財女手筆：三星手機改名的藝術
1 :
GS(14)@2017-01-12 08:07:28■Samsung新手機C9 Pro。 公司網頁
三星（Samsung）手機改名的藝術，真係難明過黃曉明！香港中英夾雜，Well，連三星都逼你用JM Tone，read一read佢地啲產品name，由爆炸到全球回收的Note7（英文讀Note，廣東話讀7），根本完全係粗口諧音，到去年內地推出限定On7手機，On8亦屬印度限定，原本，慶幸On9點都唔會喺香港推喇啩？點知三星自製最強廣告災難，最新推出「師奶Pro」（C9 Pro）！今日睇雜誌，三星廣告賣新手機，其實私下非常佩服三星打不死，即使Note7爆炸原因未明、爆炸報告未出，仍然非常有毅力地不斷推出新系列手機，完全唔理消費者對其的信心已跌至谷底，雖然尋日「救助兒童會」個主席先笑完「香港人記憶好短」，好快唔記得該會勁高行政費用，同70萬Ritz Carlton慈善生日party（詳情：
http://bit.ly/2icZD5L），不過，香港人對住三星一部又一部奇怪名嘅手機，好難會失憶！講返個三星新手機廣告，大大隻字寫住follow my pace，之後搵咗位「好有特色」嘅女model拎住部新手機，而廣告右上角寫住……「C9 Pro」……無眼花，係「師奶」Pro！我完全懷疑三星marketing team不滿意年尾花紅，甚至準備劈炮，又或者對於三星嚟講，熟悉廣東話嘅人只是浩瀚宇宙中的一點微塵，所以理、得、你！咁解釋到點解喺香港區推出新手機，可以唔理會手機名嘅諧音。當三星Galaxy「On」字輩手機並無喺香港推出，我原本相信三星高層，其實對博大精深嘅廣東話好熟悉，因為On7為內地2016年限定，新一代On8亦係印度獨家，深信On9手機不會出現係香港市場。點知新一年出現「師奶pro」，或者，三星去年運勢已經衰到貼地，有noise先係最強公關……一定係，除非唔係……
Melody
http://www.facebook.com/whichroad
來源:
http://hk.apple.nextmedia.com/financeestate/art/20170112/19893800
財女手筆：地產大亨迷戀本港樓市
1 :
GS(14)@2017-01-18 08:11:23沙田第一城一個中低層單位，實用面積連300呎都無，只有284方呎，回想在新盤劏房未盛行的年代，284呎真係細到無朋友，兩房面積正常偏小，客廳絕對細到、不少家庭只可以放得落摺枱，否則寸步難行！不過，地產富豪搾乾一個地方，真係全球香港獨家限定，全球500大富豪榜，美國有13名地產大亨上榜，香港少1名，只有12名，不過呢12名富豪總資產淨值逾9,000億港元，拋離人口總數係香港40倍嘅美國。富豪身家不一定單從地產賺取，不過，除了少數地產大亨不再迷戀本港樓市，大部份仍然獨沽一味。香港作為地產富豪的樂園，小市民只能窮盡一生、甚至兩代人嘅人生，去養活一間包裝成價廉物美嘅劏房。剛過去嘅星期日，第一城呢個全屋苑最細嘅單位，以442萬元易手，呎價15,563元，創出屋苑分層呎價近兩年新高，簡直係神經價。不過，今時唔同往日，當大家已經被一個個200呎新樓劏房薰陶，大家自願被洗腦，覺得284呎已經好合理，甚至驚訝原來都幾大，香港人嘅「獅子山下精神」，就是地產大亨迷戀本港樓市的原因。即使客廳無飯枱，仍然可以安慰自己，與新盤示範單位都無咩分別呀。
Melody
http://www.facebook.com/whichroad本欄逢周三刊出
來源:
http://hk.apple.nextmedia.com/financeestate/art/20170118/19900021
財女手筆：粒粒雪糕的關公手段
1 :
GS(14)@2017-01-26 18:06:52美國總統特朗普，經常威嚇全球商家，要留美投資，如果唔係就收重稅，不過，原來特朗普所選的白宮發言人，亦有狂人影子，仲要係因為一杯雪糕，係Twitter鬧美國公司鬧足五年！新上任的白宮發言人斯派塞（Sean Spicer），大家可能未好了解佢，只係知佢疑似老作特朗普就職典禮的出席人數！不過，美國網民就已經對斯派塞的雪糕口味好熟悉，皆因有人發現斯派塞過去五年來不斷鬧美國粒粒雪糕Dippin' Dots，呢件事一被揭發，Dippin' Dots CEO即時出面救火。事緣呢位新白宮發言人好鍾意雪糕，早於2010年前不斷投訴自稱是「未來雪糕」的粒粒雪糕，一路講講講，由2010年講到2015年，其實明顯佢係死忠fans。有一日，佢可能買唔到想食嘅雲尼拿粒粒雪糕，又上twitter鬧過，不過今時唔同往日，白宮發言人一句投訴，可能會毀滅呢間公司。
Dippin' Dots CEO即時發出公開信，用安撫發爛渣小朋友嘅口吻，話「明白鍾意雪糕口味售罄等同國家級危機」，仲話多一個朋友好過多一個敵人，話好想可以請成個白宮及新聞官食雪糕，最後送多句「一定有齊所有你鍾意嘅雪糕口味」，死未？雪糕公司想以呢封公開信希望解決「關公」，安撫完白宮小朋友，公開信中最最緊要，強調自己係美國製造、由數百美國勤力工人製成，仲話過去三年銷售有雙位數增長，證明有創造職位及工作機會，仲順道希望安撫埋大朋友特朗普，唔好嬲豬，好未？註：文中的粒粒雪糕，非香港經常見到嘅Mini Melts，Mini Melts是美國粒粒雪糕Dippin' Dots的競爭對手。
Melody
http://www.facebook.com/whichroad本欄逢周三刊出
來源:
http://hk.apple.nextmedia.com/financeestate/art/20170125/19907441
財女手筆：芬蘭250萬買大屋搞Airbnb
1 :
GS(14)@2017-03-03 00:51:43上次講到冰島行冰川，冰島樓價單喺去年第三季按年上升13%，當地廿多歲導遊呻Airbnb炒起樓價，要靠父母買樓，一身與香港年輕人一樣嘅沉重無力感。今次到北歐三國旅遊，係芬蘭Rovaniemi租住Airbnb屋仔，830呎屋仔有桑拿房、兩間睡房連閣樓，屋外有大花園、清幽河景，冬天堆雪，夏天BBQ，距離市中心10分鐘車程，每晚旺季1,200蚊，平日只需800蚊！並非推介大家去旅遊，重點當然是投資！呢間Airbnb大屋嘅屋主，登登登凳，並非芬蘭當地人，而係遠在南半球的澳洲人，所以北歐人投訴Airbnb炒起當地樓價不無道理。當地相同地理位置的大屋，只售大約250萬港紙，喺香港可能連200呎劏房都買唔到！每月租出15日，每年收租16萬蚊，回報率達7厘。
當然，Airbnb的海外投資者，交稅、按揭等問題需要處理，又要有人在當地幫忙管理。不過，後者問題非常簡單，各地短租管理公司隨Airbnb興起，可以代海外Airbnb屋主與租客交收鎖匙、清潔、執屋甚至放租等等，一站式服務。香港要買入一間具特色的獨立屋，冇億億聲都唔好諗，想做吓大屋屋主，計計數，諗諗佢啦！
Melody
http://www.facebook.com/whichroad本欄逢周三刊出
來源:
http://hk.apple.nextmedia.com/financeestate/art/20170301/19943353
財女手筆：聯航超賣 美國人狂查字典
1 :
GS(14)@2017-04-13 00:23:06關公災難隨時出現，聯合航空因為超賣暴力趕華裔醫生落機，忽然超越「因航」，至少國泰(293)超賣，根本唔會畀你登機入閘，所以冇機會搵警察出手拖你落機！在美國有189年歷史嘅online字典Merriam-webster《韋氏大字典》，今日最多人查字典嘅字係volunteer！搜尋呢個字嘅解釋，比平日多出1,900%，《韋氏大字典》用聯航事件解釋volunteer是在無受人逼迫下做一些事的人稱，抵死抽水！除咗超賣，航空公司有唔少原因會叫已登機乘客落機，曾經喺歐洲乘坐內陸機，因目的地天氣較差，飛機加多咗油，準備應付天氣差未能降落，需要offload兩名乘客，開價賠償機票一倍價錢，不過擾攘一大輪，無人主動落機，因為目的地係偏遠旅遊城市，大部份乘客都係特登去睇北極光，冇乜人想延誤行程，最終有當地人願意讓步落機，非常體貼。有乘客自願讓步當然好，其實問題好易解決，就係「每個人心中都有一個價」！轉一班機總有影響，每個人嘅opportunity cost唔同，航空公司只要不停提高賠償價碼，如果乘客第二日要上班，航空公司賠償起碼要相當於一日annual leave價格，總會有人受到利誘，冇人落機絕對係因為你出手太低！仲要搞到全球都知聯航出手低，唔怪人有人話對公司形象，真係慘過撞機！大家最記得聯航，除咗因為911事件中兩架飛機都係聯航，聯航喺十幾年前，曾經做得差到破產，執笠邊緣，於2002年申請破產保護，2011年同美國大陸航空合併。不過，經歷此事，樂觀咁睇，相信聯航未來超賣情況會有好轉，因為關公災難，全球「大賣廣告」，得罪乘客，相信超賣問題好快解決！
Melody
http://www.facebook.com/whichroad本欄逢周三刊出
來源:
http://hk.apple.nextmedia.com/financeestate/art/20170412/19987835
財女手筆：女神鞋Jimmy Choo賣盤奢侈品沒落？
1 :
GS(14)@2017-04-28 02:09:46法國奢侈品LVMH斥千億全購Christian Dior餘下兩成半股權，中環女神鞋Jimmy Choo一直係各大女星、OL的追捧對象，不少女士結婚都選擇Jimmy Choo做婚鞋，連Jimmy Choo母公司JAB Luxury就想飛甩高跟鞋，專心賣食品同咖啡，令人懷疑奢侈品市場已經見頂沒落！「待價而沽」始終係商人本色，Jimmy Choo舊年剛好成立20年，今年市值高達70億元，亞洲市場增長快過歐洲，以固定滙率，亞洲除日本收入去年按年增長19.2%，Jimmy Choo更加講明自己在中國發展比同業慢得太多，未來會加快係中國開舖，咁大家估下買家會係邊到人？
Jimmy Choo未喺內地大搞，剛好避過中國經濟放緩、打貪等，當時Prada、Burberry跌得好痛，依家入中國大搞，時機反而好好，打住中國夢、亞洲夢嘅旗幟，相信各大港女最關心嘅，莫過於Made in Italy、由西班牙、佛羅倫斯專員手製嘅Jimmy Choo，賣盤後會唔會變成Made in China。
Melody
http://www.facebook.com/whichroad本欄逢周三刊出
來源:
http://hk.apple.nextmedia.com/financeestate/art/20170426/20001882
財女手筆：300萬買公屋好好住
1 :
GS(14)@2017-05-13 01:29:44上集講到Aaron用300萬買到港島400呎「豪宅」，原來係公屋，樓上每朝早5點剁豬肉，周末一早電鑽侍候......。嗰晚入伙，Aaron一班老死上去house warming，核數師Derek望住老死用55萬豪裝間公屋，確實似足私樓示範單位，自己畢業死慳死抵畀完首期買樓，只可以買到簡單夠用傢俬......「嘩！好正呀！」歡呼聲將Derek酸味味嘅思緒震走。
Aaron女友搬咗塊斧頭扒出嚟，個個嘩嘩聲，一塊成幾斤重嘅斧頭扒，足夠餵飽5個大男人，Aaron心入面好鬼驕傲，就係自己識得買公屋，先有閒錢供養呀BB豬買d最新廚具同電器，用慢煮棒煮出時下最健康美食，廚房仲有個Bruno、無限咁多LC煲碟，方便BB豬同朋友交流下「時尚廚房佈置」。飲飽食醉，大家瘋狂大戰PS4，玩到凌晨兩點幾，Aaron話想車大家返去，原來佢仲買咗部二手車，泊咗係公屋停車場，不過見Aaron飲完兩杯面紅紅，大家都婉拒諗住的士返屋企。一出到Lift口，「邊度咁臭？！」正當做Big4嘅Derek諗緊係咪自己通完頂，今朝早就咁換衫返工，原來係超舊式公屋無垃圾房，住㻇將啲外賣、廚餘直接拋係大堂，仲要無綁實，餸汁、污糟水一地，夏日炎炎蚊蠅亂飛。走出屋村，Derek忽然覺得自己正確，至少自己係人生最大筆投資，唔係買小時候最想擺脫嘅公屋。後記：近年聽到最悲慘說話，除了「希望有多一次沙士啦」，另一樣係「幾百萬買公屋都好好住」。小時候住公屋2樓，窗口對出就係平台，平台佈滿樓下高空拋下嘅紙巾、用過嘅condom、M巾，樓下就係垃圾房，係房可以同平台走過嘅米你老鼠say hello，村校學生甚至會用石頭掟中你個窗。當年住公屋，人人想搬走，轉居屋、買私樓，只為更好環境，如果你話近年聽到最悲慘說話，除了「希望有多一次沙士啦」，我覺得「幾百萬買公屋都好好住」，先係世界大悲劇。幾百萬買公屋，難怪身邊朋友都話：「幾百萬買公屋，我寧願租一世樓，至少，可以住得好少少。」唔係講緊住豪宅，而係住得清潔乾淨，不過一樽鹽依家唔值錢。上集傳送門：300萬港島豪宅之夢
http://bit.ly/2qM86BQ
Melody
http://www.facebook.com/whichroad本欄逢周三刊出
來源:
http://hk.apple.nextmedia.com/financeestate/art/20170510/20016520
財女手筆：雙非18歲＝樓價神話
1 :
GS(14)@2017-05-18 01:09:43經常聽到好多支持樓價嘅原因，包括香港有18萬公務員、港樓供不應求、通脹有升無跌等等，當中當然有盲撐，君不見幾多中產買唔到樓。近期聽到內地投資者講，香港樓價「上帝都推唔跌」，原因係雙非即將18歲！舊年起，內地人買樓印花稅大幅提高至15%，只有無樓嘅香港人獲豁免雙重印花稅。內地人想買樓，Sorry，要畀樓價15%稅，不過，雙非B唔駛，18歲就可以借名額俾內地阿爹娘親一炮過買樓，唔少內地人相信港樓已經同內房一樣，只係會升空。早幾年有報章分析過，香港過去25年出生數字，話同樓價走勢相關系數高達80%，不過香港有幾多細路仔出世，大家都知，出生率忽然大升機會好細，早前大部份係雙非B出世。自從2001年，終審法院對莊豐源案判決起，雙非不停湧現，去到2012年梁振英話雙非落閘，到2013年1月本港醫院開始停止接受雙非孕婦預約生仔，中間12年，大大話話一共有20.4萬雙非B。唔少內地人話，香港樓仲有得升，因為由明年起，雙非B將會踏入18歲，正式可以免稅買樓。由2001年至2013年，有20萬雙非新力軍，即由2019年至2031年，每年夠18歲嘅雙非大約有萬幾人，可以用首置名額分批入市，對港樓影響力一定好大，為港樓升市再添一個神話。
Melody
http://www.facebook.com/whichroad本欄逢周三刊出
來源:
http://hk.apple.nextmedia.com/financeestate/art/20170517/20023741
財女手筆：三招避免撞上裝修黑店
1 :
GS(14)@2017-06-16 01:33:14身邊不少朋友搵室內設計，有樓價太貴、屋企有房，結婚後準備繼續同屋企住；亦有買咗樓，準備大裝一下，整番間安樂窩。不過，幾十萬裝修費並非小事，大家要認真格多幾間，有朋友畀錢全屋大裝，工程費包括換全屋水喉，最後裝修完幾個月，廁所牆漏水，先發現原來間裝修公司冇幫佢換新水喉，完全錢照收，工程唔做！所以裝修要搵相熟或者朋友介紹，免得間裝修公司偷工減料，或者之後玩消失。坊間有唔少裝修黑店，我幫大家概括一下「裝修黑店3問」，大家就認真要留意：1、插蘇幾錢一個：一屋裝修，以為插蘇好少啫？電視機後面可能已經有三、四個，加上香港人貪便，雙人床每邊加一個，枱下加一個，書房加幾個，全屋插蘇隨時有40個以上，所以必問插蘇幾錢一個，市價大約500至600蚊一個連普通掣面。2、工程合約要寫細節：正常工程公司，會寫明不包括的項目，例如不包括坐廁、洗手盤等等，客人需要另外購買，不過工程公司可以包安裝，客人自己買磚、坐廁等要回水幾多等，一一列明的公司就最老實。3、問清楚係咪真係全包：聽過有朋友要工程公司報價，大裝修加換總電掣箱、全屋水喉，不過，該公司開價一個換總電掣箱6,000蚊，無問題，不過原來只包括總電掣……個鐵皮外箱，入面的fuse？每條同你計錢！至於全屋換新水喉，問真啲，原來唔包「個別水喉」，例如洗衣機喉就要加多幾千蚊……裝修工程連設計，確實專業，不過價格唔透明，大家想知多啲，就要問多啲啦！
Melody
http://www.facebook.com/whichroad本欄逢周三刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170614/20055108
財女手筆：股災？等大媽發落
1 :
GS(14)@2017-06-22 07:41:13彭博早前三幅圖講晒，香港回歸20年，已經被中資接管，華爾街？一早就Sayonara啦！香港事事同大陸睇齊，政治上中央直接介入香港事務，逢事必過問，經濟上中資亦逐步接管社會各行各業，由天價投地、併購港資企業、接管各類型基建工程etc，邊度冇中資身影呢？中資今時今日已經佔咗香港股市半壁江山，恒指成份股更加大部份係大陸國企，不過，港股仍然「自由開放」，外資持股下，港股估值長期低殘，喺過去10年有波幅，冇升幅，長期浮浮沉沉。不過，大媽最愛引人注意，如同鍾意喺公眾場合大跳廣場舞，大媽們就係有一鋪「睇我啦！睇我啦！嚟睇盡我啦」嘅博出位心態，外資以往覺得港股值幾錢就幾錢，冇價講，所以股市長期低企橫行，自從大媽出手染指港股，錯錯錯，大媽話：「我看得中的都是最好de」，睇下長城汽車（2333），摩通唱淡兼叫大家「減持」，大媽話：「我看得中的都是最好de」，北水就同你長期湧入，長汽幾有支持。咁睇，大媽真金白銀同你買上去對賭，咁你話長遠個股市會升定跌？美圖秀秀（1357）、IGG（799）等等已經話咗結果畀你聽。港股通唔經唔覺已經流入超過5,000億，喺大媽話事之下，港股應該會來個價值重估，追返之前被低估嘅價值。股災？等大媽炒爆先講。
Melody
http://www.facebook.com/whichroad本欄逢周三刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170621/20062798
Next Page