ZKIZ Archives


LV企街拉客 購物天堂變地獄

2016-03-31  NM

走在這條街上,香港人竟可以慢步而行;行入這裡的店鋪,香港人會有貴賓的感覺。你無睇錯,這裡是尖沙咀廣東道。人民幣貶值,來港消費唔夠抵,加上反蝗行動,今日的廣東道,人龍不見了,但一間間名店因附着長約,被迫「屹立不倒」。名店為了搵錢交租,已使出「落地」自救措施。好像超級名牌LV,裝修期間,為免客人行錯入Gucci,竟派售貨員企街拉客,儼如地產經紀。Gucci則向「本土客」伸出友誼之手,請睇近日hit爆的Art Basel,香港人再變貴賓。而曾經因為阻客人拍照而引發「公關災難」的D&G,現在於鋪內任影唔嬲。超級品牌LV企街拉客

經過廣東道,昔日人頭湧湧的LV正在裝修,地鋪被白色板全包圍,但二樓繼續營業。不過記者發現,街上竟有三個穿上LV制服的職員,有的掛上LV頸巾,有的揹住LV手袋,在街上拉客。這個高檔品牌sales猶如地產代理,簡直難以想像。走到LV的另一個正在裝修的側門門外,又有另外三個職員站崗。每當有疑似自由行行過,他們就會上前細細聲問是否要到LV,「我哋二樓有開喎,你想睇男裝定女裝?」然後親自帶領他們搭電梯到二樓、仍正常營業的鋪面購物。每當有其中一個職員帶客離去,留低的職員就會用對講機,向上頭要求增援。記者上週多次前往海港城,發現無論晴天、陰天、雨天,拉客情況如常。職員也不滿說:「出面超大風,我而家好凍!」雖然裝修圍板已「雞乸」咁大隻字寫明「照常營業」,不過沒有殘體字,當然擔心自由行米飯班主會睇唔明,有站崗的LV職員亦承認:「上頭怕客人去咗Gucci喎!」據知,廣東道LV有三十多名員工,上司要求負責「企街」的職員要多主動出擊,但LV售貨員一向較高傲,未肯完全放下身段。見記者不是自由行,職員並沒有主動上前幫助,但當記者要求帶上二樓,職員都算禮貌周到。時光倒流一年前,你想入廣東道間LV買嘢,唔該先排隊登記。即使俾你入到去,如非說普通話,被白鴿眼是常識吧。眾所周知,過去LV如何巴閉,拿passport登記買袋,一年全球最多買三個,所以水貨客唔易做。但不論LV及Gucci等品牌,現時對這些「限購令」,已經「隻眼開隻眼閉」。

Gucci sell本土請睇Art Basel

Gucci所屬的Kering Group在巴黎上市,集團還持有BV、YSL等品牌。今年二月公布去年業績,香港區成績比中東及南韓等地更差,按港紙結算,收入較上一年大跌兩成五。報告多次指香港表現差勁,因為大陸人不再喜歡到香港購物;相反中國遊客去了澳洲、新加坡、日本及南韓等地,但這些亞太地區的增長,都未能彌補香港區帶來的損失。有剛離職的Gucci高級sales透露,以往廣東道龍頭店,平日每日閒閒哋過百萬營業額,週末及假期更達過千萬,但近月,平日已跌到每日只有十多萬營業額,即是說成間鋪平均賣得三個手袋!為救亡,去年底的Gucci及Prada等分店都曾劈價,低至六折促銷。但作為高級品牌,又不能夠經常減價自降身價。長遠來說,Gucci高層知道自由行去意已決,故惟有走回頭路,專心一意攻本土市場。Gucci香港區職員透露,「個個星期都要搞小型show,請香港班VIP參加,今個星期又請佢哋去睇Art Basel,仲請佢哋去後台同班藝術家傾偈,同埋睇Gucci preview show。」他透露:「高層話香港都仲有好多有錢嘅本地人,過去幾年重心去咗自由行度,而家要搵番一班sleeping customers喎。香港人某程度都難serve,但要盡量配合佢哋,佢哋要換貨就俾佢哋換貨,對佢哋要特別有禮貌。」

D&G歡迎拍照服務殷勤

殷勤的服務,本來就是服務業的基本精神,但如今卻成為各大品牌重新檢視的工作態度,可悲也!記者到D&G放蛇,竟然有賓至如歸的感覺。在太古廣場的分店,人影都無隻,記者甫入店已有兩位店員歡迎。記者一副「混吉」相,先睇鞋、再睇銀包及袋,店員都笑笑口主動詢問:「個色啱唔啱?」、「係唔係太鬆?」、「呢款著落去會比較舒服啲。」而記者表示不合心水時,店員亦不厭其煩地展示其他款式。最令人難以置信的,是D&G一二年曾阻止客人在門外拍照,指擔心櫥窗版權及拍下商品被製假貨,但現在記者在職員面前擺明為穿上的皮鞋影相,售貨員亦表示無問題。好景時,一般進取的名店sales底薪連佣金可達四、五萬元,但自從自由行不再來,很多名店售貨員只能獲得每個月約一萬元的底薪,但卻要企足十多小時,故近月流失率十分高。有行內人透露,大部分品牌一方面容許自然流失,但同時開始改變佣金制,以往要跑到一定金額才有佣金,但現時可能不論金額,只要跑到三件貨,都按比例有佣金。所以即使你入去只是買一個鎖匙釦,一樣享有殷勤服務!

TOD'S進駐新界開pop-up store

名店退租轉位潮,二線品牌Coach於蘭桂坊街頭的龍頭店,去年底正式結業。事實上其租約,要到一七年十月才完結,足足提早兩年退租,業主是李國寶家族。地產界傳聞,Hermès亦打算開價十五億元,出售旗下於中環的自置物業,賣得成認真好過賣手袋!不過並非個個品牌能夠話走就走,據知九倉旗下的海港城及時代廣場,與大品牌簽訂五至七年租約,有經紀指即使名牌要蝕錢都要捱,「排海港城條waiting list好長,你走咗大把人租。到個經濟好番,你想返嚟未必返得到。好似Hugo Boss喺對面街租咗個巨鋪,但生意始終都係唔夠海港城嗰邊好。」現時市況,名店走唔到,又唔敢隨便擴張,便索性玩pop-up store(快閃店)。上個月Burberry曾在沙田新城市廣場一期的商場中心位置開檔,但今個月就被另一品牌TOD'S取代,記者向新城市的客戶服務員查詢,她表示:「都係開咗個幾兩個月,賣頸巾同幾件大褸,都係好少物品。」記者亦走到TOD'S的快閃店查詢,店員坦承今次是品牌第一次到新界區開店:「我哋都係開三個月,同法拉利合作為主,啲款同出面嘅唔同。」不過記者見客人不多,生意麻麻。九龍站Fendi主鋪正在裝修,亦走到商場中心開短期pop-up store,雖然人流甚少,但賣得一個得一個。在中環皇后大道中核心地帶、持有鋪位的科達集團主席湯君明,指現時名店縮皮,要搵名牌進駐大鋪,難度甚高,「我個鋪依家要搵化妝品店承租,唔係好大間、唔係做遊客生意嗰啲,不過仲未搞掂,個價未傾成。」

廣東道名店重災區

撰文:梁佩均、梁延宇攝影:廖健昌資料:黃家慧插圖:朱桂葉ed_bn@nextdigital.com.hk
 

LV 企街 拉客 購物 天堂 地獄
PermaLink: https://articles.zkiz.com/?id=191294

胡孟青:拉客可以很有道(上)

1 : GS(14)@2012-02-29 22:39:21

http://www.sharpdaily.hk/article/index/15307/20120229/60294
報載有歐資大行出動龍虎榜,要員工互相比併,形同地產與保險代理,股票行又何嘗不是?連鞋舖都老早有銷售龍虎榜,有幾出奇?
話說不少大行不時都有大把笑話,有行家早年已效法代理拉車門搶客,罔顧生命危險,追車拉門、搶開股票之戶口事件。
有心理準備被「問候」

因為進取,舊老闆視之如珠如寶,可惜未能帶佢過檔至自己新開檔口,只因來自對冲基金的夥伴強烈反對。
搵客門路,有人靠家底背景網絡,自然不費吹灰之力,撇除特殊因素,靠打仗自我升呢走入大行,自然要看有無高人為你開路,或者由客戶轉介,慢慢開天闢地,大行產品架上有人在高球場,也有來自骨場,女人亦未必輸蝕。
只是阿太名媛,早已被Mark到實,老牌家族後人大部份都已開齊戶口,就算肯幫襯你開多一個半個,到有IPO國際配售時,假如你一係無貨一係就畀見高唔見高都即沉之潛水股,要有心理準備隨時畀個客「問候」。
做得Private Bank客戶都非省油的燈,除非真係好彩到個客懵到任你舞,但一場金融海嘯之後,相當懵炳嘅客都已經唔係輸到怕就係學精了,肯開嘅,生意都唔慌大得去邊。
實實際際 單刀直入

假如不是上流社會圈子中人,要搵飛來蜢就形同等運到,今時今日,真係唔見得有幾多Old Rich還未有戶口,論曾經投資過嘅領域,比你更闊,起碼人家由細到大見慣食慣,我等凡夫俗子或許會顯得特別煞有介事,人家唔特登攞出嚟吹噓。
反而係因為對方見慣不怪,根本覺得好平常,你專登戴隻三卡五卡鑽戒見客,以為扮勁怕對方睇唔起,怕對方以為你都撈唔掂,點可以幫佢搵錢等等。
香港地雖然先敬羅衣,最終又係要睇你能否幫佢賺錢;可能係出於要平衡自卑,對方原來一向冇十卡八卡都睇唔上眼;打麻雀上千元上萬元一底,你又夠輸幾多底?
跟客戶鬥行頭,假如出身不一樣,你話邊有得鬥?
倒不如腳踏實地,看看貨架上有甚麼適合的產品,爽快單刀直入。

胡孟青
獨立股評人
胡孟 孟青 拉客 可以 有道
PermaLink: https://articles.zkiz.com/?id=278014

胡孟青:拉客可以很有道(下)

1 : GS(14)@2012-03-01 22:57:29

http://www.sharpdaily.hk/article/index/15307/20120301/60882
前線唔肯返內地,好難搵新客,有家室有兒女者就要有所犧牲,對仔細老婆嫩者,每星期焗住北上兩、三日見客,都係一件苦差,尤其富貴新客多來自山西、浙江等地,就算儲埋儲埋飛一轉,都好唔得閒,且多數難以即日來回,不折不扣的跑生意。
曾經試過即日近近哋來回廣州開講座,大堆文件,電腦隨身,真正的公幹,非常辛苦,有賓架更形容自己係一隻「無腳小鳥」,終日留連赤鱲角機場,有時為咗趕飛去一些較「山旮旯」地點,更必須先取道深圳機場。
有時,個客講明想介紹多幾個富豪同胞給你開戶口,真係日夜兼程都要仆上去,然而好多時上到去,又係「柴娃娃」大圍食一餐,對方還會不時叫多幾個朋友及三幾個來自香港的律師同枱陪食飯,律師多數想博取一些例如做Trust的和味生意,惟有捨命陪君子,誰知同時成為內地客擺門晒身家、晒面子的工具。
有心機較有機心可取

靚非萬能,唔靚亦毋須整古作怪。有口才冇後台,惟有努力加把勁,世上無不勞而獲,更切忌守株待兔,有「心機」較有「機心」可取,前者反映遠見,後者未免短視。既欠缺天賦、卻欲把心一橫靠色誘、喪吹等下三檻旁門左道拉客,短裙加魚網絲襪配烈焰紅唇,以為走入富豪飯堂就係吸客之道,一切都太着迹和唯利是圖,每每因太煞有介事容易露底兼惹人疑竇。
過得自己過得人

自知醜人多八怪,倒不如正正經經、踏踏實實,如此犧牲色相,難道早已認定對方是色中餓鬼?假如,對方本身早已經係「識途老馬」大玩家,斷估Taste都有番咁上下,除非唔嫌「口味」重咗些少啦!唔夠生意,最後一樣要起身。個人經驗,假如老細見你有Potential,覺得你掂,話唔埋都會彈幾個好客畀你湊,有心機、有耐性跟得好好哋嘅話,隨時陸續有來、開枝散葉。
出身自Ivy League的富貴氣質少女,回港後,在歐資大行賣「阿Q」,一場金融海嘯之後,承受不少累客戶輸錢的感受,覺得對唔住班客,唔忍心眼見自己如此無良,情願出走法國,跑進藍帶廚藝學院,學成後回港,在廚房再展身手,感覺更過得自己過得人。

胡孟青
獨立股評人
胡孟 孟青 拉客 可以 有道
PermaLink: https://articles.zkiz.com/?id=278033

蠱惑 MPF中介人冒積金局拉客

1 : GS(14)@2012-08-15 18:26:18

http://hk.apple.nextmedia.com/news/art/20120815/16605149
積金局近日在網上刊登告示,稱收到市民查詢,指接到自稱代表政府、積金局、「強積金代理人公司」或「強積金中介人公司」的人士來電,內容提及強積金事宜和強積金半自由行,甚至邀請市民會面討論,以及要求他們提供強積金賬戶資料。積金局在告示中表示,從來不會邀請市民會面或要求市民提供其強積金賬戶資料,以推銷強積金產品,局方亦不會委託任何人進行有關活動。
局方接200宗查詢
積金局發言人接受查詢表示,由本年初至7月底,共接獲200宗市民查詢,表示曾接到來電,對方聲稱希望向他們提供強積金半自由行安排的資料,小部份甚至要求市民提供其強積金賬戶資料;2011年全年則只接獲150宗同類查詢。
強積金中介人數目由2010年6月的27,487人,增至今年6月的30,644人,增幅11.4%。積金局董事黃國健表示,合資格中介人激增,可能良莠不齊,不排除部份中介人為爭取生意,假冒積金局人員推銷強積金。他呼籲積金局多做宣傳,提醒市民注意事項。
強積金計劃諮詢委員會委員吳慧儀表示,積金局過往主力電腦開拓,以配合強積金半自由行推行,建議未來加強宣傳,提高市民選擇受託人的意識。
可能已構成詐騙
積金局提醒市民,如懷疑銷售人員並非註冊中介人,可致電積金局熱線29180102查詢,積金局網頁亦載有中介人紀錄冊。市民在決定參加某個計劃前,應清楚瞭解計劃服務水平、基金種類及收費等,再衡量是否配合自己的需要及承受風險能力等。
積金局強調,法例訂明強積金中介人須遵守訂明的要求,包括要以誠實及公平態度行事,向客戶披露充份資料等,如中介人沒有遵守操守要求,最高可被吊銷註冊。黃國健則表示,如果有任何人假冒積金局人員銷售強積金,可能已構成詐騙。
2 : GS(14)@2012-08-15 18:26:32

http://hk.apple.nextmedia.com/news/art/20120815/16605150


強積金半自由行正式上馬,打工仔日後可就自己供款部份,自由揀選強積金受託人和計劃,每年可轉移一次。至於僱主供款部份,則仍然由僱主「話曬事」,僱員無權過問。積金局相信,新安排可令強積金行政費進一步下調。
下一目標「全自由行」

強積金行政費過高一直為人詬病,積金局資料顯示,強積金基金的開支比率由2008年3月的2.1%,下調至今年7月的1.73%。強積金諮詢委員會委員吳慧儀透露,局方早前評估過半自由行推行後,強積金行政費會進一步下調,下調幅度有待觀察。
積金局下一步目標是實施「強積金全自由行」,即不論僱員及僱主供款,也由僱員自行揀選受託人,但未有執行時間表,積金局將設立中央資料庫,儲存僱員強積金累算權益分佈資料,為推行全自由行鋪路。
蠱惑 MPF 中介人 中介 積金 拉客
PermaLink: https://articles.zkiz.com/?id=280996

李光洙拉客撐D.O.

1 : GS(14)@2015-03-16 08:53:56





韓國綜藝節目《Running Man》成員李光洙,去年因拍攝韓劇《沒關係,這是愛情》而與同劇的趙寅成及男團EXO成員D.O.成為好友。前日EXO在首爾開騷,李光洙亦有與同劇另一男星金基邦現身撐場。據知,D.O.知道後更即興跳起李光洙有名的「蚊子舞」,令全場粉絲不停尖叫。另外,EXO成員世勛在結束表演時,準備下台時頭部不慎撞到舞台裝置,他即時捂着頭離開。其後,在安歌舞台上,戴着帽上台的世勛對自己撞到頭部令演出未能完美而跟粉絲道歉,更開始流淚,其他成員立即圍着安慰世勛,台下粉絲亦非常心痛。撰文:梁雯迪



D.O.

■世勛因不滿自己的表現而在台上流淚。



來源: http://hk.apple.nextmedia.com/entertainment/art/20150316/19077412
李光 光洙 拉客 D.O.
PermaLink: https://articles.zkiz.com/?id=288535

舊社區變紅燈區街頭拉客50蚊玩一會

1 : GS(14)@2016-02-03 14:43:14

山東青島市李滄區一個由200多幢舊式房子組成的城中村,由於種種原因一直沒有拆遷改造,環境複雜。有便衣警員早前到該區調查,剛進入區內,就發現有一些濃妝艷抹、年約20到40歲的女子「企街」。只要有單身男士經過,便上前兜搭。警員調查時,正好是放學的時間,不少小學生經過,但這些女子就在光天化日之下公然言語挑逗。警方發現,這些女子一般都是在自己租住的房子內招攬生意。放蛇的便衣警員跟隨一名女子進入一間民房。裏面光線晦暗,除了一張床外,設施簡單髒亂。一名女子說,隨便玩玩只需要50元(人民幣‧下同),不安全自己一分錢不要。警員隨後表明身份,拘捕女子。據悉,被捕女子姓許,48歲,內蒙古人,之前在青島打工,為賺快錢投身這行業。中國網





來源: http://hk.apple.nextmedia.com/international/art/20160203/19477442
社區 紅燈區 紅燈 街頭 拉客 50 蚊玩 一會
PermaLink: https://articles.zkiz.com/?id=295146

踩入飲食界賣日式刨冰楊秀惠打躉拉客

1 : GS(14)@2016-04-12 18:16:37

【大坑】楊秀惠前年同屋企人擲過百萬,投資代理美容品牌生意,過吓做老闆癮,美容生意起步冇耐,但原來楊秀惠最近又喺大坑開咗間甜品舖,主打食刨冰同日式蛋糕。日前記者見到楊秀惠喺舖頭入面打躉招呼客人,見佢幫手擔凳仔,又落手落腳用碗布抹枱,老闆娘事事親力親為。其間記者見有兩個後生女入舖頭幫襯買沙冰,當佢哋見到楊秀惠嗰陣,就嗌咗出嚟,仲主動拉住楊秀惠影合照。



惡補廚藝

記者事後喺舖頭同楊秀惠打招呼,佢大方承認開甜品舖:「其實自己一向鍾意食雪糕同蛋糕,咁啱我識嘅日式甜品師傅想擴張,所以咪同朋友夾份開呢間甜品舖。」楊秀惠坦言自己今次同三個朋友夾份,投資咗6位數字:「以前我都鍾意整嘢食,試過整聖誕大餐同情人節餐畀男友食,最鍾意就係整甜品,因為食完甜品個人都會開心啲!」不過,楊秀惠話而家連廚藝都生疏埋,所以趁住今次開甜品舖,要惡補一吓。



【粉絲捧場】■有粉絲幫襯時捕獲楊秀惠,立刻影相。

【交帶員工】■楊秀惠(右)親自交帶員工,非常認真。

■楊秀惠(左)日前在Instagram貼相,晒好友莊思敏都有到甜品舖捧場!


■楊秀惠早前與葉樹培傳出緋聞。資料圖片


問楊秀惠會唔會再搞其他生意,佢就笑笑口話:「其實我本身鍾意扮靚,所以都係主力做番美容生意!」採訪、攝影:王梓嫚





來源: http://hk.apple.nextmedia.com/entertainment/art/20160412/19567082
踩入 飲食 界賣 日式 刨冰 秀惠 打躉 拉客
PermaLink: https://articles.zkiz.com/?id=299106

【動畫】打兩份工養一家八口女司機拉客遭劫殺棄屍

1 : GS(14)@2016-11-26 13:50:58

越窮越見鬼!內地人口老化,很多夫妻照顧子女的同時,還得贍養雙方父母,形成兩人賺的錢要養活多人。河南嘉善49歲杜姓女子,為養一家8口,平日擺地攤做小販,還開網約車,怎料遇上兩名匪徒搶劫,被捅兩刀後拋屍落河。家人承受喪親之痛外,生活還陷入困境。遇害的杜姓女子,與丈夫育有一子一女,家翁患癌需化療及動手術,家姑則有紅斑狼瘡症;而她的父母也經常生病進入醫院。為了多賺點錢,做小販的她早前在一個網約車平台登記做司機。周日晚9時許,兩名以撞車敲詐司機維生、分別姓孫及姓張的男子,在嘉善東進一處屋苑外尋找獵物,杜女開着車主動問兩人是否需搭車,兩人先是拒絕,杜女隨後給他們一張網約車卡片,並表示要車時可打電話給她。兩小時後,兩人找不到獵物,心不甘心下想向杜女埋手。當日晚12時許,原準備睡覺的杜女接到叫車電話,10分鐘後她到酒吧接走他們。當車子開到320國道楊廟路口往東200米時,兩人露出兇器,搶走杜女身上700多元(人民幣‧下同)現金和一條金項鏈,還威逼她說出銀行卡密碼。因怕杜女報警,兩人用兇器捅了她數刀,再開走杜女的車到銀行ATM機,取走卡裡4,800元。之後,他們把車開回事發地點,將杜女和兇器扔進河,他們原想毀掉車子,但車胎卡在泥地,最後作罷。翌日,他們到湖州把搶劫來的金鏈換,轉輾兌成現金。有村民事後發現靠河菜地停放一部黑色私家車,並有血迹。警方接報後到場調查,隨後從河中打撈出一具女屍,並於當日下午3時宣佈偵破案件,迅速拘捕孫X及張X。警方指孫X,來自江蘇人,35歲左右,曾因搶劫罪被判7年;張X則是貴州人,剛年滿18歲。兩人已認罪,目前正被扣查。中國網




來源: http://hk.apple.nextmedia.com/international/art/20161126/19846307
動畫 打兩 兩份 份工 工養 一家 八口 口女 司機 拉客 遭劫 殺棄 棄屍
PermaLink: https://articles.zkiz.com/?id=317059

吳肇軒街頭拉客食檸檬

1 : GS(14)@2017-02-02 02:34:14

影圈新人吳肇軒、胡子彤、朱鑑然憑青春新面孔成功闖娛圈,三位小鮮肉日前到銅鑼灣鬧巿高唱賀年歌《財神到》搞氣氛,向大家拜年,三人在街上找途人加入,更主動向女士埋手,可惜頻頻食檸檬被當場拒絕。吳肇軒和朱鑑然不甘心,再接再厲,繼續以人盯人的攻勢,終於成功找到肯伸出援手的市民一齊唱歌拜年,估不到對象竟然是男士居多,當中還有外籍遊客跟着唱歌講恭喜發財。多次被請食檸檬的前香港飛魚王子朱鑑然說:「最初都感到好尷尬,之後就豁出去。」吳肇軒表示:「我哋大大聲唱財神到都係夠膽啦,唔會尷尬,我個性比較活潑主動。」採訪:卓寶花攝影:陳俊強




來源: http://hk.apple.nextmedia.com/entertainment/art/20170201/19913924
吳肇 肇軒 街頭 拉客 檸檬
PermaLink: https://articles.zkiz.com/?id=324977

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019