財女手筆：三招避免撞上裝修黑店
1 :
GS(14)@2017-06-16 01:33:14身邊不少朋友搵室內設計，有樓價太貴、屋企有房，結婚後準備繼續同屋企住；亦有買咗樓，準備大裝一下，整番間安樂窩。不過，幾十萬裝修費並非小事，大家要認真格多幾間，有朋友畀錢全屋大裝，工程費包括換全屋水喉，最後裝修完幾個月，廁所牆漏水，先發現原來間裝修公司冇幫佢換新水喉，完全錢照收，工程唔做！所以裝修要搵相熟或者朋友介紹，免得間裝修公司偷工減料，或者之後玩消失。坊間有唔少裝修黑店，我幫大家概括一下「裝修黑店3問」，大家就認真要留意：1、插蘇幾錢一個：一屋裝修，以為插蘇好少啫？電視機後面可能已經有三、四個，加上香港人貪便，雙人床每邊加一個，枱下加一個，書房加幾個，全屋插蘇隨時有40個以上，所以必問插蘇幾錢一個，市價大約500至600蚊一個連普通掣面。2、工程合約要寫細節：正常工程公司，會寫明不包括的項目，例如不包括坐廁、洗手盤等等，客人需要另外購買，不過工程公司可以包安裝，客人自己買磚、坐廁等要回水幾多等，一一列明的公司就最老實。3、問清楚係咪真係全包：聽過有朋友要工程公司報價，大裝修加換總電掣箱、全屋水喉，不過，該公司開價一個換總電掣箱6,000蚊，無問題，不過原來只包括總電掣……個鐵皮外箱，入面的fuse？每條同你計錢！至於全屋換新水喉，問真啲，原來唔包「個別水喉」，例如洗衣機喉就要加多幾千蚊……裝修工程連設計，確實專業，不過價格唔透明，大家想知多啲，就要問多啲啦！
Melody
http://www.facebook.com/whichroad本欄逢周三刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170614/20055108