中環在線：港交所撼低上交所業績前攞彩 李華華
2008-08-13 AppleDaily舊 年內地股市交投暢旺，滬深指數屢創新高，上海證券交易所市值喺8月6號更首度揮低港交所（388），A、B股總市值合共達16.5萬億港銀，之後長升長 有。不過勢估唔到事隔一年，市況逆轉，喺全球熊市下，上個禮拜五8月8號，港股市值反超前上交所，當日收市，港交所市值連埋創業板合共15.9萬億，輕微 領先上交所1.2%。按港交所最新數據，星期一主板同創業板市值分別15.7萬億同1008億港銀，加埋成15.8萬億銀。雖然恒指噚日急跌1%，港股市 值計落仲有15.7萬億銀，仍然騎住上交所；上交所噚日A、B股總市值13萬億人仔（約14.8萬億港銀），比港交少近6個百分點。至於深圳證券交易所， 噚日總市值約3.4萬億港銀，較港交所少八成。
今派成績表料盈利跌
最高興當然係港交所主席夏佳理同行政總裁周文耀，喺港交所 今日公佈中期業績前，先響頭炮，證明香港國際金融中心並非浪得虛名。雖然港交所市值再度爬過上交所，但對股民嚟講唔重要，最緊要係港交所今日派成績表究竟 派幾多息。瑞信最新發表嘅報告，預計港交所上半年盈利增長31%至30.4億銀；但由於港股近排成交萎縮，第二季盈利料按季下跌16%，繼續維持港交所評 級「遜於大市」。睇嚟夏主席要諗諗計，為免盈利倒退，都係出埠搵多啲生意維持業績。電郵：
[email protected]
中環在線：郭晶晶投資組合曝光
2008-08-14 AppleDaily
「跳 水皇后」郭晶晶再度奪金，大家唔止關心佢嘅戀情，亦好想知佢點用啲獎金同廣告收入。和訊網搵一男一女理財分析師幫京奧中國選手做理財分析，唔止郭晶晶，仲 有身高同身家都係巨人嘅姚明，同一跑成名嘅「欄王」劉翔。其中率先幫郭晶晶做好投資組合建議。個理財計劃係咁嘅，話晶晶年收入約1000萬人仔，女分析師 建議，攞最多四成年收入，即係400萬嚟買樓，趁家陣內地房產市道調整，泡沫唔大，最好一次過畀晒，咁就唔驚房貸利率升咁話；但就唔建議佢買股票，話風險 大，反而可以用四成收入投資債券同基金，甚至黃金都好喎。
專家教買重意外保險
男分析師就建議跳水皇后，將兩成手頭現金買人民 幣理財產品或者國債、三成買債券基金同股票基金做長線投資，佢亦覺得買樓啱跳水皇后，尤其家陣房產市道下挫時買就最啱時機；仲建議郭晶晶買重千萬銀保額嘅 意外保險。男分析師更加叫郭晶晶留錢畀下一代讀書。華華睇真啲，嗰位男分析師得到國家認證，但係家陣美元升、人仔跌，仲叫跳水皇后買國債，梗係知佢錢多， 所以要支持吓國家嘞。仲有郭晶晶退役睇怕都會嫁入豪門，乜佢認為霍家要個新抱留錢畀子孫讀書咩？
中環在線：芬佬蝕錢照袋百萬 李華華
2008-08-14 AppleDaily
美國次按風暴拖累全球股市，搞到唔少基金都要蝕錢，據《現代快報》報道，內地A股市場基金半年就唔見咗1.08萬億銀人仔，投資者損失唔少，但基金經理就照袋百萬年薪。
市況好壞照收管理費
基 金嘅收入來自固定薪金同花紅，而每年花紅係將基金表現，跟同類基金嘅排名掛鈎，雖然今年市況唔就，但大家投資都損手，拉條curve出嚟都係咁上下，所以 呢部份嘅收入唔會點減少；加上無論市好市壞，基金都照收管理費，你話佢哋嘅人工少得去邊？家吓內地基金經理年薪介乎30萬至1000萬銀人仔，相差咁大主 要係因為俾幾家細基金公司拉低；但基金經理平均人工都有100萬人仔，星級嘅就有500萬至600萬銀，頂尖嘅當然收千萬人工啦。
中環在線：奧運旺鴨唔旺股 李華華
2008-08-14 AppleDaily
奧 運火熱進行，滿城都係遊客，北京名店全聚德嘅烤鴨亦賣得火熱，可惜旺鴨唔旺股，全聚德喺內地股市竟然跌停板。全聚德嘅股價自京奧開始，就隨內地股市潛水， 到噚日短短4個交易日，累跌三成，仲係要連續4日都試過跌停板，由開幕前（7號）嘅53.5蚊人仔，到噚日收市得番36.9蚊。
股價連跌四日
據 《北京晨報》講，奧運勁旺全聚德嘅生意，話晒都係中國名牌，好多老外都慕名幫襯，搞到喺北京嘅百年老店前，呢幾日成日排長龍，就連奧運村裏面啲烤鴨，晚晚 8點前就賣晒。烤鴨賣到咁火熱，散戶又點會諗到佢哋嘅「鴨股」會唱反調，同奧運概念股一齊插水。有啲之前喺網上吹捧呢隻股嘅散戶，家陣做咗網友箭靶。
中環在線：小超選擇性封嘴 李華華
2008-08-15 AppleDaily
華 華去過好多次長建（1038）業績會，每次問小超李澤鉅最近有乜心儀收購對象，佢都會玩封嘴，只會講佢想講嘅嘢。噚日長建中期業績會，小超大贈送，解開咗 記者嘅多年心結──點解玩封嘴？佢話唔想被賣家知佢有興趣，驚買貴嘢喎！小超話：「我份工好似poker face，完全唔可以俾世界知道我諗緊乜，除咗我嘅central committee。未到扑槌前嗰秒，都唔可以俾人知我有冇興趣。」咁又係，老闆大把還大把，做生意梗要計到盡，何況數口精如小超。有乜收購對象佢唔講， 但問到樓市，佢就選擇咗開口！
講乜？話長實嘅樓已經賣得八八九九、九九十十囉。不過，有記者問小超點睇梁展文事件，佢又即時打回原形，「我唔想喺呢個題目 （俾人）quote到任何發言。」話晒警務處前處長李君夏係長實（001）同和黃（013）嘅顧問，無謂你講人，人講你啦，吓嘩。
中環在線：陳啓宗愛食一哥叉燒 李華華
2008-08-15 AppleDaily
咪 以為富豪兼上市公司高層一定餐餐豪食，查實好多時佢哋可能食得仲平民過華華同埋咁多位讀者，好似「老婆靚就唔使搵二奶」嘅恒隆地產（101）執行董事吳士 元（Terry）咁，噚日同班行家講開睇奧運，佢話前晚中國女排大戰古巴，佢喺公司做到好夜，跟住就落跑馬地新昌明一邊食魚蛋粉一邊睇。第五局，中國女排 敗陣，搞到佢碗魚蛋粉都冇乜味。
講開食，Terry仲爆埋佢老闆陳啓宗最鍾意食大家樂嘅叉燒，有時如果做嘢唔得閒，就會叫啲手下幫佢去大家樂買盒叉燒飯， 真係估佢唔到。查實華華不時都聽啲上等人講食經，喺佢哋口中，入流嘅叉燒推介通常圍繞翠亨邨、滿福樓、福滿樓、利苑等。至於大家樂嘛，真係冇乜聽過囉！
中環在線：中移動品牌榜再摘金 李華華
2008-08-15 AppleDaily
中 國品牌越多人識自然越值錢，咁邊個最有價值？「2008胡潤中國品牌榜」放咗榜，頭兩位同上年一樣，中移動（941）冧莊，工行（1398）繼續做阿二。 中移動以3800億人仔嘅品牌價值摘金，佔其市值18%，遠遠拋離得1800億人仔嘅工行，建行（939）就爬過中行（3988）入三甲。
李寧排名跌五級
其 實中國品牌首十個排名同上年差唔多（見表），只係做通訊嘅華為跌出十大，由貴州茅台頂上。至於上年無影無蹤，今年榜上有名嘅包括太平洋保險、百度同聯想 （992）。若然有進步大獎，相信會係阿里巴巴（1688）攞到，佢跳升15級到第17。而喺奧運開幕禮傳最後一棒火炬嘅李寧，旗下李寧（2331）品牌 排名跌咗5級到第31，下年唔知會唔會因為奧運呢一棒，令品牌價值飛升？據講品牌價值係「結合經濟資料和對消費者調研結果來評估」，總品牌價值比上年提高 31%。胡潤喺報告度話，奧運可望令中國企業對品牌價值更重視。
08胡潤品牌十大
‧排名：1去年排名：1品牌：中國移動‧排 名：2去年排名：2品牌：工商銀行‧排名：3去年排名：4品牌：建設銀行‧排名：4去年排名：3品牌：中國銀行‧排名：5去年排名：6品牌：農業銀行‧排 名：6去年排名：5品牌：中國人壽‧排名：7去年排名：7品牌：中國電信‧排名：8去年排名：8品牌：招商銀行‧排名：9去年排名：13品牌：貴州茅台‧ 排名：10去年排名：10品牌：交通銀行資料來源：胡潤百富
中環在線：廖烈武囝囝入廖創興 李華華
2008-08-15 AppleDaily
http://www.hkexnews.hk/listedco/listconews/sehk/20080813/LTN20080813555_C.pdf創 興銀行（1111）廖氏家族，安排第三代接班人。廖創興企業（194）公佈，兩位第三代包括廖烈武個仔廖金輝，同廖烈忠醫生個仔廖坤城，分別被委任做副董 事總經理及執董。廖坤城今年33歲，年資雖淺但來頭甚猛，係牛津法律系碩士，00年喺集團做老竇嘅替代董事，兼創興銀行董事。今次被委任做集團執董，以前 做企業融資、併購等律師經驗，可以拎番出嚟幫自己人。佢年薪連福利約96萬銀，另加董事袍金5萬銀。至於廖金輝，97年已經喺企業做執董，今次被委任做老 竇嘅副手（廖烈武係董事總經理），幫老竇手兼學嘢，咁嘅安排絕對係家族企業傳統。今年41歲嘅金輝，年資高啲，年薪加福利有324萬銀，袍金一樣5萬蚊。
中環在線：蘋果喬布斯高興得一日 李華華
2008-08-18 AppleDaily
iPhone 3G手機全球熱賣，最大得益當然係蘋果公司，股價由幾個禮拜前154蚊美金，炒上近180蚊美金，升幅逾15%。上個禮拜三收市，蘋果市值仲首度揮低互聯 網搜尋一哥Google，市值達1588億美金，超越Google嘅1572億市值，最開心莫過於蘋果行政總裁喬布斯（Steve Jobs）。
Google股價反彈
不 過，蘋果Steve Jobs高興只係維持咗一日，因為Google股價禮拜四反彈約1%，令市值重上1589億美金，超過番蘋果。以上禮拜五收市計算，Google市值達 1604億美金，較蘋果嘅1557億市值，高出逾3%。雖然Google市值高達千六億美金，不過同全球IT公司一哥微軟相比，仍然有大段距離，微軟市值 高達2539億美金，比Google高出差唔多成千億，點追！
中環在線：張朝陽「我啱做特工」 李華華
2008-08-20 AppleDaily
「跳水皇后」郭晶晶奪金當日，搜狐CEO張朝陽親身到前線採訪，仲拉咗霍啓剛做訪問。果然係IT人，永遠發揮創意。
必做應做都不做
《中 國企業家》訪問張朝陽，佢話自己啱做特工，因為鍾意收埋自己嘅感受。話說00年科網爆破，張朝陽話：「頭都要炸了」，每日都冇覺好瞓，又要應付諸多問題， 最慘要扮冇事，唔俾人知，總之俾公司業務拉住行，折磨到身心俱疲。搜狐去納斯達克掛牌前張朝陽就話有名冇利，冇安全感啫，家陣就唔同。佢話05年終於可以 施展佢嘅管理哲學，將「必做」同「應做」嘅責任同義務，喺佢嘅辭典裏刪除。家陣有幾free？佢話好似輪船，只要不時巡吓、周圍敲吓，保證機器正常運轉就 得。所以家陣放工後嘆咖啡時，就算有人搵佢傾合作嘅事，佢都唔會吓吓親身出動，只會叫對方搵相關部門。難關過盡，難怪佢話：「00年互聯網的冬天，誰都說 張朝陽是最弱的、最先死的，可是活得最久的就是我。」
Next Page