📖 ZKIZ Archives

電視風雲 - 王奇雲 雷劇當道 (2013年07月15日)

1 : GS(14)@2013-07-17 01:11:08

http://www.am730.com.hk/article.php?article=163372&d=2105

【am730專欄】近年大陸市場出現咗「雷劇」一詞，本來「雷劇」只係一種地方戲曲，如今，後來引申指一啲大幅度違反歷史，誇張戲說嘅古裝劇，而再引申開去，仲有「雷人」、「雷橋」、「雷對白」等等，上星期有線電視新聞都專題報道大陸前兩年啲「抗戰劇」，點樣「雷」法？例如：中國武林高手一手撕開日本兵兩截、被姦民女用連環箭射死十幾個鬼子、最經典自一幕係掟手榴彈炸日本飛機啦！有興趣嘅可以上YouTube，大把有得你睇。
「雷劇」漸漸已經成為咗國產電視劇的重要分支，因為即使日日俾人鬧，俾人批評點唔合理，但係收視高企，好似無記以前師奶劇咁，愈鬧愈高，你無佢符！其實點去分別「雷劇」？你話好簡單又得，好難都得，「雷劇」通常劇情離奇無邏輯、製作粗糙犯駁又多、演員演技浮誇，對白不合時代，隨意穿越古今，根本違背所有編劇理論，好似近期嗰套《新洛神》，編劇再次使出淋狗血必殺技，叫曹操、曹丕、曹植三父子，與甄宓玩起四角戀，令傳統觀眾反晒面，不過玩呢亭玩亂倫、畸戀情節仲未夠皮，真正攞你膽就係邊演邊唱嘅形式！尋常人真係會毛管都豎起，難得仲有人繼續睇添！
至於所謂「正劇」都唔好得去邊，有黃曉明擔正嗰套《精忠岳飛」，一樣咁「雷」：特徵係多角愛情戲，岳飛同林心如飾演的李孝娥卿卿我我，仲有同虛構出來紅顏知己李素素有著一段情，其他各大配角都有自己愛情線，秦檜真的戀愛了！韓世忠、趙構也同時愛生愛死，甚至金兀朮都戀埋一份，總之，戀唔停，問你怕未？

王奇雲  (逢周一至五刊載)
PermaLink: https://articles.zkiz.com/?id=283382

電視風雲 - 王奇雲 入屋大過天 (2013年07月17日)

1 : GS(14)@2013-07-17 22:51:46

http://www.am730.com.hk/article.php?article=163782&d=2107
音樂比賽可以令人一夜成名，憑著動人歌聲感動大眾，獲獎後，簽約唱片公司，一邊出show演唱攞經驗，一邊等待出碟機會，好彩嘅就成為新一代天王、天后，好似近年《超級巨星》節目，成就咗許廷鏗同埋林欣彤，兩人喺年尾樂壇頒獎禮取得理想成績，亦得fans歡心，算係有交代啦，林欣彤入行無耐，仲有幸夥拍樂壇天后容祖兒拍攝電影《DIVA華麗之後》，對一個新人嚟講，的確係個千載難逢嘅升呢機會。
至於電視劇，亦有一種神奇魔力，令某啲人趨之若鶩，唔係吹水，當年嗰幾間大唱片公司，會定時定候同無記傾密偈，睇吓有邊套劇啱佢哋旗下嘅歌手演出，有時即使已係二線頭嘅歌星，嚟拍劇唔係做主角一樣無say no，咁樣唔係屈機，係嗰種難求嘅入屋魔力吸引佢哋嚟合作啫，試諗吓，一連五晚，每晚成粒鐘俾觀眾對嗰位歌星加深印象，如果以唱商場show嚟計，真係唔知要唱幾多場先有咁嘅效果，所以話電視劇可以話係歌手增加fans嘅推進器。
印象較深嘅有1998年鄭秀文嘅《寵物情緣》、2005年有許志安嘅《伙頭智多星》、2007年有容祖兒嘅《學警出更》，真係多到不能盡錄。其中有位歌星最近上電台節目，講番想當年喺無記拍劇嘅辛酸，日夜趕拍無休息，佢用咗一句說話嚟形容：「拍一套二十集電視劇，等如老咗三年，而且只係得最低工資。」話雖如此，佢又不能不認當時係為入屋，增加觀眾緣，不過凡事有兩面，有歌星喺公仔箱出現，同樣令套劇有新鮮感，總算雙贏啦，不過點解近年又愈來愈少歌星肯拍劇呢？
PermaLink: https://articles.zkiz.com/?id=283449

電視風雲 - 王奇雲 衝上男色 (2013年07月18日)

1 : GS(14)@2013-07-19 01:32:19

http://www.am730.com.hk/article.php?article=163990&d=2108
估唔到《衝上雲霄2》要用一班佬嚟吸引眼球，飛機師嘅制服誘惑依然奏效，戴上黑超之後更加搞到女粉絲大呼小叫，反而空中服務員陣容覺有啲弱，最索嗰件法拉都走去揸飛機，另外嗰個就負責修理飛機，無記似乎有心服侍班師奶多啲，而罔顧毒男感受，大家要明白，衝上雲霄嘅行業性別裡面，女人一定多過男人，所以呢個劇有「性別歧視」之嫌。
同上一輯一樣，《衝上雲霄2》依舊情情塔塔，「雷劇」味重，又係玩三角戀、多角戀，今次將兩女爭一男換成兩男追一女。吳鎮宇依然是其中一角，不過另外兩個則換咗張智霖飾演風流飛機師顧夏陽，同陳法拉飾演的型格女機師何年希，佢將會愛來愛去，喺吳鎮宇同張智霖之間徘徊，吳係法拉亦師亦友，張係幫忙忘記舊愛傷痛嘅情人。可能吸收咗之前重頭劇嘅教訓，今次唔玩偏章，主力賣陽光同靚景，男主角又剛陽有勁，唔似《金枝慾孽2》陳豪咁玩陰柔、唱崑曲，成功搶番女觀眾。仲有吳卓羲和馬國明分別飾演副機師唐亦風及高志宏，另外羅仲謙和周志文上陣，滿足晒女觀眾對於俊男健碩的投射，今勻可謂出盡男色誘惑大家嘞！
但係始終係續集，跳唔出框框，香港真係有咩嘢觀眾，就有咩嘢劇集，《衝上雲霄2》這部十年後再拍的續集，無響航空業上面擴闊觀眾視野，最後又係多角戀，感情瓜葛，令人有點失望，但大家又受，試問又可以點？ 如果真的想電視業有競爭，就算無記開《衝上雲霄10》，我都想有多個選擇。
PermaLink: https://articles.zkiz.com/?id=283528

電視風雲 - 王奇雲 無記行業劇 (2013年07月22日)

1 : GS(14)@2013-07-23 00:42:51

http://www.am730.com.hk/article.php?article=164420&d=2110
航空題材電視劇收現高開，皆大歡喜，大家當贏咗，先唔講裡面有幾多飛行專業嘅謬誤，淨係睇番無記嘅「行業劇」公式，即係隨便揾個專業做包裝，八成玩三角戀，兩成講行業，都已經悶親，即使有兩個電影男cast上陣，一個玩頹，一個扮cool，都難以遮掩內容空洞，重複以往男女交錯感情線嘅舊橋。
其實真係一啲都唔意外，因為先天所限，有航空公司贊助，受人錢財，替人消災，總唔可以隱善揚惡嘛！例如近年大陸遊客襲擊空中服務員，喺機艙裡面大聲喧嘩，統統唔寫得，鬼叫有好多大陸航線同強國客咩？你想反映現實都唔得啦，係咪？仲有，任何有損航空公司形象的劇情都唔可以，已婚機師同空姐之間嘅不倫同瞹眛要消失；機艙服務員之間嘅勾心鬥角又抹走，對付麻煩乘客嘅非常手段都要免提，左閃右避之下，剩低嘅只有一班空中小姐對機師發姣獻媚，最後又跌番落一般公式，某行業有個靚仔，唔理係律師、醫生定飛機師，大受歡迎，Cool爆，但係只情深女主角一人，抽離現實到死！好嘞，一去到行業情節，又流流地，好似劇中，飛行時發現有雷雨雲，副駕駛建議轉飛或繞行，但機長張智霖唔理咁多，扮有型，喝住大家討論，高唱《Fly Me To The Moon》，直飛直過雷雨帶，情節就俾網上好多飛機師嘲笑，因為穿越雷暴十分危險，如果可以選擇繞航，例如上升或下降都得，飛機師仲要為乘客安全負責，萬一俾雷電擊中，可大可小，即使個別乘客心急，都無可能咁做，成件事太過兒戲了！(逢周一至五刊載)
PermaLink: https://articles.zkiz.com/?id=283570

電視風雲 - 王奇雲 短得有道理 (2013年08月15日)

1 : GS(14)@2013-08-15 23:04:09

http://www.am730.com.hk/article.php?article=168099&d=2129

【am730專欄】得知女友Carol佢間新電視台，依家拍嘅電視劇，只係得十幾集，甚至得幾集，好似《我阿媽係黑玫瑰》原本25集縮淨9集，《歲月樓情》原本30集得番14集，感覺上集數的確係幾零丁，同中國人要五要十嘅齊頭數傳統嚟講，真係算破格。開頭我都覺得係拍得好又使咩縮吖，集集都要本錢㗎嘛，王老闆有苦自己知啫，佢都公開解釋過，話想套劇濃縮啲、精彩啲，即使唔見幾百萬都無計，不過近期剛開拍嗰套《四年B班》一開就話明只係得四集咁大把，嚟緊再開嘅新劇都屬短劇，Carol話開始時係有啲唔慣，但慢慢都好認同電視劇嘅集數，應該係貴精不貴多。
話時話，做咗咁多年編劇都無人話過我知，點解所有電視劇唔係開20集，就係30集、40集，可能呢啲係無記傳統，一個月或者兩個月內就播完一套劇，配合埋啲廣告套餐，就可以同啲廣告客戶好計數，所以從來都無人諗過或者提議過開幾集嘅短劇，新電視台套套係短劇，做觀眾有得揀又有新鮮感就梗係好啦，之但係喺一間電視台嘅角度睇，即係要製作更多節目先可以每日填滿個電視節目表，唔怪之得，未攞正牌，王老闆都話下半年會將藝員細數由250人增至300人，咁即係話，幕後都好有機會要添加人手，或者增加工作量，個台先可以應付到時時刻刻有節目出街，睇怕Carol只會愈來愈忙，話就話當初去得做開荒牛預咗壓力大，但我都唔想做殘自己個女友，加上有傳聞話「魔童」用人唔簡單，捽到你甩皮，希望王老闆高抬貴手，繼續錫住啲下屬啦，要長期作戰吖嘛！

王奇雲  (逢周一至五刊載)
PermaLink: https://articles.zkiz.com/?id=283677

電視風雲 - 王奇雲 台有台格 2013年09月30日

1 : GS(14)@2013-10-01 16:39:59

http://www.am730.com.hk/column-174514
好懷疑有一群專業觀眾，喺屋企起碼有部超過六十吋嘅大電視，令佢哋睇劇都睇得特別清楚，好多連導演認為觀眾可能唔多覺眼嘅細位、穿崩位、服飾唔連戲，甚至分別兩套劇嘅相同服飾，都能夠俾呢班眼利觀眾逐一發現。最近，就有觀眾發現「神槍手」張兆輝，喺劇裡面捧住個大紙皮箱，上面印住「整餅戲」嘅寶號「羅信記」，有網民就揶揄話唔通周海湄開嘅café係有花生糖賣？認真搞笑。
其實電視劇所用嘅道具，向來都係道具部負責，小至一隻水杯，大至傢俬電器，道具手足會好專業咁記低晒每套劇要用嘅道具，咁當然有好多都會重複使用，你喺專訪節目見到嘅花樽擺設，隨時喺唔知邊套劇會再出現，呢啲都好正常，大家都唔會特別留意，發現都唔會介意，不過今次嘅紙皮箱印住上一套劇嘅生意寶號就較為特別，雖然開台以來都無明文規定唔可以咁做，但感覺就好易令人懷疑係咪無記又想推軟性廣告呢？「神槍手」係由一個洗髮露品牌贊助，雖然出現嗰個招紙只係另一套劇嘅劇中公司名，但都會令人聯想起現實中嗰間餅家，如果係咁就真係對洗髮露公司唔多公平，俾出嘅贊助費，竟然有另一個產品品牌令觀眾直接聯想到而促成商業活動，可能問問法律意見睇吓有無違約喎。咁都未算，配角李國麟喺「神槍手」做徐子珊老竇，喺「整餅戲」就做陳展鵬阿爸，的確係容易令觀眾混淆，但咁都無計，拍嗰時，根本唔會知套劇出街時，邊套劇接上或接下播出，兩套劇出現同一個藝員好難避免，如果唔係兩年前都唔會出現甘草演員羅樂林「一日死五次」嘅事件，只能講句「如有雷同，實屬巧合」。
(逢周一至五刊載)
PermaLink: https://articles.zkiz.com/?id=283774

電視風雲 - 王奇雲 電視革命潮 2013年10月21日

1 : GS(14)@2013-10-22 00:12:07

http://www.am730.com.hk/column-177452

當連想有選擇睇電視嘅權利都俾人剝奪，咁下一步政府攞走你嘅嘢係咩嘢呢？置業權？教育權？人身自由？還是言論自由？星期日數以萬計嘅市民又再次走上街，包圍政府總部，我同Carol當然唔例外，下晝同埋所有香港電視網絡嘅員工一齊，為咗香港嘅公平，創意，自由，意難平！
今次發牌結果牽動了香港人嘅心，我身邊好多本來唔多理政治嘅朋友同家人，都主動打電話俾我，問我哋會唔會上街，周圍嘅商戶貼上咗支持發牌嘅標語，我真係好意外，因為我心裡面嘅香港人只顧揾食，怕麻煩，驚政治，竟然會咁關心電視牌照，真的感動了！電視本來係娛樂事，估唔到反而如水銀瀉地咁入屋，議題比甚麼國民教育同替補機制更加容易明白，尋常師奶老人家都會知道，睇電視係市民基本權利，所以，這場電視革命嘅殺傷力，同持久性，政府班蠢人又一次低估情況，我可以話，電視係香港人嘅最後防線之一，大家唔死守，以後就後悔莫及。
集會裡面，我聽到好多藝員嘅真心話，例如林文龍講述佢離開以前任何一間公司都唔會流一滴眼淚，但係今次發牌事件，就令呢個大男人喊咗出嚟。仲有，我唔多認識嘅關伊彤，陳丹丹，都好勇敢咁上台，佢哋唔理以後會點，大膽講出心裡話，例如，香港電視俾藝員嘅待遇，比起以前無記，係大大提升，仲十分尊重，人哋話戲子無情，呢句說話實在有欠公平。而且藝人最怕得罪人，說話最圓滑，最後都要被迫企出嚟，為生存出聲，睇嚟香港真係出事了！

王奇雲  (逢周一至五刊載)
PermaLink: https://articles.zkiz.com/?id=283968

電視風雲 - 王奇雲 沒有更無恥，只有…… 2013年10月28日

1 : GS(14)@2013-10-29 00:54:54

http://www.am730.com.hk/column-178509
時窮節乃現，係編劇度橋時常用嘅方法，大意係，將一個角色放響一個好盡好盡嘅境地，於是佢真正性格就自然呈現出嚟。如果唔多明白嘅話，日前就有個好好例子，就係響立法會內會裡面，議員就動用權力及特權法投票，要求行政會議公開不發牌予香港電視嘅理由時，自由黨五票投反對票，事後田少竟然厚顏咁話：「投錯咗喎！因為嗰時行出行入，唔係太清楚莫乃光有關修訂喎！」
就係因為咁，議案就被否決，自由黨呢五票本來可以左右大局，之不過有人要向上面表忠，所以反對。本來唔緊要，我哋預咗，自由黨慣曬看風駛，不過你都唔好講出咁低B嘅理由吖，當市民係無記師奶觀眾咩？穿曬崩啦！田少！仲夾硬演落去？哈！原來我哋班編劇度唔到嘅橋，佢仲有得出賣，就係再一次厚顏，話響11月6日立法會討論呢件事時，自由黨決定撥亂反正，投番贊成票喎！係人都估到，當日立法會要通過議案，係要響分組點票情況下，同時有多數票至會成功，而功能組別大家都知道，係無機會有多數票，換句說話，即使自由黨投咗贊成票，都無力挽回大局。講到呢度，畫公仔都畫曬出腸，田少兩面逢源，想食盡著數，一方面搶佔發電視牌道德高地，另一方面又力保政府利益，可以話比起民建聯、工聯會、經民聯，更加虛偽！
Carol同一班留守嘅同事經歷7日6夜抗爭都無事無幹，反而聽見自由黨咁嘅彈弓手行為，激氣到即刻病咗，田少！你好嘢！

(逢週一至五刊載)
PermaLink: https://articles.zkiz.com/?id=284022

電視風雲 - 王奇雲 立會後形勢 2013年11月11日

1 : GS(14)@2013-11-12 00:34:42

http://www.am730.com.hk/column-180732
本月6日立法會否決了動用「權力及特權法」後，大局已定，Carol 和同事都知道電視牌照無望，激情過後，就是要面對未來的時候。除了有長約的員工外，大部分幕後人員已經離職，留下來比較完整，只有戲劇創作組，資訊綜藝部人手不算多，部分人早就給有牌的電視台羅致，他們如果還想留在電視行業，應該問題不大，至於待遇嘛，自然要張就一下。
大部分未遣散嘅創作人員，其實都係因為仲有一年至兩年嘅死約，即係話電視台除非賠足錢，否則雙方仲要維持僱傭合約，直到約滿為止。前幾日Carol部門開會，據說公司喺三至六個月內有plan B，細節未知，可能關於亞記，可能同大陸電視台合作，又可能轉搞電影，總之乜都要等，大家照完成手頭上劇本先，然後齊齊去聖誕party！
係！無錯，仲有party去，王老闆既然九億都付諸東流，當然唔志在使多幾十萬，同一班戰友高興下，今次仲會轉地方，由會展改去洲際，排場class高幾班，Carol佢哋都唔知開心定擔心好，因為到時一來要著靚啲，咪俾街外人睇小香港電視；二來怕大家聚首一堂，百感交集，一時感觸喊起上嚟，化妝都不保；當然，都會怕大家酒逢戰友千杯少，醉倒幾十個都唔出奇啦。女人就係寧捨多嘢諗，多事煩，正一有得去又投訴，無得去又反對咁啦。
大家最擔心嘅反而係製作嗰邊同事，當日好多位係無記高薪挽留下，立心過檔，有啲仲差少少反面咁滯，要回頭未必咁易，就算有人招手，男人大丈夫面子攸關，骨氣錚錚，多數都唔肯返去㗎！
(逢週一至五刊載)
PermaLink: https://articles.zkiz.com/?id=284083

電視風雲 - 王奇雲 再起風雲

1 : GS(14)@2013-11-13 14:14:03

http://www.am730.com.hk/column-181088
香港電視最後一套電視劇《Night Shift》今個月內就會煞科，雖然不獲發牌，但成班手足可以話係更落力、更俾心機去完成埋呢份工作，呢種專業及團體精神，行內行外都受人尊敬。自己用心去做嘅嘢，唔知幾時先可以見光，對於創作人嚟講，其實會好無癮，佢哋能夠無私咁為公司，劇中藝人郭鋒講得好啱，劇集係公司資產，冇理由hea咗佢，難怪老闆王維基都話，呢次事件，令佢感受到五十多年來，從未感受過嘅澎湃嘅愛。
天下無不散之筵席，之前受影響嘅三百幾個員工，仲有即將滿約嘅同事，大家都要為個飯碗籌謀一下，部分藝員同事開始有工開，話晒藝人要靠曝光率生存，現階段唔少人都密食當三番，為自己鋪路，而幕後因人數眾多，一下子市場未必能夠消化，有個別編劇已經有著落，有人返去無記求安穩，有人去now記開新天地。雖然無記係開咗條職工求助熱線，又有當家小生、花旦肉麻呼籲「愛回家」，基於種種原因，聽聞呢個電話無咩響過，其實當中有啲孤家寡佬，已疊埋心水返大陸賺人仔好過。
至於另外兩間獲發牌嘅公司，係有風聲話要人，但求職者一下子有成幾百人，你揀人、人揀你，市場出現供求問題嘅情況，有機會令同事嗌價及待遇有阻力，唔少同事都心大心細，走得出一個籠，冇理由自己又跳返入另一個籠嘛，到時又有機會跌番落大財團嘅抑壓局面，所以有人已計劃自組公司，創作工作室又有，製作團隊又有，自己接job等等，總之大家心裡仲有團火，加上本身嘅行業專長，無可能唔掂嘅，話唔定因此令香港嘅電視業再起風雲。
(逢周一至五刊載)
PermaLink: https://articles.zkiz.com/?id=284115
Next Page
ZKIZ Archives @ 2019