財女手筆：賭股更好選擇
1 :
GS(14)@2018-02-04 23:38:58賭股新聞近期娛樂性十足，本身準備新年前試住美高梅（2282）新酒店，點知延押1月29日嘅開幕，行過地鐵站仍然見到大量開幕廣告，對管理層執行能力大巴大巴車落去，真係一個重複性傷害。再嚟永利澳門（1128）控股股東主席Steve Wynn被Metoo，指控多年來性騷擾旗下賭場女員工，雖然有大行衝出嚟護航，話係舊聞，叫大家唔好理，低位吸貨。不過永利股價溢價咗好耐，永利皇宮前年8月開幕後，累計都升咗兩倍，相比起有新酒店開幕嘅其他對手，加上美國方面、澳門博彩監察協調局都話關注事件，相信永利股價仲有得波動，賭股有其他更好選擇，例如今年有新酒店開幕嘅新濠（200）。尤其永利最大品牌就係呢位「拉斯維加斯之父」、永利賭場嘅老闆，一舉一動當然唔係被逼落台辭職所能解決到，正如英國維珍集團（Virgin Group）創辦人Richard Branson一旦離開Virgin，相信維珍品牌嘅投資價值絕對失色不少。
Melody
來源:
https://hk.finance.appledaily.co ... e/20180131/20290591
財女手筆：跟北水買呢啲股
1 :
GS(14)@2018-02-13 03:14:28恒生指數兩日大跌2,000點，不過市場情緒出奇地冷靜，冇呼天搶地。身邊好多同事朋友更加只係食住花生等睇戲。無他，散戶好多好早已經畏高，手上一股都冇，市場升跌同佢哋無關。有啲投資者更加好早已經滿倉貨，呢兩日佢哋只係賺小咗，遠未入肉。喺咁嘅情況之下，市場情緒平靜係可以預計。不過喺幾日跌幾千點嘅情況之下，仲有一班勇者無畏無懼衝入場掃貨，果班就係北水，呢兩日瘋狂炒底兩日夾埋買咗180億貨，而且仲意猶未盡。因為人民幣升值之下，北水香港掃貨全部八折，對佢哋來講，港股依然都仲係平，每一次大調整對佢哋嚟講都係一個趁低吸納嘅機會，至於北水最鍾情嘅依然係滙控（005），兩日流入50億。呢兩日跌市固然恐佈，不過如果你信牛市未死，現價跟北水買番啲接近5厘息既滙控同接近4厘息既內銀輸極有限，嚟緊3月全年業績，喺息差持續擴闊下，斷估唔會差，博財息兼收，亦未嘗不可。
Melody
來源:
https://hk.finance.appledaily.co ... e/20180207/20297389
財女手筆：樓市玩會員制
1 :
GS(14)@2018-02-20 21:11:40半年前一篇〈如果有1,000萬，你仲買唔買香港樓？〉引起讀者熱議。時光飛逝，半年很快就過去了，香港樓市升完又升，上星期，放售多時嘅荃灣千萬兩房單位終於售出，天價變成市價，再次印證嘉湖林太「專家食屎論」何其擲地有聲。當普羅大眾覺得樓價如何貴而且不值嘅時候，偏偏樓價繼續脫離市民負擔水平向上升，而且天價原來真係有人買，仲話畀你聽其實唔貴，原來平行時空真係堅㗎。話說回來，香港樓價奇特嘅地方係違反一般經濟理論，當供應不斷上升，息口預期繼續加，樓價繼續唔跌，上年仲狂升超過一成。香港樓係咪真係咁超然？睇番香港政府過去咁多輪樓市逆周期措施，無論係壓力測試定係收緊按揭成數，喺保護香港銀行業穩定嘅潛台詞下話畀市民知：「我唔想你班窮人買樓。」自始，香港私樓市場正式同普羅市民告別，變咗少數有錢可以進入市場嘅人加北方來的暴發戶嘅玩意。就好似賭場出咗會員制，交唔起會費就連門都入唔到，你想賭都無資格。香港私樓市場變咗少數人嘅玩意嘅時候，結果就係係呢班人眼中，樓價遠遠未到好貴同負擔唔到，天價承接對佢哋嚟講無難度可言，喺經濟無問題嘅時候，佢哋買得起而且供得起有餘，完全毋須理會普遍市民係咪負擔得到，咁樣，貨源歸邊，樓價要跌就變得困難。可悲大部份香港普羅大眾似被遺棄，喺佢哋面前只有三條路，減薪排公屋或等運到抽每年得幾千個嘅居屋、租樓住，或者期望喺可見將來香港經濟大幅衰退從而帶動樓價下跌。何其悲哀。
Melody
來源:
https://hk.finance.appledaily.co ... e/20180214/20304732
財女手筆：買樓黃金期
1 :
GS(14)@2018-03-11 23:50:41執筆之時，將軍澳某新盤喺創同區新高價下開賣，收票仍然理想。樓市繼續瘋狂，喺咁嘅樓市下，上回講到香港政府多輪樓市逆周期措施，目的為唔想你班窮人買樓。咁政府唔想你買樓，究竟可以去到幾盡？就同大家計吓數。以買一層400萬樓計數（雖然現時市面上400萬樓已經所剩無幾），借按揭保險，可以承造9成按揭，首期加印花稅、律師費、經紀佣金、按揭保費，大約60萬就搞掂。呢60萬可能好多人用自己積蓄或者屋企人幫手都可以拎到出嚟，不過好多人買唔到樓，問題可能出喺無月入息限制呢度。400萬樓，承造9成按揭，借360萬，分30年還，以現時普遍按揭息率2.15厘計算，每月要供大約13,000元，入息最少要大約3萬。不過咁都仲未夠，政府為保護香港銀行業穩定，怕債仔喺加息環境下還唔起錢，僭建多個壓力測試，要假設咗利率升3厘你都還得起（過去10年都無發生過），每月最少入息即刻升到去接近36,000元。根據統計處資料顯示，喺30至39歲呢個最黃金嘅買樓年齡層，入息中位數得2萬。換句說話，你唔結婚公一份婆一份，你連入場玩嘅資格都無（俾多幾成首期者除外）。當然每個年代買樓都係困難，呢個係事實。不過現今呢一代買樓遠比之前幾代嘅人更加困難，喺壓力測試要求下，入息要求遠比真實還款要多好多，間接將一批本可以上到車嘅人拒於門外。前人如果入息唔多，都仲可以選擇節衣縮食，捱層樓返嚟；現今一代，即使你有一份入息穩定嘅工，係有機會因為壓力測試而做唔到按揭或者借唔足按揭，呢班人連死慳死抵去捱嘅資格都無。
Melody
來源:
https://hk.finance.appledaily.co ... e/20180307/20324250
Next Page