2009-06-07 AppleDaily
| ||||||
| 美 國通用汽車（GM）申請破產保護令，重組營運模式，將GM一分為二，新GM接收有價值資產與品牌 （GMC，Cadillac，Buick，Chevrolet），舊GM保留壞資產與無用品牌（美國銷量低之汽車）如 Pontiac，Saturn，Hummer，Saab。新GM嘅股權分佈喺美國政府60%、加拿大政府12.5%、工會17.5%、債券持有人10%， 原來嘅股東呢，對唔住，一啲都冇你哋份，九十美元買入一股者，留番做金融海嘯紀念品啦。 GM患重病，非自今日始，但金融海嘯就係呢間百年老店嘅催命符。何解有金融海嘯？老友K自三藩市傳來電郵，一啲有心人有最新解釋： 柏 林一間酒吧老闆Heidi諗到一條妙計，增加賣酒收入。酒吧客戶多數係失業酒鬼，要飲酒，但孤寒，Heidi特別批准佢哋飲酒有拖冇欠，月尾埋單，於是消 息傳開後，酒客湧至，生意大增，酒吧乘機加價，增加利潤；Heidi手頭上多咗好多應收未收賬款（receivables）。賬面上，錢賺多咗好多，但現 金流唔夠用噃，怎麼辦？酒吧條街有一間銀行，內有一位RM（客戶經理），十分進取，聞風而至，搵Heidi斟生意，教佢將啲應收賬款抵押畀銀行，借多啲錢 嚟周轉。 銀行總部的衍生工具專家立即動腦筋，將啲酒吧賬款包裝成為Drinkbonds， Alkbonds，Pukebonds……冇人識得這是甚麼bonds，不明白其結構，但啲銀行配售專家就將呢類bonds分銷全世界，政府買入，基金買 入，大戶散戶齊齊買入。格林斯潘不是說過市場有froth（啤酒泡）而無bubble嗎？項懷誠來港不是說過沒有泡的啤酒不好飲嗎？ 直 至有一日，一位「四方木」──銀行風險管理經理突然間話：「我發覺有啲唔妥，啲啤酒債券炒得太癲嘞，可能大家都飲醉晒！」銀行好唔高興，叫佢唔好周街講， 立即炒咗佢，然後暗中派人去Heidi酒吧收數。Heidi於是向酒鬼債仔追數，不追猶自可，一追就爆煲通天，冇人有錢還，Heidi唯有申請破產，跟住 引發大規模賴債（default），啲啤酒債券價格大跌特跌，銀行周轉不靈，要政府動用公帑打救，穩定局面。政府啲錢點嚟o架，咪向唔飲酒啲納稅人加稅 囉。這就是金融海嘯的故事。 | ||||||
| ||||||
| 星 期六日冇英超聯球賽睇，突然間覺得晚上好得閒，若有所失o忝。英超聯水準，未必一定世界最高，例如巴塞隆拿對住任何一隊都有取勝把握，但如果叫巴塞參加英 超聯，一季踢足三十八場加各種盃賽，相信美斯一定頂唔順，體力不勝負荷。英超快上快落，緊張落力，比賽係十分好睇嘅。 雖 然話世界經濟不景，但啲富豪球會擲 錢唔眨眼，皇馬話要用超級銀彈將卡卡收歸旗下，相信成數係有嘅，足球員係講錢嘅啫，何況球會更加恨錢，意大利總理（AC米蘭班主）唔會嫌錢腥也。但皇馬買 入卡卡，皇馬搵乜嘢球員去配合呢？加多一個卡卡打唔贏巴塞o架！計左丁山話，皇馬不如搵卡卡打右中場，列貝利打左，再搵埋杜奧巴踢中鋒，配合魯爾執死雞， 後防搵埋維迪治（Vidic），咁就差唔多，四個人加埋要億幾兩億英鎊，問銀行借夠啦！ 但 如此一來，啲薪水唔識計。德勤（Deloitte）幫英超計咗條 數，指英超聯上一季嘅總收入升咗26%，去到十九億三千萬英鎊，比前季增加咗四億三千萬鎊，增幅可觀，但球員薪水支出，超過十億鎊，其中車路士有油王照 住，支薪最高達一點七二億鎊，曼聯次之，一點二一億，阿仙奴第三，一點○一三億，利物浦第四，達零點九○四億，最唔抵嗰隊肯定係紐卡素，一季支薪零點七四 六億，竟要降班，以英超第五多薪水支出，得到包尾第三名，紐卡素全隊上上下下都唔係波，而且仲要負債二點四五億鎊，降落冠軍聯賽之後，去邊度搵錢還債？紐 卡素球會正掛牌出售，中國民間啲富豪不妨諗一諗，橫掂係做蝕本生意啫，GM嘅悍馬都買得咯，買紐卡素，濕碎啦。 紐 卡素件球衣為Northern Rock賣廣告，呢間銀行在次按風暴之初，已經破產，命運不吉，連累埋紐卡素（輸波賴地硬吖嘛），曼聯件球衣有AIG，AIG周身蟻，二○一○年之後就冇 錢再玩，一○至一一球季開始，由Aon（又係保險公司）頂替，據講簽四年斥資八千萬鎊嚟贊助曼聯，正是一雞死一雞鳴，做體育贊助，回報率唔知點計算，企業 贊助商真係要計到盡嘅話，就冇資格進軍世界舞台。 | ||||||
| ||||||
| 金 管局總裁一職，由誰人接任？似乎大熱門係陳德霖，如果正式宣佈之日，人選唔係陳先生，中環銀行界會有掃唔晒咁多眼鏡碎片。民主派指曾特首用人唯親，甚至任 用家臣（不妨參考陶傑說法，「謁陵」與「家臣」都係中國人根深蒂固之帝皇思想），未免係為反對而反對，反而練乙錚教授之〈「任人唯親」的另類解讀〉一文 （《信報》六月八日），有啲意思，不妨討論吓。練教授係著名經濟學家，雖然已經唔教書，轉為《信報》總主筆，但睇佢啲文章學經濟，讀者有本有利。 練教授話 用人唯親有三類：第一，制度問題；第二，近親繁殖；第三，金管局之獨立性。佢根據第二、第三點，指出陳德霖出身金管局，非局外人，係近親。而且陳德霖現與 權力中心距離較近，或難保持獨立性，故此「陳德霖還不是理想人選。」理論上，練教授嘅推理，放諸四海而未必錯，用之以評論美國、英國、澳洲、歐盟、新加 坡、印度等等國家嘅儲備銀行主席/行長/董事總經理，一樣會通，新人上任之前，其他人猜想佢嘅獨立性、工作能力與視野，講乜都得。譬如候任人唔係陳德霖嘅 話，而係一位：北大/清華畢業，哈佛/麻省理工經濟學博士，曾在世界銀行/IMF任職十年，後在花旗/美銀/大摩/高盛之類任職十年，做到董事總經理，居 港八年，有香港身份證咁嘅人物，香港有呀，搵佢做金管局總裁，香港人是否會信任？ 民主派會否懷疑佢嘅效忠對象係北京權力核心，北京一早派嚟香港蹲點，「伺 機而動」嘅分子？呢位仁兄仁姐是否又會保持金管局獨立性？一切存疑。上網查吓：英倫銀行行長Mervyn King係經濟學家，九○年加入英倫銀行；印度儲備銀行行長Subbarao博士係公僕出身；澳洲儲備銀行主席Glenn Stevens在一九九○年加入銀行；新加坡金管局董事長Heng Swee Keat係公僕出身，做過部長，一九九七至二○○○年係李光耀辦公室首席私人秘書；美國聯儲局主席伯南克係大學教授，但做主席之前，已加入聯儲局。以上述 資料嚟睇，佢哋全部都係「局內人」，自政府或銀行內部提升，近乎近親繁殖一類，而且與政府有種種關係，獨立性成疑。講多點，佢哋全部唔係賣廣告公開環球招 聘嘅。 | ||||||
| ||||||
| 世事真奇妙，上個月搭飛機，上機之時行經商務艙去經濟艙，竟然見到賓架S好舒服咁坐喺商務艙內，於是落機後問佢攞張卡片，再通電話，一位唔見四年嘅朋友就係咁樣恢復聯絡。 賓 架S來電郵，話佢月尾會到香港一行，約去佢喜歡嘅老地方陸羽飲茶，左丁山當然一口應承。賓架S係美國人，以前在香港服務，因為在長春藤名校讀書時，讀識咗 日文，娶埋日本太太，所以喺香港銀行工作之時，已想辦法去東京打工，搵咗幾年卒之搵到，好歡喜咁與太太回歸日本，點知就係咁樣遇上了二十年起落不定嘅生 涯，甚為奇妙。 佢去到日本兩三年後，因為係美國名校畢業生，精通日文，畀人挖角入咗一八六五年創立嘅Kidder Peabody，做咗一排，公司喺一九八六年畀通用資本（GE Capital）收購重組，賓架S失業，返回美國投閒置散，點知一九九四年GE將Kidder業務賣咗畀一八八○年創立嘅Paine Webber，舊日老友搵佢去東京重操故業，做得好地地，二○○○年UBS收購Paine Webber，賓架S又試成為重組犧牲品，返美國避難一年，跟住貝爾斯登找佢去東京，嘆咗幾年之後，○八年四月貝爾斯登竟然破產，乜嘢股票認購權都冇晒， 慘情到極，當時左丁山立即寄電郵畀佢，未見回音，心裏不舒服，以為佢已經好沮喪，從此退休，但啲退休基金唔見咗好多咯噃，點算好？ 今 次再遇，方知佢又搵到一份銀行工，果真貓有九命。問佢：「點解金融海嘯之中，你仍然有運搵到水泡？」賓架S笑曰：「我讀大學唔算成績點叻，好彩學校名氣大 到極，我有大樹遮蔭，二來識埋日文，始終美資銀行係鍾意搵一位經驗豐富，通曉日文嘅美國人做事嘅，佢哋覺得自己人舒服啲吖嘛！」浮浮沉沉咁多年，賓架S已 睇到化晒，作風樸素節儉，不似一啲美國海外賓架（expatriat banker）咁豪爽豪氣。昔日香港客戶之中，佢只記得名氣最大嘅董先生。佢話董先生人情味濃，甚為念舊，佢在夏威夷灣潛水之時，董先生路經檀香山，曾經 打過電話畀佢，令佢好感動。 | ||||||
2009-06-19 AppleDaily
| ||||||
| 睇 到一段有趣新聞，為之哈哈笑。廟街素來有人擺檔替人睇相算命，吸引不少遊客幫襯。據報廟街附近甘肅街，有一位賴相師，五十二歲，據稱為賴布衣第八代傳人， 能講數種語言，生意不俗，六月十四日凌晨，有人自稱CID，要踢檔，否則要畀茶錢。於是兩人先而口角，繼而動武，驚動警察，原來呢位自稱CID係冒認嘅， 兩個人一齊被捕。賴布衣名震中國風水界七百幾年，一二三八年（南宋嘉熙二年），即宋帝昺在香港青山溺死之前四十一年，中進士，為宋理宗國師。 照計粗略地以 三十年一代計，賴布衣後人已經去到第二十五代，何解有人自稱係第八代傳人？考起。賴布衣係風水尋龍嘅祖師爺，唔知佢有冇推算到「後人」會在香港甘肅街擺檔 畀人欺凌？自爭產案成為城中話題之後，左丁山無論去到甚麼場合，都聽到有人講風水師。細路哥讀書時，老師講及唐朝大將軍郭子儀威震四方，時人有「生子當如 郭子儀」之嘆，三國時當然亦有「生子當如孫仲謀」之語。先父就話五十年代騎師冠軍郭子猷威震快活谷，港人曾有「生子當如郭子猷」之說。 到了二十一世紀的今 天，恐怕有人講生子當如風水師咯；乜唔係呀，爭產案充份顯露拜金心態，某一位「教授」擺風水陣，獲贈三億三千二百萬元，識埋身體按摩嘅風水師獲贈二十億 元，數字簡直嚇死人，乜乜醫師、建築師、會計師、賓架等等，統統行埋一面。馬主W夫人心水清，加多一句：「仲要識埋心靈按摩，讀過心理學至得！」係噃，咁 嘞，趁住金融海嘯後遺症未除，讀QFM（計量財務管理）驚住冇工做，不如在大學地理系開埋風水尋龍種穴算命學，只准心理學主修生副修，畢業後去泰國跟埋師 傅學習泰國古式按摩，返到嚟，希望十年逢一閏 ，一開單就收番兩三億元，立即退休！ 講吓笑啫，後生仔不可信以為真。潮州賓架傳來電郵，寫下二十四句打油詩，不知出於誰人之手，內有云：「此案攪到滿城 瘋，茶餘飯後談興濃，皆勸未來主人翁，學睇風水咪搵工，億萬身家輕輕鬆，何必捱到眼矇矇。」（上刪一百二十六字，唔敢抄……）想唔到潮州賓架對風水師如此 不服氣也！ | ||||||
2009-06-24 AppleDaily
| ||||||
| 美 國冇退休年齡嘅制度，有好有唔好，學術研究好多時講究「內功」，年紀越大，經驗越豐富，加上現代人身體健康，壽命延長，教書隨時可以教到七十歲以上，聽一 位榮休教授講，加拿大大學以前有退休年齡限制，於是好多叻人做到五十幾歲就南下美國，逼到加拿大大學都取消咗退休制嚟留住人才；近年英國大學鬧窮，不少名 教授橫渡大西洋去咗美國，大部份係與薪水與退休制度有關。 不過今年暑假之後，或者可以去美國搶人噃。金融海嘯令哈佛、耶魯等損失慘重，街知 巷聞，哈佛大削經費，裁員與中止一啲「不賺錢」計劃，已非新聞，史丹福大學就發行十億美元債券，以防萬一。o依家呢，根據教授L自華盛頓大學傳來電郵，加 州因為州政府財困，陷於破產邊緣，對大學經費大斬特斬，柏克萊下一個財政年度會有一億四千五百萬美元赤字，要全體教職員減薪8%之外，還會裁員加學費，取 消若干課程，甚至乎取消一啲獎助學金，令全校上下非常擔心。校長（Chancellor）Robert Birgeneau呼籲所有教授、員工、學生一同犧牲部份利益，共渡難關。香港高等教育界尚未到此情況，假如有心有力嘅話，香港啲大學向美國大學搶人才， 此其時也。 對於服務業嚟講，服務員年紀太大始終係手腳慢啲嘅，好多朋友唔願意搭美國飛機，主要原因就係食物完全唔合口味， 仲要驚埋服務員在機艙拎行李（如有需要）會力不從心──故此亞洲人始終係鍾意乘搭亞洲航空公司客機，外國人亦然。最近Skytrax選出全球最佳航空公 司，就係騎騎騎，國泰航空是也，第二名係新加坡航空，第三名係韓亞航空。國泰與新航年年爭頭二三名，由○一到○九年，國泰有三次第一，兩次第二，四次第 三；新航有三次第一，兩次第二，兩次第三，兩次三甲不入，總計差過國泰。九年之中，只有英航在2006年攞過一次第一，可見國際旅行人士一致鍾意亞洲人服 務嘅航空公司，係冇得拗嘅。Skytrax係英國公司，附屬於Inflight Research Services，係最有權威性嘅航空業調查公司，航空業信服。國泰有此成績，前幾年做Inflight Service，最近先至轉職嘅莊偉茵會最高興。 | ||||||
2009-06-26 AppleDaily
| ||||||
| 本 欄在六月十六日講「證監會要硬起來」，內裏提及：「證監會可能乘勝追擊，進入金管局監管地盤，直情要銀行向新鴻基、凱基學習，與散戶簽訂類似協議。」所謂 類似協議，就係向散戶回購雷曼迷債啦。六月二十二日，《信報》與《明報》報導中銀香港考慮以六成收回迷債，但證監會要求十足收回，於是銀行與證監談判成為 僵局。左丁山閱報後，向銀行界人士查詢，佢哋不置可否，但放出消息話，以六成價收回（長者投資者可望收回七成）本來係監管當局最初嘅意思，銀行考慮再三， 唔想拖落去，於是有意跟從，點知監管當局竟然話唔制，你哋要賠十足，且向銀行界發信，態度強硬，銀行唯有立即搵律師研究，預備與證監會打官司，呢場仗打起 嚟，對香港金融中心聲譽，定無好處；對散戶而言，呢場官司亦唔係好消息，有排都唔慌有回購。 純以投資角度講，六折收數唔算曳，滙豐股價至今未回復股價高峯 之六成呀！雷曼原來之資產究竟誰屬，喺美國仲係打緊交，啲無抵押債權人（如對冲基金）正在要控告有抵押債權人（如摩根大通），誓要取回一部份資產；美國嘅 雷曼清盤人要阻止雷曼債券信託人（滙豐美國）將啲迷債資產轉回香港；英國清盤人要阻止英國雷曼資產交畀美國清盤人，官司複雜之程度，幾乎係前所未見，要全 部解決嘅話，相信要等多三至五年。 本欄曾於六月十七日引述大馬主W之言講行山保健康，資深行山人士何伯來函有補充。何伯云；「昨天得閱貴大作『行山保健 康』編（篇），小弟有些少補充以供參考，以策萬全：──（一）要帶一枝長短適中手杖，可以撥草驅蛇，可以支撐；（二）要帶備少許繩索，以便必要時使用； （三）一定要帶火柴、哨子及電筒；（四）一定要帶一個小型急救箱；（五）如果可以，最好至少三個人一同去行山，因為：──假如有人跌傷，一個人可以留下陪 傷者，另外一人去求助；假如傷得嚴重，兩個人可抬傷者至適當地方，等待救援。」原來行山人士個背囊要裝好多嘢，懶人如左丁山見到馬主W與何伯之必需品，已 經覺得：好難行啫，孭住咁重磅。這所以人哋健康得多也。 | ||||||
2009-06-27 AppleDaily
| ||||||
| 互 聯網新聞與博客興起之後，傳統報紙流失不少讀者，年青人更係上網有空，睇報紙冇時間，任何報紙講年青化、爭取年青讀者，直情似講笑話。試問，一個不存在的 市場，如何爭取？美國有不少傳統大報（如《紐約時報》）以及名氣雜誌（如《財富》）嘅廣告頁數越來越少，《紐時》陷入財困，已不是新聞。《紐約時報》係唔 係知識分子大報？《紐時》專欄作家係唔係權威人士？《紐時》對美國政治人物與政治發展有無影響？《紐時》是否本港知識分子、知識作家嘅尊崇對象？答案只有 一個，就係Yes Yes Yes！對一啲言必英美嘅人士嚟講，《倫敦時報》與《紐約時報》與香港啲「所謂報紙」根本無從比較，差天共地。 不過批評別人寫飯局、講傳聞、嘻哈一番嘅專 欄就好容易，但讀書分子永遠係少數。大如美國，人民有三億幾，科技發達，人才輩出，讀書分子或知識分子大報原來只係「叫好不叫座」嘅，在互聯網衝擊之下， 發覺生存並不容易。相反地，美國有兩份雜誌完全不受金融海嘯衝擊，不怕互聯網競爭，就係八卦娛樂刊物 Us Weekly 與People，據報導，呢兩份雜誌視海嘯如澗水，銷路穩定，廣告增加，全美有四千幾萬人睇People，一啲都冇流失。 假如People期期都刊登克魯 明文章，或者搵讀書人寫專欄，左一句文化意識，右一句後現代，講完「結構」，又講「解構」嘅話，你估People會唔會咁暢銷呢？世界上有分工呢回事，後 現代文章有小眾市場，知識分子專欄有小眾市場，八卦飯局傳聞可能有較大市場，名人娛樂有最大市場，從銷量多寡可以知道晒。一位專欄作者選擇定位，係佢自己 之事，亦係編輯之編務方針，兩者互動，作家唔鍾意嘅話，大可不寫。但選擇咗走合乎自己性格與興趣嘅專欄定位之後，卻又批評他人專欄俗套、失落、缺乏文化， 講唔通啩？日後民俗史家研究香港二十一世紀初之商場生活與政商野史，可能覺得呢啲專欄有參考價值o忝。批評他人寫得好唔好有其道理，但批評他人所寫之題 材，就多餘得很。 | ||||||
| ||||||
| 中 午宴會，遇上賓架C，講起馬會遴選會員洪承禧，到了古稀之年，因收取金錢而推薦別人入馬會，罪成入獄兩年，不勝欷歔。賓架C識得洪先生，大家曾經談過生 意，發夢都諗唔到呢位前九倉高層竟會如此下場。賓架C話：「大家留番個錢先至步入人生冬季，咁就會好啲！」留幾多錢先至夠？賓架C話：「好難講嘅，打工仔 無論幾高級都好，最緊要理智清醒，知道自己唔係富豪，無論薪水幾優厚，在職時用慣公司錢旅行、宴客，退休後就要知慳識儉，降低一格嘞，唔通公司畀你十三萬 元坐頭等飛機來回紐約，你覺得好舒服，退休後竟然一樣坐頭等機去紐約咩？去多幾次你已經浪費成年嘅生活費！」 最怕係由儉入奢易，由奢入儉難，左丁山自己要 有兩年調整期，先至適應到離開私募基金後，出外冇商務機位坐。某年去北京，坐頭等艙，感覺非常良好，公司找數，更加過癮。o依家見吓機票價錢就已經下定决 心在經濟艙擠逼一番。賓架C講得好啱，高級打工仔若非因擁有股票認購權而得到幾千萬以至幾億元，好似霍大班咁，當然驚都未驚過，否則千萬要收歛收歛。問賓 架C：「你成日上大陸，話得吓事，有冇人願意畀你退休金，做吓富豪呀？」賓架C話：「唔怕坐監嘅話，幾乎日日都有人話送我一大筆退休金！最近有人自稱係某 市高層，知道我哋在某市向企業追債，佢叫我將筆債以二折價錢賣畀佢，由佢去收，但我行（銀行）要預支一筆活動費畀佢，銀行答應嘅話，收債成功後，佢與我私 人對分。 嘩，計吓數，筆債有二千萬，我哋早已撥備，以二折出售，收番四百萬，可列入盈利，本來有得傾嘅，但呢位仁兄要我講掂銀行預支畀佢一百萬做活動費， 實則係呃錢鬆人啫，你估我哋打開道門派錢嘅咩，睬佢都多餘！」左丁山故意問：「你有冇計過自己可以分到幾多呀？」賓架C話：「當然有，如果佢真係收番二千 萬，實賺千六萬，分一半即係八百萬元畀我，夠晒肥，但會好快在內地或本港坐監，英名盡喪，如果我要做呢啲事，使乜等到二十一世紀先至郁手？內地人搵你做呢 類事，千祈咪制，日日都有人打電話嚟銀行話有辦法搞掂乜，搞掂物o架，信一成再打五折都嫌多！」 | ||||||
2009-07-02 AppleDaily
| ||||||
| 賓 架Ｓ自東京來港會友三天，預先約好友人行山，點知碰上「浪卡」與大雨，為之興致索然。呢日與佢上陸羽飲茶，請佢一嚐在美國與日本一定冇食過咁好嘅咕嚕肉， 等佢笑番幾分鐘。傾講之下，原來呢位貓有九命嘅美國賓架，再度失業，佢去年加盟嘅外資銀行，成年唔敢做衍生工具生意，提前與佢解約，到八月尾賓架Ｓ又要搵 工咯。賓架Ｓ嘆口氣：「已一把年紀，現在銀行家聲譽又唔好，好難轉行搵工，或者喺日本教英文渡過餘年。」原來佢十年前失業之時，趁有空去咗倫敦讀咗一張 「Teaching English as a Second Language」文憑，o依家竟然有用途。又好彩佢曾經在紐約買屋，高峯時賣咗。在東京市區買咗一個六百呎樓宇單位，貨銀兩訖唔使供。兩公婆依足日本人 住細單位嘅習慣，唔憂嘅，日本人解決住的問題之後，食用好慳嘅啫。退休不可無屋，係放諸四海而皆準嘅道理。賓架Ｓ在港時，銀行租二千呎豪宅畀佢兩夫婦住， 現在就學懂能屈能伸嘅大道理。 賓架聲譽唔好，銀行證券界聲譽唔好，因受金融海嘯拖累，雷曼破產之故。雷曼旁落，搞到今日香 港中環之銀行大堂內出現大小二便問題，實在匪夷所思，賓架發噩夢都未諗過在銀行大堂內發現米田共。美國金融界未見過呢啲事，但因飽受抨擊，議員又惡，於是 美國嘅銀行證券界，包括大型嘅高盛與花旗以至中小經紀行，合力聘請咗公關公司Brunswick，月付顧問費五萬美元，又請埋民主黨籍、共和黨籍嘅民意調 查公司，而最重要嘅，就係委任兩位前財長保爾森嘅助手做統籌，一於嚟一場「帝國反擊戰」，為行業挽回聲譽，恢復正面形象。呢啲新型公關戰，可能有嘢睇，值 得香港銀行界、公關界睇到實，看看是否可以偷師，香港銀行公會唔該研究吓！今年銀行公會主席係王冬勝，身為滙豐執行董事，而美國滙豐與香港銀行公會就雷曼 迷債事件有歧見，王主席點算好？佢話銀公成立一個雷曼小組全權處置，銀行公會開會之時，議程唔會有雷曼之事，避免主席牽涉其中喎。 | ||||||