📖 ZKIZ Archives

德州撲克（Texas Poker）流行已久，這陣風近年吹至香港，瘋魔一眾銀行界及財經人。遊戲的樂趣是這樣的：由坐下來開始，對手每一次落注，注碼大小、速度，都是和對方的 一次對話、一個攻心的計算。要贏出比賽，講求技巧和心理質素，與Banker做「刁」如出一轍。前天行國際（993）執行董事兼基金公司老闆蔡朝暉 （Stanley），十三歲已開始賭啤。本月初他參加一場於澳門舉行的全亞洲最大型德州撲克賽，第一次參賽，即擊敗七十二名對手，贏得五千萬元獎金！在 「啤界」一夜成名。「最大經驗，係你要守到留番條命，先有得玩到尾。」Stanley夾著雪茄，和大家分享他的贏牌秘訣。

這場「慈善啤王大賽」，在澳門星際娛樂場舉行，七十三個參賽者分組廝殺，「馬拉松式」玩足十四個鐘，淘汰到只剩最後一個。最終成為「王 者」，Stanley興奮得三十個鐘無瞓，再馬不停蹄飛了一轉北京，一轉上海，與牌友慶祝。前週回港後，他又在會展廣場的Faces包場慶功。這天他穿起 一條繡滿啤牌的牛仔褲，手持一杯香檳滿場飛，還搞了場大抽獎，送出二十萬獎金。十時半開始慶功，不到十二時，他已醉醺醺，「贏咗世界冠軍喎，無諗過，真係 好興奮！」

「一次出牌一次對話」

以往這類比賽，都是舉行七日七夜的，每天如返工般賭完休息瞓覺；今次玩一氣呵成，正好有利於Stanley，「我成日蒲蘭桂坊，晚晚三、四點先瞓，可以應 付到。」體力過關，玩啤還要講技術、心理。他說，以往試過手持一pair K，一pair A等靚牌，以為贏硬就曬冷搏到盡，「無計到人哋一樣可以係大牌，對方揸『夫擄』或『同花順』，你就一鋪玩完！」揸住大牌、意氣風發的時候，Stanley 認為往往會輸得最慘，「股市幾時死最多人？咪就係三萬二千點，個個楂住股票唔放嘅時候。」他認為，爛賭心雄的多數都會輸，「呢類人，唔識風險管理，心存僥 倖，揸住『卡窿』蛇都搏，但其實少過百分之十機會博到。」他教路，「除咗睇自己兩隻牌，要計埋對方揸嗰兩隻係咩牌。人哋手牌好過你，你幾好嘅牌都要掉。有 時，守住本金，放棄都係贏嘅一種。」那對方底牌是什麼，怎樣計？「對方每次出籌碼，都係一次對話，佢raise定唔raise，跟定唔跟呢？愈玩得多會愈 有sense（感覺）。」比賽當晚，頭七、八個鐘，他死守十萬元本錢，最差時玩到只剩三萬多，唯有 「偷雞」（bluffing），「有一鋪自己手牌好弱，但我表面好有信心不斷加注，希望嚇到對手棄權；然而對方係世界冠軍，可能睇穿我，亦可能佢手牌唔 錯，總之佢木無表情一路跟注，我如果再落多注就無曬錢。」Stanley這次心理戰失敗唯有棄牌。最後守到一個機會，他反守為攻，「俾我抽到一手 『pair六』，sense到對方無牌，即刻all in（曬冷）。」

「贏要無人性」

玩牌講計算，Stanley選擇玩德州撲克，亦如是。他看賭業股年報，發現老虎機贏面得二成三、廿一點得一成八，百家樂最低，只有約百分之二至三，所以一 直以來只鍾情德州撲克，「通常莊家贏曬，贏面咁低，點解要玩？Poker則賭場唔做莊，只抽水。」而這場比賽，入場費要二百萬元，但彩池有一億四千萬港 元，按名次分配獎金，只要能進身頭十二名就有獎金，對Stanley來說亦是值博率超高。十三、四歲，Stanley已與街坊玩話事啤，第一次接觸德州撲 克是五年前，平日一星期玩一次，都是朋友間切磋。參加比賽，亦是因朋友一席話：「世界冠軍，手頭咪又得兩隻牌，唔通叻嘅有三隻咩！」Stanley操啤三 十年，技術亦無可置疑，但人終歸是人，沒有絕對的理性，「專業嘅賭徒，係無論之前鋪牌係點，都唔可以諗番轉頭。」但理論歸理論，其中一鋪牌，他拿起手後決 定棄牌，誰知連同枱面的「公共牌」，原來可得「夫擄」，他往後半小時都有點心不在焉，「咁我都係人，呢啲係人性，唯有定一定神，叫自己快啲忘記。」他不諱 言，「有技術，有EQ，但又唔可以無運氣。」他憶說當晚本來運氣麻麻，於中場小息去廁所小解。完事後，他心血來潮，跟友人說：「如果今晚真係贏到冠軍，獎 金十分一捐咗去。」說完這番話，「氣場」果然有變，賽至最後一局，他單挑世界冠軍。Stanley得一對「啤十」後曬冷，對手照跟，揭出只得「啤六」，他 因而獲勝，他自嘲說：「今次真係盲拳打死老師傅！」事後他兌現承諾，捐出五百萬元到大自然保護協會。

「最緊要識守」

Stanley認為，玩Poker與投資同樣講求風險管理及值博率；不過最相似的，還包括那種「蠱惑」。手揸強牌，玩家會在頭兩輪下注時讓牌或只跟注，令 對手以為你底牌一般；又或者明明手揸弱牌，卻以進取姿態下注及加注，目的是誤導對手，令對方知難而退。一○年，一直低調的Stanley，忽然高調夥拍內 地快餐連鎖店真功夫老闆蔡達標，入標爭奪已宣佈清盤的內地食品供應商福記（1175）。當時他向傳媒宣佈，或用高達十億元收購，但其實他只以五億元入標， 「因為當時好多大陸佬，有無實力都話有興趣；講大啲，可嚇走部分買家。」但財團最後輸給安徽海螺創投，人家出六點六億元代價，他說：「無辦法啦，對方真係 太有錢。」Stanley屬白手興家，小時候住石塘咀均益大廈，父親是典型散戶，天天坐在證券行炒股，「不過佢手頭嘅都係佳寧、海外信託等股票，真係買乜 輸乜，搞到屋企好唔開心，令我知咩叫風險管理。」十六歲那年，他到證券行打暑期工，幫人送股票。接觸得多，十七歲就到新鴻基證券開戶口，炒的是外匯及期 權，儲到錢再去美國升學。九六年回港後曾在新鴻基證券打工，幾年後他與朋友成立公司代理美國食品，失敗後又重做證券。○三年他購入屬證券行A組的聯合證券 （Head & Shoulders），○七年以一億元代價賣予當時由張德熙打骰的上市公司天行國際，併入局當董事，一○年他以三千萬元購回部分業務，一來一回贏個開。已 婚並育有一子一女的他，去年中以一億元沽出壽山村道朗松居獨立屋，又賺了六千萬。他辦公室枱頭有一個相架，相架掛的是一張百富勤股票，當年他一鋪過買入五 百萬元的百富勤股票，怎料百富勤倒閉，留下來的已變成一疊廢紙。失敗的經歷，再一次教曉他：「守住條命才有得玩。」

Texas Poker玩法

基本概念形式與話事啤（Show Hand）相似，但話事啤是每名玩家獲派五張牌，而Texas Poker則是每名玩家獲派兩張底牌，其後枱面會派五張「公共牌」。玩家把手上兩張底牌和枱上五張「公共牌」組合，能將五張牌組合成最強者便獲勝。如「同 花順」贏「夫擄」，「夫擄」大過「蛇」。玩法第一輪●所有玩家獲派兩張牌，每局由其中一名玩家任「大盲注」（Big Blind），這玩家必須要下注，另有一個「小盲注」（Small Blind），該名玩家亦必須下注，注碼為「Big Blind」的一半。第二及第三輪●所有玩家看過底牌，選擇跟注、棄牌或加注後，枱面會先派發三張「公共牌」。先由第一位玩家決定如何下注，再輪流由其他 玩家決定下注與否，第三圈派第四張公共牌，亦輪流決定棄牌、跟或加注。如何出注就看玩家技術、心理及如何猜測對方牌路。最後一輪●派發最後一張公共牌。仍 參與的玩家要以手上的兩張底牌和出面五張公共牌的任何三張，組合出最強的五張牌便獲勝。

強積金——回報低，收費高，有「強迫金」、「強姦金」之稱，一眾被「㩒住搶」的打工仔，只有滿腔憤怒。因無黨派而被稱為「四散人」（另三人為林大輝、梁家騮及謝偉銓）之一的立法會保險界議員陳健波，認為與其閉翳，不如諗計。原來他私底下精於玩強積金，七年間累積增長三成，高過平均數一倍，人人請教，但他作風低調，從不肯教人，最怕輸了被人找晦氣，「你自己研究完，輸咗無得怨嘛！」他最近終向本刊透露他的MPF秘笈。陳健波簡介

學歷：伍華書院預科畢業英國特許保險學會會士及特許承保人2009年至今：慕尼黑再保險中國顧問委員會理事2008年至今：立法會功能組別（保險界）議員2005年：慕尼黑再保險香港分公司行政總裁1999年：恆生銀行助理總經理兼保險業務主管恆生保險董事兼總經理1995年：恆生人壽保險董事1993年：恆生保險副總經理1974年：恆生練習生

○八年當上立法會議員之前，陳健波在恆生保險部工作了三十多年，他看準人壽保險發展空間大，九五年主動提出向滙豐購入經營牌照，短短十年間，人壽保險營業額由最初的三千萬變成十三億，他亦如坐直升機般，由副主任升至銀行助理總經理；二千年他再為恆生成立強積金部門，今日已成為業內五大龍頭之一。○五年他轉投全球最大的再保險公司慕尼黑，成為該行首個華人行政總裁，並首次為自己的強積金供款。不過他當時嫌麻煩，將所有供款隨便放入一個定息基金，從未打理，到○九年辭職專注做議員時，才發現不妙，「四年間先得百分之七增長，即係一年得百分之一點九，通脹都追唔上，你話係咪㷫過炭！」自此，他的起心肝鑽研。

專攻港股基金

弔詭的是，他竟然無揀自己創辦的恆生強積金，逢人問陳健波轉邊間好，他一定答細公司永明，並且將三個助理的強積金轉投其下。「我無利益衝突o架！揀基金好睇主持人，佢（永明）嘅基金經理好出名，好多年都被選為基金之星，所以佢隻港股基金，差唔多係全港跑得最好嗰隻！」該基金由有「長勝將軍」之稱的首域大中華投資總監劉國傑打骰，去年增長約百分之二十一，雖然表現並非最標青，但成立十二年來，累積回報超過三倍，遠遠拋離同行。「其實強積金來來去去咪又係六種組合（股票、債券、混合、保證、貨幣市場『即定息基金』及指數），保證、貨幣市場基金一定輸通脹，債券基金遇美國加息又會跌價，一定係股票基金先有高回報。」和大部分香港人「唔熟唔食」的心態一樣，他獨沽一味只揀港股基金，其他地區免問；看好股市時，他將所有錢專攻港股基金，風高浪急時，就將錢泊入定息基金避避風頭。

最壞往往最好

「睇市主要睇息口變化，一○年底股市升到二萬三、四千點，牛皮咗成幾個月都升唔上，之後中國加息，內銀股可能受拖累，我手上八成五都係股票，當然好小心。」結果他在上半年分三次減持股票，成功在前年底歐債危機惡化、港股跌至全年低位一萬六千點前散貨。所謂力不到不為財，買了好的基金也非一勞永逸。自知股市猶如鱷魚潭，陳健波日日睇住市，幾乎每隔三、四個月就將強積金轉倉一次，每次在港股及定息基金間調配比例，「通常第二日就轉到，無乜時間風險。」到去年一月，他見股價低殘但股息至少四、五釐，又開始小試牛刀入市；到五月希臘大選失敗，「脫歐」之聲不絕，港股一個月內大跌三千點，但陳健波最淡定，一個月內三次大執平貨，增加強積金中的港股基金比例，「當時個個都唱會繼續跌，之後真係跌一浸，但你永遠無可能捉到最低點，見佢比較低就好買！」當時長實（1）跌穿九十元至全年低位，市盈率只得四點四倍，工行招行亦是七、八倍，「最壞嘅時候就是最好嘅時候，個個都驚我仲定添，當時都唔想睇報紙，費事影響自己判斷。」

唔識揀選指數基金

訪問中，陳健波常掛在口邊的一句是：「買股票唔係咁容易學，個市日日變，我個腦不斷轉，睇住事態發展，成日改變主意，朝早同夜晚諗嘅可以完全唔同。」他建議完全不熟股票的打工仔，不如揀指數基金，「畢竟長期跑贏大市嘅股票基金唔多，而指數已消化了股票表現、成交量，好的股票納入成分股，唔好的踢走；好似恆指有咁多隻成分股，就算有一、兩隻週期性跌，你都唔會好傷！」由於指數基金只須跟貼所掛鈎的指數，毋須投資經理管理，所以營運成本較低，收費一般為百分之一，較強積金平均收費的百分之一點七四便宜，「以前投資股票每年有一成回報，而家要現實啲，一年有百分之六、七已經好好，所以啲收費慳得就慳！」恆指去年七月谷底反彈後，一直氣勢如虹，他看好今年大市愈升愈有，暗示港股基金有運行，「今年上半年我都睇好個市，而家息咁低，又無得炒樓，仲有咩炒？」

低息環境至少持續兩年，借貸成本驟降，除了有利投資環境，更為不少香港人提供創業資本，脫離打工仔行列，幹一番事業。港人熱衷創業，其中「飲食」、「網絡生意」及「服裝」三大行業，都是一眾生力軍的首選，貪其易入行兼客源大。但是，做生意和投資一樣，陷阱多多，稍不留神即一鋪清袋。本刊找來專家和過來人教路，拆解行業守則及竅門，為創業者準備一支「盲公竹」。創業入門秘笈出牌最易撞板

全港有一萬八千間食肆，每年投身飲食業者眾多，但做飲食生意並非「揸鑊鏟」般簡單。飲食出牌顧問公司雅仕的老闆黃志超（超哥），十多年來做過多間酒店餐廳及茶餐廳等食肆的出牌顧問，熟悉出牌規則，他大嘆政府的指引有二百多頁，規則「濕碎」，難以消化，新手往往在出牌一環觸礁。「啲人好多時都租咗鋪先，一路裝修一路攞牌，發現唔合規格先來改，最後愈使愈多錢。」他解釋，現時食環署是唯一的食肆發牌機構，當局會在六星期內處理申請，並發出臨時牌照，有效期為六個月，其後再批發正式牌照。分別在深水埗和元朗經營火鍋店「凰朝」和「巨店」的黃麗文（文姐），開鋪時都是自己一手一腳籌劃。她表示，睇鋪時，會帶同出牌顧問一起去，省得浪費時間，「唔係間間鋪都得，有啲鋪位有閣樓，可能係僭建，亦可能已經入則，要顧問先識睇。仲有，若然糞渠在廳房地下，一定唔可以做食肆，萬一客人食飯時爆糞渠，點算？」文姐指，抽風及消防等都需要交給專業人士去做，她強調﹕「出牌過程好複雜，自己邊度識睇屋契、睇地圖呢？基本上有咩頭暈身㷫都會搵顧問！」

魔鬼在細節

「好多時出唔到牌，係因為通風、電力、消防以及氣體承辦商未能準時提交文件，證明餐廳合規格，一係老闆唔記得準時俾錢承辦商，一係喺小地方出錯。」超哥說。最易撞板個案與消防的要求有關，餐廳喜歡選用乳膠皮做的梳化或裝飾，但消防處指乳膠會於火警時釋放有毒氣體，嚴格規定餐廳選用合乎英國規格的BS7176或BS7177皮料，即屬「低排放」種類。「就算係英國規格，如果NO.係5字頭嘅都唔得，歐盟或加拿大嘅標準都唔啱用。」木製裝飾亦須塗上防火漆，否則亦難以通過消防規格。部分經營者為降低購買成本，會往內地廠商購買爐具，但氣體承辦商亦有權因爐具來歷不明而不批發安全證明。部分餐廳為免「蝕租蝕人工」，沒有牌照仍如常營業。一旦被食環署發現無牌經營，會按照餐廳的生意規模而定出罰款，金額約為數萬元。「有老闆會將罰款當交租，但最大問題係如果員工或顧客意外受傷，就算買咗保險，保險公司都可以唔賠償！」超哥警告。

開鋪宜與忌

風‧廚房出風位要離地2.5米，避免影響附近鄰居或途人。‧留意街鋪後巷有無位置安裝冷氣機散熱組件，若無，要花錢在店內另設槽位。‧商場鋪要留意冷氣開放時間能否配合餐廳的營業時間。火‧增加煤氣供應要額外接駁煤氣喉，需向路政署申請掘地，需時三個月，造價超過十萬。‧石油氣須存放於特設的石油氣貯存室，只限兩罐。‧煤氣公司會贊助爐具，可節省大部分設備費用水‧廚房地台需要預先塗上防滲漏的樹脂。‧裝修時要預留雪櫃去水喉位。‧現時餐廳必須設置洗水間，裝修要注意糞渠安排。電‧舊區鋪位可能仍採用單雙電，難以應付餐廳需要。‧若想於冬天時加設火鍋，要使用大量電磁爐，要留意電力能否應付。

潮玩捉心理

踏入全民皆網的年代，網上生意成為最新趨勢。前年在eBay網上創業家挑選賽上獲獎的陳思穎（Vivian）和李煒濠（Gordon），在eBay經營網店Vivi賣女裝手袋，主攻消費能力高的外國客。他們先利用阿里巴巴和淘寶入貨，每個款式購入三至五件測試水溫，毛利近五成，扣除運費等開支，月賺三萬至四萬。二人強調網上生意最緊要識捉顧客心理。第一步是貨品要實物拍攝，增加客人信心。「客人第一眼嘅感覺好緊要，實拍會更有真實感。」Vivian說，Gordon購入平價燈光工具，再利用單反相機拍攝，她補充﹕「一張相有齊唔同顏色嘅貨品，再退地加水印，俾人感覺認真專業。以前相片可加上文字描述，但最近eBay唔俾。」Vivian說。

運費併入售價

開業初期，Vivian曾收取額外運費，但發現客量減少。「網站評價包含運費一欄，如果免運費，嗰一欄會自動當滿分，變相可以提高排名。」Vivian笑說。表面「免運費」，但標價時已經計算運費，寄件會選用時間較長但費用較低的「二等空郵」。「運費佔營運成本近四成，利潤拉上補下﹐平均淨利潤率有三成。」Gordon說。「我哋亦會用eBay的調查工具，好似Terapeak，去睇吓客人上網習慣，佢哋會點樣搜尋自己想買嘅嘢。」另外，網上生意特別重視與客人的溝通，「客人留言，基本上廿四小時內要回覆，如果唔係，好易走。」Gordon已在智能手機設定「即時通知」的功能，方便即時回覆。

香港人有優勢

阿里巴巴香港區銷售總經理吳浩瑋承認，網上生意門檻及成本皆低，成為創業趨勢，去年香港區用戶量增加一成五。他指在網絡生意範疇，香港商戶有優勢，「香港人有做貿易生意的傳統，語言能力高，海外市場好信任香港人，短時間難以被其他地區取代。網上買家最關注的並非價格，如果單看價格，香港市場老早就不存在了。」他笑言。現時，阿里巴巴會為付費會員提供免費教學課程，講解如何營運網上貿易平台。網上生意競爭大，吳浩瑋指可從關鍵字入手，爭取曝光率。「關鍵字愈多愈好，也要了解不同市場怎樣稱呼你的產品。例如一隻杯，可以寫家用品、陶瓷品，節日時又可以改為禮物；電話可以叫cell phone﹑mobile phone，又可以用品牌名，如Samsung﹑iPhone。」商戶填寫產品介紹愈詳細，排名會愈高，但他提醒交易條件不要太嚇人，他笑言﹕「有濾水器廠商本來堅持最低交易數量要五千部，後來經我們提醒，改為一百部，結果有興趣的客人在兩個月內增加了一倍。」

四部曲莫缺漏

心情好時要購物，心情不好時更要購物。時裝生意門檻低，是不少貪靚女士的創業首選。本刊找來開設韓國時裝批發及零售時裝店「MR.香工」老闆張立德（Edward），以及男裝品牌店Cubic老闆娘藍穎詩（阿詩），講解從事時裝生意的入門四部曲。

1. 訂立目標客群

「想賣男裝抑或女裝？咩價錢？大陸、韓國或日本貨？究竟想做啲咩年齡層嘅客？諗好目標，先可以定下一步嘅策略。」Edward表示，阿詩亦認同：「就算做男裝，都有分Hip Hop（街頭），斯文休閒等。」

2. 入貨

香港時裝主要來源地是大陸、日本和韓國。內地貨價最便宜但品質差，日本貨質素高但價錢最貴，但近年以中價韓服最受歡迎。位於荔枝角的香港工業中心（香工）是香港最大的時裝批發集散地，有近五百間批發商。多得韓劇、韓星帶旺，場內一半店鋪都是經營韓國貨。Edward提醒：「韓國時裝有原產韓國貨，但有部分其實係大陸貨，與韓國貨嘅價錢差成倍，有鋪頭會買『Made in Korea』嘅標籤，兩蚊一個，再釘上去造假，所以入貨時要留心質料及車工。」衫款方面，Edward指時裝店剛開張時至少要有八十款，讓客人感覺多選擇，每款三件，減少壓貨風險，標價是來貨價的一倍至四倍之間，預留空間予客人講價及減價。另阿詩補充，長沙灣時裝批發廣場亦有不少女裝批發店，男裝則購自深水埗批發市場。

3. 選鋪

在旺角擁有四間分店的阿詩指出：「我會選擇在成行成市都係類似鋪頭嘅地方，因為咁先多人行，多人睇，人流對生意好重要。」剛在旺角瓊華商場開了一間地鋪的Edward建議，創業者開店要預留一大筆資金，選擇人流旺但租金較高地段。「旺鋪可以保證人流，因為好似瓊華呢啲傳統旺鋪，通常都唔會有吉鋪，租用都要先俾四至五萬頂手費，若然做唔住，轉租出去可以攞番嗰筆頂手費。」

4. 營運

生意好壞好多時取決於售貨員是否懂得推銷，阿詩表示：「新店應該聘請有經驗、識襯衫嘅售貨員，香港人好懶，襯得好睇，可以游說佢買多幾件。」Edward亦指售貨員很重要，「有個朋友賣男裝，請咗個女售貨員，講嘢雞仔聲，啲客試衫時，會幫佢扣鈕，唔買，佢就嘟起個嘴，嘩，冧到唔少男仔幫佢買衫，我都想試吓被佢sell。」Edward笑道。他又指售後服務非常重要，「一星期之內可以換貨，其實一百個人買，得三、四個會換，但有呢個服務會令客人安心啲。時裝生意靠熟客，所以與客人保持聯絡，要有facebook專頁，定期更新產品，要叫客人留電話，而家個個都用smartphone，有新嘢就即刻Whatsapp俾佢。」

地產界，無人不識范統。他是富豪酒店（78）、百利保（617）及世紀城市（355）的董事；有他老闆羅旭瑞，他就在身邊，角色如大內總管。一般人對他，既陌生又熟悉，因為他的名字，又可叫「飯桶」，他說：「我細佬叫范剛（飯缸），細妹叫范畹（飯碗）。阿爸係專登玩嘢的。以前去攞身份證，人哋叫咪『范統一號窗』，全場爆笑。」

平日見到的范統，總是西裝骨骨。原來一到假日，他便會脫下洋服，穿上緊身衣，打泰拳、練散打。已五十六歲的他，打功夫懂得「避重就輕」，即使速度不足，但氣力搭夠，打「持久戰」遊刃有餘，曾打贏大他一個碼的海關督察，亦試過「越級」挑戰廿三歲的後生仔。近日，他正為下月的比賽操練；在擂台上致勝之道，亦是他的打工仔秘笈。范統 Profile

年齡：56歲

學歷：香港大學建築系畢業

家庭：已婚，育有一子一女

職位：

1987年：入職百利保，職位為項目經理

1993年：獲委任為百利保控股執行董事

2002年：出任富豪酒店執行董事

2007年：出任百利保控股首席營運總監、及世紀城市執行董事

每個週六，范統都會到拳館練泰拳、格鬥，他換上一身緊身服，一躍上擂台準備練習，邊出拳邊說：「本來做gym減肥，教練見我玩開散打，叫我玩埋泰拳，點知玩上癮。」採訪當日，他只是和教練Bryan練習，但也毫不留力，踢腿、左勾拳、右勾拳，中間加插掌上壓和sit-up來鍛鍊體能，最後練習古泰拳「凌空肘擊」，在教練大髀跳上又跳落，再用手肘「鑿」教練天靈蓋，練足一小時仍未喘氣。週六練完泰拳，週日一早又跟他的師傅冼國林練散打。練習前，記者見他在更衣室換衫，窺看到他那本來四十吋的胸肌，稍為有點鬆弛，他解釋：「早排練拳整親條腰，幾個星期無練喇！」原來有腰傷在身，醫生要求他休息三個星期，但自命「唔郁身痕」的范統依舊和冼國林過招，準備下月的散打友誼賽。冼國林多次為範統安排散打比賽，他曾打贏過海關督察，亦試過「越級」挑戰比他年輕廿多歲的後生仔。冼國林說：「佢下月上擂台，就破紀錄做最老拳手喇！范統識用自己最強嘅摔撻（掃對手的重心腳，以摔倒對方）去撻人，明知力度唔夠，唔好似啲後生咁急住同人硬碰硬，佢夠氣力，打持久戰，啲後生仔唔夠佢嚟o架！」他在擂台上的招數，亦是他職場上的「激戰」秘笈。

第一招：「蠢唔緊要，最緊要勤力！」

范統常做gym，又跟家中的雪橇和美國秋田犬到居住的渣甸山一帶跑步。勤練功，似乎是老生常談，卻又最難做到。「而家請啲後生呀，佢哋第一句問星期六使唔使返工，你話激唔激氣？」范統畢業於港大建築系，做過幾年則師。八七年，三十歲的他加入百利保，任職項目經理，六年後已經進身公司董事局。「當年上司同我講，入職申請當中，人工叫價最高係我，年薪四十萬。」他為證明物超所值，零舍勤力，「當時公司有我及另一個項目經理，對方因私人理由走咗。我唔怕辛苦，同上司講『唔好請人，我做埋佢嗰份！』嗰時公司有好多項目，銅鑼灣香港富豪酒店、九龍城廣場同後期嘅機場富豪酒店等，我全部有份參與。到董事局要升人，公司呢個位得番我一個，所以輪到我囉。」那時，他除了畫則，還要計數、買地、銷售，一腳踢，日日朝九晚十，他的宗旨是：「蠢唔緊要，最緊要勤力！」對自己如是，對下屬要求如是：「你見個同事咁落力，就算做錯呀。唉，諗一諗，佢都盡曬力，仲鬧咩？」廿多年來，他只試過「炒」三個人，「佢哋唔係做錯嘢，係懶！」

第二招：「可以輸，但唔好被人KO！」

年過半百的范統，明知不夠後生仔打，仍「恨」上擂台，不斷叫記者催促冼國林為他安排比賽，他說：「我唔介意輸贏，純粹享受喺擂台。呢局可以輸，但唔可以被人KO。只要喺裁判數十聲內企得番起身就得。唔KO，就過到；KO咗，就一世。」他在百利保廿多年，也有失意時。范統一直不願提起，直至記者提起曾翻查剪報，知悉他十多年前曾投資物業而被追訪，他即耍手擰頭說：「唔好再提啦！好多年前出過一次報導，要我講私人投資，我又講咗，作為老闆梗係唔鍾意，怕我影響工作。」那次之後，工作量銳減，他心知不妙，自此聽聽話話，不再回應任何私人投資，只做好眼前工作，很快又重獲信任。現時百利保手頭有逾一百億的項目有待發展，包括剛以二十四億元投得的九肚山地皮，以及上環、土瓜灣酒店和元朗丹桂村住宅項目等。不過回想二千年，百利保及同系公司試過財困，透過債務重組，終鯉魚翻身。那次未被「KO」，其後幾年更轉虧為盈。提起往事，范統歸功於老闆：「負責睇數嘅同事，計數計到手都震埋。但老闆面不改容，EQ（Emotional Quotient情緒智商）同AQ（Adversity Quotient逆境智商）真係好高，我做乜？我負責大事化小，小事化簡，等老闆煩少啲。有問題時，我從來唔同老闆講，解決完都唔講，因為已經解決咗。」

第三招：「一切榮耀歸於主子」

跟范統做訪問，他把自己「縮」得很細，記者說他泰拳打得好，他歸功教練Bryan；記者說起散打，他又說全靠冼國林。○三年，適逢沙士，他負責賣赤柱富豪海灣，壓力大得天天失眠，「老闆唔出聲自己都會有壓力，九七年用五十五億買塊地返嚟，成個項目開支近百億，到○三年先開賣。利息開支又咁大，無錢回籠點掂？半夜起身開著部電視，拎住遙控，眼光光逐個台㩒。」當年賣樓，未似現時花招多多，他們找專人送樓書給一眾上市公司老闆，又與TVB合作，首創找來歌星藝員拍音樂劇來宣傳。待到沙士過去，這樓盤一日賣十幾伙，還不斷加價，說起往績，范統說：「呢樣羅寶文（羅旭瑞女兒）諗o架。」記者笑他「不邀功」實屬難得，他說笑道：「一切榮耀歸於主子，一切錯誤歸於臣子。」

先苦後甜

身為三間上市公司董事及百利保的首席營運總監，范統很忙，經常OT至晚上七、八時，「我廿幾年來，仲累積咗一百六十日年假未放。」上月中他才忙裡偷閒，和太太及一對子女去肯雅看動物大遷徙，家住渣甸山豪宅，他和太太逢週六、日一起放狗。他的日常工作是：「老闆唔鍾意做嘅嘢，我負責做。」但又補充說：「不過好多嘢佢都鍾意做，我喺身邊學嘢。」他指跟著羅旭瑞打工廿六年，從未見他發脾氣，「大聲講嘢都未試過，最多黑面，咁你自己好知衰乜。」事實上，范統與羅旭瑞，同為港大建築系出身，同聲同氣，多年來一同經歷過公司高低潮，建立了一份互信和默契，「佢想要啲咩我大概知道，我有咩係搞唔掂佢亦都知。」事實上，曾有上市公司向他拋橄欖枝，范統很快拒絕，他更向記者揚言一世「唔會走」，他解釋：「你諗嚇，要喺新環境，重新去建立老闆同同事嘅信任，係好花時間。如果無信任，做事只會事倍功半。」