📖 ZKIZ Archives

【馮仁昭四圍超】四哥中環蕩失路

1 : GS(14)@2016-07-12 03:19:38

謝賢（四哥）前日現身中環ifc超市，推住購物車嘅佢，揀咗啲海膽、壽司同沙律，天氣咁熱，凍冰冰嘅食物特別吸引，四哥仲買咗價值490蚊嘅日本夕張蜜瓜，認真識嘆，消暑啱晒。大約逛咗十幾分鐘之後，四哥就排隊畀錢。不過離開商場時，四哥好似唔多熟路咁，行錯另一個方向，行行吓發覺唔對路，最後要問保安員點行先搵到正確方向。





來源: http://hk.apple.nextmedia.com/entertainment/art/20160711/19689285
PermaLink: https://articles.zkiz.com/?id=303293

【馮仁昭四圍超】杜sir要演員學龜速

1 : GS(14)@2016-07-12 03:19:38

杜琪峯執導、古天樂、趙薇、鍾漢良合演嘅警匪片《三人行》，早排喺廣州拍一幕動用過百個演員一齊做慢動作嘅場面。因為杜Sir唔要靠機器做效果，要求演員人肉慢動作，所以請嚟導師訓練兩個月，演員日日學龜速行動。古仔笑話：「我曾經諗過係咪連眨眼都要慢。」有份拍慢動作嘅林雪亦講笑話：「拍慢動作比死更難受，之前冇時間練，只係上速成班，即學即拍。」





來源: http://hk.apple.nextmedia.com/entertainment/art/20160711/19689290
PermaLink: https://articles.zkiz.com/?id=303294

【馮仁昭四圍超】張可義同陳七割席

1 : GS(14)@2016-07-12 03:19:38

陳肇麒


曾經喺2012年同南華球星陳肇麒（陳七）去酒店爆房嘅模特兒張可義（Emily），噚日同莊思敏出席高踭鞋活動，佢就表示同陳七完全冇聯絡：「嗰件事之後消失咗，而家單身有人追，都係睇對方誠實、有恒心。」Emily仲話要查清楚家底背景：「見過鬼怕黑，而家啲人收得好埋話冇，呢排工作忙拍戲，啱啱拍完《少女打擋台》，做打女好過癮。」





來源: http://hk.apple.nextmedia.com/entertainment/art/20160711/19689294
PermaLink: https://articles.zkiz.com/?id=303295

【馮仁昭四圍超】梁浸浸冧暈契媽阿嬌

1 : GS(14)@2016-07-12 03:19:39

阿嬌　互聯網圖片


鄭希怡（Yumiko）嘅得意囡囡梁子柔（梁浸浸）好多星級契媽，Twins嘅阿Sa同阿嬌都錫到契女燶。阿嬌噚日凌晨就擺咗條片上ig，梁浸浸行來行去，對住個鏡頭甜笑兼拍手仔萌到爆，Yumiko就叫佢整beautiful eyes，佢即眨眼放電say hi，阿嬌仲問佢鍾唔鍾意契媽，梁浸浸就點頭示意，被冧暈嘅阿嬌即啜佢面珠仔一啖。





來源: http://hk.apple.nextmedia.com/entertainment/art/20160711/19689303
PermaLink: https://articles.zkiz.com/?id=303297

【馮仁昭四圍超】古惑仔獲李宗偉撐場

1 : GS(14)@2016-07-12 03:19:39

鄭伊健、陳小春、錢嘉樂、林曉峰同謝天華，五位古惑仔日前到大馬雲頂開騷，有「大馬羽球一哥」李宗偉去捧場，小fans林曉峰完騷後即搵埋老婆康子妮捉住李宗偉影合照。而湯盈盈亦帶埋兩個囡囡去捧場，大女攞住相機幫爸爸影相，嘉樂都忍唔住走埋去陪囡囡玩，又對住家人大唱情歌，盈盈冧爆向台上飛吻。





來源: http://hk.apple.nextmedia.com/entertainment/art/20160711/19689306
PermaLink: https://articles.zkiz.com/?id=303298

【馮仁昭四圍超】吳卓羲擬開公司拍戲

1 : GS(14)@2016-07-12 03:19:40

吳卓羲、李幸倪（Gin）等噚日喺鑽石山出席「麥當勞叔叔之家慈善基金」義賣開售日活動。自由身一年嘅吳卓羲話：「暫時唔會簽公司，同經理人籌備緊工作室，想拍多啲電影。我同楊怡同一個經理人，希望一齊合作，之後會一齊去雲頂登台。」感情方面，他表示空白一片。另外，Gin嘅「倪」字被當眾錯讀做「兒」字，佢話有啲尷尬，不過已經習慣。





來源: http://hk.apple.nextmedia.com/entertainment/art/20160711/19689320
PermaLink: https://articles.zkiz.com/?id=303299

【馮仁昭四圍超】陳潔靈學鋼琴冇考試

1 : GS(14)@2016-07-12 03:19:40

陳潔靈噚日喺尖沙嘴出席自動演奏鋼琴香港發佈會，會上佢同著名藝術家李偉安（Warren）合作，獻唱《Fly me to the moon》。佢話好興奮，因為呢次合作好有難度：「因為啲歌本身係獨奏版，唔預有人唱，要諗啲計仔同個琴夾番。」佢又話：「Warren係我以前嘅琴老師，都跟佢學咗3年，不過冇考過試，學嗰啲嘢都畀番晒老師啦。我有試過自彈自唱㗎，不過都係算罷啦。」





來源: http://hk.apple.nextmedia.com/entertainment/art/20160711/19689309
PermaLink: https://articles.zkiz.com/?id=303300

【馮仁昭四圍超】思明接受楊明獻身

1 : GS(14)@2016-07-12 03:19:40

莊思敏、思明同思華三姊妹前晚喺中環賀劉晨芝嘅餐廳開業一周年，思明見到着低胸短裙嘅思敏時，即話：「嘩！你着到咁行，做乜嘢唔提我？」楊明早排受傷得到女友思明照顧，事後話要以身相許，思明即甜笑話會接受，但就唔會咁快住。思敏間食店打算開分店，問到佢仲係咪股東？佢話：「以我所知有四個股東，我、陳君怡兩公婆同埋一個男性朋友。」





來源: http://hk.apple.nextmedia.com/entertainment/art/20160711/19689317
PermaLink: https://articles.zkiz.com/?id=303301

【馮仁昭四圍超】利智16歲女　眼大夠Pure

1 : GS(14)@2016-07-12 22:08:10

■16歲嘅Jane前日現身內地出席全球XIN公益大會。








李連杰同利智99年喺美國結婚，婚後生咗兩個囡囡，大女Jane Li唔經唔覺已經16歲。前日上午Jane罕有咁同爹哋一齊亮相，現身阿里巴巴在內地舉行嘅全球XIN公益大會，Jane喺台上分享自己從事環保公益嘅心得。



■利智當年嘅泳衣照，36F魔鬼導彈身材呼之欲出。資料圖片

■李連杰喺台下聽囡囡演講嗰陣，不時點頭微笑。



爹哋台下微笑

據現場嘅人透露李連杰喺台下聽囡囡演講嗰陣，不時點頭微笑。Jane喺活動上講到04年一家人喺印尼遇海嘯，嗰時年僅4歲嘅佢被浪沖走，爹哋喺海中救起佢嘅經歷，令人十分感動。而Jane前日穿着樸素白衣，顯得相當清純可愛，公開活動露面後，即引起網上熱烈討論，唔少人覺得Jane似媽咪利智擁有一雙水汪汪大眼，亦有網民覺得Jane比較似爸爸。當年利智憑36F魔鬼導彈身材喺86年勇奪亞洲小姐冠軍，之後加入亞視參與演出，當時佢唔鹹唔淡嘅廣東話，更成為一時佳話，試過將「陰謀」講成「陰毛」，亦係電視史上經典笑話，利智之後亦有拍電影，喺《七年之癢》嘅泳衣照同上水戲，當年引起一陣話題。棄影從商後，99年同李連杰喺美國結婚，婚後專心相夫教女。撰文：馮仁昭





來源: http://hk.apple.nextmedia.com/entertainment/art/20160712/19690697
PermaLink: https://articles.zkiz.com/?id=303416

【馮仁昭四圍超】G.E.M.攞獎賀出道8年

1 : GS(14)@2016-07-12 22:08:12

首屆傑出華人青年大獎頒獎典禮噚晚喺灣仔君悅酒店舉行，共有10位得獎者，包括鄧紫琪（G.E.M.）、姚明、郎朗、邱德根孫女邱詠筠同蔡加讚等。G.E.M.話噚日係自己出道8周年，喺呢日得呢個獎，佢覺得特別有意思，但對之前因改編《喜歡你》同BIGBANG嘅歌俾人鬧爆，佢就回應話：「做乜嘢都會有唔同聲音，但都要有勇氣擁抱不同嘗試。」撰文：馮仁昭





來源: http://hk.apple.nextmedia.com/entertainment/art/20160712/19690741
PermaLink: https://articles.zkiz.com/?id=303419
Next Page
ZKIZ Archives @ 2019