📖 ZKIZ Archives

笑到最後：TSA與香港股神

1 : GS(14)@2017-02-06 07:25:47

過年之前，高明同基金經理溫鋼城兄食飯，溫兄問咗個問題：點解咁多人靠買樓發達，但係咁少人靠買股票發達？直接啲問就係點解香港冇股神？全世界先進嘅金融中心，總有幾個有代表性嘅投資者，美國由畢菲特、索羅斯，數落去多十隻手指都未必數得晒；其他地方亦有「歐洲股神」Anthony Bolton、德國股神André Kostolany，日本以前有邱永漢，現時有B·N·F。但係香港又真係講唔出邊個代表人物。香港的確有好多人靠股票發達，但就唔係透過買賣，而係提供服務，包括印股票、放貸、買賣殼，以上生意同炒股係完全兩回事。答番條問題，高明大概記得，喺餐飯入面答香港樓市已被證實同美國息口關係較敏感，利率下降樓價會升，有類似美股嗰種彈力，反而港股冇咁嘅升值能力，所以即使有人喺港股度賺到錢，都會買兩嚿磚頭保值，個個有錢都搬錢走，股市好難大升，塘水滾塘魚亦都難搵食。不過，以上解釋都仲係好表面。直至高明睇新聞見到教育局局長吳克儉，因為TSA不得民心，所以將評估改名做BCA，繼續要小朋友操練有標準答案嘅練習，本報報道仲話好多家長係fans，就知香港人自細被訓練只可以做睇得到結果嘅嘢，亦都係香港出唔到股神嘅原因。從事投資，就好似以前出海搵新大陸咁，即使你有齊裝備，都未必搵到大陸，但有時又會符碌發現新大陸，冇標準答案話一定有結果。港式考試則相反，先有結果，之後小朋友再操練，呢種方法訓練出嚟嘅思維，就係只做計算到嘅事，股票市場上印股票「車出街」、有抵押放貸等等，全部都計得到回報，所以香港不乏呢方面嘅精英。至於買樓，樓價升跌同樣都不屬計算得到，但起樓賣出去有數得計，散戶買二手樓收租亦有得計，好多香港樓民買樓只計租金回報，樓價升當送，個市逼你發達。炒賣股票並冇一條好明顯嘅回報數字，即使有市盈率之類，隻股唔升都吹佢唔脹。有呢種思維打底，贏錢都會提走，個市永遠唔會旺。接受過港式教育嘅人，都好難做到股神。高明
http://www.fb.com/bigricetea本欄逢周一刊出




來源: http://hk.apple.nextmedia.com/financeestate/art/20170206/19918887
PermaLink: https://articles.zkiz.com/?id=325623

千嬅避TSA帶仔考國際學校

1 : GS(14)@2017-03-03 00:59:49

■楊千嬅同丁子高（右）陪囝囝考國際學校，表現好緊張。讀者提供圖片



【爆相爆片】虎媽楊千嬅嘅囝囝Torres已經4歲大，上月千嬅生日時，已經話最大願望係囝囝考到好嘅小學。日前千嬅同老公丁子高就帶咗Torres去加拿大國際學校面試，被讀者方小姐透過「爆相爆片」分享，方小姐喺電話表示：「千嬅同老公好留心聽校長講話，我見到千嬅個袋都放滿學校資料，之前應該備足課。」



■Torres似乎好有信心，面試完出嚟即攬住媽咪千嬅。

考完攬實媽咪

不過喺等候囝囝面試出嚟期間，見到千嬅個樣一面凝重，似乎心情都好緊張，而丁子高就戴咗副有框眼鏡，畀人穩重爸爸嘅感覺，佢哋又不時撳手機打發時間。方小姐話：「Torres面完試出嚟，仲同老師give me five，跟住就走去千嬅面前，攬實媽咪，千嬅見Torres個樣咁有信心，佢都笑得好開心。」由於Torres係龍年出世撞正嬰兒潮，要同好多學童爭學位，Torres讀緊K1時，千嬅已講明工作全部要坐歪，直到有心儀小學收Torres為止。雖然丁子高希望囝囝讀傳統學校，不過據知千嬅希望囝囝有愉快學校生活，唔想有類似TSA嘅壓力同麻木操練，最後兩公婆得到共識，為囝囝選擇最合適學校。




來源: http://hk.apple.nextmedia.com/entertainment/art/20170302/19944134
PermaLink: https://articles.zkiz.com/?id=327455
Next Page
ZKIZ Archives @ 2019