📖 ZKIZ Archives

電視風雲 - 王奇雲 台有台格 (2013年05月20日)

1 : GS(14)@2013-05-20 13:53:59

http://www.am730.com.hk/article.php?article=155196&d=2048

【am730專欄】上個星期高等法院不受理無記嘅司法覆核，好多人拍爛手掌，跟住新免費電視牌照有望嘅消息又炒起，連亞記嘅藝員都夠膽行出嚟支持發牌，之前4月個諮詢又一面倒批評兩間免費電視台，兩套重頭電視劇又收視低迷，口碑惡劣，睇怕政府考慮嘅已經唔係發同唔發，而係發俾邊個？
傳聞行會決定只發兩個牌，唔係無道理。你哋諗下，發一個牌絕不可能，因為一定俾全世界鋤，話有偏幫一台嘅嫌疑；如果發三個又尷尬，因為研究審批咁耐，最後又係呢三間，咁又點解釋到要花成三年呢？所以，兩個新牌係折衷嘅辦法，完全係簡易原理，只係政府要面，又怕解唔到畫，唔關係等亞記執笠，留定個牌俾「不死鳥台」接棒。
之不過事情又唔能夠太樂觀，有風吹話無記會死纒爛打落去，即使政府發咗新牌，一樣會提出司法覆核，仲上訴到底添。Carol話我知，新電視台最近已經回復正常製作，準備好長時間作戰，乘機儲定節目，如果無記死拖，輸嘅唔只官司，仲輸埋形象，大家記得亞記曾幾何時，一夜間變咗人人藐爆嘅電視台，如果你同人講，屋企係睇亞記，人哋會當你有病，隨時瘀到無朋友，嚴重啲女朋友都同你分手。
其實無記離呢步唔係好遠，你前一排試下話趕返屋企睇《神探高倫布》吖？又試下話最鍾意《金枝慾孽2》個如妃吖？同事同學仔都會懷疑你無品味，今日無記漸漸亞記化，成為「睇代表你無品味」嘅icon，呢種後果有時唔只因為節目，會因為「台格」，「台格」有如人格，唔係你錢多多，可以告人就有，往往係做得多，反而錯多添。

王奇雲  (逢周一至五刊載)
PermaLink: https://articles.zkiz.com/?id=282908

電視風雲 - 王奇雲 單純阿媽觀眾 (2013年05月22日)

1 : GS(14)@2013-05-22 14:24:41

http://www.am730.com.hk/article.php?article=155506&d=2050
【am730專欄】呢幾日，天有不測之風雲，驟然風雲色變，仲係有帶遮都會濕身嗰種，所以一收工就乖乖返歸，開個iPad上網逛吓好過，咁啱老媽子拎住碟餸經過(目及)到，喺面書post咗一套新劇嘅劇照出嚟，即刻碌大對眼話：「呢個廖啟智做戲好叨㗎，不過好似好耐都無拍劇喎，隔籬嗰個唔係林嘉華咩？呢套幾時有得睇呀，阿仔？」我如實回答，呢個問題，應該要問特首，因為呢張劇照係Carol間新電視台嘅其中一套劇，即係話一路未發牌，一路都未出得街，阿媽，你等吓啦。
唔怕得罪講句，我老媽子係標準師奶，自我懂性以嚟，見佢同啲隔籬左右嘅師奶吹水，雖然係非正式統計，但佢哋討論親邊套劇好睇或唔好睇，正正同公司嘅收視指數報告不謀而合，有時我個腦塞車，都會同佢傾吓閒偈，當係減壓又好，甚至有時會俾到啲idea我寫稿添，所以喺呢方面，我都好多謝佢。茶餘飯後，老媽子又再追問我Carol間新電視台嘅事，仲大膽到叫我考慮轉過去Carol嗰邊做，我估唔到呢排無記啲劇反應一般，啲師奶唔單止想轉台，如果有仔女喺度打工，仲會叫佢轉工，繼而佢竟然問起我《金枝慾孽2》嘅劇情，又話叫我嗌祥仔黎耀祥唔好再拍「哥倫布」嗰類劇，而且更加係支持發牌，因為身為單純嘅觀眾，可以有多啲選擇去煲劇吖嘛，佢仲拍咗我大髀兩下，語重心長一句：「阿仔，再係咁落去，真係唔得㗎！」我忽發奇想，唔知無記嘅高層會唔會好似我老媽子咁有危機感呢？如果係，咁係咪聽老媽子話齊齊轉工？
PermaLink: https://articles.zkiz.com/?id=282920

電視風雲 - 王奇雲 係入行時候 (2013年05月24日)

1 : GS(14)@2013-05-24 09:32:04

http://www.am730.com.hk/article.php?article=156132&d=2052

【am730專欄】星期日同親戚飲茶，有Auntie知道家陣電視台用人之際，就同佢個仔問我，做編劇會唔會係一條出路？因為而家香港地，大學生畢業之後真係無咩嘢工作選擇，入唔到政府、教唔到書、做唔到大公司，基本就會好快成為sales一族，無論係金融、地產定保險，好多時都係佢哋嘅現實選擇。
我諗咗一陣，好凝重咁同Auntie講，做編劇係一件好痛苦又好過癮嘅工作，唔可以用金錢收入衡量，雖然本質上佢都係一位sales，但係回報認真唔算高，不過呢，養妻活兒都可以嘅，如果肯努力下苦功，有樓有車係得嘅………。點知我未講完，Auntie就即刻插咀追問，做幾耐有得升？有幾多錢人工？一集劇本收幾多錢？搞到我無力招架，唔知點應對好，因為我怕噏得多咗，佢又心雄，迫佢個仔去考編劇；萬一噏少咗，又怕無喇喇扼殺咗一個大好青年入行！
於是乎，我動用時下最流行嘅「語言偽術」去化解。我咁答佢，阿咩姨！正所謂行行出狀元，貴子弟如果天性聰敏，佢一定脫穎而出，升得快過人，依我所知，家陣有機會多幾間電視台，人才好缺，待遇又提高咗十幾二十巴仙，有心入行係時候。道理好簡單，早入行競爭無咁大，依家未發牌，好多畢業生仲係觀望態度，未加入爭奪戰，有啲學歷好嘅會考慮第二行先，到有咗牌嗰一日，形勢會好唔同，到時一定有成群人趁熱鬧，世姪仔又邊度有機會呢？佢聽完好似明，又好似唔明，哦哦聲，好明顯表現出香港人，執輸行頭慘過敗家嘅風格，似有咗個決定！

王奇雲  (逢周一至五刊載)
PermaLink: https://articles.zkiz.com/?id=282951

電視風雲 - 王奇雲 投訴大滿足 (2013年06月07日)

1 : GS(14)@2013-06-08 15:56:51

http://www.am730.com.hk/article.php?article=158260&d=2067

【am730專欄】前幾日有位甘草演員(佢本人當然唔認)見咗報，投訴新電視台搵佢拍動作場面，無用替身，結果扭傷咗條頸，戴埋頸箍叫記者上佢屋企採訪；呢位阿姐(或者有人覺得佢係阿嬸)，仲不滿劇組無飯盒俾佢食，問人對方又敷衍，滿肚冤屈氣咁，難得生果報仲用成半版招呼佢老人家，講到新電視台縮骨夾無良咁，真相究竟係點嘅呢？
Carol響新公司八咗啲料我知，話有人對工作安排有唔高興，覺得自己大材小用，仲推過戲添，所以同工作人員有意見，近來都少導演揾呢位阿姐做嘢，咁啱得咁橋，無幾耐就爆單咁嘢出嚟，似乎時間上面有多少巧合。另外，呢件事據說有另外一個版本，但生果報無求證同報道，就完全信晒呢位藝員，咁樣對幕後工作人員有欠公道，是非黑白，誰是誰非？唔係單方面講咗就係吖嘛？不過無論點樣，有人已經成功爭取見報宣傳，同佢拍寫真嘅心態可能一樣：大滿足晒！
呢個故事仲教訓我哋，戲子無情，尤其係女人，仲有識得演戲嗰種，你哋唔見早前雯女點樣投訴《金枝慾孽2》個編審咩？咪又係搵記者盡訴心中情，講到自己幾陰功豬，點解佢千揀萬揀，唔去搵牧師、教友，一定唔係巧合囉，最後咪又係要人問候、關心、替佢唔值，換轉係男藝員，多數唔會咁嘅樣委屈樣，好似全世界欠佢，全宇宙烚佢咁，但係偏偏女人就可以打呢張「可憐牌」，所以話，千祈千祈唔好得罪女人，更加唔好太容易同情佢哋，一個唔小心，有人隨時變臉，送你一程上路。

王奇雲  (逢周一至五刊載)
PermaLink: https://articles.zkiz.com/?id=283021

電視風雲 - 王奇雲 電視劇之王 (2013年06月24日)

1 : GS(14)@2013-06-25 01:10:28

http://www.am730.com.hk/article.php?article=160344&d=2087
韓劇一向少睇，但為咗工作又唔可以唔睇下，惟有揀部分口碑好少少，好似《秘密花園》、《城市獵人》、《拜托機長》都可以睇下，香港人對韓劇始終無持久嘅熱情，總係嫌班泡菜男女口水多多，眼淚又多多，郁啲就出眼淚，略嫌表現感情方式有啲過咗，想投入都投入唔到。
韓劇係電視劇之王嗎？網上有人話，韓劇精神同泡菜好神似，正所謂小食怡情，主食傷身。當你用佢嚟做生活調劑時，偶爾愛恨癡纏，簡直令人心曠神怡；但係你當主流韓劇幾十年如一日，情情愛愛失憶復仇，男男女女瞪著無辜大眼淚水盈盈時，難免會令人食到滯兼夾反胃。
最近就正正追緊一套叫《電視劇之王》，除咗我冧冧地女主角鄭麗媛之外，主要係因為題材，講正我哋呢行，故事大概係講述一部電視劇嘅誕生，從企劃到最終播出，三個主要人物包括：認為「電視劇是賺錢道具」嘅電視劇製作公司代表安東尼金(金明民飾)、與認為「電視劇是表達人間之愛」嘅新人編劇李高恩(鄭麗媛飾)、以及不懂妥協、充滿自信嘅超級巨星姜賢瑉(崔始源飾)之間發生嘅有趣故事。
《電視劇之王》主線脈絡，就是一個功利主義偏執狂製片人，不擇手段求成功發達，不惜一切利用別人，一朝失利後眾叛親離，從天堂跌到地獄，始終死心不息，兩年後有一個機會，於是再偷呃拐騙之前被自己害過嘅傻瓜編劇，氹人攜手排除萬難，一步步攞番自己嘅電視劇王國。咦！乜條橋同現實有多少相似嘅，嗯，我都係暫時寫到呢度，費事一個唔覺意，會收到封律師信，煩到社長就唔多好啦！ (逢周一至五刊載)
PermaLink: https://articles.zkiz.com/?id=283140

電視風雲 - 王奇雲 編劇入行之路 (2013年07月05日)

1 : GS(14)@2013-07-06 14:58:42

http://www.am730.com.hk/article.php?article=162120&d=2095
正所謂「有人辭官歸故里，有人漏夜趕科場」，娛樂圈流失大，幕前需要大量男女藝人，幕後工作人員更決不可少，有前輩講過，藝人同背後工作人員嘅比例，要係1：10，但時至今日，觀眾要求高，製作亦比以前更認真，相信呢條數要加碼調升，好編劇嘅需求更加係買少見少，所以如果有人問到的話，我幾時都話公司仲請人，希望遇到真正「有心有力」嘅新人嘛，有人好奇問，編劇究竟係點入行？好少見勞工處或者招聘雜誌上刊登話請人？無錯，係極少，如果有俾你睇到，仲要唔知咩公司，真係要小心可能係騙局。
先講正路，有讀緊大學時入嚟做實習嘅，雙方夾到的話，順理成章畢業後會繼續留低，不過老實講，家吓嘅大學生會覺得實習時就無計啫，正式員工時應該唔止咁低待遇，加上要還學費俾政府，所以有唔少被現實覆蓋理想，寧願考份政府工好過。另外，電視台會舉辦編劇訓練班，好明顯係俾有心人一個幾直接嘅渠道，但同時間亦披露咗唔少呢行嘅苦況，例如：有開工，無收工時間、鬧人唔使本，甚至似患有精神分裂嘅阿頭、仲有未教你寫稿就要先識去幫全組人買下午茶或者消夜，唔係話要人入行做妹仔阿四，一個編劇夠唔夠細心、認真同埋識唔識處理問題，完全可以喺呢度反應出嚟，曾經隔籬組有個新人，阿頭要佢買足三個月外賣先開始俾佢試吓寫稿，期間只可旁聽大圍開會度橋，呢啲工作模式，後生仔會覺無聊頂唔到，大人大姐嗰啲又覺無面，甘願留低嘅都所剩無幾。有啲人會自薦去電影或製作公司應徵，但要預咗石沉大海，同埋回覆時間係似有或無。
PermaLink: https://articles.zkiz.com/?id=283226

電視風雲 - 王奇雲偶像劇咪亂開 (2013年07月08日)

1 : GS(14)@2013-07-09 09:18:41

http://www.am730.com.hk/article.php?article=162281&d=2096
【am730專欄】近來女朋友追看台劇《真心請按兩次鈴》，每晚都喺平板電腦上面逐集追，我身為大男人一件，當然無興趣睇呢亭軟淋淋嘅偶像劇，不過有時候見佢睇得入迷，都會伸個頭過去裝下，睇下究竟有咩嘢法寶？可以連行家都吸引追看，果然，睇咗我都唔明，又係兩男爭一女扮情深古仔，成集瑣瑣碎碎，除咗畫面的確幾靚之外，真係揾唔到追看嘅原因。
台灣近年生產大量偶像劇，一時無兩，差不多「偶像劇」成為台劇嘅代號，但係響2012年，「偶像劇之母」柴智屏決定解散旗下專拍偶像劇嘅公司，全身退出戲劇市場，十二年前佢拍攝嗰套《流星花園》，一舉捧紅F4，紅遍中港台，帶動偶像劇熱潮，正好代表台灣偶像劇泡沫化情況嚴重，除咗玩呢味男女愛情故事，似乎搵唔到咩嘢出路。近年加上各家電視台刻意標榜自家品牌，不過重複鬆散的劇情結構，水分十足，以及的爛尾和老土，多數難逃收視低迷命運，《華麗的挑戰》同《國民英雄》就係例子。
咁香港可唔可以拍偶像劇呢？我話千祈唔好！好簡單，大家睇下日劇近年嘅題材，連「純愛」系都放棄，台灣方面又太濫，韓劇供應又太多，如果香港仲開呢啲戲，只有死路一條！而且香港男女喺亞洲裡面最無愛情feel嘅人，一個二個認錢唔認人，又點會相信周圍會發生一啲咁哀怨纏綿嘅故事呢？仲有，香港真係有「偶像」咩？唔好玩啦！叫做紅少少嘅，個個三十幾歲，仲嚟扮青春？愛到生生死死？邊度有人信呢？我勸電視台老闆，不如拍多幾套鬼片好過！至多得泰國同你爭！
(逢周一至五刊載)
PermaLink: https://articles.zkiz.com/?id=283255

電視風雲 - 王奇雲 飛機師的夢 (2013年07月09日)

1 : GS(14)@2013-07-09 09:19:10

http://www.am730.com.hk/article.php?article=162474&d=2100
【am730專欄】無記近排推出嘅劇，接二連三收視未如理想，唯有寄望嚟緊呢個月15號首播嘅《衝上雲霄2》，希望憑著吳鎮宇、張智霖等幾位型男帶住觀眾，將收視指數一飛衝天，好似十年前第一輯咁叫好又叫座。其實照往常情況，公司每有第二輯劇準備出街，除咗做宣傳，亦會落吓藥打底，喺深夜時段重播第一輯，順便幫觀眾溫習吓，但聽聞呢次就有人擔心觀眾因此會將新舊兩輯作比較，加上套劇未出街，又俾人話今次由林子祥唱嗰首主題曲唔掂，網民話搵番第一輯由陳奕迅主唱嘅《歲月如歌》好過，所以公司寧願斬腳趾避沙蟲，唔重播好過。成件事，聽落好奇怪，好似俾咩玄學大師預測到呢套《衝2》會被批評兼反應差，而且仲默認咗係事實添，所以立即作出緊急應變措施。無錯，電視劇有個宿命，好多時第二輯被批評不如第一輯，好似美國劇集《逃》都係一樣，第一輯收視報捷，追看度爆燈，但之後就被批評一輯不如一輯，加上早排播出《金枝2》嘅反應又係咁，都咪話唔令人擔心，仲有早前喺無記播嘅韓劇《拜託機長》，同今次套《衝2》都係以航空業為故事藍圖，難免大家又會拉埋嚟比較吓。
而事實上，正所謂出得嚟撈，有好多嘢要預咗啦，今時唔同往日，唔係吓吓都要係你贏，勇於從失敗中領悟先係最高境界。話時話，其實都幾期待呢套劇，大製作之餘，全部都係型男索女，個個著套醒神制服，起碼有視覺享受先啦，十年前女主角胡杏兒仲係肥肥白白嘅新人，今時今日已經係攞過「電視最佳女主角」嘅一線阿姐，睇法又唔同咗，總之希望呢套新劇，可以將沉咗一排嘅士氣同埋收視，好似劇名咁衝上去，能夠挽回無記向來重視嘅面子。
(逢周一至五刊載)
PermaLink: https://articles.zkiz.com/?id=283256

電視風雲 - 王奇雲 皇妃監製 (2013年07月10日)

1 : GS(14)@2013-07-11 01:14:21

http://www.am730.com.hk/article.php?article=162653&d=2101

【am730專欄】老媽子話近排唔多精神，做咩都無心機，本以為佢有邊度唔舒服要去睇醫生，後來細妹爆料，話老媽子係因為晚晚煲劇，夜瞓咪無精神囉，竟然電視劇係罪魁禍首，邊套咁勁搞到老人家唔願瞓，照計依家深夜時段係播緊《世青盃》，根本無可能搞到我老媽子。原來佢個幾月前，已經夜麻麻一個人匿喺房睇無記高清台，播緊嗰套由台灣藝人林心如主演嘅《傾世皇妃》，每晚睇到凌晨，後生仔都傷身啦，相勸之下，佢老人家就投訴近期好悶，無咩節目啱佢睇，唔覺意發現有呢套宮廷戲啱口味，雖然有好多演飾角色嘅藝人佢唔識，但起碼有當年演《還珠格格》嘅林心如做女主角，仲有好戲之人惠英紅做太后，加上佢老人家大讚劇中演北漢太子嘅霍建華靚仔，集合種種原因，咁就俘虜咗佢老人家煲上癮。講番呢套劇，其實係林心如自組嘅製作公司嘅首套古裝作品，係改編自網絡作家慕容湮兒嘅同名暢銷小說，故事係以五代十國做背景，所以睇起上嚟，個個都係太子同埋公主，要處理咁多不同國度嘅宮廷戲，的確唔簡單。至於林小姐當然自己擔正做女主角，而且仲做埋監製，老實講，林小姐人靚又演得，經已係無需質疑，劇中服飾又夠華麗，又有型男陪襯，至於做監製呢，可以話佢仲有好多進步空間，有好多藝人做得悶悶哋，就鍾意喺行內嘅其他方面搵啲新搞作，例如演員走去出碟唱歌、藝人去做導演咁，連出名勤力嘅「牛華」，都曾經因此損失慘重啦，所以話演員想轉型都唔係易事，之但係，向來都知東南亞劇集需求大，國內市場更加被視為會生金蛋嘅地方，唔少行外人都想去分一杯羹，更何況在行嘅藝人，當然都希望個個都喺呢行搵到食，百花齊放。
(逢周一至五刊載)
PermaLink: https://articles.zkiz.com/?id=283269

電視風雲 - 王奇雲 參考定抄襲 (2013年07月16日)

1 : GS(14)@2013-07-17 01:09:51

http://www.am730.com.hk/article.php?article=163527&d=2106
近日一位寂寂無名嘅三線藝員鄭俊弘，憑著一首《時代曲》喺音樂比賽節目《星夢傳奇》一唱成名，相信公司同埋佢本人都預料唔到，郭偉亮直接了當一句：「你唔好做戲，去做歌星啦。」更加令成件事昇華。
無錯，呢個節目同紅遍全國嘅某藝人比賽節目非常相似，其實節目互相參考嘅情況，都係非常普遍嘅事，之但係抄還抄，都要添加個人風格同埋要參考得有進步，先可以青出於藍，其實無記參考人哋節目再造都唔係新聞，好似想當年亞記出產嘅金牌時事節目《今日睇真D》，無記二話不說吸個九成九版嘅《城市追擊》嚟打對台，仲有《尋找他鄉的故事》，多年嚟贏得「電視欣賞指數調查最佳節目」大獎，無記憑住雄厚資源財力，製作出豪華版《向世界出發》嚟挽回面子同埋口碑，所以話「橋唔怕舊、最緊要受」係無錯嘅。
講番《星夢傳奇》所有參賽者唱得真，兼演得真，每人出場前必有心聲自白，呢個係節目模式唔緊要，好似之前嘅《超級巨星》都有呢種真情對話環節，觀眾根本唔認識參賽者，佢淚如雨下講自己點努力唱好首歌嚟比賽，會易啲得人心，之但係依家嗰班藝員參賽者，個個都講到必眼淚，學莎莉話齋，唱到人毛管戙就話勁啫，係唔係都好似中咗催淚彈咁，就令人覺得係博同情，堂堂大男人都咁，加上本身係戲子，可能會引嚟反效果，其實真性情唔一定要落淚，邊個話開心事唔可以感動人，只要係真，相信觀眾感受到，尤其香港觀眾較理性，識分析較多層面，至於內地觀眾，你就可以單純啲、煽情啲，甚至淋狗血都見慣不怪，所以吸人節目或製作時，都要先考慮同顧及地區觀眾嘅國情。
PermaLink: https://articles.zkiz.com/?id=283378
Next Page
ZKIZ Archives @ 2019