| ||||||
| 好多粉絲嘅瑞銀財富管理及證券顧問陸東，噚日下晝本來上電台做節目，電台公關事先張揚，吸引大批傳媒喺電台門口候駕，華華亦一早到場，打算問吓佢對大市嘅最新睇法。不過陸東一到埗，見到大班記者即刻「變臉」，未踏入電台門口已經掉頭走，結果搞到要取消原定嘅電台訪問。 遇記者圍攻「變臉」即閃 喺 華華眼中，陸東一向性格率直，我行我素，佢喺本新書《智者傲行》入面，都話自己經常獨來獨往，唔鍾意應酬；不過連對傳媒追訪都咁抗拒，真係始料不及。陸東 只係同電台公關講咗一句：「我冇話過接受其他（傳媒）訪問」，就轉身閃人，在場記者只能互相呆望，公關亦面有難色，惟有清場叫記者走人。據了解，陸東最後 都冇返去完成節目，要擇日再來，好彩節目係錄音訪問，唔係現場直播，否則電台方面都幾難交代。電台公關事後解釋，話可能係佢哋同陸東溝通上出現誤會，所以 唔知佢唔想接受其他傳媒訪問，先至出現今次尷尬場面。不過華華覺得，陸東喺財經界打滾多年，論輩份有番咁上下，乜大場面未見過吖，唔想接受訪問，其實有好 多解決方法，例如封口，冇必要搞到失場，要再約過時間做訪問，浪費自己時間，對自認智者嘅佢嚟講，似乎有啲「蝕章」。李華華 [email protected] | ||||||
| ||||||
| 肥 佬黎在台灣意圖收購中時集團，點知畀旺旺集團蔡衍明老闆截咗糊，呢位蔡老闆跟住入股香港亞視，威風一時，大概有意做傳媒大亨啩。做傳媒其實好難賺大錢，賣 米餅反為容易盤滿缽滿，例如旺旺（0151）啱啱宣佈業績，○八年賺咗二十點四九億港元，上升四成八六，純利率雖然下跌一點五個百分點，仍有百分之十六點 九，幾和味呀。 亞視呢，據張永霖講，係蝕本無底深潭，根本係一個黑洞，蔡老闆第一次涉足傳媒，就要兩線作戰，在台灣要力保危城（中時），在香港要救活死城 （亞視），真係面對人生大挑戰，睇吓佢如何盡出武功，已經足夠寫MBA論文。肥佬黎買唔成中時，改為經營有線電視台，請咗馬英九前幕僚金溥聰（清朝末代皇 帝愛新覺羅氏後裔）為行政總裁，轟動台灣，看來又係向難度挑戰，再次考驗肥佬黎嘅營運天才。 分析K同左丁山講：「黎先生財力同蔡衍明差一大截噃，點解仲要 進軍台灣電視業呀？」何所見而云然？分析K話：「條數好易計，旺旺發行股數132.07億，星期五收市價每股三點二六元，市值430.54億元，市盈21 倍，派息率4.57%；而壹傳媒（282）發行24.12億股，星期五每股作價七毫八仙，市值18.81億元，市盈率3.5倍，息率31%；蔡老闆有旺旺 做後盾，財力大好多倍啫。 如果硬碰硬，黎老闆在台灣吃虧啲喎，不過蔡老闆或者會畀亞視累親，令佢唔能夠集中精力呢？」計死數當然係咁計，但左丁山另有見 解，肥佬黎轉入傳媒，已有十九年，早已過咗learning curve之上，而蔡先生剛入行，仲要交吓學費，並且肥佬做好佐丹奴先至建立《壹週刊》，搞好《壹週刊》，先至創辦《蘋果日報》，到香港掂晒嘞，就到台灣 搞「壹仔」，台灣「壹仔」OK嘞再出台灣《蘋果》，o依家稱霸台灣印刷媒介嘞，先至進軍電視，肥佬係一步一步嚟嘅，從不兩面作戰，不開動兩條戰線，佢好清 楚知道在甚麼時候做甚麼事，對生意focus之執着，商界罕有其匹，如果我係大學MBA課程主管，今日就會開始追縱跟進蔡黎傳媒大戰，預備寫學習個案嘞。 | ||||||
| ||||||
| 舊年喺內地被人話旗下礦泉水有問題嘅康師傅（322），財務長林清棠噚日借業績記者會機會同香港傳媒大吐苦水，話俾人抹黑，搞到舊年包裝水嘅市場佔有率（按銷售額計）跌到去17.7%；用金額計，仲俾娃哈哈過咗頭。佢叫香港傳媒一定要同佢做澄清。 佢話嗰班人好專業，首先叫人扮記者做採訪，話有人飲咗康師傅礦泉水後又噴血又唔舒服，再做份假報告話啲水太酸，之後更動員大班人不停喺內地網上討論區貼文章，搞到其他媒體跟進報道，規模大到估佢唔到。 林清棠話，因為幾年前當娃哈哈係第一名嘅時候，都試過俾人抹黑，所以佢哋都預咗，但勢估唔到真係咁厲害。佢話已經初步掌握到幕後黑手，但就唔方便講到咁明，叫華華自己用推理能力估吓係邊個喎！ | ||||||
2009-04-30 AppleDaily
| ||||||
| 巨 型國企中國中鐵（390）照顧住廿幾萬名員工生計，董事長石大華背負嘅壓力咪話唔大，一旦國家政策有乜風吹草動，導致公司養唔起咁多員工就麻煩，隨時動搖 國之根本嘛！石總亦深明箇中道理，所以中鐵經營嘅業務層面何其廣泛，佢強調要「堅定一個思路」，即係堅持建築業上、中、下游協調發展，形成相關嘅多元化產 業結構，有咁嘅揸fit人睇住中鐵，員工都可以放心啲啩！之但係，國企管理制度或多或少窒礙企業發展，石總話，所有幹部已經係按合同聘用，中鐵每年亦會招 聘上萬名大學生，正所謂老人老辦法，新人新政策，令公司更加市場化。石大華噚日又喺業績記者會上有感而發，話對住記者朋友份外有親切感，皆因佢位千金都係 華華同行──新聞從業員，喺中央電視台做編輯，唔知會唔會近水樓台，隨時可以訪問老爸呢？ | ||||||