萬南 二五中環 官永義 變身散戶？
1 :
GS(14)@2015-08-23 01:08:06http://www.metrohk.com.hk/index.php?cmd=detail&id=288269&search=1
上星期，「抽水大王」官永義(圖)旗下嘅永義國際(1218)公布沽出手頭一批港交所(388)，平均價大約$217，幫公司賺咗兩千零萬。但咪以為官生炒港交所好準喎，事關佢旗下另一上市公司永義實業(616)喺上個月用咗4千零萬掃港交所，平均作價要$242，唔夠一個月已經每股帳面蝕$40，足足輸緊7球幾。
好多人都唔明官生點解咁分裂，兩間旗下公司可以對港交所完全唔同View，其實你哋對官生認識太淺，佢只係擁有一般炒鬼嘅特質。就好似永義實業早前用咗7球掃入南方A50(2822)，通告講明買入原因，乃貪佢係具吸引力嘅投資，點知4個交易日之後就盡沽，唔計使費賺咗7萬大元，手法十足企喺銀行門口嘅師奶散戶。
萬南 二五中環 馮裕鈞遇電郵騙案
1 :
GS(14)@2015-09-19 21:17:31http://www.metrohk.com.hk/index.php?cmd=detail&id=290908&search=1
萬南每日收到過百封電郵，有時真係花多眼亂，再加上近排多咗電郵騙案出現，的確唔敢立亂打開一啲有可疑嘅附件。繼葉劉淑儀早前收到假冒港鐵主席錢果豐電郵，搞到電郵戶口被駭客入侵，仲冒認佢將50萬轉走後，萬南收到好堅嘅江湖傳聞，指利豐（494）第4代掌門人，亦即現任行政總裁Spencer馮裕鈞(圖)亦遇到類似情況。
外面傳嘅版本係咁嘅，原來Spencer唔知由幾時開始，被駭客入侵咗佢嘅公司電郵戶口，駭客入得去，當然係想食大茶飯，摸清楚利豐嘅架構後，就冒認Spencer發咗封電郵畀利豐財務總監Ed Lam，叫佢過一筆銀碼相信唔細嘅數落某個戶口，阿Ed收到後覺得唔多對勁，於是好多事打電話畀老闆Spencer求證，識破係騙案，未至有金錢損失。
而喺呢個時候，Spencer先知自己電郵被駭客入侵，快快手叫IT除病毒，但唔知之前有乜機密文件被駭客睇咗呢又？而發生呢單嘢之後，據聞Ed亦同樓下啲手足講，叫佢哋做足防範措施，以防再有類似情況出現。
萬南 二五中環 復星有橋 循環再用
1 :
GS(14)@2015-09-19 21:18:01http://www.metrohk.com.hk/index.php?cmd=detail&id=290908&search=1
舊年4月，萬南寫過有「上海和黃」之稱嘅復星國際（656）竟然冇折讓又「了能」供股，目的就係唔想散戶跟供，結果真係認購額不足，令到身兼包銷商嘅大股東趁機增持。
當時萬南已講咗，用逆向思維諗就一定要買，供股完咗復星股價就一路向上，足足升咗一倍有突，萬南雖然冇咁叻喺高位沽清，但總算有顯著回報。
復星頻頻去歐洲血併收購，伸手要錢好正常，但要留意佢集資嘅辦法，晌幾個月前嘅大時代，復星選擇高位批股畀馬雲(圖)同馬化騰，到依家股價回落不少，佢又再施展舊年冇折讓又「了能」供股法，大股東真金白銀供股之餘，仲希望趁低吸納，所以喺依啲位應該建底，何況依家買平雙馬多多聲，感覺零舍良好。
萬南 二五中環 17入股「17」 直播彤叔近況鄭家純晒胸
1 :
GS(14)@2015-10-04 03:23:45http://www.metrohk.com.hk/index.php?cmd=detail&id=292049&search=1
近排最矚目話題，唔係炒新iPhone，而係失驚無神彈出一個直播社交App名叫17，瘋魔萬千後生仔，萬南認識唔少金融圈好友更玩到通宵唔瞓。究竟有乜好玩呢？但因為有啲人越軌直播一啲踩界嘢，被App Store拉下架暫時冇得玩咯。
提起17，更多中環人諗起呢個係新世界嘅上市編號，有口痕友就話如果17入股17，純官鄭家純做17App嘅名譽主席，除咗夠噱頭，仲大大提升重新上架嘅機會。班友甚至愈吹就愈認真，想叫一啲做開直投嘅老友做串連，乘機賺隻佣咁話。
雖然十劃都未有半撇，但班友已經諗咗好多極具話題嘅直播頻道，例如直播久未露面嘅彤叔近況，等大家睇吓佢老人家健康良好；亦可在全線周大福直播賣金情況，萬一有賊人進來，除咗可當閉路電視，就算出咗舖頭條街四圍都有人有手機，用17直播賊人逃跑路線都相當過癮；最後一條剎食頻道，就係搵鄭家純做深宵直播，不過唔係大老闆純官，係同名同姓嘅性感女星雞扒妹(圖)，有佢坐鎮，肯定吸引唔少男粉絲。
萬南 二五中環 Cosplay公司都上市
1 :
GS(14)@2015-10-04 03:24:10http://www.metrohk.com.hk/index.php?cmd=detail&id=292049&search=1
近排創版全配售愈玩愈離譜，立基工程（8369）上市幾日示範瘋狂過山車，只可以講不適宜老散操作，要買便預咗有輸晒嘅心理準備。其實近日申請上市嘅公司，唔少都概念獨特，就好似中國派對文化（1532），單睇個名仲以為係搞派對生意，但原來佢係全中國最大Cosplay假髮製造商、Cosplay服飾就排第3，仲係國內性感內衣第2大生產商。
中國派對文化似乎專做女性生意為主，但原來兩名老闆係雄糾糾男子漢，本身對Cosplay興趣唔大，只係做假髮起家，見Cosplay近年大熱才踩隻腳入去，至於點解搞埋性感內衣就無從稽考。其招股書將「性感內衣」列為專業詞彙，以下是形容「以性感和神秘為特色的一類內衣，能營造強烈的視覺吸引力，最終形成視覺刺激，刺激人類五官並喚起人類的性慾。」寫嗰位律師文字功力幾有意境喎。
萬南 二五中環 林夏薇老公5個月閃辭執董
1 :
GS(14)@2015-10-04 03:24:37http://www.metrohk.com.hk/index.php?cmd=detail&id=292049&search=1
早前同姐仔林夏薇(圖)結婚嘅金融才俊Jason莫贊生，坐喺多間上市公司嘅董事局，算係金融圈其中一位當時得令嘅人。佢最近又有新舉動，9月底生效辭任衍生集團（6893）執行董事，理由相當例牌，因為要個人發展及其他機會，睇落冇乜唔妥，但如果再細心留意，Jason今年五一勞動節才生效加盟衍生，竟然做唔到十一國慶，5個月就玩完。
市場對閃辭之快令人生疑，大家都想知發生乜事，尤其係Jason只係向衍生請辭，未有向其他公司劈炮。老缸湖話唔知乜料，不過市場係會講說話你知。
萬南 二五中環 城中有錢佬被貼街招狂數
1 :
GS(14)@2015-10-18 23:08:04http://www.metrohk.com.hk/index.php?cmd=detail&id=293185&search=1
近排多咗香港人傾「去殖民化」話題，就好似郵政署打算將幾十個英國殖民時代沿用至今僅存嘅郵筒，將刻上面皇冠標記及英國皇室徽號遮住，結果被唔少網民鬧爆。講開去殖民化，有間公司名唔多政治正確老闆，身家非常疊水，亦都出名疏爽人緣好，但睇嚟近排惹到唔少麻煩。
點解咁講？話說萬南早排行經銅鑼灣，竟然見到呢位有錢佬被人圖文並茂貼街招，狂數佢舊事，由於涉及誹謗成分，請恕在下唔可以將內容透露。老友話有錢佬其實好多區都被人勁貼街招，更誇張到出現系列式街招，唔同版本有唔同內容，睇策劃者用唔少人力物力搞呢件事。
老友仲話某日佢落街放狗，路經呢位被人狂數有錢佬某個頻頻打躉地點，發現對面街有一班兇神惡煞大漢企喺度，感覺極唔友善，唔單止佢覺得巧驚驚，就連隻狗都認為勢色唔對，行過時不停狂吠，佢惟有急步趕返屋企。
萬南 二五中環 蔡洪平出山 火速籌50億
1 :
GS(14)@2015-10-18 23:09:18http://www.metrohk.com.hk/index.php?cmd=detail&id=293185&search=1
今年2月冇做德意志投資銀行亞太區主席Henry蔡洪平，近呢半年都冇聽到佢動向，原來自立門戶搞新基金，據聞近日開始見人集資，目標係籌10億美金，以新成立基金講唔算大貪，成績亦相當唔錯，好快已達標一半以上，相信3個月內可以正式投入運作。
點解咁多人遞上支票畀Henry搞基金？事關佢人面極廣，曾經幫約170間中國企業走出去IPO，再加上名氣極大前星級分析師Joe張化橋，出名有料但唔易相處，但當年佢哋喺UBS合作，Henry係Joe直屬上司，阿Joe亦好服佢，就證明此人相當了得，投行界更形容佢同「紅籌之父」梁伯韜都屬神級。
Next Page