📖 ZKIZ Archives

官義岱 給力 拆拿 打人從此叫「碰撞」

1 : GS(14)@2013-07-23 00:45:05

http://www.metrohk.com.hk/index.php?cmd=detail&id=215787&search=1

山東民工冀中星話佢05年喺東莞畀人打到癱咗，佢多年嚟不斷上訪投訴；結果佢喺周六再次喺北京首都機場引爆炸藥，佢自己隻左手炸斷咗，今後除咗行唔郁之外，仲連一隻手都冇埋！呢單嘢搞到咁「杰」，廣東方面話要打佢嘅東莞方面解釋。東莞方面就好嘢喇，佢哋唔使24小時就否認冀中星係畀治安隊毆打致殘，仲揚言冀中星係同治安隊「碰撞」受傷致殘，但東莞方面「宅心仁厚」，考慮到冀中星家庭苦難，「警方救助10萬元」喎。網民都「嘩」一聲叫咗出嚟，東莞警方咁有義氣，有責任都「無啦啦」救助10萬元？總之，從今日開始，「打人」同「碰撞」可能變咗同義詞，大家要用呢個詞時要小心啲！






官義岱
PermaLink: https://articles.zkiz.com/?id=283573

官義岱 給力 拆拿 褐二代

1 : GS(14)@2013-08-06 23:35:25

http://www.metrohk.com.hk/index.php?cmd=detail&id=216997&search=1

大陸呢期有個新名詞，叫「褐二代」。可能各位讀者都有聽過「紅二代」，但大家又知唔知咩嘢係「褐二代」呢？所謂「褐二代」，係指嗰啲「表面為官、內裏是賊」者，佢哋也屬「官二代」，但與「紅二代」唔同，上輩未參加1949年前紅色革命，係由平民晉升為官僚嘅家族。不僅民眾痛恨「褐二代」，「紅二代」對「褐二代」亦好反感。有人話喎，「褐二代」會成為未來反腐嘅主要對象。早前有美國傳媒爆料，揚咗好多「褐二代」嘅料。呢啲猛料，好可能就係有「紅二代」特登放出嚟嘅！







官義岱
2 : joebaba(1652)@2013-08-07 12:23:45

又係林D新野出尼鬥
PermaLink: https://articles.zkiz.com/?id=283626

官義岱 給力 拆拿 薄熙來仍未輸晒

1 : GS(14)@2013-10-01 16:27:51

http://www.metrohk.com.hk/index.php?cmd=detail&id=220587&search=1

薄熙來雖然今次判咗終身，但阿爺對佢，可以話係「仁至義盡」。點解咁講呢？過去，黨政領導貪污兩千萬元，好多都重刑過薄熙來。2000年原江西省副省長胡長清貪污544萬，死刑立即執行。2007年原藥監局長鄭筱萸貪咗649萬，都係死刑。薄熙來貪兩千萬只係判終身，算係「輕判」。況且，佢有可能坐十零年監就可以假釋。不過，阿爺留咗一着，就係剝奪政治權利終身，務求要佢無辦法東山再起。經過今次庭審，可以話薄熙來已經由神壇跌咗落嚟，但偏偏各位不可以就此判定佢一定玩完。點解咁講呢？所謂今日唔知聽日事，難保有朝一日，左翼路線會再次興起，到時薄熙來有可能喺某個時刻被特赦啟用，如果天下大亂，薄熙來絕對有可能成為民粹領袖被請出山。若然中國未來有一天實施多黨制民主，薄熙來仍可能成為極左政治力量嘅代表人物。總之，大家絕對唔可以話實佢冇得再玩！（薄案分析五之五‧完）








官義岱
PermaLink: https://articles.zkiz.com/?id=283767

官義岱 給力 拆拿 秦檜正蠢蛋

1 : GS(14)@2013-10-29 00:42:19

http://www.metrohk.com.hk/index.php?cmd=detail&id=222161&search=1

依家睇番轉頭，大家就會發覺宋高宗時期嘅秦檜，係史上最蠢嘅宰相，因為，佢殺拒絕同金人講和嘅名將岳飛，竟然用咗「莫須有」罪名，搞到自己遺臭萬年。如果換咗今日某強國，岳飛一定會畀人打到佢承認「收咗兵器商人賂賄，誓死不肯接納和平方案」，然後，岳飛要喺朝庭上公開承認錯誤；幫岳飛講說話的朝臣，都一律要道歉！同樣道理， 今天有案竟然未審先判，要喺中央台度承認「收錢作新聞」，而且唔知佢係咪畀公安屈打成招，法律上嘅「無罪假設」原則，突然間唔見咗。成件事依家好似一盆污糟水，搞到混濁晒，真相可能永遠都唔知。咁樣，對所有涉案嘅人都好唔公平。一個冇「程序公義」嘅社會，就好似一個人冇咗靈魂！






官義岱
PermaLink: https://articles.zkiz.com/?id=284009

官義岱 給力 拆拿 習一哥諸事不順？

1 : GS(14)@2013-11-12 00:37:18

http://www.metrohk.com.hk/index.php?cmd=detail&id=222954&search=1

話說上回講到，三中全會其中一個焦點係睇吓中共一哥習近平嘅個人權威嘅高低。但有位北京老友同官義岱講，話習一哥以後話唔話得事就唔清楚，但其實佢過去一年都唔係太順利。老友話喎，習一哥好想取消勞教制度，但結果喺元老嘅反對下唔成事。聽講話習近平嘅老竇習仲勳文革期間都畀紅衛兵捉咗去勞教咗7年，當年仲要係習近平嘅少年時代，所以當今一哥對勞教制度真係好反感。個北京老友又話，習近平本來想提拔佢老友張又俠做其中一個軍委副主席，但江澤民同胡錦濤話「no」，所以唔得咁話。張又俠依家做咗總裝備部部長同軍委委員。仲有，呢位北京老友話，本來習近平想搵佢老友何毅亭做中共中央政策研究室主任，但結果個位又係畀江澤民同胡錦濤嘅智囊王滬寧，而何毅亭就要去中央黨校做常務副校長。呢位老友話，依家啲「緊要嘢」其實都要同江澤民同胡錦濤兩位商量過先OK，咁三中全會之後係咪有改變呢？大家真係要睇睇喇！






官義岱
PermaLink: https://articles.zkiz.com/?id=284088

官義岱 給力 拆拿 強國好嘢

1 : GS(14)@2013-11-12 00:37:31

http://www.metrohk.com.hk/index.php?cmd=detail&id=223047&search=1

讀強國報紙，好多時都會獲益良多。好似《中國青年報》最近曾報道：「中國紅十字會透明度排行榜上排名第一」，認真頂瓜瓜；光明網又話喎：「世界上15個移民最佳去處，中國排名第一」，真係恨死隔籬；《法制晚報》又揚言：「中國民眾對政府信任度達88%，排名世界第一」，強國果然係強國，零舍不同；中國經濟網又話喎：「中國社保繳費達工資40%以上，181國中排名第一」，嘩，強國福利真係掂；《成都晚報》仲咁樣吹，稱「中國看病最不貴最不難」，真係幸福到爆。強國好兄弟嘅「朝鮮央視」亦有單好嘢，話：「全球幸福指數，中國第一，朝鮮第二」！有咁好嘅祖國，官老爺仲紛紛將家眷同財產送去外國，不忘「救濟」外國「水深火熱」嘅人，佢哋認真「唔話得」啊！






官義岱
PermaLink: https://articles.zkiz.com/?id=284089
Next Page
ZKIZ Archives @ 2019