財女手筆：如果有1,000萬，買唔買香港樓？
1 :
GS(14)@2017-08-02 05:56:10香港地遍地富豪，根據花旗銀行早前公佈的「香港千萬富翁調查報告2016」，香港擁有1,000萬或以上流動資產的千萬富翁有成5.9萬人，真係一個招牌跌落嚟都死幾個。無他，香港樓市近10年升完又升，普普通通一個200呎劏房都可以賣成千萬，你話千萬富翁唔多都冇人信。之不過咁，有人辭官歸故里，亦有人漏夜趕科場；有人賣樓套現，有亦人高價追貨。如果你有1,000萬，仲買唔買香港樓好?依家就幫你好簡單咁計吓數，有1,000萬，假設唔買香港樓走去移民其他國家，你可以做啲咩?用加拿大呢個香港人熱門移民嘅國家做例子，同移咗民成10年嘅親戚打探下，哇！不得了！原來?家喺溫哥華買間2,000呎既House（兩層有車庫果啲啊Baby）只係50萬加紙，折合300萬港紙！！！樓齡係舊少少，離市區遠少少，仲有成20年樓齡，不過裏面裝修都幾新，已經好過好多香港偽豪宅啦。喺加拿大住，用咗300萬買咗間屋，淨番700萬，咁未有工返都要生活㗎，唔緊要，瞌埋眼，現價痾煙5號仔匯豐，每年收息接近35萬港紙，計番都有成3萬蚊一個月，唔大使都夠喺加拿大印印腳唔使做啦。不過，你要首先可以移民加拿大同有1,000萬先有價講。再望番轉頭，用1,000萬係香港買個劏房，你預樓價可以升多倍，double再double嘅當然就咩都唔好諗掃港樓啦。哈哈。
Melody
http://www.facebook.com/whichroad本欄逢周三刊出
來源:
http://hk.apple.nextmedia.com/financeestate/art/20170802/20108823
財女手筆：填海增供應划算
1 :
GS(14)@2017-09-17 17:29:34香港樓價居高不下，其中一個重要原因為香港地少人多，需求增加，供應卻「有限」，此一論點一經反覆洗腦，變成全民共識，樓價貴就成為合理不過的結果。然而，香港土地供應是否真的「有限」？不可不知，香港細不僅在於其山多平地少，海岸線彎曲，而且大部份土地早已劃為郊野公園，神聖而不可侵犯。近年政府覓地建屋，市區用地買少見少，政府大呼覓地困難。其實，香港百多年發展完全是一部填海造地史。由維港兩岸，到各新市鎮包括沙田、馬鞍山、大埔、屯門、東涌，全部填海得來。如果香港從來冇填海，今天應該絕無可能承載700萬人。當然，現今世代與幾十年前固然不同。填海要環評，要滿足的條件遠比以前多，不過，現今造地並無容易的方案。新界東北搞咗幾年，距離成事起樓仲係好遙遠；市區重建，收業權都搞幾年。望嚟望去，填海原來算係易搞，不過政府從來唔嘗試，唔將佢放首位。一邊大叫要增加房屋供應，另一邊連一個完整的增加土地方案都無；唔怪得市民當你政府無到，繼續搶樓。
Melody
http://www.facebook.com/whichroad本欄逢周三刊出
來源:
http://hk.apple.nextmedia.com/financeestate/art/20170913/20151528
財女手筆：買手袋順便抽眾安！
1 :
GS(14)@2017-10-09 03:01:03女人除咗要識shopping，買得精明，網購買得抵，仲要識得精明投資！眾安在綫（6060）成為新股黑馬，忽然WhatsApp女人shopping group，由買手袋，變成孖展抽眾安，大家將「買得抵」概念運用係抽新股，咁先係精明女人！曾經紅極中港股市嘅「三頭馬車」，由投資、消費、淨出口對GDP的貢獻率，變成馬雲、馬化騰和馬明哲，完全係明星效應。不過，睇番眾安A輪融資近60倍人仔，當時估值已經成500億人仔，無啦啦兩年後棄A股投港上市，估值爆升50%上成千億人仔，你都唔好話無潛力，理得佢保險講咩互聯網，表面至少有個好開始。頂頭錘飛成本唔使8萬，想保守啲，當然用齊全家人戶口，機會率高過大手抽，周四截飛，絲打巴打都出手喇喂！
Melody
來源:
http://hk.apple.nextmedia.com/financeestate/art/20170920/20158044
財女手筆：用發展商一按前先計計數
1 :
GS(14)@2017-10-09 03:09:20樓價貴，遲買更貴是常識吧！700萬2房更加為窮人恩物，畀唔起首期都要買定先，自住唔怕跌，非常合理。是故個多月前某鐵路上蓋推售，超過7成買家選用發展商一按買樓，開心上車。不過個幾星期前發生買家指摘經紀誤導，以為幾年之後實可以轉按銀行享平息，誰是誰非在此不深究。不過都可以計吓數，發展商一按係咪咁着數，借咗冇煩惱。以借發展商8成一按買700萬樓分期30年，首3年通常息P-2.5厘左右，之後全期P計算，貸款額560萬，首3年還款接近80萬。3年後要避免捱貴息，就必須轉按銀行。不過，600萬以上物業銀行最多只可以按6成。所以3年後劇本會咁：3年過後還咗80萬，當中有一半40萬係還本金，你仲爭發展商520萬，當樓價冇升跌，700萬樓，銀行最多借420萬畀你。冇錯，係樓價冇升跌嘅情況下你要抬100萬上會。不過我哋係樓市大好友，雖然話自住，買樓唔睇升不如唔好買，係咪？我哋目標係唔駛補錢就可以轉按銀行上會！其實真係唔難，以上700萬樓只需要升少少到860萬，升25%就可以啦，銀行會借500萬過你，盡享低息！樓升唔到咁多？冇問題，金管局只要突然放寬按揭成數，一樣一個仙都唔使補，輕鬆轉按！如果真係咁不幸地以上兩樣都冇發生，唔緊要，我相信大家畀完百幾萬首期，會預鬆少少，有多百幾萬放喺銀行，隨時備用。如果都冇，放心放心，大家有3年時間每月除咗供樓外儲接近3萬蚊，到時一樣會有120萬抬上會。就咁睇以上計數，用得發展商一按嘅一定係樓市實力買家，不單家底豐厚，隨時可以抬百萬出嚟而面不改容，仲坐底睇樓市升多25%，今次樓市仲唔gogogo！
Melody
來源:
http://hk.apple.nextmedia.com/financeestate/art/20171004/20171807
財女手筆：洗脫不孝罪名買滙控？
1 :
GS(14)@2017-10-15 16:53:38大笨象又變身小飛象，話說今個星期四將會除淨嘅滙控（005），昨日創過9年新高，加上又到派息除淨，相信短期仲有得升！小飛象派息穩定，昨日收市價報78.6元，現價都有5厘息，好過唔少投資產品。當然，我都聽過唔少人話，終於擺脫不孝子、不孝女之名，因為滙控上次見逾70蚊，唔少仔女都叫阿爸阿媽入貨，話收息好，當然心底都夢想滙控重返紅底股，咁就財息兼收，可惜滙控一路跌到喊，唔少父母因而覺棺材本血本無歸，仔女背上不孝重罪，不過話時話，比起放銀行，相信投資保守嘅老一輩，至少收咗好多年唔少股息，雖然可能嚇到心臟病!大行現在又睇好小飛象，加上香港息口跟美國，都有上升趨勢，香港業務淨息差相信會更加理想，業務向好，今次又可以繼續叫阿爸阿媽入貨啦？
Melody
來源:
http://hk.apple.nextmedia.com/financeestate/art/20171011/20178642
財女手筆：翻炒舊書夠閱文發達
1 :
GS(14)@2017-10-22 17:02:52早係十幾年前，就覺得港台小說篇幅太短，唔夠過癮盡興，好彩發現咗廣闊嘅內地小說市場！當年熱門小說最多賣「字」，作者收小說出版費，仍未有電視劇、電影版權出現，由《夢回大清》、《步步驚心》一路睇睇睇，沉醉幾十萬一本嘅字海。當時每套熱門小說要分上中下集，因為「字」先最搵到錢，造就到好多內地作家成名，好似桐華、顧漫、金子等等，不過唔知點解，好多都係身居海外嘅華人作家，哈！當然賣小說，已經發個滿堂紅，因為睇書係低消費活動，學生、貧窮打工仔女，個個都消費得起，加上現時有電視劇、電影扶助，作者發過豬頭。不過騰訊（700）分拆上市的閱文集團，當年其實根本未有份，近年先加入戰團，出錢買起網上小說出版平台。不過，創意好值錢，至少仲有好多舊嘅熱門小說未翻拍做電視，《微微一笑很傾城》、《三生三世十里桃花》其實已經出版近10年，並非新作，所以相信閱文前景都係美好！不過可惜手上無價值45萬嘅騰訊股份，非常睇好就等上市後買一買，對得住十幾年晚晚係被窩煲書嘅青春。
Melody
來源:
http://hk.apple.nextmedia.com/financeestate/art/20171018/20186055
財女手筆：書中確有黃金屋
1 :
GS(14)@2017-10-29 23:58:44「書中自有黃金屋」，係騰訊（700）分拆上市的閱文集團（772）身上完全印證到。周四先開始招股的閱文，預留孖展額已經爆升至450億元，係公開超購50倍以上，投資者對眼發晒光！有人以風摩全球嘅《哈利波特》做例子，指Harry Potter改編電影、搞主題公園同其他衍生產品，全球總商業價值逾70億美元，你想笑閱文旗下咁多大陸站，到底有幾多個J.K. Rowling寫得出《哈利波特》？內地發展軟實力多年，例如內地2014年熱爆嘅穿越古裝劇《步步驚心》，就係由晉江文文學城（閱文持股50%）作家所寫，大家迷到要生要死嘅南韓拍劇公司，都買咗《步步驚心》韓文版權，拍咗套韓劇叫《月之戀人》，南韓仲買埋同一個作者的另外兩部作品《大漠謠》、《雲中歌》嘅版權拍韓劇，內地劇賣去外國已非夢想。愛情劇要賣埠容易，唔少小說更係越南、泰國等地翻譯，武俠、科幻小說亦都唔嘢少，閱文有版權嘅內地小說盜墓尋寶《鬼吹燈》，聽講出吓書、電影、電視劇、網絡遊戲等等，總商業價值都超過30億港元（4億美金），當然比起Harry Potter係小事，不過至少係個好開始。
Melody
fb.com/whichroad
來源:
https://hk.finance.appledaily.co ... e/20171025/20193947
財女手筆：秋風起！雷蛇肥
1 :
GS(14)@2017-11-05 16:39:11騰訊（700）個仔仔閱文（772）今日網上都招完股，熱烈程度簡直要睇大家手頭仲有幾多彈藥。其實，仲有彈藥大家可以抽埋星期三（1日）開始招股嘅電競設備商雷蛇（Razer，1337）！無寶不落嘅誠哥李嘉誠，有份投資Razer，連紅顏知己周凱旋揸fit嘅維港投資都玩埋一份。再者，Razer招股價比閱文親民好多，招股價介乎2.93元至4元，每手1,000股計，入場費都只係大約4,040元，比閱文平足一半，而且閱文凍結咗唔少資金，大家眼大大，睇唔到Razer，相信Razer招股熱爆程度應該無咁勁，分到股數更可觀。上隻誠哥有參股嘅眾安（6060），由上市定價59.7元到97.8元，升幅達64%，認真和味，雖然現價只係80樓下，不過各大散戶好放心。可惜誠哥私人投資唔係次次都Ok，李嘉誠曾公開稱讚過嘅美國人造蛋黃醬Just Mayo，仲做埋代言人咁親自示範點炒蛋，點知個投資最後真係「炒蛋」，間蛋黃醬公司造假數，連維港投資代表最後都離開董事局，所以呢，Razer都係蝕住上市，今年上半年就蝕住74.9萬美元，仲預告未來兩年仍會持續虧損，大家要買都要睇長遠啲好。
Melody
來源:
https://hk.finance.appledaily.co ... e/20171101/20200497
財女手筆：炒波幅不如等收成
1 :
GS(14)@2017-12-05 00:39:1610年啦！人生有幾多個10年可以等？不過你有恒心，最終都會等到，講緊恒指闊別咗10年嘅3萬點，四叔今次真係等到啦！上到呢個位，大家又全城狂熱，人人講股，高追強勢股成為指定動作。不過大家唔好忘記，上到歷史高位，股市當然風高浪急、波幅加大、殺上殺落，呢幾日股王QQ（700）同平保（2318）就做咗完美示範，表演點樣由高位插一成而面不改容！尤其上星期二高位嘅好倉可能噚日朝又被震走了，跟手下晝眼白白睇住佢由紅燈轉眼變成綠燈，左一巴右一巴，仲慘過無買。重要嘢要講多幾次，家個場北水話事，一日北水流入冇改變，港股只會繼續大漲小回，慢牛格局，散戶需要做只係坐貨，強勢股回調時量力而為加注正股，然後坐定定等收成就可以了，炒波幅並非唔得，不過如果炒唔中，輸到信心冇埋，然後？就沒有然後了。幾時升完離場？本欄無設咩目標價、咩阻力位，32000係阻力位？衰鬼，咸豐年前嘅嘢咪再提啦，騰訊、平保、友邦（1299）早就高位再高位而唔知咩叫做阻力位，我地都係等北水買夠先再討論幾時見頂。本欄上周推介聖誕鐘買滙豐（005），一星期小結跑贏指數加幾隻股王，有貨繼續揸，等破前高位啦喂。
Melody
來源:
https://hk.finance.appledaily.co ... e/20171129/20228706
Next Page