隔牆有耳：明哥素菜特別又有營
1 :
GS(14)@2015-03-29 11:20:44
中東鷹嘴豆炒飯、東南亞金不換素菜米紙卷、藜麥紅菜頭粥，呢啲素食菜式咁有新意，到底出自邊位星級大廚之手？咪深水埗明哥囉！為咗照顧不同國籍、不同宗教嘅基層人士需要，明哥精心炮製咗一張健康素食菜單，暫時有10款，粥粉麵飯樣樣齊，連麵包都係自家製，講明絕對唔落雞粉、蠔油同味精，肯肯定健康有「營」。噚晚仲特地喺深水埗舖頭搞咗個「明哥飯局」，邀請成班老友齊齊試味，八方有幸成為座上客，先至知道素食原來可以咁有特色！話說明哥曾經向一班南亞裔露宿者派飯，但對方擔心有豬油、口味又唔同而婉拒，激發明哥同夥計鑽研新素菜嘅念頭，仲專登請教南亞裔大廚過兩招。佢透露嚟緊可能會去元朗開社企平價飯堂。
來源:
http://hk.apple.nextmedia.com/news/art/20150327/19091743
隔牆有耳：化身魚蛋佬食粟米財爺軟銷美食車
1 :
GS(14)@2015-04-08 08:33:15財爺曾俊華喺財政預算案提出搞美食車（Food Truck）。為咗身體力行推動，鬍鬚曾噚日出席工聯會陳婉嫻喺觀塘海濱道搞嘅「反轉天橋底」墟市活動時，即場變身生招牌，喺工聯會特登為佢度身訂做、掛住印有佢篤住魚蛋嘅卡通banner貨車前「開檔」，篤魚蛋畀現場嘅小朋友食。唔知鬍鬚曾會唔會覺得配埋一杯咖啡，成件事更加perfect？除咗變身魚蛋佬，鬍鬚曾仲即席試食有機粟米；咁鬼賣力宣傳，無非想大家多多支持美食車計劃，佢話好希望盡快落實呢個建議，會交畀旅遊事務署詳細研究㗎嘞，佢就唔想美食車只係賣魚蛋同燒賣喎，最好係要發揮多啲創意。
嫻姐促推動墟市
其實噚日嘅墟市係由嫻姐牽頭成立嘅「天橋底行動」舉辦，由朝早10點至黃昏6時，免費租畀有興趣嘅地攤檔主。八方去睇過，墟市有約20個地攤，賣有機蔬菜、自家創作布袋、飾物等。嫻姐請到財爺大駕光臨，當然唔放過佢，除咗要財爺快啲落實美食車計劃，又話政府既然搞得降低食物中鹽和糖委員會，唔明白點解唔可以成立統籌部門，推動地方經濟舉辦墟市？而負責提供魚蛋畀財爺篤嘅張先生，原來係喺黃大仙冬菇亭做食肆，佢話而家每月租金約20萬，租金好貴；如果政府真係推行美食車，佢有興趣經營㗎，起碼成本低咗、又唔使請咁多人。
李八方
mailto:
[email protected]
來源:
http://hk.apple.nextmedia.com/news/art/20150408/19104885
隔牆有耳：胡景邵ATV藕斷絲連
1 :
GS(14)@2015-04-11 11:36:50雖然政府決定唔畀亞視續牌，但係匯友資本首席合夥人胡景邵仲係好想做白武士，同亞視藕斷絲連，噚日親自去大埔廠房登門造訪。佢接受亞視新聞部專訪，形容同亞視關係好似「追女仔」咁，不過如果政府呢個「未來外母」要收番亞視頻譜，都惟有放棄呢段姻緣。早兩日喺記者會上，胡景邵已表現幽默感，佢喺專訪用咗個好有創意嘅比喻，話好想追到亞視，但係呢個女仔下個月要去美國讀書，而家佢好痛苦，希望未來外母打救，畀個女留低。不過追女仔都有底線，胡景邵講明只係做「白武士」啫，唔係「勇武士」，營運唔到都冇辦法。同胡景邵一齊去亞視嘅另一合夥人何智恆就話，希望傾到一個政府接受嘅可行方案，等亞視繼續營運。
來源:
http://hk.apple.nextmedia.com/news/art/20150411/19108613
隔牆有耳：TVB突重播《大時代》丁蟹效應又殺到？
1 :
GS(14)@2015-04-15 02:06:54【本報訊】股市呢排係咁升，無綫就食住條水，突然宣佈下個星期一（20日）午夜時段重播經典劇集《大時代》，係事隔18年再喺大氣電波上映，被視為股市升跌指標嘅「丁蟹效應」再次被熱烈討論。被問到擔唔擔心套劇一重播個市又跌？無綫企業傳訊部副總監曾醒明話：「其實鄭少秋喺《Sunday靚聲王》都出現咗一段時間啦，個市都長升長有呀！」其實咪話唔驚，睇番秋官以往嘅紀錄，丁蟹效應真係唔講得笑，首先1992年秋官喺《大時代》飾演「丁蟹」一角就有劇情講股市，播映時就適逢香港股災，之後幾乎套套有佢份嘅劇一播就出事，股民唔擔心就假。
艾威興奮大讚神劇
不過曾經效力港視嘅艾威就好興奮，佢當年喺《大時代》飾演暗戀藍潔瑛嘅警察李立光，當佢知道《大時代》重播嘅時候，佢就話：「咁正？」艾威話呢套劇好經典，「仲有一樣好經典就係造型嘅時候先知換咗角色，本來係做丁蟹四個仔其中一個，即本來係陶大宇個角色」。艾威仲話當年呢套劇係口碑好，但係收視就唔好，又大讚呢套係神劇。
來源:
http://hk.apple.nextmedia.com/news/art/20150414/19112119
隔牆有耳：TVB七警報道獲國際獎
1 :
GS(14)@2015-06-23 20:16:34每次有新聞行家得獎，八方都會覺得可喜可賀，之但係今次呢單行家得獎消息，就令人百感交集。八方聽無綫電視新聞部行家講開，佢哋舊年嘅七警暗角毆打曾健超嘅報道，最近勇奪第55屆蒙地卡羅電視節最佳新聞報道獎。當日無綫電視攝影師眼明手快咁影到七警暗角打人片段，再由當時嘅助理採主何永康配上「警員將佢抬起，帶到添馬公園一個暗角位，將佢放在地上，對佢拳打腳踢」嘅旁白。點知新聞部總監花哥袁志偉河蟹，下令刪去「拳打腳踢」字眼，事件令到無綫員工好㷫，聯署反抗，最後何永康等多人先後離職。無綫今次呢單新聞獲獎，內部有記者就覺得高層一方面出手打壓，但又同時拎呢單新聞去參賽，都幾睇唔過眼。個獎由當日開口力撐花哥決定嘅無綫新聞部經理黃淑明去拎。
來源:
http://hk.apple.nextmedia.com/news/art/20150623/19195017
隔牆有耳：有機西瓜少甜 響應政府？
1 :
GS(14)@2015-07-10 08:54:07漁護署每年都同新界蔬菜產銷合作社舉辦本地有機西瓜節，今年仲最新引進咗來自泰國嘅品種「玉蘭」。新品種果身呈圓形，表皮係鮮綠色帶有條紋，肉質爽脆，最特別之處係果肉呈淡黃色，比較少見。雖然甜度唔夠其他西瓜高，但係政府都成立「降低食物中鹽和糖委員會」，咁「少甜」西瓜都不失為一個符合政府政策嘅另類選擇，況且「玉蘭」含較多葉黃素，對雙眼有益。本地有機西瓜節將會喺今個星期六、日喺沙田公園結客場舉行，時間由上午10時至下午4時，免費入場。大家除咗可以一試呢款黃色微甜西瓜，仲有另外3款近年引入嘅有機西瓜出售，包括「超甜黑美人168」、「黛安娜」同「鳳姬」，而參加展銷嘅43個農戶，仲會攞埋自家種植嘅時令有機蔬果出嚟㖭。
來源:
http://hk.apple.nextmedia.com/news/art/20150710/19214798
隔牆有耳：10A港姐：佔中對港有益
1 :
GS(14)@2015-09-08 07:59:55■出爐港姐冠軍麥明詩曾經去過佔領現場，仲喺instagram貼相。
曾經喺instagram貼過雨傘運動相嘅十優狀元港姐冠軍麥明詩，摘完后冠一身輕，日前接受《南華早報》訪問時談敏感嘅佔中議題，佢話欣賞佔中引發港人思考，對香港係有益嘅，反映到港人對香港嘅熱愛，形容佔中對香港嘅歷史係特別時刻。問及對佔中有乜取態？去過佔領現場嘅麥明詩話，行動證明咗一切（action speaks for itself）。
做特首會降樓價
曾經話過想做女特首嘅麥明詩話，從政已非佢年幼時想像咁，如今發現從政涉及政治角力同財政實力，仲要政治正確，嚟緊呢一年都想喺演藝事業多啲發展。但如果真係做特首，一定會將香港嘅房屋變得可負擔，聲言自己同身邊好多朋友啱啱大學畢業，都覺得樓價高到難以搬出嚟住。喺劍橋讀法律嘅佢仲話，香港嘅法制應該完善，以防止「大多數的暴政」。被問到做港姐係咪想釣金龜？畢業於女拔、劍橋嘅佢用相當優雅嘅用語回應：「I can't be more offended」，話呢個想法冒犯，若然要釣金龜，用不着選美，因為喺劍橋，大把合資格嘅單身漢畀佢揀囉。
來源:
http://hk.apple.nextmedia.com/news/art/20150908/19287045
隔牆有耳：翻版麥明詩為林作助選
1 :
GS(14)@2015-11-24 08:29:49今屆區選新人王，黃大仙龍星區嘅林作肯定上榜，單憑佢有個十優港姐女友麥明詩Louisa，就已經係話題。不過面對住爭取連任嘅譚香文狙擊，仲有對手岳敬寬、何偉權，林作都一直冇出動十優港姐助選，反而佢媽媽同婆婆，都喺較早前出現過。就算噚日衝刺日，都未見伊人影蹤噃，唔通係cctvb唔畀佢拋頭露面？
■去到噚日衝刺日，林作始終都冇出動女友麥明詩助選。張志華攝
八方現場所見，林作雖然請唔到女友助陣，但助選團亦請嚟唔少美少女撐場拉票，當中更有酷似麥明詩嘅面孔。入夜後細雨紛飛，呢班短褲女郎攞住螢光標語，笑意盈盈幫呢位25歲大律師拉票。美少女戰術，真係唔打得都睇得。
來源:
http://hk.apple.nextmedia.com/news/art/20151123/19384264
隔牆有耳：拍住民建聯 TVB變TVDAB
1 :
GS(14)@2016-03-01 18:19:22呂秉權 fb圖片
前晚全港市民非常關心新東補選結果，選舉管理委員會都明白傳媒需要，喺調景嶺新聞中心大螢幕，不停更新各區票站點票結果。官方公佈嘅數字，梗係最準，之但係，無綫新聞與眾不同，成晚採用民建聯嘅點票數據（圖），惹嚟網民批評，無綫主播都特別喺報道時解釋，數據係民建聯根據現場點票提供，仲話喎：「快過而家選舉事務處公佈嘅票數。」嗱嗱嗱，民建聯喺各區都有派代理人監票，確實係可能快過當局公佈，但政黨數據相比官方，乜唔係官方嗰個準繩啲咩？抑或無綫覺得民建聯更可靠呢？且全晚loop住民建聯提供數據，認真係免費宣傳嘞！有網民諷刺TVB係TVDAB（按︰民建聯英文簡稱DAB）︰「最緊要快；唔需要準」、「真係好有公信力」。
來源:
http://hk.apple.nextmedia.com/news/art/20160301/19511604
隔牆有耳：印尼領事一周做7日
1 :
GS(14)@2016-05-24 10:39:53印尼擬於明年起逐步停止輸出外傭，但唔適用於香港，令唔少香港家庭主婦安心晒。而印尼駐港總領事Chalief Akbar則於7月離任，近日佢接受港台電視31《早辰．早晨》嘅「講式早餐」節目訪問時，自爆每朝起身都會飲熱茶，然後陪仔女食早餐，等佢哋返學後就開始辦公。
Chalief坦言在港呢3年好難忘，一嚟香港嘅食物、文化同其他東南亞地方相近，二嚟孩子讀本地國際學校，接受好好嘅教育。但甜中亦有苦，由於香港唔少印傭周日放假，所以領事館周日都照常開工提供服務，變相佢一周返足7日工，認真陰功，笑稱3年嚟只帶孩子去過一、兩次主題樂園咋，而每逢周末都盡量抽時間陪屋企人，一齊食午餐或睇電影，最近就睇咗《美國隊長》。
來源:
http://hk.apple.nextmedia.com/news/art/20160523/19623779
Next Page