ZKIZ Archives


派得好投資組合月結 (Jan 2014) PARTIPRAL - ROAD TO FINANCIAL FREEDOM

http://partipral-hk.blogspot.hk/2014/01/jan-2014.html
組合單位值: 112.55
組合週回報: -0.01% (2014年回報: +6.78% / 1月回報: +6.78%)

現金水平: 8% (前週: 28%) 

"巴黎鐵塔反轉再反轉"

上週寫週記時係恐慌到嘔, 若然唔係一早沽左一堆野, 今週開市好大機會係低位剪哂佢. 由星期五(24/1)成手澳門股PUT, 到星期一(27/1)買到滿倉永利(1128), 新濠(200), 講緊都係半個交易日內完成既轉變. 構成轉VIEW關鍵, 很大程度出於星期一開市一刻澳門股明顯跌得過籠, 講緊係銀娛(27)跌8%, MGM(2282)跌近10%, 一張2月10%價外PUT可以升3倍, 當時一刻未肯定見底, 但基本上已經可以肯定唔會追沽; 及後於恆指隊得最勁一段時間, 騰訊(700)迅速回穩, 金山(3888)亦一度有強勁買盤掃上, 就是更大誘因去平掉手頭淡倉. 午市後指數無大起色, 但明顯見澳門股及騰訊已經喘定, 而亦有幾多二, 三線股倒升. 跌近500點但完全感受不到恐慌情緒有蔓延跡象, 星期一應該係另一個關鍵日子.

自己一直無參與澳門股, 主要係因為已經錯過最爆炸性一段, 就不想再追. 其後一升再升, 作為局外人唯有眼光光. 濠賭屬結構性增長行業, 但股價升得勁很大程度是由投資者情緒拉動, 依一刻係好難預測究竟澳門股會點走: 呢世都唔會再見一月份高位? 抑或最近調整隻係為左走更遠既路? 正等如去年11月$17時買金山(3888), 都唔會知究竟有冇機會再上返$24. 講到尾都係值搏率問題, 星期一摸住個底買永利, 新濠, 每股最多都係擺低$1-$2; 若然今次確然見底, 是有機會再挑戰歷史高位. 既然輸極有限, 便可以無懼風雨衝入場搏一鋪. 至於後來將部份正股換成期權, 則是操作上的考慮. 

一月份有做得好, 亦有做得不好既地方, 高位出清DYNAM JAPAN(6889)頗為關鍵. 整體拉勻有得贏, 都應該值得滿意. 組合經過一輪調整後仍以金山軟件(3888)作重倉股; 堅持歐美逐步復甦乃今年其中一個投資亮點, 隊得最狠果時衝入場接左一堆出口股, 目前稍見起色; 雖然德昌(179)仍在捱價, 但見歐洲同業Faurecia(EO:FP)及Valeo SA(FR:FP)股價不算差, 暫時不太擔心. 

組合趁指數大跌時趁機納入中航信(696), 搏內地旅遊增長, 此股攻守兼備是有可搏之道. 純炒短期供求效應, 上市日競價盤追買新股老恆和(2226). 如早前留言所講, 自己跟炒新股, 多數等上市首日才追買, 如636, 586, 1359, 2226等等. 上市後投機新股主要都係炒供求效應, 操作概念係要國際配售分貨小, 公司業務夠獨特, 即市場並無其他選擇及公司集資後發展計劃吸引, 會有基金肯追 - 老恆和是符合以上全部條件. 值搏率比正常情況更高的原因是市況轉差, 多一手黨見上市已經贏咁多便會爭先沽貨, 有利有心人收貨後再炒上. 甚麼MAGNUM, 諾奇, 米格等自己則是不會追, 原因是公司業務並無特別之處, 基金追貨動力便不強. 雖然目前已經累積一定升幅, 但我睇短期應可再抽幾棍.

處於經濟溫和增長期, 資源股唔會太叻但亦唔會太差, 中海油(883)每年都總有段時間跌到要執笠咁款, 但往後又會升到你唔信. 目前跌近波動區間底部, 是值得入場搏反彈. 貪槓桿夠大, 自己買左少少二月價外CALL搏搏. 聯想向Google收購Motorola, 市場昨日(30/1)明顯以行動投不信任票. 感覺上呢單收購係反映聯想仍在打算進攻手機市場, 甚至有多少為國出力的味道; 相反Google早已知道未來科技戰場應不在此. 無論生意目光, 公司質素Google都遠在聯想之上. 今單Deal應該係失敗之作, 加上聯想仍在處理收購IBM伺服器業務, 要同時Handle好兩單交易亦是潛在不明朗因素. 貼近歷史高位, 個人認為是可以用較價外的PUT做淡. 

今日(31/1)開始參與美股買賣, 由於用開的銀行手續費用昂貴, 自己又沒時間兼顧兩個市場即市炒賣, 操作美股個人是傾向較長線持有. Facebook, Google兩大科網巨擎剛公佈強勁業績, 縱然估值甚貴, 但勝在想像空間遼闊, 齊齊破頂後不應就此停步. 

展望二月份馬年開局, 個人操作上仍然傾向審慎一點, 最大問題係好多股都似見明顯頂部, 升上去又會有堆人爭住止賺, 為降低風險, 買貨只集中數個SECTOR去買就算. 另外最重要係睇騰訊及澳門股能否守穩一月份低位, 若然失守, 便應提高現金比重及加強對沖. 多加留意是否有股票於期內向上突破, 強股就在此中尋.
PermaLink: https://articles.zkiz.com/?id=90507

Next Page

ZKIZ Archives @ 2019