利世民：不變應萬變
1 :
GS(14)@2012-06-18 23:44:02http://www.sharpdaily.hk/article/fin/20120618/102366
落筆之時，希臘同法國選舉結果都未出，但係，大家睇報紙嘅呢一刻，應該就水落石出。我都無謂猜測太多，估中，只不過係好彩；估唔中，自己冇面之餘，又要嘥咗個欄位，何苦呢？
睇番上個月剪報，發覺原來5月底，寫咗篇《大陸幾時減息？》。唔係認叻，因為之後個禮拜，人行真係減息，我都冇即時出來「聲大大」話估中。其實睇番自己寫嘅嘢，可能當時人在美國，心態上有少少抽離，分析都幾客觀、幾滿意。坦白講，當時我真係冇諗過究竟人行幾時減息。
我唔去預測未來，係因為明知中唔中都冇意思。不過，做呢一行，真係好難唔去預測。你唔講，又有人就以為你有好嘢收埋唔同人「分享」。但係當你好認真同人解釋，點解唔去預測未來呢個哲學問題，佢哋又問：「唔通乜都唔做？」
唔係乜都唔做，但明知有可能錯，理財嘅心態，就會由一注獨贏博最大回報，變成分散風險，減少被一鋪清袋嘅機會。從呢個角度睇，今時今日世界上絕大多數人，資產都仍然太過集中。
反而被動投資者，分散風險做得更好。08年，畢菲特在股東書講過，長遠來講，被動投資者因為風險分散，長遠回報一定高過主動揀股嘅投機者。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：選舉廣告的政治經濟學
1 :
GS(14)@2012-06-23 13:07:06http://www.sharpdaily.hk/article/fin/20120622/104465
立法會選舉就快到，有財力的政治演員，紛紛在選舉期正式開始起錶計數前，擦邊球式大打形象廣告。規限，從來都係要來對付循規蹈矩的乖仔。最終贏嘅，就係不斷搵漏洞嘅人。
「完全禁止選舉廣告又得唔得呢？」暑期見習天真問。
一般大眾傳媒，應該唔會介意。反正，主流選舉廣告同疑似選舉廣告，都係戶外廣告。畢竟選舉係地域競賽，做主流大眾媒體廣告好浪費。已經在位嘅政治演員，當然希望限制挑戰者，而且個個可以企喺道德高地，講反對金權政治，不知幾好聽！暑期見習：「根本已經係金權政治！究竟點樣，先可以令選舉更加公平？」
資訊經濟學有兩條原則：一，理性無知，即係一般選民根本唔會花太多時間去了解議題，所以無論任何宣傳，都講究訊號快、狠、準。呢一點，其實廣告界發展咗成百幾年，政治演員一招半式都學唔到，真失敗。
二，越多資訊，越少理解（Abundance of information creates a deficit of attention）。疲勞轟炸之下，政治演員個個都面目模糊。最大贏家，就係希望「和諧」香港，同埋靠鐵票食糊嘅選舉機器。制度嘅設計，威力之大，由此可見一斑。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：僭建與階級鬥爭
1 :
GS(14)@2012-06-25 23:32:00http://www.sharpdaily.hk/article/fin/20120625/104963
候任特首「思歪」兩間大宅有冇僭建，唔使審啦！至於佢老哥係唔係有心僭建，就心照不宣啦！
老實講，喺香港住得獨立屋嘅，點都會有多少改動嘅，呢個老早係香港地產業公開嘅秘密啦！
當日「思歪」、涼粉營班「蠶蟲師爺」、以及西環「日月神教總壇」，搞大僭建事件，表面上攻擊唐唐誠信同政治判斷，實際上，係階級鬥爭。
共產黨憎人富貴嘅DNA，真係好難「搣得甩」。就算已經有錢、有面、住大屋，只要覺得差人家少少，譬如人家條命生得正、家山有福、又有錢過自己少少，就即刻諗到玩階級鬥爭。
玩階級鬥爭，結果去到最後，一定係「剃人頭者，人亦剃其頭」。
讀過西洋史就知，搞法國大革命最熱血份子羅伯斯庇爾（Maximilien Robespierre）講過：「法皇一定要死，因為共和國一定要生（The king must die so that the country can live）。」但係，大革命嘅最終結局，就係羅伯斯庇爾俾人未經審訊送上斷頭台。
選舉嗰時，我已經覺得奇怪。假假哋「思歪」都係住山頂獨立屋，出入有司機接送，點解班未來社會棟樑會當正佢係基層代表？故事再次教訓世人，除非真係一窮二白、露宿街頭、成世做廢青，否則，搞階級鬥爭就等於排隊等俾人挑戰。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：衰過老董
1 :
GS(14)@2012-07-03 22:08:03http://www.sharpdaily.hk/article/fin/20120703/107501
「思歪」上任第一日，就已經同當年老董最差嗰時一樣，搞到幾十萬人上街。我真係好懷疑，佢點樣可能做足呢屆任期。
有人話，思歪既然係靠西環上位，佢根本唔會理民情，佢甚至會用高壓手段整治反對聲音。
我唔敢講思歪有冇呢種能力，駕馭港式官僚，用政府機器去進行呢類政治任務。畢竟，特區成立15年，好多傳統由老董開始都已經被破壞，思歪只不過係接手完成呢個改造過程。
亦有人話，思歪雖然冇經驗，但未至於傻到會夾硬來。特區除咗怨氣多，儲備更多。可以用錢解決嘅問題，就唔係問題。再者，香港人時至今日仍然大大聲話要高度自治，就係因為香港人覺得自己經濟獨立，財政自主。
用晒儲備，香港唔靠北京，仲可以靠邊個呢？當年老董上任，第一日就講「中國好，香港更好」，之後就日日話香港同上海競爭，唔可以被邊緣化。如果話老董任內，對北京最大功勞，就係成功用Propaganda（政治宣傳），令唔少香港人真心相信，唔靠北京香港死實，所以要聽話，等阿爺派糖送禮；就算所謂嘅禮物係「阿爺出豉油，香港出雞」，我哋都要感激流涕。
思歪幫佢契哥完成呢個歷史任務，令到香港財政回歸，我覺得更加切合劇本需要囉。
利世民
利世民：前海咪又係地產！
1 :
GS(14)@2012-07-05 22:27:02http://www.sharpdaily.hk/article/fin/20120705/108506
好耐之前，內地改革開放要有「試點」，就搞經濟特區。
當年，可以一步步開放，因為工業生產，點都要有個地方，有物理上嘅配套。不過，就算今日睇番轉頭，呢種「試點式」改革開放，通常都會遇到問題，尤其係流動人口。到最後，都係經過幾十年，全國都開放，先至慢慢一齊富起來。
幾十年前，搞經濟特區，因為政治上有死硬派，仍然唔信市場。今時今日，我諗大陸都冇人會想返轉頭。所以，乜嘢深圳前海金融合作區，真係睇到我一頭煙。再講，資本呢樣嘢，無形無實體，點解要一個地方去做試點呢？
有熟悉國情高人指，前海係深圳最後一塊可以發展嘅土地。大陸同胞嘅城市規劃，乜乜金融區，永遠都係最貴嘅地皮，所以，深圳市政府，當然會條件式反射咁去諗，點樣可以成功爭取將前海「打造」成金融區。不過，前幾年，大陸中央又有指令，唔准地方政府亂咁話自己係乜乜金融區，掛羊頭賣狗肉變相搞地產。結果，前海要用金融區呢個定位，都要搞到中央祝福。
話說回頭，睇到有大陸官方媒體，話前海第日會係「新香港」，不期然我就諗：「究竟係香港會越來越似大陸，走向封閉？定係大陸越來越開明呢？」不過可以肯定，大陸地方政府學咗香港嗰套，乜都可以變成地產項目！
利世民
利世民：炒股教授
1 :
GS(14)@2012-07-07 16:00:48http://www.sharpdaily.hk/article/fin/20120706/109001
又有報道話香港有大學打本畀學生炒股，扮演基金經理過吓癮。我自己就睇到搖頭嘆息。不過，諗深一層，可能真係自己唔化。
我讀得書少。不過，我偏偏就對Efficient Market Hypothesis（EMH，有效市場假說）情有獨鍾。如果我冇搞錯，負責指導班大學生炒股嘅教授，一定係認為EMH有不足之處，有聰明人可以比市場更有效率。如果係咁，唔知呢位教授，點樣有系統咁教學生，用乜嘢方法去跑贏大市呢？Behavioral Finance（行為財務學）？
芝加哥大學Richard Thaler，都算係Behavioral Finance嘅代表人物。Thaler同拍檔Russell Fuller開咗間投資公司，搞咗兩隻以Behavioral Finance原理做投資策略嘅基金，UBGAX同UBVAX。十年來，好聽就叫做大市同步，不過扣除經理人嘅收入，投資者都要輸少少。當然，兩個創辦人就一定係最大贏家，因為2004年兩隻基金轉手賣畀JP Morgan，Fuller繼續有顧問費收入。
話說回頭，人家搞行為財務學，專門揀市值細、流通量低嘅股票。偏偏香港嘅炒股教授，就要學生賭大藍籌。大藍籌市場資訊已經咁充足，究竟炒股教授，點解覺得自己叻到可以賭大藍籌會跑贏大市？香港炒股教授如果有咁嘅能耐，教書真係有些少浪費囉！
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：減息無助增長
1 :
GS(14)@2012-07-10 00:22:31http://www.sharpdaily.hk/article/fin/20120709/109431
上周人行不對稱減息。大陸官媒引述「專家」稱：「齊讚利率走向市場。」就連LIBOR（倫敦銀行同業拆息）都爆醜聞，明眼人一睇就知，全球金融業越來越扭曲，同市場距離越來越遠。大陸官媒淨係識跟指定線路，之前講好話利率要市場化，人行每次做嘢就條件反射式話「走向市場化」。今次就算唔係有預謀同歐洲央行夾埋，都係預期人家會做嘢。有人話，人行同歐央行一齊減息，顯示G20有決心處理問題。減息就係有決心？原來o依家央行行長嘅水平，竟同未來社會棟樑差唔多，「肯搵份工都算上進」。
經濟問題，如單靠寬鬆政策可解決得到，呢個世界就太簡單，可惜真正問題非出在流動性不足。其實寬鬆政策去到呢個地步，係變相逼人買資產投機，但之後又點算？
當前世界經濟問題係增長不足！歷史話畀我哋知，資產價格泡沫，對增長幫助唔大。只有當經濟裏面創造價值嘅成份增加，就業先會改善，其他問題亦迎刃而解。就連我個七歲嘅女都識講：Growth isn't only about getting bigger. We become stronger and more complex too.（增長唔只係變得大，仲係變得更強同更複雜）。
市場係乜，唔通央行行長、分析師真係唔明？
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
2 :
鱷不群(1248)@2012-07-10 00:36:29民企借不到錢要搵大耳窿，點減息都不會有用
3 :
GS(14)@2012-07-10 00:53:552樓提及
民企借不到錢要搵大耳窿，點減息都不會有用
根本唔會放水啦
利世民：減幾多次息先夠皮？
1 :
GS(14)@2012-07-10 23:32:12http://www.sharpdaily.hk/article/fin/20120710/110025
最新公佈數字，大陸CPI創29個月新低，得番2.2%，PPI更是負2.1%。上星期，人行忽然不對稱減息，有讀者問：「乜唔係要打擊通脹咩？」恐怕，唔需要我多解釋，其實所謂通脹問題，其實已經唔再係重點。當然，大前提係，你相信呢啲所謂嘅經濟數字。
我又唔係話物價統計一成真都冇。之不過，由於我自己一直對大陸經濟都比較悲觀，所以任何負面數據，我更加會持平一點。
「咁，通脹回落算係好事，定係壞事先？」可能，你會問。呢個係好問題。物價穩定，當然係好事。可惜，傳統上，衰退同通縮都混為一談，好多人都認為兩件事永遠一齊出現。衰退當然係唔好啦。
「2.2%，美國CPI都差唔多，未算衰退啫？」可能，你又會問。當然，又要問吓，究竟你信唔信美國嘅數字。By the way，近來原油價跌，燃料能源價一樣跌得急，有理由相信，好快美國CPI都會跌。再者，美國經濟結構有個死結叫樓價，如唔計住屋價格，CPI數字一樣可以好難睇。
講番大陸。o依家最弔詭嘅係CPI跌，反而樓市好似有啲起色。除咗話好多人唔信大陸政府真係做低樓市，更重要原因，應該係好多人預期存款利率會跌得更急。究竟，要減幾多次息先夠皮？
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：被動式分散儲蓄
1 :
GS(14)@2012-07-12 22:10:49http://www.sharpdaily.hk/article/fin/20120712/111086
平日返中環一定揀非繁忙時間。上晝八點出門，返到中環接近八點十；但九點半先出發，未到十點前都可能返到。咁大分別，因好多事情嘅關係，其實係非線性（Non-linear）。
不過我哋一般唔會用非線性思維分析現象，最佳例子就係通脹、股價嘅問題。如好多人覺得幾個巴仙嘅通脹好小事，但有研究貨幣史嘅人都知，一隻貨幣由幾個巴仙通脹，去到通脹預期不受控，甚至崩潰，可發生得好快。當年德國威瑪共和1918年話馬克含金量高過美金，1920年仲試過有幾個月通脹衝上10%之後回落，1921年仍然平穩，1922年通脹由雙位數字百分比升到四個位。1923年德國馬克價值，只剩番1918年時嘅1萬億分之一。由風平浪靜到完全崩潰，只有5年。
股價都一樣。好多時，股價可以好耐都冇動靜；一有反應就倍倍聲咁上落，呢個仍係好多人死守一隻股嘅原因。如果真係明白呢個道理，就知最佳投機策略係細細注，分散投資，不過真係要有番啲功夫。今個月我哋讀書會揀咗Larry E. Swedroe的《The Quest for Alpha》討論被動式分散儲蓄，有興趣可email聯絡。另Nassim Taleb將會11月推出新書《Antifragile》，講點樣從Non-linear獲利，本書一出，即同大家分享。
利世民
利世民：四舊水零用怪招新聞
1 :
GS(14)@2012-07-14 15:40:17http://www.sharpdaily.hk/article/fin/20120713/111567
噚日有份報紙，頭版頭條寫：「每月零用400，學生易抑鬱」。報道話，香港五成七學生有不同程度抑鬱，有四分一屬於嚴重嗰隻。做呢個調查嘅組織，叫做再生會，報道入面被訪問嘅有精神科醫生、藥劑師同臨床心理學家。
今日我教大家睇報紙。一，無端端有調查統計，唔使審，背後梗有目的；二，睇被訪者嘅身份，大概都估到背後乜嘢人做「新聞」。
話說好多年之前，我未加入傳媒，正職係公關。當時我好多客仔，例如藥廠，都係冇得賣廣告。冇得賣廣告，就要諗方法見報。結果有人發現，原來新聞界好鍾意統計數字。
結果，過去十幾年，香港就多咗好多統計。老實講，雖然我明白大家都好無奈。不過，客觀事實係，大家都睇到麻木晒。從一個前公關顧問，又係傳媒人，我會呼籲各位：回頭是岸，真正嘅公關同新聞，唔係咁樣做㗎！
另一方面，政府都開明啲啦！本來，唔准賣醫藥廣告，係怕消費者收到錯誤訊息。不過，禁止言論自由，錯誤訊息更加嚴重。
外國容許醫藥廣告，只要聲明得清清楚楚，一般消費者對健康醫療訊息都可以掌握得好好。再者有互聯網，香港唔畀賣廣告，你估我哋唔識Google咩！
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
Next Page