肯定稱不上開心。真正感覺是:我好似被人狠狠地摑了好多巴。
3.入場前,我一心以為陳刀仔回來了,即使沒有星仔同行,但應該點都會把當年睇《賭俠》時的亢奮——就算少少都好,帶俾我吧。
4.「賭俠」原來只是一個沒有任何指涉的虛名。劉德華的角色名字,不是刀仔,而是阿King。一個一出場就剛剛搵完情婦減壓相當無情的——老千。《賭俠1999》的Universe再沒有甚麼賭俠,而只得一班老千。
5.這是一齣起圍好現實,一開始已摑醒了我的電影。不像90年代初盛行一時(但濫拍到拍無可拍)的賭片,再沒有好架勢的「神、聖、俠、霸、王」,有的,是「千門八將」:正、提、反、脫、風、火、除、謠。「正」,專門出面賭的;「提」,負責設局呃人;「反」,專用女人呃麻甩佬;「脫」,幫人事後甩身;「風」,收風;「火」,有事時用武力解決;「除」,講數;「謠」,製造及散播謠言,讓被千者更易入局……各有職分,媲美古代「吏戶禮兵刑工」,而且仲多兩個部門。
6.阿King所扮演的是「正」——老正。他曾經以為自己天生注定是贏家,人生最大目標,是跟傳說中坐擁超龐大賭業王國的「馬交文」賭番鋪……直至在搵完情婦減壓後的一場賭局(嚴格來說是千局)中,臨尾香,失手,仲殺埋人,順利踎監;踎監期間,他頓悟,明白「十賭九騙」這真理(但他以前不是一直做老千的嗎?Why而家先明?),於是決定努力進修,學習用電腦儲存、分析賽馬結果,快人一步進入大數據年代。但無論點改變自己,他都改變不了一個事實:他永恆地失去老婆以及尚未出生的兒子。
7.當日在戲院睇完以上一段序幕,心,已經唔知沉咗去邊。
8.好在有化骨龍。之後的故事,就是描述阿King出獄後與化骨龍的相知相遇,既讓化骨龍(呢個熱愛賭錢的九流古惑仔)明白「十賭九騙」(其中最大快人心的一鑊是,智破由黃子揚呢個警界敗類所操控的射龍門騙局),也讓化骨龍個妹知道自己原來一直俾隻鴨呃(鴨叫Raymond周,自稱喺美國普林斯頓大學攻讀經濟,個個月需要化骨龍個妹寄錢接濟,但真身原來是專媾「驅風行血老耆英」的鴨王)。Yes,《賭俠1999》的世界只有兩類人:呃人的人&被呃的人——就連深諳塵世間諸種呃人伎倆百毒不侵的阿King,原來都一直俾人呃。
9.《賭俠1999》時而悲情時而好搞笑,到最後甚至出現堪稱史上最離譜的騙局(也是張家輝/化骨龍生命中一次經典演出),個感覺,的確好難捉摸,但有一點倒是一以貫之——成齣戲由頭到尾都在努力拆散、瓦解90年代初那個賭片(濫拍)熱潮下,所營造的虛假浪漫世界,把曾經沉浸在那片虛假浪漫中的我們一嘢拉回現實——現實就是:你以為自己贏梗?其實一直被千咋傻仔。然後,金融風暴唔該都冇聲就殺到,世上從此滿布被千的人,過其千後餘生。
10.言猶在耳。「你講嘢吖?乜嘢叫做賭神呀?而家乜嘢咁巴閉吖,咪係啲老千仔~」《賭俠》一開波冇耐就出場的CN戴如是說。
浪漫 月巴 巴睇 90s 巴氏 賭俠 俠陪 陪我 歡度 金融 風暴 聖誕 2016 12 23
PermaLink: https://articles.zkiz.com/?id=323857

浪漫月巴睇90s: 月巴氏 賭俠 陪我歡度1990年聖誕 2016-12-16

1 : GS(14)@2017-01-24 03:35:09

https://www.am730.com.hk/column/ ... 81%96%e8%aa%95-3730

有些電影對白,你真係會一世都記得。



1.「昨日,我菲律賓工人行過街市,聽到有個賣魚佬講話有條友仔叫做賭神——係你,哈哈哈哈哈……我當堂嚇一跳,然後得啖笑,呢個世界,居然有人自稱為賭神,咁即係分明當我流啫——嗱我就叫做賭聖!你賭啤都要戴隱形液晶體眼鏡吖,我就睬你都嘥氣直情睇穿牌嘅,呢啲就係叫做特異功能;呢度有隻煙屎,只要我輕輕一啜,就即刻變為一隻……巢咗嘅煙屎,因為我未發功吖嘛,我發咗功呀變副麻雀出嚟都得。睥——咩吖?學嘢唔使錢吖?抄低我聯絡電話係香港3345678,我再重複一次,係香港3345678。你唔搵我我冇所謂,因為呢啲係你嘅損失。十點後唔好打嚟,因為我瞓咗。」

2.曾幾何時我真的可以在同學面前一字不漏地將以上對白背出來——嚴格來說,不是背,是演繹,有表情有動作有埋抑揚頓挫嗰種。其實,我可以演繹得更好,只要有女同學願意為藝術犠牲——扮演賭聖身旁嗰位正職夜總會小姐的「王晶姐姐」。如果你記性好,應該記得當賭聖講完「我當堂嚇一跳」後,會叫對方攞碗麵出嚟;講完「然後得啖笑」,就擘大口食啖麵——以上都唔難,最難是呢一下:當賭聖講完「呢啲就係叫做特異功能」,就再次呼喚「王晶姐姐」,身穿低胸裙的「王晶姐姐」隨即醒水地從自己胸前,輕輕地,不徐不疾地,潛出一隻「煙屎」……

3.「發.神.經。」就像刀仔睇完那餅自薦Video之後的反應,這是女同學給我的即時回應(回想,佢哋唔告我,已經要還神)。


4.《賭俠》,肯定是令我呢世人在戲院場內笑得最奔放的電影。

5.那是26年前、1990年聖誕假期。我讀緊中三,正面對人生一個重要關口——隨時不能在原校升讀中四,但我冇理,只管跟同班同學黑鬼(仲有聯絡及見面)和另一班的同學阿業(N年冇見了),前往沙田UA6買飛欣賞《賭俠》。

6.發.神.經。我們買的明明是中午場次,竟然剩番頭三行位置,我們仨只能買到第三行、最側邊的戲飛。事實證明,悶嘅戲,坐得再comfortable一樣會全程坐立不安;正嘅戲,卻會令你渾忘了毫不舒適的坐姿。

7.成齣戲基本上找不到半滴冷場。由一開波賭俠輕鬆賭贏CN戴,到星仔倒立出場;然後兩叔姪登門造訪拜師(但賭俠回港行蹤不是好神秘的嗎?),到殺手殺上門,刀仔星仔逃過一劫,並以賭俠賭聖名義上船決戰老千侯賽因,點知中伏,中了對方的電腦偷窺陷阱輸到身敗名裂……成個過程有笑有淚兼而有之,但最正的還是:到最後,二人痛定思痛,以刀仔星仔的素人身份再戰侯賽因,用借來的廿蚊,贏夠三百萬美金,參加慈善啤王大賽,攞番晒失去咗嘅嘢!絕對比起塵世間所有正規勵志片更加勵志!


8.即使在日後我也看過不少超正香港電影,但就是沒有一齣,能夠俾到我當日睇《賭俠》時的超級亢奮,一種又喊又笑兼夾勵志的亢奮。裡頭冇一個角色多餘,不計作為主角的刀仔星仔和三叔(吳孟達令我笑到噴水!),就連夢蘿、龍五、龍九,甚至明明喺公廁小緊便但因為聽到自己個名而標出嚟的「X家剷」,真的,統統一個都不能少。最不能數漏的,自然是「你簡直係卑鄙下流,冇深度兼無厘頭;教壞晒啲後生仔,敗壞社會嘅風氣」的Final Boss侯賽因,單立文交出了生命中一次經典難忘的演出。

9.事隔多年,我依然忘不了那個坐第三行最側邊同黑鬼阿業以及成場三唔識七的人,一齊狂笑爆笑怒笑的聖誕節。今時今日的我們可能嚴肅了,今年聖誕,想搵齣笑片都難。

10.有一點我咁多年都唔明。Why星仔和阿叔的屋企會裱起一幅賭神專注賭啤時的沙龍?賭神唔係從來唔影相嘅咩?


90年代,可能是我們最後的快樂時代。

撰文:月巴氏

facebook: https://www.facebook.com/fatmoonba

blog: http://fatmoonba.blogspot.com/

email: fatmoonba@yahoo.com.hk
浪漫 月巴 巴睇 90s 巴氏 賭俠 陪我 歡度 1990 聖誕 2016 12 16
PermaLink: https://articles.zkiz.com/?id=323858

浪漫月巴睇90s: 月巴氏 曾經有個高中生, 趕返屋企睇 朱茵~ 2017-01-13

1 : GS(14)@2017-01-24 03:36:15

https://www.am730.com.hk/column/ ... c%b5%ef%bd%9e-11091

請明瞭,我心癡,這是毫無心理準備下突然想寫的一篇。


1.初中年代的我是個熱愛球類運動的小夥子。每個放學後,例牌駐守籃球場,揮灑青春的汗水……


2.上了高中,不再打波——我給波友們的解釋是:要預備會考了,不得不放棄Basketball。狀甚無奈的我從此謝絕波友們邀請。


3.其實我只是為了一放學即搭81K返屋企,然後連校服都唔換,趕住收看《閃電傳真機》——嚴格來說,是為了欣賞朱茵。


4.朱茵有甚麼吸引我?我不知道,只知道1992年某一天睇完《逃學威龍2》,腦海便Keep住浮現她——她在戲中的一舉一動一顰一笑、她的嬌嗔和嬲怒、她對愛情抱持(過分)浪漫幻想的天真,以及佢個靚樣——Yes,吸引我的,就是所有構成她的物質與非物質元素。我明顯將戲中那虛構的「Sandy」跟現實的「朱茵」,混淆了。


5.我不知道自己把那餅經由Laser Disc複製的錄影帶翻炒了多少遍(但其實我不認為《逃學威龍2》好睇,根本只是將首集Copy一次,但又冇晒首集趣味),只知道自己深深被這個100%的女孩吸引,書又唔溫,波又唔打,不能自拔……


6.1993年,對朱茵來說是極重要的一年。電影,她拍了《超級計劃》(可惜她的角色可有可無,主要用來製造危機)、《的士判官》(可說是女主角,但因成齣戲由始至終的主角只得一個:黃秋生,做吳孟達個女的朱茵其實純屬配角,作用,是為那個暴戾的Universe加添一點可愛和調皮,以及吸引男性觀眾如我入場觀看)、《風塵三俠》(也是配角,但如果冇咗佢,成齣戲要扣五十分)——但最重要的還是兩齣電視劇,《原振俠》&《都市的童話》,而當中又以《都市的童話》更重要。


7.故事的主要設定,應該參考了桂正和《電影少女》——一個虛擬少女錯誤地來到現實世界,不自覺地跟人類男主角日久生情,嚴重地愛到不能自拔,但又無奈地注定不能一起,嗚嗚。配合埋由黎明主唱的主題曲《傻癡癡》,實在為我帶來一種如夢似幻但又有層悲哀墊底的甜絲絲感覺。這種複雜(到要動用多組形容詞來描述的)感覺,在電視史上,只有《都市的童話》帶過給我。你可以話有冇咁誇張吖,但,就係咁誇張。


8.最大功勞是朱茵。且讓我再誇張一點:朱茵絕對是上世紀90年代初最重大的發現——唔知點解地,她就是能夠為一個普通角色Add上難以估計的Value,把普通變得好唔普通;而如果,好彩地,角色本身已經寫得極度精彩,朱茵就更能動用她那得天獨厚的特質,讓該角色成為不能磨滅的經典——例如,紫霞仙子。


9.她就是這麼與別不同,單憑一雙眼已足以訴說塵世間各種不同情緒。只是到了後來,可能為了挑戰自己、或開發自己更多可能,又或……我都唔知點講好了,總之就是走去同馬德鐘拍那齣甚麼誘惑……OK,你可以話我偽君子,但看在眼裡,我是傷心的。


10.好多年後,當我正在為「浪漫月巴睇90s」煩緊寫乜時,「朱茵」這名字突然在腦裡唔知邊忽閃過,然後寫了以上一大段字,我終於明白:朱茵絕對是構成「我的90年代」中不可或缺的重要成份。只是當年那個為了收睇《閃電傳真機》連波都唔打的月巴,就像《都市的童話》的她,化成泡沫,煙消雲散。這一刻有點感觸的我,只想祝福朱茵永遠快樂。
浪漫 月巴 巴睇 90s 巴氏 曾經 有個 高中生 高中 趕返 返屋 屋企 企睇 朱茵 2017 01 13
PermaLink: https://articles.zkiz.com/?id=323859

浪漫月巴睇90s: 月巴氏 曾幾何時,入場為了睇周星馳(上) 2017-01-20

1 : GS(14)@2017-01-24 03:37:52

https://www.am730.com.hk/column/ ... 6%b3%e4%b8%8a-14326

上星期在觀塘睇《天煞異降》,開波前,先送上由周星馳和徐克親身演繹的《西遊伏妖篇》第二段trailer,即徐克玩緊扭計骰,周星馳上前話啲電腦特技好正嗰段……


1.全.場.靜.默。不是單純冇笑那一種靜默,而是根本連些微反應都沒有的死寂。不是咁邪吧?我立即四圍望,咦唔係冇人喎,仲坐滿了4/5觀眾。

2.Why會咁?我明明經歷過一個只要見到周星馳(就算企棟棟保持緘默)都必定全場爆笑的年代,而我,亦自然是其中一個,仲係笑到最癲嗰個。

3.於是突然想回顧那一個周星馳嚴重支配我們面部神經的90年代。就由1990年開始。那一年,周星馳已經OK紅,而當年不少OK紅的電視演員,都會拍埋戲(今時今日反而壁疊分明),而事實是,他早在1988年已經開始拍戲。

4.但那段時間的戲,大抵都抓不住(又或根本冇諗過要去抓住)周星馳的個人特點——嚴格來說是都抓不住當時觀眾喜歡的周星馳個人特點。

5.還有一個嚴重問題:濫拍。睇番1990年,10齣。除咗1月、11月和12月,每個月都有周星馳(掛帥的)電影上映,當中除了5月《咖喱辣椒》和8月《賭聖》真正奠定他的地位,其餘的,應該都冇乜人會再提,只當是香港電影市道興旺時,亂咁拍的過眼雲煙——偏偏我有睇晒,我當時實在太鍾意睇周星馳嘞,但再鍾意,理性還是要話俾我知,拍得極度粗疏的《一本漫畫闖天涯》實在唔算好睇,最好睇嗰場就只是周星馳上台高歌「你老竇有身紀~紀~紀~紀~~恭喜~恭喜!」,問你死未?《風雨同路》,根本唔需要搵周星馳拍囉。《小偷阿星》,主角由始至終都是陳觀泰,海報卻用周星馳個大頭作招徠,呃鬼我。《師兄撞鬼》其實唔太差,但周星馳明顯擠唔入驃叔和馮淬帆個Universe……還有(牌面好笑其實好悲的)《龍鳳茶樓》、(真係得啖笑的)《無敵幸運星》、(完全唔識形容的)《江湖最後一個大佬》——問題是,即使成齣戲再有問題,周星馳的演出部分其實冇問題,只是那一年的他仲未能夠單靠個人光芒去凌駕成齣戲。

6.當然,之後再冇呢個問題。1991和1992那兩年,他拍戲數量依然嚇死人,但每一齣都收得(最唔收得是《情聖》,個感覺太80s,不合時宜,但都收過千五萬喎)。當年的我太Crazy,每一齣我都例必入場觀看然後再租LD並Dup成帶以便不時翻炒,在我眼中,周星馳電影只有「好睇」和「好好睇」之分,甚至被植入一種觀念:他的電影充分展現「後現代主義」(而我當時連「現代主義」係乜都唔知)。

7.但到了現在,我會說,那一批在90年代初相當收得的周星馳電影,並非每一齣都是佳品——票房數字(這種數據)所反映的不是質素,而只是熱潮,熱潮就是一種社會大多數人都在參與(而未必理性的)的事;至於所謂「後#現代主義」的展現,不過是有些人(食飽飯冇屎屙)對熱潮所做的一種詮釋,一種過度詮釋。或許,「無厘頭」的興起,真的跟「後六四」情緒的釋放有點關係,但其實,香港人一直都咁鍾意睇笑片,就像80年代某些明明不旨在搞笑的戲,都要夾硬攝入大量搞笑場面和情節。

8.「周星馳笑片」,一種轉變了形態的香港笑片——不再像過去般純以情節作為產生笑意的主導(以便由任何演員去演,觀眾都會識笑),變成了必須要由周星馳本人親身去做,總之一切都要由他主導,才能真正直達爆笑的根源。唔信?不妨看看古天樂事隔多年後,將《家有囍事》常歡所患的「無定向喪心病狂間歇性全身機能失調症」重新演繹……那一刻,我是戥佢尷尬的。

9.原來當時的我,入場只是為了睇周星馳個人表演——但,咁仲算睇戲咩?一齣真正好電影,包含的應該更多更多;好在,1994年及之後幾齣周星馳電影,都是真的好電影。但冇位了,下星期再講。

10.補充少少:1990年周星馳還有一齣《望夫成龍》,一對夫婦由鄉間走進城市,感情由鄉間的純真,到城市後逐步變異。成齣戲近乎完全不搞笑,但真摯動人。
浪漫 月巴 巴睇 90s 巴氏 幾何 入場 為了 周星馳 2017 01 20
PermaLink: https://articles.zkiz.com/?id=323860

浪漫月巴睇90s: 月巴氏 感謝上官小強 2017-01-27

1 : GS(14)@2017-01-31 18:13:59

https://www.am730.com.hk/column/ ... 0%8f%e5%bc%b7-15822

是《小強漫畫集》帶我進入港漫世界。

1.這個港漫世界,跟一般(從來唔睇甚或蔑視漫畫的)人所認知的,好唔同。


2.一般(從來唔睇甚或蔑視漫畫的)人所認知的港漫世界就是:打打殺殺。咁又難怪,因為長時間在書報攤所能買到的主流港漫,就是打打打打打打打打打打打打和殺——不同漫畫的不同角色在不同Universe,同樣需要終日面對不同戰役,打得贏自然好,唔夠打?就要練功。好彩(定唔好彩?),有大把強勁武功等住佢哋去練,練完,又再打……他們的命運,恍如希臘神話的薛西弗斯,分別是薛西弗斯永恆在推一塊永遠會碌番落嚟的石頭,港漫的主角們就Keep住打一班永世都出唔完的高手(但我承認,當日睇住王小虎用「霹靂狂龍」踢爆火雲邪神時我超級興奮)。


3.《小強漫畫集》給我看到的,完全不同。基本上冇乜涉及打鬥的漫畫,有的,是題材、畫風、表達、技巧上完全不劃一的短篇作。這些短篇作,絕大部分均由一群當年的漫畫界新人(有一些甚至是助理)負責。


4.Yes,《小強漫畫集》就是一本沒有固定題材、專俾機會新人發表作品的漫畫結集。這本結集的出版時間是——唔知,因為是不定期刊。


5.所以每當行經書報攤瞥見出版了最新一期《小強漫畫集》,就會不禁Yeah出來;假如咁啱撞正是由邱福龍精心繪製的封面,更是Yeah上加Yeah——全靠《小強漫畫集》,才讓我知道香港原來有一位彩稿極度強勁的人物,兼且最叻畫機械人幪面超人異形怪獸等等,一般香港漫畫家唔會畫的題材事物。我永世難忘那一個S.F.3.D.機械人的封面。


6.邱福龍以外,《小強漫畫集》還先後讓我認識了:利志達、甘小文、羅永康、祖兒、狄克、大粒墨等等。他們的作品讓我知道,原來在那個招式不同但本質相同的打打殺殺表象下,有一班欠缺知名度的香港漫畫家,努力用不同方式去畫不同故事,而因為上官小強,他們得到了難能可貴的發表機會。只要你(曾經或依然)有創作,自然明白創作人最需要的,就是發表機會。


7.因為《小強漫畫集》,我開始睇埋《壽星仔》。問心,我不認為故事超級好笑,而只會說,《壽星仔》透過對其他漫畫和電影的二次創作,唔覺意令我認識了更多漫畫和電影(例如望月三起也《七金剛》);書內極度貼地的對白,教識了我一些廣東字的寫法和應用(另一本教我廣東字的課外書是《加菲貓》中文版)。而成本書我最鍾意睇的是:A.上官小強專欄。字裡行間我感受到小強份人應該好Nice,而且極度喜愛英美音樂,兼夾留意流行事物;B.讀者投稿。分兩種,一頁完漫畫&半版篇幅的專欄,當年的我自問冇能力畫一頁有故事性的漫畫,於是決定專攻半版專欄,記憶中仲苦心孤詣地畫咗隻(甩漏的)異形皇后,結果——冇刊登,失望自然有,但反而激發我努力練畫的決心。


8.上官小強在80年代末自組公司,《小強漫畫集》繼續出版,只是名字變成《小強畫集》,而我依然期期捧場。90年代初,是香港漫畫(最後)的高潮——沒有了統一局面,各公司先後推出了足以代表港漫最輝煌時期的代表作(但同樣離不開打打和殺殺),而上官小強,繼續畫他的壽星仔、小強和彭蛇,繼續提供機會,讓擁有創作熱情的新人發表跟主流迥異的漫畫。


9.直至他退隱,與太太留守在信和「壽星專門店」。外面的港漫世界經歷風風雨雨,由掛愛情賣色情到人人爭住濫出兵器到江湖書,日日出版到市場逐步萎縮到今時今日——係點?大家有眼睇。


10.上官小強離開了,我是真的有種傷感。傷感是因為,在那個漫畫界光芒耀眼到好多人盲目的時候,上官小強為很多有志於漫畫的新人提供了機會,而他這樣做,並不因為要做甚麼漫畫大亨,或甚麼漫畫之神,而只因為他是一個好Nice的人。
浪漫 月巴 巴睇 90s 巴氏 感謝 上官 小強 2017 01 27
PermaLink: https://articles.zkiz.com/?id=324853

浪漫月巴睇90s: 月巴氏 曾幾何時,入場為了睇周星馳(下) 2017-02-03

1 : GS(14)@2017-02-06 12:10:05

https://www.am730.com.hk/column/ ... 6%B3%E4%B8%8B-16299

續上回。周星馳由一個好多戲爭住搵佢拍但仲未搵到定位的演員,好快地,變成一位人人入場就只為睇佢個人表演的喜劇之王。


1.喜劇之王,就是單憑個人之力,便可把最爛的Gag變成全場大笑的笑話。

2.但笑話的本質是甚麼?冇人得閒去理,畢竟入得場就只是為了笑。Why笑?好笑咪笑囉——曾幾何時的港產笑片,功能就只在令人笑,笑像本能,要被滿足,被餵飽。

3.撇除那些單純以演員身份參與的電影,周星馳在90年代,用了四齣戲,去拆解/探索/鑽研/提升「笑」這一回事。笑,不純粹是擘大個口的行為,行為背後可以包含一大堆複雜情緒,只不過殊途同歸以「笑」展示出來。

4.像賀歲片《大內密探零零發》,不只是效法其他古裝笑片,用一班笠住古裝的現代人,去演繹其實好Modern的笑話(古裝不過是俾人睇的表象,核心還是現代的觀念思維)。表面上,《零零發》或許也是這樣,但電影更想做的,是戲謔我們自小被灌輸的那個約定俗成「武俠世界」:原來古龍筆下的西門吹雪可以是一個地中海月巴中坑,葉孤城竟然可以是完全不型,甚至甩皮甩骨的黃一飛;決戰紫禁之巔原來是違法的,是要踎監的(武俠世界從來沒有甚麼合法違法的觀念,畢竟大俠要踎監實在成何體統)。當時在戲院一睇見呢個開場,已經爆笑,而爆笑,是建基在一種對武俠世界固有概念的幽默瓦解。

5.瓦解,還包括主角的設定。作為「保龍一族」的零零發,竟然是一個連前滾翻都打得唔好、只醉心科學研究的發明家,而不是武功高強的人(反觀其他「保龍一族」成員,又鐵布衫又五形拳,個個都好打得);偏偏就是這麼一個最唔打得的發明家,才是最有用的人——回看中國歷朝歷代,科學的頭腦根本不曾被重視。

6.《食神》則要用笑片去講一個其實極度嚴肅的故事:一個明明人間失格(但又被捧成神)的人,怎樣做回一個似模似樣的人——「人」與「非人」的最大分辨,在於有沒有「心」——而「心」,固然可以反映在行為,在《食神》裡,則呈現在一碗雪中送炭患難見真情的叉燒煎蛋飯。問心,到最後那場對決突然搬出滿天神佛埋尾,是一種失控的埋尾,也削弱了故事原有的「用心重新做人」主旨,但至少,這主旨還是一以貫之,由頭貫穿至尾。《食神》的笑,有著一種不露骨的人性感動墊底。

7.《喜劇之王》把這份人性感動再推進一步。尹天仇不像零零發及食神,他由頭到尾都沒有成功過,他唯一的成就,在於沒有離棄柳飄飄(這一個同是天涯淪落人),而就是這份完全懶理身份地位的情義,尹天仇展示了人心中最難Keep而又最Core的東西——即使他始終做不成著名演員,而只能留守在那條村,在那個冇人識欣賞佢的地方,同一班甩皮甩骨的人共演悲劇《雷雨》。「喜劇之王」,由始至終,一個反諷。

8.反諷不止於抽水。抽水,抽完就算,只有(輕輕的)破而沒有任何建立。《國產凌凌漆》是一場極強的反諷,諷甚麼?如果你睇過,應該好清楚(對比起來,《表姐,你好嘢!》就純屬抽水)。而我最佩服是那一組人物設定,以一個政治成分良好,但被喻為廁紙的廢柴特務,配一個(天生就注定的)漢奸走狗賣國賊,反諷地,合力地對付表面最義正辭嚴其實最X街的高官,好笑,笑裡卻藏悲。

9.悲到盡頭的笑,是哭笑不得的苦笑。

10.周星馳在90年代,把「笑」提升到一個過去從沒有人到過的層次。靠的,純粹是他本人的演繹以及鑽研到極其深邃的劇本。千禧後,他戀上人人都有能力去做(只是未必個個都做得好)的特技(連《西遊.伏妖篇》Trailer都不斷強調特技特技特技)。「周星馳」這名字過去所代表所包含的,被他自行瓦解。

news-images
《大內密探零零發》完美拍出兩公婆嗰份甜蜜。劉嘉玲代表作。
news-images
《喜劇之王》的尹天仇究竟是一個好演員還是渣演員?不重要。最重要,他是一個好人,而且不是做戲咁做。
news-images
去錯麗晶飯店呢一場,My Favorite。
news-images
化灰都記得呢一幕。
news-images
政治成分良好的廢柴特務配漢奸走狗賣國賊。
news-images
《食神》頭30分鐘史提芬周嗰份賤,億看不厭。
浪漫 月巴 巴睇 90s 巴氏 幾何 入場 為了 周星馳 2017 02 03
PermaLink: https://articles.zkiz.com/?id=325728

浪漫月巴睇90s: 月巴氏 沒有先旨聲明,我們置身的世界竟然是…… 2017-02-17

1 : GS(14)@2017-02-19 14:57:15

https://www.am730.com.hk/column/ ... 0%a6%e2%80%a6-66200

1.其實你根本不需要理會引言中的所謂「先旨聲明」——生命,從來沒有「先旨聲明」。在你被拋到世上擘開雙眼之前,有冇「人」懶係溫馨提示地同你把生命這回事「先旨聲明」?

2.我們都在毫無預設下,展開生命,再以不同方式演繹生命——即使大部分都係殊途同歸地返工等放工等出糧,唔覺意愛上一個跟自己同樣平凡的男或女,拍一場平凡的拖結一場(懶係不)平凡的婚,再生一個平凡細路,然後平凡地逐漸老去,死,塵歸塵,土歸土。

3.期間我們通常(甚或肯定)不會懷疑:眼前這一切,Really?

4.但Neo有問,仲成日問,問到遇上Morpheus這個關鍵人,問到問題核心,終於知道自己過去每一天所身處的世界原.來.假.嘅,只是The Matrix投射在他腦袋的感官意識在作祟,在弄虛作假。

5.關鍵時刻沒有Pizza Hut,只有由親切Morpheus遞上的兩粒藥丸:食藍色的,Neo可以回到本來的虛假日常,繼續營營役役地在那不存在的場所,虛度那根本不存在的光陰;食紅色的,Neo就可以被引領到Real World……

6.真實與虛假的世界對照,人生恍如夢一場,不是甚麼新主題(《The Trueman Show》、《Dark City》都拍過),只是《The Matrix》再進一步,抽取了Hilary Putnam「桶中之腦」這個有關知識論的思想實驗(當中涉及好技術性的論證,不是我能夠用三言兩語講得完),再加上不少哲學議題和典故(例如一開始Neo用來收藏Hacker程式的書,竟然是布希亞的《擬仿物與擬像》,極度拋書包;又例如一開始Trinity叫Neo「follow the white rabbit」,便來自《愛麗絲夢遊仙境》)作幌子,用一種OK哲學的包裝,去拍一齣極度娛樂的科幻電影。

7.娛樂性既來自故事,也包括視覺衝擊。CG在上世紀90年代初開始令我們大開眼界,像《未來戰士續集》的T-1000液體金屬機械人、《侏儸紀公園》的史前恐龍,甚至是Michael Jackson《Black or White》MV中的變臉示範,我們看見了一種過去不曾看見過的「真實」,一種被摸擬和製造出來的「真實」;到了《The Matrix》,則把Bullet Time這種真實地存在但我們肉眼看不見的時間進程,「真實地」呈現出來——偏偏又只能在由The Matrix整出來的虛假世界,才能夠睇得見。

8.Bullet Time被之後唔少戲玩到爛,真正對日後荷李活片產生超深遠影響的始終是:請來袁和平擔任動作設計。在《The Matrix》前,荷李活動作片的肉搏方式,主要是「拳拳到肉式」——你出完一拳嘞?Well,咁到我出拳咯喎——由史泰龍到阿諾舒華辛力加到布斯韋利士,一概如是;直至《The Matrix》,所展示的,是一種急速優美招來招往得來更加超現實的港式動作,畢竟功夫的出現場所,是在那個虛假世界——不單純是視覺技藝的挪用,還包括對功夫這技藝的深邃思考(題外,周星馳《功夫》動作設計絕對悅目,但如果是拍於《The Matrix》三部曲之前,才算真正強勁)。

9.講到尾,《The Matrix》將哲學+CG+功夫後,想帶出的一點無非是:醒覺。當Neo醒覺,他看透了現實不過是一個由虛假所編織成的網,知道了自己過去每一天都在虛假中過活,能夠回到真實才是無比可貴——即使個真實極其不堪。

10.至於我們,無論食Blue Pill定Red Pill,個世界都只會是七警打人罪成,而佢哋個一哥感到非常難過。我都難過,難過在覺得有冇搞錯。
浪漫 月巴 巴睇 90s 巴氏 沒有 先旨 聲明 我們 置身 世界 竟然 2017 02 17
PermaLink: https://articles.zkiz.com/?id=327052

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019