📖 ZKIZ Archives

去年暑假，「自拍照相館」彈起。但話咁快，這類「自拍照相館」已開到一街都係。要突圍，最新玩法是搞「3D」。上週，「香港3D奇幻世界」博物館在尖東開業，聲稱投資近千萬，銳意成為香港第一間。

記者發現，原來於一個月前，蕭頌妍（Joey）及鄧嘉琪，兩個只有二十三歲的本屆大學畢業生，早已在觀塘工廈開設「放鬆一下3D相館」，搶了頭啖湯！投資額還只是六十萬元。兩人畢業後不想打工，又零積蓄，於是各自問家人籌旗開業。不論地點、裝修佈置及客路，都「將將就就」，猶如山寨版。但由於收費平，上個星期平日都有八十個客人，「我哋相信下個月開始會收支平衡！」

記者早前在韓國旅行，已玩過這類3D錯覺攝影館，顧名思義，就是在一幅有立體圖案的畫布前拍照，如在海洋世界的畫布上，扮與海龜玩遊戲；在意大利威尼斯運河中，浪漫撐艇。早前一間3D錯覺攝影館在尖東開業，聲稱投資千萬，更被指是全港第一家。記者即時上網搜索行情，發現原來在觀塘鴻圖道附近工廈，早已開有一間。記者往上址查看，這間3D照相館位於頂樓，搭升降機還要再行上一層樓梯方可到達。一打開門，感覺是──「好鬼山寨呀！」

三千呎的館內，各幅牆上掛了不同的錯覺立體畫，共三十幅，包括張開口欲把人吞噬的鯊魚、過山車、拿著刀要殺敵的忍者等。雖然略有立體效果，但畫風欠細緻，印刷質素較差，容易「穿崩」。窗戶以油紙遮蔽、裝潢簡單、燈光蒼白，但都無損客人雅興。原因是，這裡入場費只需八十九元，比對手平近一半﹗客人付費後，便可以自備的攝影機任影兩小時，場內還有腳架及各種小道具提供。剛前來拍照的中二生Krystal，上來的原因與記者一樣：「我喺YouTube，見有YouTuber（專拍片放上網，並收取廣告費）介紹尖東3D相館，但原來收得幾貴，於是上網搵其他3D相館，搵到呢間。雖然無咁靚，但都好似韓國嗰啲。」

借六十萬開檔

這間山寨版照相館，老闆Joey和嘉琪，都是今屆大學畢業生。她們年紀輕輕，坦言整間照相館，投資額只需六十萬。不過對於兩人來說，未打過工，六十萬也要和家人借。二人的父母亦只是普通打工仔，幾十萬絕非小數目，但依然很快便答應借錢。嘉琪說：「我無同阿媽講，只敢同阿爸講，佢都唔明咩係3D相館。我俾啲相佢睇，解釋俾佢知好受歡迎，年輕人去外地都鍾意搵自拍館影相，第二日佢已經決定支持我！」而Joey則笑言自己是先斬後奏，「同阿媽講過，佢見我無下文，以為我講嚇啫。直至我去睇鋪聯絡畫廠，落埋訂再同佢講，佢嚇咗一跳。但見我咁認真，所以好支持。」嘉琪則補充說：「我阿爸覺得讀完書唔一定要打工，可以破格做嚇其他嘢，仲叫我勇啲！」嘉琪和Joey讀的是海外大學辦的旅遊系銜接學位（Top Up Degree），曾到旅行社實習，「老師介紹嘅工都係旅行社、機場，需要輪班、公式化工作。起薪點只有七、八千元，所以一直諗緊其他出路。」他們諗過開自拍照相館，只是開業成本高，競爭又大。嘉琪說：「我去韓國玩完3D錯覺攝影館，發覺香港無就想開啦！」 二人開業成本有限，唯有樣樣慳得就慳。地點選擇觀塘工廠區，但由於年紀小，開始時少不免碰釘，「行入去地產鋪，個個經紀都以為我哋混吉，抬起頭望一望就算，Hello都無句，好在最後都有一個好人阿姨幫我哋。」Joey說。行了十多個盤，找到了現址覺得合心水，但業主亦因為二人「小朋友」而卻步，「業主怕我哋無錢交租，好在個經紀阿姨幫我哋落嘴頭，成功說服業主。」

畫布損耗高

這盤生意最大的投資就是立體畫布，質素高的立體畫布，講求設計，部分更會人手畫，增加立體感。記者參觀過千萬投資的照相館，人家除了如韓國一樣有海洋、有風景，更有啟德舊機場及皇后碼頭景，充滿本土風味。而Joey及嘉琪卻只能將貨就價，Joey說：「朋友搭路，介紹我哋去上海一間畫室。我哋兩個帶住floor plan同佢哋逐張傾，太細張無立體感，太大張又放唔落。」兩人最終以「友情價」，揀選了平均每張約五千元的印刷畫布，花了十六萬元，唯有在其他地方再慳一點，「搬畫掛畫都自己做。當初搬第一卷畫覺得好重，但搬得多已無曬感覺。買個暖水壺，我哋都格價格咗三條街，最後行返去第一間買，慳咗廿幾蚊。」嘉琪即搶著道：「慳咗三十蚊啊！」她繼續說：「而家唔食晏，等下午茶餐先食，以前邊會咁。」記者瞄到嘉琪擱在桌上、應是之前買下的Prada手袋，確信她以前真的不會這樣慳儉。他們為了不讓客人弄污畫布，聲明要照價賠償，也要求客人踏上畫布前先脫掉鞋子。但由於客人人數多，記者見即使客人已脫了鞋，腳板一樣「污糟」，當一腳踏上畫布，Joey及嘉琪見狀，心裡乾著急，「小小瑕疵，但影相出嚟唔太覺。」由於畫布昂貴，她們亦不可以短期內更換，但為了保持照相館的新鮮感，都以此為目標，「希望四個月可以換到一批。」他們問家人借的六十萬當中，已保留十萬元作流動資金。

開業資料

（6/14）租金*：$160,000裝修：$160,000畫布及道具：$160,000宣傳：$20,000流動資金：$100,000總成本：$600,000*三按一上

營運資料

（6/14）營業額：$50,000租金：$40,000水電：$6,000器材：$4,000雜費：$5,000蝕：$5,000

千萬3D照相館：好失望!

記者和「香港3D奇幻世界」的老闆Zac見面，劈頭第一句，他便澄清指與嘉琪及Joey的「放鬆一下3D相館」不同，不可相提並論，「我哋咁大規模係博物館，佢哋只係照相館。」而他強調，兩者的畫亦有很大分別，「佢哋啲畫係印出嚟，大陸好易買到，好易撞款。我哋啲畫係自己設計，有本地元素，再交俾畫家人手畫。我哋一幅畫要畫三個月，成本比印出嚟嘅貴幾十到一百倍。」Zac自言未曾到過「放鬆一下」，但他指看過照片已知對方有什麼立體畫，並說：「好失望，香港人應該有自己嘅創意，喺其他地方都見曬你嘅畫，仲有咩意思？香港人嘅眼睛係雪亮，會分得出邊個有心機搞。競爭預咗有，最好大家都俾到驚喜客人。如果無心機搞，好似上年密室逃脫咁良莠不齊，盞令客人感覺唔好！」對於被Zac指無心機搞，嘉琪和Joey指無所謂，最緊要客人玩得開心，「如果能力可以，我哋都想揀靚啲嘅畫，奈何成本太高，唯有慢慢嚟。我哋入貨時都見過佢哋啲畫款，不過我哋無揀到之嘛。我哋平啲，又有自拍館元素，總之各有各做！」嘉琪說。

主打學生客

地點和佈置不如人，因此在收費上要比人平，以保持競爭力。Joey和嘉琪指，她們希望主打消費力有限的學生，早已和十多個學生會聯絡，提供優惠，借學生會網絡在校內宣傳。她們聽過學生們反映，希望鋪頭增加自拍照相館元素，因此上月花了四千元，買入一部自拍佈景機。其他自拍照相館會提供相機，但由於不想再花錢買相機，因此只提供腳架，相機則客人自備，「希望之後可再加多部自拍佈景機﹗」嘉琪說。記者所見，新加的自拍佈景非常受歡迎，久不久會出現輪候的人龍。 她們誤打誤撞，成為全港第一間立體自拍照相館。不過，月初資金豐厚的對手開業；對於有競爭者進入市場，她們反而開心，「當初係有啲驚，但後尾諗落，佢哋係做遊客生意，我哋係做本地人生意。有個『大佬』仲好，令其他想開番間嘅同行卻步，一陣好似自拍館咁開到成行成市仲弊。而且竟然有好多人打嚟問我哋，係咪貴嗰間嘅分店。唔少客覺得佢哋貴，轉而幫襯我。」嘉琪說。開業首月，扣除二人飯錢等雜費，相館差五千元才收支平衡。對方開業後，生意反而比上月好，由試過整天無客，到變成平均每日有四十個客。「只要每日有廿個客就可以收支平衡，尋日（上週四）有八十個客。」Joey興奮地說。假如保持到這個成績，營業額每月可達二十多萬元。由於用的是家人積蓄，她們自言有壓力，故一有錢賺，便會還債，「上月試過全日無客，返到屋企，阿媽純粹問嚇今日有幾多個客，唔係叫我還錢，我已經覺得好大壓力。」她們指家人有心理準備血本無歸，「仲同我哋講無咗三十萬唔會有即時壓力，叫我放心做。但我哋想講，就算有一日真係做唔住，都會出嚟打工還錢俾屋企。」