ZKIZ Archives


我遇過的一些好同事 人在中環

http://manincentral.blogspot.hk/2013/06/blog-post_12.html
David禮拜五就last day了。

David係我公司請既第一個專門負責IT既同事。六年前,公司開始有一點點規模,我發現我需要一個全職既IT同事,負責support我公司既network。說來失禮,響David加入之前,果啲support既工作,原則上係由我同拍檔兼職做的。David入黎做既時候,只有十九歲。

David考唔到大學,但係對Networking有濃厚興趣。當年我請佢,一來因為佢平,二來,其實都只因為見工既時候覺得佢合眼緣,又幾傾得埋,直覺話我知,佢係個肯做肯承擔既後生仔。

公司響佢入咗嚟之後果幾年,以倍數既速度長大。David要負責既嘢,亦同樣以倍數增加。我幫佢請咗幾個under佢既下屬,間接令佢變成咗公司裡面其中一個部門既阿頭。六年裡面我加過好多次人工,而事實上David響度,我覺得好放心。所以加佢人工,我覺得物有所值。David份人說話唔多,但佢最impress我既地方,係只要佢應承幫忙處理既事,無論幾麻煩,幾影響佢平日既生活都好,佢點都會諗辦法同你死掂佢。總之佢份人,講得出,就會做得到。當依家個個都話八、九十後做嘢唔掂既時候,我覺得David係其中一個最好既反駁。

*****

「David,不如你話我知,有冇嘢可以留得住你?」我問。

「CK,唔係錢既問題,亦都唔係做得唔開心。」David答:「只係我廿五歲啦。我一讀完書就響你呢度返工,唔覺唔覺就六年。我只係覺得,我應該出去見識多一啲。」

我一直知道David份人,其實幾有上進心的。我其實響一段時間之前,就預計過遲早會有呢一日。自私既我,透過好多唔同既手段,嘗試將呢一日盡量延遲。不過要嚟既日子,似終都要嚟。

「放心,我啲假唔拎啦。我會留足一個月,做好晒交接工作先走既。」David說:「多謝你地咁多年既照顧。」

「照顧?好似你照顧我多啲喎。」我苦笑:「有咩打算?」

「未知呀,做咗六年,都冇認真放過長假。」David笑:「想抽離工作一陣,諗清楚下一步想點行。可能想學你地咁,試下創業做生意都唔定。你創業既時候,都係同我依家差唔多年紀?」

「大過你依家些少啦。」我答:「不過冇關係既,機會嚟到既時候,幾多歲都係一樣。」

David辭職,我唔知點樣形容我面對呢件事既心情。近年同我work得最close既幾個管理層同事,都係響我公司還係蚊型規模既時候入職的。佢地唔係咩名牌大學生,冇家底、冇後台、唔會有一口流利竹星仔口音英語。佢地都係平凡人,響起點既時候,亦唔係甚麼精英份子。因緣際會佢地入咗嚟我既公司裡面做,碰巧公司正在成長,佢地亦自然地同公司一起成長起嚟。

與其話我呢個老闆仔曾經俾過一啲機會呢班同事,倒不如話,佢地響我最需要人去幫忙既時候,出現咗響我面前。佢地幫我渡過咗,創業最艱艱既一段日子。當然我明白,我呢間小公司,真正既「精英」大概唔會睇得上眼,但問心講,我覺得我所遇到既呢班同事,佢地對工作既承擔同投入程度,可能係好多所謂「精英」都及唔上的。遇到佢地,該感恩既,應該係我。

我曾經妄想過,呢班同事會一直跟住我,直到退休。當然妄想係唔會變成現實。兩年幾前Kelly跟老公移居外地而辭工,之後又有同事要生仔做全職媽咪,我既班底,還是一個又一個咁離開。David係個上進既後生仔,俾著我係佢,我諗去到呢個年紀,大概都會有同一樣既選擇。男人,係的確應該出外闖闖的。繼續留響我呢度,過住安逸既日子,其實唔會有咩前途的。

有啲老細朋友,總係埋怨依家既年輕人,工作做唔長,總係好高騖遠唔踏實。David足足俾咗六年我,我諗,我係冇可能對佢有呢個complain了。講真,六年,其實可能我以經賺咗。然而同事選擇離你而去,所反映出既係乜嘢?我好現實的,我認為所反映既係,作為老闆既,唔夠本事。你所帶領既公司,成長既步伐,已經追唔上同事自己成長既速度。步伐不一致,分開就變成無可避免了。

有時我諗,點解我會喜歡阿仙奴…可能多少都係有一點自我代入同投射的。

祝大家有個愉快既端午節假期。
我遇 遇過 過的 一些 同事 人在 中環
PermaLink: https://articles.zkiz.com/?id=58148

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019