看太長和太短都有問題 隨笈
From
http://chuicup.blogspot.com/2008/04/blog-post_26.html原本想等埋中人壽業績出先寫文，但遲遲都未出。
不少人對阿爺的救市措施有微言，其實這是不愔中共運作的表現。
中國經濟改革經歷這麼多年的發展，尤其是近年的躍進，顯示了中國政府掌管經濟那一班人的厲害。
個人想法：阿爺救市，唔係為咗拯救股民，唔關奧運事，係為咗拯救自己。認識中共歷史的話，會知道權力架構裏面的鬥爭非常激烈。市況跌得太爛而令到情勢動盪，或者令經濟運轉有阻力，當政者就會受到內部敵對者的壓力。
那 當然，股市要升得起，必定要有企業盈利所支持。大部份企業若然是爛的，經濟是差勁的，怎托也不會起。將目光多點注意基本分析吧。投資中國，考慮政治因素是 基本分析之一。若然對中國的「社會主義特式的市場經濟」不滿、深感困惑或者投不信任票，那麼，只好選擇其他市場投資。 我們做玩家的，是要睇遊戲規則來做人；抱怨遊戲的規則，只是多餘的舉動。想想下一步應怎樣做好過吧。
另外，經常遇到十年後股票表現怎樣的問題，又或者時常有人幻想十年後自己的股票怎樣。
其實能夠睇得通某支股票兩三年的發展已很不錯，看得太遠和看得太近一樣會出問題。
投資股票有好多時候是摸著石頭過河的過程，要靠不斷吸收新的資料作基礎分析和監察，不斷引證自己當初的想法，進而作出行動。預測長遠的經濟方向或許都有人能辦到，但是有誰人能夠肯定告訴你某支股票十年後會怎樣？正如十年前持有花旗銀行的人，可否預計到現在的表現和回報？
不誠實，誠實，和太誠實。 人在中環
http://manincentral.blogspot.hk/2013/03/blog-post_13.html
話說今早小弟在
AM730出了一篇短文，內容係講述一個二十六歲來見工的女孩子，在決定take唔take個offer之前，要先徵詢阿爸阿媽既故事。
比較出乎我意料之外既，呢篇隨隨便便既文章，竟然帶來了一點迴響。有朋友寫電郵俾我，認為文章裡面既女孩子，坦白無罪，跟屋企人商量更加唔應該睇成係問題。我好奇去AM730既facebook專頁裡面望一望，發現有關小弟呢篇爛文既comment，相當兩極化。「有爭議」既位置，係有關果位女孩子「誠實」是否有錯既問題之上。我覺得呢個題目其實幾有趣，有趣之處係，呢個其實係一個好基本既價值觀問題，當我地以為，大眾價值觀響呢啲事情上面應該分別唔會太大既時候，原來每個人對同一件事情既解讀，差別可以相當大。
以下係我自己對呢個題目既解讀，先旨聲明，百份百「只係」個人意見，大家毋須太過認真。
*****
我認的。我認為二十六歲其實唔細。一份你自己send信apply既普通文職工作，以一個有四、五年工作經驗既人黎講，是否take個offer，我的確係認為「唔需要」阿爸阿媽俾意見，都應該有能力自行判斷既「簡單事」。佢可能有另一個offer響手上，又或者interview既過程裡面，有嘢令到呢位女孩子對所apply既職位有所懷疑，但career係屬於自己的。阿爸阿媽亦冇好似女孩子咁親身到嚟interview，所以無論如何，我都依然覺得，要「等阿爸阿媽俾完意見」先可以做決定，唔係一個可以接受既理由。這可能是偏見，但合理既懷疑係：呢位女孩子，響日常既生活上，到底有幾多事情係需要由其父母作主？請咗番嚟，日後工作上有任何微細既改動，又係咪同樣要「先過佢父母果關」？請人係一個配對過程，冇話邊個岩或者錯。只係如果有其他選擇，除非佢響其他方面異常突出，否則僱主點解要選擇冒險？
*****
有關「誠實」既問題，反而比較複雜。
或者咁講，響呢件事情上面，我其實接受當candidate收到offer既時候，認真考慮幾日才答覆的。如果女孩子簡單地同Amy講：「我想先考慮幾日再答覆」，而唔係將「要等阿爸阿媽」既「事實」搬出黎，我相信Amy係絕對唔會選擇即時放棄佢的。
我絕對贊成，誠實係美德。但係響「誠實」作為大前題之下，不同既場合環境，一個在商業社會生存既人，應該明白誠實既程度，係應該有差別。
在我眼裡面，呢位女孩子既問題係，披露過多事情既始末，而果啲所披露既細節，基本上係冇必要，亦冇人要求佢披露的。我認同女孩子的確係誠實，但佢選擇披露過多事情既始末，我覺得這則屬於天真。天真當然亦唔係罪過，但作為僱主，則唔會希望有個過份天真既人響自己既roster裡面。事關你永遠唔會知道，佢下次會向乜嘢人，過份披露一啲有關你公司而又唔應該披露既事情。
請人有時係一個好矛盾既過程。你想請一個誠實、有誠信既人做你既下屬，但同時你又唔想請一個「太誠實」，誠實到唔曉變通既人，因為你很清楚這些人會為公司帶來災難。凡事去得太過極端，都係會有問題。即使係所謂既「美德」，去得太過盡，都只會係災難。
*****
有朋友將這件事同CY既語言偽術扯上關係。hmmm，我響度諗，女孩子假如只係同Amy講：「我需要時間考慮一下」，而唔披露佢其實係需要「同阿爸阿媽商量商量」呢個事實，咁樣其實又算唔算係「語言偽術」之一？
這個我唔敢下判斷。但我既諗法係：女孩子如果好似上述所講，即使冇披露有關佢阿爸阿媽既「故事」，我依然認為佢係一個誠實既人。
但係CY既「語言偽術」一出，大家都不能再將佢同「誠實」扯上關係。
「講大話」同「選擇性披露」，當中應該係有些少分別吧。
*****
女孩子廿六歲，剛好係八十後。
有朋友鬧我，話我又走黎借頭借路去插班八十後。
只能咁講，做人毋須太過敏感，千祈唔好自行對號入座。今次只係巧合呢個女仔係個八幾年出生既後生女。如果呢個女孩子係個七十後又或者六十後既中年人，呢個故事俾到我既震撼可能會更加大。
過去十年既招聘，我見過有阿媽陪個女嚟interview，又見過同事辭工唔敢自己遞信要阿爸代勞。相比之下，今次其實算係碎料了。
然而一個不能自立，成了年之後還要依賴父母代為處理生活上大小事務和決策既的人，問題出響邊道？
要插既，唔係八十後九十後，而係佢地既父母。