利世民：被動式分散儲蓄
1 :
GS(14)@2012-07-12 22:10:49http://www.sharpdaily.hk/article/fin/20120712/111086
平日返中環一定揀非繁忙時間。上晝八點出門，返到中環接近八點十；但九點半先出發，未到十點前都可能返到。咁大分別，因好多事情嘅關係，其實係非線性（Non-linear）。
不過我哋一般唔會用非線性思維分析現象，最佳例子就係通脹、股價嘅問題。如好多人覺得幾個巴仙嘅通脹好小事，但有研究貨幣史嘅人都知，一隻貨幣由幾個巴仙通脹，去到通脹預期不受控，甚至崩潰，可發生得好快。當年德國威瑪共和1918年話馬克含金量高過美金，1920年仲試過有幾個月通脹衝上10%之後回落，1921年仍然平穩，1922年通脹由雙位數字百分比升到四個位。1923年德國馬克價值，只剩番1918年時嘅1萬億分之一。由風平浪靜到完全崩潰，只有5年。
股價都一樣。好多時，股價可以好耐都冇動靜；一有反應就倍倍聲咁上落，呢個仍係好多人死守一隻股嘅原因。如果真係明白呢個道理，就知最佳投機策略係細細注，分散投資，不過真係要有番啲功夫。今個月我哋讀書會揀咗Larry E. Swedroe的《The Quest for Alpha》討論被動式分散儲蓄，有興趣可email聯絡。另Nassim Taleb將會11月推出新書《Antifragile》，講點樣從Non-linear獲利，本書一出，即同大家分享。
利世民