📖 ZKIZ Archives

上周更新 (2 Jun - 8 Jun) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/06/2-jun-8-jun.html
組合單位值: 91.94
組合週回報: -2.51%

上週組合加入永亨(302), 網龍(777), 創科實業(669), 銀娛6月$40 CALL OPTION, 加注稻香(573); 沽出部份理紙(2314). 目前現金水平約1% (前週23%).

恆指本星期大跌3.6%, 組合跟隨回落. 指數表現欠佳, 但用心感受, 會發現市場絕非一面倒恐慌. 個人觀察名單中, 市值較大如申洲(2313), 銀娛(27), 創科(669), 港燃(1083), 合生元(1112), 龍源(916), 信義(868), 瑞聲(2018); 或市值較小如網龍(777), 金山(3888), 信利(732), 舜宇(2382), 亞衛(1045), 聯泰(311)等等於今次跌浪中仍算守得不錯. 尤其當指數看似跌得勢兇夾狠之際, 有部份股票低位往往承接力甚強, 更甚至可以組織反攻, 仍然有人夠膽買, 要話今次調整係另一次股災前奏, 我認為證據不足.

前週提升現金比重後, 加上深信仍有大堆股票有可能發圍, 自己今個星期打法變得相當進取. 如早前所講, 投機性買入永亨(302) - 雖然作戰期以三個月為限, 但純靠NAV做買入考量, 愈跌愈低時根本一定唔會捨得沽出, 所以有可能係會步上不歸路, 注碼適可而止. 銀娛調整, 提供左一個幾唔錯既買入點去搏染藍前最後一星期股價會重新發力. 正如早前所講, 今次搏銀娛屬特殊事件, 非常時期用非常手段, 用期權肯定會比正股好. 索性用組合0.5%-1%去放手一搏, 目標起碼對開對半.

網龍今年首季手機網上業務總收入1.45億, 環比上升42%. 收入主要源自手機廣告及手機遊戲兩大類別. 前者季度收入70M, 環比上升18%, 同比上升200%, 締歷史新高; 後者季度收入68M, 環比上升47%. 野村早前發表研究報告, 引述管理層預期相關業務今年可以錄得理想增長, 全年收入達6億至8億人民幣. 假設網絡遊戲業務可以維持Q1表現, 即公司全年收入約14.5-16.5億; 純利率保持, 今年最高賺3.5億RMB, 現價預期市盈率約21倍, 以增長股而言, 估值可以接受; 控制注碼, 作中短線持有.

其餘持股方面, 趁稻香調整, 於$5.6左右加注, 目前已經買齊, 靜侯再次破頂; 本來星期一已經沽出部份港燃套現, 但後來見整個燃氣界別於今次指數調整浪中表現相當硬淨, 決定買回; PMI數據+兩份大行報告將理紙(2314)打穿近期橫行區. 市場明顯睇法有變, 就算幾有信心, 都唔可以太一意孤行. 理紙估值唔算昂貴, 減輕注碼後索性合埋眼, 再坐遠一點.

上周更新 (9 Jun - 15 Jun) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/06/90.html
組合單位值: 90.77
組合週回報: -1.27%

上週組合加注網龍(777), 買入銀娛6月$39 PUT OPTION; 沽出銀娛6月$40 CALL OPTION, 時代集團(1023). 目前現金水平約3.8% (前週1%).

恆指上週再跌近3%, 反彈無力之餘恐慌情緒更有蔓延跡象. 星期四早市頭半小時可算係今年最恐慌既一個交易時段, 當時基本上不論強股弱股一概被大舉拋售. 當日出現小股災, 領匯低位大舉反彈算係亮點所在. 今次跌浪中領匯等REITS屬第一批大跌股票, 可以暫時扭轉劣勢, 證明當時情況並非太壞, 無需急於跟風斬倉. 而最後下午連其他股票亦開始由低位反彈, 算係暫時脫險.

自己前週觀察, 發現跌市中仍有大量股票仍然高位徘徊, 因此決定提升持倉水平. 今日檢討, 當日所謂撈貨行動其實足足早左接近兩星期. 指數上週繼續跌得如此急如此勁確實出乎自己預期, 而且上星期五個股反彈力度普遍不足, 更加值得提高警覺. 整體投資氣氛繼續轉差, 難保強股遲早都會遭到拋售. 經過上星期後, 股票估值偏貴的話其實已經有減持必要. 自己持倉中網龍(777), 創科(669), 港燃(1083)估值都係算貴, 雖然後者業務上有一定防守力, 但以目前市況而言其實無必要持倉太重; 寧願明早適度減持, 輸少當贏.

銀娛今個月有染藍因素令其股價大幅跑贏其他濠賭股如金沙(1928), 新濠(200)等. 尤其若以金沙作指標, 銀娛更加顯得強得不合理. 恆指新貴表現特佳, 連我都睇到, 相信市場上有更加多投資者有參與玩呢個PARTY. 星期一指數變動正式生效, 我非常懷疑究竟仲有冇人會於如此高位繼續追買銀娛. 股票無買盤推動, 最終只有下跌一途. 自己星期五收市前沽清銀娛CALL OPTION後隨即反手開PUT, 注碼不多, 純粹搏銀娛係另一個聯想翻版, 染藍後股價由高位大幅回落.

信星盈喜通告無甚特別, 股價急升一段後便倒跌收場, 27號公佈業績, 屆時再作分析; 本地餐飲龍頭大家樂會於25號公佈業績, 對重倉成員大快活年度表現有一定啟示作用. 績前就無謂加加減減, 維持倉位.

調整部署 PARTIPRAL - ROAD TO FINANCIAL FREEDOM

http://partipral-hk.blogspot.hk/2013/06/blog-post_28.html
今個星期一, 二根本係難捱到暈, 不止一次想低位全線斬倉離場算數. 最後決定捱, 係因為有過面對股災經驗; 但最後等得到反彈, 今日諗返其實係相當夠運. 當日根本唔知反彈幾時黎, 就算前晚制定應市策略, 都要諗多幾個情景. 結果最後岩好開中對自己最有利一瓣, 淡市中算係拾回多少自信.

今昨兩日忙於將手上股票掟走, 投資生涯上從未試過如此於一, 兩天內大幅拋售股票 - 事過境遷後回望, 今日唯一感覺就係輕. 預期七月份股市會繼續出現大幅波動, 坐擁現金, 輕身上路, 心理上會好過得多.

其實我並不希望再有股災出現, 因為只有指數平穩起伏, 個股才有望百花齊放. 經歷急跌之後, 起碼要出現一段長時間橫行才可以斷定是否見底, 因此根本不用心急買貨. 目前唯一既應市策略就係, 萬一七月股災再臨, 我要肯定我唔會成為陪葬品.

大快活業績比預期中失望, 但隨著開業成本愈來愈昂貴, 只會愈來愈少新競爭者加入; 而現時市場只會被強者逐步蠶食. 諗通呢點, 大快活, 稻香, 大家樂本地業務肯定只會愈做愈勁, 除非品牌遭到破壞, 否則本地飲食股實在無太多值得顧慮既地方. 其餘中長線持倉之中, 基本上只差路訊通(888)就完成減倉行動. 根本不可能完全放棄股票, 但起碼持股要有足夠抗逆力, 方可渡過難關.

十二碼一係入, 一係唔入; 大陸今次一係死, 一係唔死. 死的話, 內銀, 建材, 資源股肯定跌到飛起; 唔死的話, 第一個復甦界別一定係內房. 兩天反彈後, 調整部署, 好倉換馬至一線尾內房海外宏洋(81); 淡倉主打工建招三行搭中國建材. 前者用星期二低位作止蝕; 後者用今日高位作分段撤退起步點. 長倉期權目前佔組合1%, 最多輸清光; 但只要短打內房有1成升幅貢獻, 便起碼可以打個和.

高現金水平配合好淡平衡出擊, 七月份部署基本上暫時已經完成. 長假期後或有另一片天與地, 屆時再作微調.

現時組合:

長線持倉: 32.6%
中線持倉: 7.9%

短線持倉: 9%

- 中國海外宏洋(81)

期權淡倉: 1%

- 工商銀行 07/13 4.70P
- 建設銀行 07/13 5.00P

業績簡評 - 維他奶 (0345.HK) [2012-2013] PARTIPRAL - ROAD TO FINANCIAL FREEDOM

http://partipral-hk.blogspot.hk/2013/06/0345hk-2012-2013.html

• 香港分部:
• 2012年上半年收入/利潤: 832,215,000 / 157,231,000 (18.90%)
• 2012年下半年收入/利潤: 839,619,000 / 158,851,000 (18.92%)
• 2013年上半年收入/利潤: 903,518,000 / 161,573,000 (17.88%)
• 2013年下半年收入/利潤: 893,070,000 / 158,439,000 (17.74%)

• 中國分部
• 2012年上半年收入/利潤: 599,891,000 / 74,290,000 (12.38%)
• 2012年下半年收入/利潤: 414,179,000 / 15,314,000 (3.70%)
• 2013年上半年收入/利潤: 700,256,000 / 96,617,000 (13.80%)
• 2013年下半年收入/利潤: 473,972,000 / 25,809,000 (5.45%)

股災之後 PARTIPRAL - ROAD TO FINANCIAL FREEDOM

http://partipral-hk.blogspot.hk/2013/06/blog-post.html
足足兩年未見過既股災六月再度出現, 奈何始終未能避開此劫, 組合回報創下今年新低.

今次股市垂直跳崖式下跌, 表面證據睇甚有機會係2011年8月翻版, 只係主角由美國換做中國而已. 中國信貸危機愈演愈烈, 有機會如上次般一樣最後無事, 但亦有機會達至無可挽救之地步. 長線投資股票, 最怕遇上大波動市況. 價值被徹底扭曲, 無疑製造執平貨機會, 但若然本身已經一褲都係, 碰上股災式大瀉, 過程其實相當難捱.

自己並非睇到世界末日, 但個人係極度不喜歡持重倉渡過如此波動市況. 有過2011年經驗, 自己相當有信心今次跌浪可以做得更好.

二, 三線連續兩日大洗倉, 已經證明市場極度恐慌, 而極度恐慌往往有利短線技術性反彈. 反正已經輸到嘔, 目前一定係衝入場用即月末日期權同佢搏過. 不敢肯定反彈會否於半年結前出現, 所以要配合正股出擊. 自己偏好用藍籌股作反攻箭頭, 因為買二, 三線根本唔知開邊隻, 又唔夠本錢打散十幾隻買, 索性搏指數股就最直接.

今次跌浪風眼在中國. 因此短線而言一定主力買大陸股; 另外香港地產股早已比指數先跌, 亦有權成為挾淡先頭部隊. 內銀, 內險, 內房, 本地地產四揀三, 自己選擇用平保及兩大藍籌內房股做正箭頭; 恆隆(101)則作輔鋒. 搏見底反彈可以輸到重傷, 因此止蝕位要守得緊. 今日低位乃最後防線, 萬一跌穿, 正股便要立即撤退.

短線睇上, 人行出手, 有權挾返成千點都唔出奇. 除用藍籌股+期權作絕地反擊之外, 亦要有心理準備將中長線持倉鬆綁. 要相信價值, 但亦要明白當股災出現時根本係覆巢之下無完卵. 人心變價格自然會變, 市況處於大幅波動, 所謂價值可以完全被市場情緒蓋過, 而持倉過重只會令自己錯過低位買貨機會.

除非斬手指戒賭, 否則當然不可能完全清倉離場, 個人目標係將組合持倉水平降至30-40%左右, 目標持倉如下:

長線持股:

大快活(52): 10%
港華燃氣(1083): 5%
中線持股:

信星集團(1170): 2%
時代集團(1023): 2%
瑞聲科技(2018): 2%
網龍(777): 2%

反彈過後, 七月重演六月走勢絕不奇怪. 淡市之中不能完全捱打, 當係對沖又好, 投機又好. 下月操作一定係主力LONG PUT OPTION. 重申今次風眼在中國, 做淡首選當然係大陸股. 出現信貸危機, 銀行一定係最大劑. 買期權內銀股之中首選招行(3968), 因為最大價會較易操作; 其次搭多隻指數權重股建行(939)或工行(1398).

本來內房股都係信貸危機下最令人生畏既界別, 但相對之下負債超高既建材股受累機會係更加大. 雖然中國建材(3323)已經跌得好多, 但若然真係出現中國末日, 股價肯定低處未算低.

簡單而言, 我自己做淡既話會瞄準呢三隻就算數, 太多心, 最終反而一事無成.

以上情況純粹假設, 目前只係制定策略, 但實行起上黎係唯有見步行步. 更差既情境係反彈時間推遲出現或力度遠比想像中細, 個人暫時可以想像到既操作方法係:

1. 跌多一千點先反彈

可以想像到最差既情況, 因為自己目標係等指數反彈先沽出中長線倉位. 指數再次急跌的話中長線持股係無可奈何要再捱一棍; 而短炒之藍籌股反而容易處理: 打中止蝕位即斬. 但整體而言肯定傷亡慘重.

2. 反彈於七月初

出現此情況, 因為末日CALL已經輸清光, 所以肯定未能完全受惠今次反彈. 姑勿論屆時反彈幅度如何, 指數升, 一定先將中長線倉位減持, 最後再將短炒之藍籌股沽出.
3. 反彈力度不足

於人心膽怯情況下出現短癮反彈或力度不足其實係有機會出現. 由於自己步驟係先減細, 再減大. 因此出現此情況最大損失係短炒大股要輸錢, 但若然中長線倉位可以成功減磅, 其實已經值得慶幸.

目前好大可能係另一個投資逆境, 但過得一個就可以過到第二個. 前年, 上年都唔死得, 今次都肯定唔會死. 如何演繹劫後餘生, 會係大家都要面對最大既問題.

上周更新 (16 Jun - 22 Jun) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/06/16-jun-22-jun.html
組合單位值: 89.70
組合週回報: -1.18%

上週組合買回時代集團(1023), 加入中海外(688), 恆隆地產(101); 沽出銀娛6月$39 PUT OPTION, 減持港燃(1083), 創科(669), 網龍(777), 稻香(573). 目前現金水平約2% (前週3.8%).

恆指上星期繼續乏力反彈, 進一步下試20,000點. 觀察個股表現, 一份無甚特別既報告竟然將舜宇(2382)打殘; 申洲(2313)趁高抽水, 最終亦失守配股價; 強中強銀娛(27)星期五亦出現大幅度下跌. 強股愈收愈窄, 剩下既被逐隻擊破, 並非好事. 指數星期五低位出現反彈, 但2,3線股票明顯跟唔上, 整體氣氛其實並無改善. 指數一日未能重上21,400, 應該要減低持倉水平, 降低心理負擔.

自己周初已經著手減持股票, 最佳做法都係隻隻沽少少; 最唔想沽都係稻香, 但因為此股盤路太疏, 趁有高位點都要酌量減少少. 雖然已經放棄睇好, 但臨近月尾, 其實可以考慮下搏出現技術性反彈. 當然如果搏反彈就一定用藍籌大股, 跌得最急果隻值得優先考慮. 富時指數調整比重, 中國海外(688)有明顯沽壓; 搭多隻恆隆地產(101), 拎星期五低位做止蝕, 投機性買入.

有幾個SECTOR其實應該仲未死得住, 如手機零件, 科網及燃氣. 瑞聲股價開始轉弱, 且看今星期有否機會趁低吸納; 至於之前提及過既信利(732), 相對上技術優勢不高, 自己預估今年估值起碼都13倍, 唔算特別便宜, 決定放棄.

雖然開始降低長線持倉比重, 但餐飲界別自己仍然有一定信念去堅持. 稻香業績啟示本地餐飲業人工增長放緩, 若然加上食材價格受控, 毛利率改善的話, 整個行業利潤都有機會提升. 今個星期比較關鍵, 且看翠華, 大家樂, 大快活業績如何, 再為組合持倉定去留.

派得好投資組合年結 (2012-2013) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/06/2012-2013.html
===================================
32% - 長線倉位:

12% 路訊通 (0888.HK)
7% 大快活集團 (0052.HK)
5% 港華燃氣 (1083.HK)

9% - 中線倉位:

5% 信星集團 (1170.HK)
2% 網龍 (0777.HK)
2% 時代集團控股 (1023.HK)

9% - 短線倉位:

9% 中國海外宏洋 (0081.HK)
0.8% - 期權倉位:

0.3% 中國建材 07/13 7.00P
0.2% 工商銀行 07/13 4.70P
0.1% 建設銀行 07/13 5.00P

49% - 現金
===================================

投資組合單位面值: 90.30
月回報: -4.26% / YTD: -0.04%)
(上月月結: 94.31 / 2010年7月1日起始值: 60.00)

派得好投資組合每日表現


過去一年交易比以往頻繁, 而當中亦出現甚多失敗交易, 主要出自短線倉位部署錯誤. 以絕對金額計算, 傷得比較重係來自以下幾個交易:

平均買入10,000壹傳媒(282)@$1.65
平均沽出10,000壹傳媒(282)@$1.39

平均買入12,000理文化工(746)@$5.29
平均沽出12,000理文化工(746)@$4.75

平均買入10,000建滔積層板(1888)@$3.89
平均沽出10,000建滔積層板(1888)@$3.58

平均買入4,800敏華控股(1999)@$7.60
平均沽出4,800敏華控股(1999)@$6.53

平均買入1,500中信証券(6030)@$20.70
平均沽出1,500中信証券(6030)@$18.58

投機壹傳媒(282)係由於以為出售台灣業務勢必成事, 但事後證明整個賣盤交易所牽涉範疇太闊, 成功機會率未必如想像中清晰, 加上復牌日股價已經高開, 變相出錯空間太少, 值搏率亦下降. 今次算係嚴守止蝕位, 可以及早沽清; 但損失金額亦算多. 日後面對此類情況, 就算立心投機, 其實都只宜小注入場; 機會率難辨, 當買期權算數.

理文化工(746), 建滔板(1888), 中証(6030)三項交易死狀同出一轍, 六個字概括: 中國復甦概念. 大中國美夢過去數年締造無數倍升股, 但必需接受現實, 中國目前經濟狀況肯定比想像中壞. 最低工資不斷抽升, 匯率許升不許跌正在不斷削弱企業盈利能力; 而技術附加值不高既工業, 製造業公司最受直接影響. 目前行業處於漫長整合期, 低潮甚難捱, 因此市場根本不會給予此類公司過高估值. 買入後期望市場遷就自己睇法, 倒不如改變自己, 去迎合市場.

投機中國復甦概念失敗, 得到相當重大教訓. 目前投資股票, 一定要撇掉以往中國必贏既想法. 目前只有幾類中國公司仍然可以力爭上游, 其一係勞工密集: 客戶需求有穩定增長而產品亦有一定技術要求; 大型如瑞聲(2018), 小型如時代集團(1023), 理文手袋(1488)等等工業股其實仍然有投資價值; 其二係產能轉移: 公司能夠早已, 或漸漸將產能移遷至其他人工低一大截既東南亞國家, 對盈利能力及競爭力幫助甚大. 如申洲(2313), 聯泰(311)等等, 目前估值仍然比過去三年最高多出一截, 絕非無的放矢; 信星(1170)目前正朝此方向走, 期待明年業績可以慢慢重拾增長正軌. 長期受政策打壓, 練得一身好武功既內房; 受惠國家重視重視環保政策, 大力推動清潔能源既燃氣; 估值不便宜但盈利增長強勁, 想像空間夠闊既科網都其餘值得看好既中國股票. 除此之外, 都係少碰為妙.

投資股票信念不足本身能夠造成既後果未必會太嚴重, 但若然信念不足之餘, 注碼又落得太大, 下場一定會相當淒慘. 投機敏華(1999)失敗, 正正係最佳例子. 事後證明當日睇敏華其實並無睇錯, 但INITIAL BET落得咁大, 當日傳出發CB消息後股價大瀉, 根本係不能不割席離場; 信念不足, 亦埋下翌日股價低位大幅反彈沒有重新進場既伏筆, AND THE REST IS HISTORY.

檢討今次失誤, 最大問題都係買得太大; 其次係當時根本無足夠心理質素呢頭斬倉, 第二日就重新追貨. 經歷過不斷挫敗, 其實已經開始明白自尊於股票市場之中根本一文不值. 拘泥於無謂既綁縛, 操作上反而不夠得心應手. 其實今年來已經比較多係先買入後再做功課, 但正如人與人之間相處, 開始時認識不深, 投放過量感情, 斬纜時痛得死去活來, 何苦? 投資為贏錢而非贏啖氣, 適當既做法係將注碼慢慢疊上去, 由市場決定是次操作正確與否 -  MAKE SURE BET ON THE RIGHT SIDE.

近日富士高(927)績後急挫兩成. 富士高之死, 根本非如管理層受訪時所講, 與派息下降有關; 最大問題係由於下半年業績嚴重走樣. 個個睇住上半年業績做VALUATION, 下半年遭與如此滑鐵盧, 事前根本無從預計. 沒興趣繼續談富士高, 反而今次事件令我回想起一年前重倉股聯亞(458)發盈警後股價急挫既慘況. 人生流流長必然會遇到幾隻大跌股, 停牌股, 清盤股, 若然未遇上, 只係時辰未到. 要將最壞情況出現後所造成既震撼減至最低, 最起碼要做既係注碼控制.

公司業務太難理解, 其實已經不值得重倉持有; 其次係交投太過疏落既公司, 亦不值得過份關注. 目前股票市場高手如雲, 所謂錯價很大可能係"自己睇錯價"多過"市場錯價". 普遍投資者都對此間公司提不起勁, 買賣兩閒, 就算公司無問題, 都肯定叻極有限. 更關鍵係買又無對手, 賣又無對手, 一個壞消息, 個個爭先恐後沽低幾格; 買賣高難度股票沒有特別獎金, 其實又何必枉費精神? 日均成交幾萬股, 倉位細, 尚且勉強可以; 但我總唔信十年, 廿年後大家仍在打理一個數十萬股票倉位. 良好習慣, 必須從小開始培養. 自己已經全線撤出低流通量股份如永旺(984), 聯亞(458), 利亞(831), 永安(289)等等. 昔日愛股又如何? 今日回望, 除笨有精. 投資股票, 根本從來不應投放感情.

展望第4個投資年度, 自己投資理念從來無變. 組合挑選長線持倉成員, 優先考慮條件仍然係業務簡單, 派息穩定既公司. 以往單純沉醉股息回報, 但其實更重要既係盈利穩定兼且能見度高. 若然基本因素沒有大變, 大快活(52), 稻香(573), 港燃(1083), 路訊通(888)都會係組合核心成員, 其餘長線成員選擇尚有莎莎(178), 佐丹奴(709), 置富(778), 領匯(823), 金沙(1928), 中國海外(688)等等.

中線持倉成員會傾向挑選盈利增長具確定性, 又或者正處爆發週期公司. 時代(1023), 網龍(777),信星(1170)便屬現時選擇. 仍打算加入瑞聲(2018), 聯泰(311), 維他奶(345), 合生元(1112)等等.

短線持倉反而無特別喜好, 嚴守止蝕, 主要挑選有特別催化劑既公司作短線持有. 指數換馬必然要參與; 其次係估值極殘; 其三係52週新高, 價量異動既股票, 亦可以加入考慮. 有過以往經驗, 來年操作上仍會傾向先買入後了解. 風險用注碼控制, 短打INITIAL BET極限可能係組合2%, 等證據愈多, 再放大注碼. 另外亦會多用期權長倉, 為長線成員對沖風險.

投資組合第三年回報持平, 但若以期間個股表現作標準, 如此戰績當然完全不及格, 但可貴既地方係今年學到既野比之前兩年加埋更多. 曾經以為買中倍升股就眼光獨到, 今日回望簡直貽笑大方. 愈美麗的東西我愈不可碰, 挑選倍升股皇, 故事太淒美動人; 其實只要組合平穩增長, 股災唔會一役沒頂, 就係個人來年投資最大目標.

======================================================
上月月結: 派得好投資組合月結 (May 2013)

第3年半年結: 派得好投資組合月結 (Dec 2012) / 半年結
第2年全年結: 派得好投資組合年結 (2011-2012)
第1年全年結: 派得好投資組合年結 (2010-2011)

投資組合第3年(07/2012-06/2013)回報: -0.83% (最高: +3.78% / 最低: -5.17%)
投資組合第2年(07/2011-06/2012)回報: +20.7%
投資組合第1年(07/2010-06/2011)回報: +26.4%

上周更新 (30 Jun - 6 Jul) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/07/30-jun-6-jul.html
組合單位值: 90.22
組合週回報: -0.0%

上週組合加入中石油(857), 維他奶(345), 瑞聲(2018); 減持路訊通(888), 賣出中海宏洋(81). 小注短炒世房(813), 微蝕離場. 將招行(3968), 工行(1398)即月PUT OPTION平掉, 換馬至安徽泥(914), 江西銅(358)即月PUT OPTION; 將中建材(3323)即月PUT OPTION行使價不斷下移, 繼續持有.

上星期恆指先見21,000然後急劇回吐, 最後兩日又可以急升超過700點, 價位波幅之巨, 上落步速之快, 極難捉摸. 用心感受市場, 其實來來去去大家都只敢炒指數股. 所謂強股, 其實早已所剩無幾. 合生元(1112)之死, 除反映於大陸做生意容易受政策風險影響, 中國模式, 國進民退之外; 港股目前相當相當難炒, 亦係一大問題.

恆指"高倨"兩萬點樓上, 但國指早已除除向下, 往2011年低位進發. 就算不計科網股, 其實仍然有甚多股票遠高於2011年低位. 信手拈來, 中國建築(3311), 金沙中國(1928), 中海外(688), 新奧燃氣(2688), 恆安國際(1044), 信義(868), 創科實業(669), 申洲國際(2313), 莎莎(178)...但相反, 亦的確有一堆股票正向當年低位邁進: 建滔(148), 理文(746), 馬鋼(323), 中國龍工(3339), 重慶機電(2722), 至於內地消費型百麗(1880), 達芙妮(210), 利邦(891)等等早已仆直更加不在話下.

唔得既股票會繼續唔得, 有好一堆公司自己睇得相當淡, 延續中國無運行主題, 淡倉三寶水泥兄弟搭江西銅, 應該都算係今個月長沽之選; 但另一方面, 就算得既股票, 亦唔知邊日會隨時變成賤過地底泥. 合生元(1112), 舜宇(2382)便屬最好例子. 自己都開始有D迷惘, 究竟現時仍買進估值貴至完全無出錯空間之維他奶(345); 或者以$40以上價錢買進瑞聲(2018), 是否將組合自行引爆之導火線?

太多UNKNOWN, 又唔係非持有股票不可, 立心迴避風險, 其實最佳做法係儘快將錯誤修正, 覺得有疑問的股票就不如斬左佢就算數. 相對美股仍保牛氣, 香港太多股票正在拉牛上樹, 實在很難說服自己現時在牛市之中. 買正股炒唔起, 做淡倉又隨時俾人挾到嘔電, 自己實在未想到有更好應對方法. 淡倉當然會繼續持有, 但就無謂亂咁加注. 無端端買大左, 輸起上黎心理上比買錯股票更難過.

操作短評 (10 Jul 2013) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/07/10-jul-2013.html
1. 低成交下大家繼續廝殺指數股, 飄上飄落唔駛十分鐘, 正常穿兩萬一就要追貨, 但今日早段明顯中伏; 暫時靠邊站, 減少Day Trade.

2. 淡倉三寶(358, 3323, 914)價外期權時間值流失速度開始加快, 今早江西銅隊穿祥上身即月12蚊PUT竟然只升得不足五成, 暫時將個股PUT全數清倉離場, 等挾返高D再買好似比較抵搏.

3. 藍籌股中石油仍算可以, 起碼能夠完全跟足指數走, 頂得順INTRADAY波幅, 其實可以繼續持有; 自己會換馬至恆地(12), 止蝕位放$45.5, 搏重上$50.

4. 亞太衛星(1045)穩守突破點, 止蝕位放$5.55, 小注投機性買入.

5. 上週末完成信星集團(1170)分析 (1170.HK 信星集團), 近兩日成交開始增多, 算係佳兆. 似乎係有少少成功機會既MID-TERM TRADE, 自己已經開始加注. 只要守穩裂口高開日低位, 順勢操作, 暫時問題不大.

6. 瑞聲(2018)成為繼舜宇(2382), 合生元(1112)後第三隻強股被擊落, 喜幸星期一及早修正錯誤, 否則已經坐艇. 走勢甚差, 暫時唔會沾手.

上周更新 (7 Jul - 13 Jul) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/07/7-jul-13-jul.html
組合單位值: 91.17
組合週回報: +1.05%

現金水平: 4.8%

上週組合加入聯泰(311), 亞衛(1045), 恆地(12), 聯想(992), 中海外(688); 加注信星(1170), 重新加入中石油(857). 賣出維他奶(345), 瑞聲(2018). 小注短炒世房(813)失敗, 中海外(688)失敗; 中石油(857)成功, 潤地(1109)成功, 恆安(1044)成功. 期權方面, 安徵水泥(914)即月PUT平倉; 江西銅即月$12 PUT繼續持有; 趁中建材(3323)反彈開即月$6.75 PUT.

上週比較多短炒, 先做賽後檢討:

1. 星期一低位接中石油(857), 當時股價$8.65, 拎當日低位$8.6止蝕, 上望$8.8左右, 最後成功達標, 而及後再升, 只屬後話;

2. 星期一同一時間分注出擊潤地(1109)與世房(813)兩隻內房, 前者$20.15買, 止蝕放當日低位$19.8, 翌日$20.7沽出; 後者$14.46買, 止蝕同樣放當日低位$14.28, 翌日升幅竟然跟不上兩隻龍頭內房, 及後更加自行倒地. 觸及止蝕位但走唔切, 輸多左幾格. 總結兩隻內房一勝一敗, 來回得個吉.

3. 星期二恆安(1044)無厘頭低開近3%, 無特別新聞, 當然紮衡馬衝入場. 開市後見低位回升, 正路當然立即追買. $78.65買, 止蝕放當日開市$77, 結果$80.25沽出;

4. 星期三指數一下子挾上21,000點, 見如此情況當然追貨. 追買藍籌中最有信念兩隻: 中海外及中石油, 另加農地催化劑恆地(12). 結果當日走勢超級飄忽, 十分鐘內指數由升300變幾乎倒跌, 收市前又升返兩舊. 可惜當日短炒其中兩隻中海外及中石油早已被震走.

總結幾個短線交易, 好多都係一蚊搏一蚊既交易, 問題不大. 當然要考慮埋交易費用, 但以當時市況如此又快又飄, 可以選擇唔賭; 但若然參與, 短炒其實係唯一出路.

不過經過上星期幾日好淡角力後, 星期四指數出現大成交裂口上升, 短期都一定係睇上. 星期五小幅調整, 係一個幾好既上車機會. 趁機減低現金水平, MARK實幾隻大股; 寧願放遠少少止蝕位, 都要一定要買.

雖然追買大股, 但基本概念仍然未變. 中國相關股票如內銀內險證券股, 暫時係點都唔買, 所以變相自己會小左好多選擇. 中石油(857)基本因素扭轉, 2 Jul大成交裂口上升後一直無回補跳空位意慾, 買大股的話係根本無可能走甩呢隻. 自己決定於$9.2左右買回, 寧願預輸6毫子, 都要重新上車;

恆地(12)情況類似, 農地算係少少催化劑, 5 Jul大成交裂口升穿6月大跌後整固橫行區, 本地地產股要PICK一隻寧願揀跟4叔買; 中國海外(688)賣樓數字理想, 市場反應正面, 11 Jul大成交裂口上升, 次日亦未有回補意慾, 立即買回; 聯想(992)個人電腦市佔率稱霸地球, 小注投機性持有.

大股之外, 組合亦加入聯泰(311)及亞衛(1045). 兩者皆會於8月份公佈中期業績, 先行小注進場; 剔出瑞聲(2018)及維他奶(345), 主因係前週買入時明顯太衝動. 兩股估值已升至沒有任何出錯空間, 揸得唔舒服, 倒不如唔買. 星期一微蝕離場, 事後睇係執番身彩.

開始加注信星(1170), 自己有少少信心, 逐個禮拜慢慢買, 主因係交投問題, 不能一次過買太多; 網龍(777)走勢甚有股王風範, 熊市中難得既牛股. 雖然不可能買得大, 但點都繼續持有.

雖然目前大市基本上已經無太多強股或領導股, 但燃氣界別走勢則明顯轉強. 中國燃氣(384)升勢甚勁, 週線圖亦準備突破, 應該多加注意; 另外味千(538)剛公佈同店銷售數字比首季理想, 實地觀察, 本地店午市亦要排隊等位; 早前品牌遭受嚴重破壞, 但銷售網絡仍然強大, 挽回食客信心後有機會扭轉長期弱勢.

期權方面目前只有江西銅(358)及中建材(3323)淡倉, 約佔組合0.7%. 睇淡中國大方向不變, 但短線可能會走走位, 畢竟現時已經係月中, 時間值流失速度可以甚快.