📖 ZKIZ Archives

【馮仁昭四圍超】石希露做過性商店售貨

1 : GS(14)@2016-07-12 22:08:13

資料圖片








ViuTV實況選美節目《美選D.n.A》16號F cup紋身女石希露（Olga），前日被網民爆曾經俾前男友毒打到裂鼻骨要入院，噚日又有讀者爆佢3年前化名LuLu喺夜店做坐枱，兼喺性玩具店做售貨員。Olga噚日回應話讀中學時確實叫LuLu，亦曾經喺性玩具店幫過手，但就否認做過夜店：「你睇我咁多紋身，兩隻手臂都嚇走晒啲客啦，3年前仲讀緊書，真係冇接觸過，性商店只係幫朋友手做過一日。」撰文：馮仁昭





來源: http://hk.apple.nextmedia.com/entertainment/art/20160712/19690730
PermaLink: https://articles.zkiz.com/?id=303421

【馮仁昭四圍超】陳妍希兔兔喜帖曝光

1 : GS(14)@2016-07-12 22:08:14

微博圖片








陳妍希同內地小生陳曉上星期喺內地領證結婚，仲宣佈妍希有喜。噚日佢哋嘅喜帖同喜餅亦曝光，原來婚宴有個特殊意義叫「兔兔在一起」。


陳妍希


兩人喜帖寫上：「心願是如初見，不相忘，把手牽」底部仲有一對捧住心形玫瑰嘅兔仔；而餅盒分啡色同白色兩盒，盒身都佈滿兔仔。據知，婚宴以兔做主題係因為陳曉屬兔。撰文：馮仁昭





來源: http://hk.apple.nextmedia.com/entertainment/art/20160712/19690702
PermaLink: https://articles.zkiz.com/?id=303424

【馮仁昭四圍超】莊思敏橫店幾乎中暑

1 : GS(14)@2016-07-12 22:08:18

莊思敏近日同王祖藍拍魔幻古裝新片《神魔道》，組成長短腳之戀，莊思敏早排到內地橫店拍外景，雖然低胸戲服勁性感，心口有得唞涼，不過當地氣溫超過攝氏40度，日日焗喺冇冷氣嘅片廠開工，真係人都癲。都算捱得嘅佢，第一次拍古裝就差啲熱到中暑：「試過狂飲水降溫，但飲得多又成日去廁所，揪住件十幾磅重嘅古裝衫去廁所好重手都軟埋，最後解決方法係唔郁避免流汗。」撰文：馮仁昭





來源: http://hk.apple.nextmedia.com/entertainment/art/20160712/19690705
PermaLink: https://articles.zkiz.com/?id=303439

【馮仁昭四圍超】霆鋒打邊爐假戲真食

1 : GS(14)@2016-07-12 22:08:18

謝霆鋒瘋狂愛上煮嘢食，連早排佢同劉青雲合作拍新戲《驚心破》時，都成日整好嘢慰勞劇組，而戲中有幕佢同范曉萱一齊打邊爐，雖然只係做戲，但霆鋒都好認真，親自揀食材，結果拍完嗰場戲，所有人都停晒手埋位打邊爐，嘆完當然要讚番霆鋒兩句，大家封佢做「鋒味神探」。不過青雲就懷疑霆鋒只係請女唔請男食，因為每次都冇佢份食。撰文：馮仁昭





來源: http://hk.apple.nextmedia.com/entertainment/art/20160712/19690707
PermaLink: https://articles.zkiz.com/?id=303440

【馮仁昭四圍超】余安安求進步感壓力

1 : GS(14)@2016-07-12 22:08:19

余安安噚日喺上環綵排舞台劇《最後作孽》，之前佢憑呢套舞台劇勇奪劇后，問佢會唔會有壓力？安安話唔係因為劇后呢個名有壓力，而係因為想超越上一次而有壓力。佢仲話「阿女」薛凱琪唔喺香港冇捧場：「不過佢都好想演舞台劇，都希望有機會母女檔做舞台劇。」忙完演出，佢之後就忙嫁女，大女文琪年尾香港擺酒，有好多傳統細節要做。撰文：馮仁昭





來源: http://hk.apple.nextmedia.com/entertainment/art/20160712/19690712
PermaLink: https://articles.zkiz.com/?id=303442

【馮仁昭四圍超】周杰倫紅館騷舞台揼本

1 : GS(14)@2016-07-12 22:08:19

周杰倫出年1月喺紅館舉行6場嘅「周杰倫地表最強世界巡迴演唱會」，大會噚日公佈門票同演出日期詳情，首場定喺1月8號，跟住重有9號到11號同埋13同14號合共6場，票價分為$1,080、$680同$480，貴過之前五月天個演唱會門票。據主辦單位寶輝娛樂噚日話，演唱會要好大地方先能夠容納今次斥資4千萬港元嘅舞台設計，所以寧願減少座位。撰文：馮仁昭





來源: http://hk.apple.nextmedia.com/entertainment/art/20160712/19690718
PermaLink: https://articles.zkiz.com/?id=303443

【馮仁昭四圍超】林耀聲難忘智叔掌摑

1 : GS(14)@2016-07-12 22:08:19

新晉導演陳志發嘅電影《點五步》劇本，贏咗電影發展局200萬元撥款開拍，套戲安排下月25日上映，而家做緊優先場。前日一班演員林耀聲、胡子彤、談善言同導演喺淘大花園影藝戲院謝票，觀眾反應好熱烈。好多觀眾想知班演員最難忘邊場戲，佢哋話係畀智叔廖啟智飾演嘅盧校長集體掌摑嗰場，林耀聲話：「打咗幾次導演都未得，仲有次打到第三個嘅時候，有人縮，咪要由頭再摑過。」撰文：馮仁昭





來源: http://hk.apple.nextmedia.com/entertainment/art/20160712/19690723
PermaLink: https://articles.zkiz.com/?id=303444

【馮仁昭四圍超】馮允謙欣賞G.E.M.改編

1 : GS(14)@2016-07-13 05:15:46

馮允謙噚日喺銅鑼灣以代言人身份出席耳機體驗會，講到緋聞女友鄧紫棋（G.E.M.）先後改編Beyond主唱嘅《喜歡你》同BIGBANG首歌而被網民鬧爆，馮允謙話：「我好鍾意Beyond個版本，亦欣賞人哋嘅創作，呢個比賽同韓國PSY一齊改編呢首歌，係幾特別，當然有啲歌曲要小心處理，始終係首經典歌，但係我個人聽就覺得幾得意。」撰文：馮仁昭





來源: http://hk.apple.nextmedia.com/entertainment/art/20160713/19692156
PermaLink: https://articles.zkiz.com/?id=303555

【馮仁昭四圍超】親身上陣槍戰戲　古天樂玻璃碎入眼

1 : GS(14)@2016-07-13 05:15:47

■古仔吊咗半日拍呢場拯救戲。








導演杜琪峯、游乃海聯合監製，趙薇、古天樂同埋鍾漢良等演出嘅電影《三人行》聽日上映。今次古仔飾演追捕悍匪鍾漢良嘅警察，其中一場講述鍾漢良喺醫院逃走，由高處墮下受傷，古仔基於警察救人天職所以最後都要救佢。嗰場戲講古仔一手捉繩索一邊落手銬捉鍾漢良，至於用嚟救命嘅消防喉忽然下墮，認真驚險。事實上拍攝背後都係好驚險，鍾漢良因為要長時間倒吊充血，搞到塊面第二日爆微絲血管，但點傷都唔夠古仔差啲盲眼咁慘。


■古仔因為拍呢場槍擊戲份，玻璃碎入咗眼而差啲盲。

趙薇虛脫

話說古仔有場同鍾漢良互相開槍戲，仲有玻璃破裂場面，古仔話：「拍完之後好似覺得有啲玻璃入咗眼，我用水洗，過咗四、五日再去睇醫生，要挑起眼皮攞番啲玻璃碎出嚟，醫生話都好彩係幾日，如果唔係會割傷眼球角膜。」唔好以為淨係兩位男主角辛苦，其實趙薇喺倒吊嗰場戲要拉住條消防喉救兩位男主角，之後佢都話好似虛脫咁。另外，今個暑假檔古仔有多部戲同時上映，其中《使徒行者》日前拍攝海報，演卧底釘姐嘅佘詩曼有多款揸槍造型。阿佘戲中又會同上司吳鎮宇有曖昧，不過鎮宇話拍之前話會有激咀戲，點知出嚟效果俾電視劇仲保守。撰文：馮仁昭





來源: http://hk.apple.nextmedia.com/entertainment/art/20160713/19692147
PermaLink: https://articles.zkiz.com/?id=303556

【馮仁昭四圍超】懷欣爆老竇聽歌貼地

1 : GS(14)@2016-07-13 05:15:52

許懷欣（Ryan）噚日同小塵埃嘅Pollie到新城電台宣傳新碟，Ryan新碟搵咗Pollie合唱《Hear Me》。


許冠傑


Ryan爹哋許冠傑年底會開演唱會，到時兩父子又有機會一齊演出，Ryan爆阿Sam聽完《Hear Me》後都讚Pollie聲靚，又話有聽過小塵埃嘅歌。原來阿Sam聽歌都好貼地，Ryan笑話爹哋成日都聽收音機。撰文：馮仁昭





來源: http://hk.apple.nextmedia.com/entertainment/art/20160713/19692160
PermaLink: https://articles.zkiz.com/?id=303571
Next Page
ZKIZ Archives @ 2019