ZKIZ Archives


學生妹時裝店 新衫任著任換

2013-02-26 NM
 

賤物鬥窮人,有咩筍得過五十蚊買件衫,仲可以無限次任換?三十五歲的蔣彼得(Peter),諗出這條吸客奇招。他前年在旺角創立「轉LOOK」時裝店,專攻一班貪新鮮的學生妹。客人只要在鋪頭買入一件新衫,三個月內即可無限次在店內更換其他款式。效法H&M及Uniqlo做法。「啲客人上來換款時,通常亦會試吓其他新貨襯衫。」但原來最大的金礦,是因此換出來的舊衫,每件賣三十八蚊,成功開拓二手衫市場。此盤生意總投資只要三萬多元,雖然貨價平毛利低,但仍為Peter帶來每月近兩萬盈利,並再衍生出另一條財路。

新衫可以任換款,記者即刻想像有人會每日換款一次,將「着數」用到盡,不過Peter說大部分客人都只是換兩三次,最盡是有個客人一星期換款一次,「狼死」程度比他想像的少。Peter並非時裝達人,身形肥胖的他自己都很少買衫;過去從城大中途輟學創業,都只是在eBay賣化妝品及手機配件。「我當初淨係諗到『任換』呢個概念,但對潮流嘢一啲都唔識,啲客上嚟買衫,我都唔識幫佢哋配襯。」他女友在英國,遠水不能救近火;請教朋友,他的朋友們都一致認為呢條橋唔work,但Peter堅持想法可行。在各個困局中,他慢慢摸索出一套搵女人錢的生意模式。

困局一 九十八蚊都嫌貴

對Peter來說,搞「轉LOOK」一字記之曰:「平。」由於目標客人是貪新忘舊的後生女,他選購的衣服不太講究質素,並由內地入貨,仿日本及韓國款式,每件成本只是十五至三十元。鋪頭他亦選址在好景商業大廈十六樓,租金只要五千元,慳得就慳。結果當初開業的投資額只要三萬元。不過,最初Peter定價每件衫九十八元,原來仍被嫌貴。「我覺得價錢唔算貴,但客人話,比起同區其他樓上鋪,只係賣幾十蚊,就欠缺咗競爭力。」他因此大劈價至四十八元一件,而款式及質量較好的,則定價九十六元,希望能拉高毛利,其目標客群亦再向下調至中學生:「有得揀之餘,得兩款價格亦較簡單。一件九十六元嘅衫,可以換兩件四十八元;或者兩件四十八元嘅,換番一件九十六元。」Peter搏客人翻頭來換款時,能買新衫襯埋一套。衣服全部free size,現場所見每日約四點放學時間,便有大批高中生來鋪頭幫襯,買新衫的客人超過一半,也有人拿衫來換,但消費力較高的OL則較少。

困局二 無人換舊衫

當初Peter「轉LOOK」的意念,是讓客人購買一件衣服後,可在一個月內無限次無條件任換店鋪內不同服裝,經營模式就如曾經流行一時的二手漫畫書店。Peter會把客人換回來的舊衫,加以清潔後重新放上架,即是客人想免費換衫時,除了換新衫,也有機會換到舊衫。但經過多月後,Peter發現舊衫很少客人肯換,畢竟舊衫不是二手漫畫,始終要著上身,「客人件衫就算污糟或者爛咗,佢拎來我都肯換俾佢哋。但殘咗嘅衫其實好少客人肯換來自己著,結果都係舊衫換新衫,所以鋪頭內舊衫就愈積愈多。」再加上開店初期,來換衫的客人比買新衫的客人多,Peter的如意算盤打不響,頭一年月蝕一萬元,固執的Peter不願摺埋,遂想到開拓「另一個」市場吸客。這些被客人換回來的舊衫,Peter特設二手衫區,每件定價三十八元,「我啲衫成本唔高,用二手價賣一樣有賺,而且令鋪頭積存嘅舊衫有渠道清走。」記者現場所見,「轉LOOK」鋪內的新衫佔約七成,另三成是舊衫,舊衫的目標客群再鎖定為消費力更低的顧客。就讀IVE的阿Tam,便覺得二手衫區令她可執平貨:「其實去得買平衫,都係諗住著幾個月就掉,所以三、四十元買件二手衫好抵呀!」而開設二手衫區後,「轉LOOK」營業額即時由一萬元急升至四萬元,並扭虧為盈,每月賺一萬九千元,超出了Peter意料之外。

困局三 鋪頭細無發圍

Peter生意好了,令他面對另一難題。 由於鋪頭面積只得一百多呎,只能存放五百件衫左右,放上衣架的衫更只得三百多件。而且鋪頭太細,客人想試衫要到大廈的廁所,相當麻煩。生意飽和,利潤有限,Peter要維持營運,只有一條路可行,就是擴充。「轉LOOK」開業半年後,有客人已主動和Peter接洽,以特許經營方式在觀塘開分店。不過由於不是自營店,客人在旺角總店買衫後,再到觀塘分店換衫,令兩店的成本及營業額出現錯配混亂:「咁賣出去嘅錢,係總店賺定分店賺呢?條數其實好難計,嗰時我太快開特許經營店啦,所以,亦都好快因賬目混亂及生意唔好而執咗笠。」雖然Peter的擴張大計首遇滑鐵盧,不過卻令他發現二手衫有很大發展空間。他索性將鋪內的二手衫區,改名「換LOOK」,加以發展:「其實有好多人問我,話想收我鋪頭嘅舊衫去賣。因為我哋啲衫只係著過幾次,洗乾淨好似新嘅一樣。既然有市場,不如我自己做。」上個月,在Peter的「轉LOOK」樓下,便以特許經營模式開了一間「換LOOK」,由Peter提供二手衫貨源。全場只賣二手衫,客人買了舊衫後同樣可在特定時間內無限次在鋪內換衫,同時亦可將自己的舊衫賣給鋪頭,就像回收店一樣:「除咗舊衫由總店供應,宣傳都由我搞掂,即刻吸引咗投資者加盟,就快會再開多兩間!」前景:現時賣二手衫反而佔盈利六成,其餘才是賣新衫的盈餘。Peter認為買賣及任換二手衫的利潤空間,其實很大,更笑言目前在擴張期,不肯透露太多詳情:「『轉LOOK』因為係舊衫換新衫,啲人覺得冇錢賺,所以冇人抄橋。但『換LOOK』賣二手衫,就好易俾人抄橋,因為兩萬元已經可以開到鋪,而且賺到錢的機會很大!」Peter認為,當專賣二手衫的「換LOOK」開多數間後,便會為總店「轉LOOK」提供清貨渠道,增加了「轉LOOK」開分店的本錢,下半年將會在觀塘工廈開分店:「經過第一次分店執笠嘅經驗,我覺得要保守啲,要保證到啲二手衫有渠道賣走,收得番成本兼有啲錢賺,先可以擴大『轉LOOK』任換店嘅規模。」一路走來,雖然Peter已試驗出舊衫換新衫並無齋換二手衫咁有市場,但他堅持自己諗法,不為錢,更似為啖氣!

開業資料(4/13)

租金^$15,000入貨$7,000宣傳$3,000雜費$8,000總投資$33,000^兩按一上

營業資料(1/15)

營業額$40,000租金$5,000人工$4,000入貨$12,000盈利$19,000

學生 時裝店 時裝 新衫 衫任 任著 著任 任換
PermaLink: https://articles.zkiz.com/?id=133315

中環在線:連鎖時裝店促消員工

1 : GS(14)@2012-09-04 12:57:08

邊間? 2%?
http://hk.apple.nextmedia.com/financeestate/art/20120904/18007346
內地消費力有轉弱跡象,就連財爺曾俊華都話,7月份零售數據令佢非常擔心,華華相信,零售業老闆更加腳軟。君不見好多時裝店提早或拉長減價促銷期?新近聽聞有間上市嘅連鎖時裝店醞釀裁員,老闆落咗柯打叫各部門「交人」,搞到內部人心惶惶!
醞釀裁員嘅呢間連鎖時裝店,好受潮人同年輕人歡迎,前線同後勤嘅工作量多到喊,大家都以為公司生意好好,點知老闆最近毫無先兆突然要求各後勤部門削減人手,交出裁員名單,前線銷售嘅情況亦唔樂觀。
折扣越做越有
老實講,作為消費者,今年行街shopping真係好爽,事關好多大牌子嘅連鎖時裝店好早減價,越減越平,仲要有碼、有新貨,真係買得好爽,好易滿載而歸。踏入9月,大部份連鎖店都轉咗秋冬新裝,但由於天氣依然好熱,加上唔知會唔會又提早減價,華華唔使走在潮流尖端,一於等嚇先,唔會咁快入市。
之但係,如果人人都係咁諗,內地人又少咗幫襯,零售商真係幾頭痕。查實好多零售股都控制緊成本,達芙妮(210)上月底就傳出內地炒300人,搞到股價冧曬,之後又爆出公司以低價策略迫走加盟商,自己人打自己人。唔通零售業寒冬已經靜悄悄來臨?
2 : Sunny^_^(11601)@2012-09-04 13:30:48

2%有上市??

我估有可能係IT
3 : kobe bryant(28492)@2012-09-04 13:55:28

報警~~
4 : kobe bryant(28492)@2012-09-12 10:28:44

仲唔係報警 (999)?

樂香園:I.T知名度有幾高?
作為本港「潮人」指標的I.T(999),上周首先被揭發把部份內地賣不出的貨品拿回港「散貨」,繼而再有上任不足一年的財務總監「跳船」,連串壞消息令投資者也來一個「清貨大減價」,股價接連急挫,昨再逆市跌逾6%。
05年上市的I.T,於時裝界的名氣當然很大,但在投資界,可能大家覺得潮流走向難以掌握,有跟進I.T的券商數目不多,與其名氣構成強烈反比。彭博資訊顯示,現時雖共有九間證券行研究I.T,惟其中四家的最後更新日卻是去年,足顯券商對I.T的「關注度」有多高。
券商「冇興趣」,不如看一看大眾留言。本報上周二「大陸賣剩衫I.T港清貨」報道的留言板上,網民多數對I.T產品價格有較多意見,如認為I.T是將產品價格刻意上調,再拋出一個很大的折扣,令產品變得「好抵」,亦有網民對品質有微言。
至於昨日「I.T掌櫃突跳船」報道,可能相對不太「貼身」,留言數目大減,主調是叫大家投資I.T要小心。
看來,大眾亦是關心I.T產品多一些。
密西比
5 : Sunny^_^(11601)@2012-09-12 10:52:59

2樓提及
2%有上市??

我估有可能係IT


估中左smiley
6 : GS(14)@2012-09-12 23:34:00

http://hk.apple.nextmedia.com/financeestate/art/20120904/18007198
好多呀
中環 在線 連鎖 時裝店 時裝 促消 員工
PermaLink: https://articles.zkiz.com/?id=281395

八方人物:舊衫任換新衫 時裝店殺出血路

1 : GS(14)@2015-03-13 08:59:37





■蔣彼得堅持創業,終於以售賣二手衫,助「轉LOOK」轉虧為盈。








為了圓創業夢,你可以去到幾盡?蔣彼得(Peter)賣過手機配件,也做過護膚品批發,屢敗屢戰,每次儲夠本錢便辭職實踐新念頭,「就係鍾意自己搞生意」。前年他看準港男港女愛購物,「十個有十個都試過買完啲衫唔啱着,或者好快着厭」,遂創立「轉LOOK」概念店,廉價賣衫之餘,更提供三個月無條件任換服務,就算衣服破損也照換,如此豪氣換來月蝕一萬。倒貼年半,他「硬頸」堅持到底。最近衍生姊妹品牌「換LOOK」二手店,終於轉虧為盈。「轉LOOK」的任換概念相當大膽,只要選購店內任何一件衣服,三個月內無限次任換其他衣服,希望減少浪費。即使衣服穿過、甚至有破損和明顯污迹,照樣可換新衫,「唔想客人有包袱,放心買、放心換,肯定換到件鍾意嘅」。若然看中的衣服沒有全新貨,更可預訂,五天便到貨。



月蝕逾萬曾想放棄

對客人來說「抵到爛」,卻是盤「點睇都蝕本」的生意。Peter坦言幾乎所有朋友潑冷水,「話你條橋唔得,賺唔到錢」。但他深信創業需要衝動和勇氣,力排眾議,打本三萬元在旺角好景商業中心十六樓租用蚊型單位,配合網上宣傳,開始第N次嘗試,「冇嘢係冇可能,唔試過又點知?」事實勝於雄辯,單靠任換確實行不通。「轉LOOK」開業一年多仍未達收支平衝,最嚴重的月份甚至蝕本逾萬元,Peter不諱言已到放棄邊緣,「始終都要食飯」,但他自覺過去試過太多次失敗,不想重蹈覆轍,加上生意漸上軌道,越來越多人留意,決定咬緊牙關撐下去。「最初賣九十八蚊一件衫,有啲客話旺中(旺角中心)好近,人哋又多款又平,你呢度唔就腳,好難做」。他從善如流,春夏衣服劈價至四十八元,秋冬裝則售九十六元,任換期限更延長至三個月,生意漸見起色。



闢二手區轉虧為盈

賣得多當然換得多,約半數客人會回頭換衫,且多數選擇新衫,店內舊衫越積越多,「個舖得百幾呎,係咁積落去都唔係辦法」;加上不少客人反映家中「冷宮」積存不少失寵舊衫,啟發Peter在店內闢出角落,以極低價出售客人捐贈或換回的二手衫,例如一條短牛仔褲只售十八元,但不設任換,「畀客人多個選擇,唔介意着舊衫嘅,可以搵到平嘢」。二手區只運作兩個多月,已令「轉LOOK」轉虧為盈。Peter不放過機會,去年底公開邀請有意創業人士加盟,開設姊妹店「換LOOK」,主力接收客人的二手衫,並回贈現金券,讓他們揀選店內其他二手衫、新衫及飾物。首間分店設於好景十五樓,位於觀塘開源道的第二分店則於月中開幕,目標於今年內開設五間分店,擴展至屯門、元朗等地區。他自言資金有限,亦明白年輕人創業難,往往被高昂租金打沉,希望透過加盟方式幫後來者一把,「有固定客群,唔使由零開始」。■記者袁樂婷





來源: http://hk.apple.nextmedia.com/news/art/20150313/19074618
八方 人物 舊衫 衫任 任換 換新 新衫 時裝店 時裝 殺出 血路
PermaLink: https://articles.zkiz.com/?id=288433

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019