一家二十口到灣仔吃晚飯，計過揸五架車過隧道與停車場費用，已經要幾百蚊，而且揸車來回，就唔飲得紅酒、白酒喎，幾冇癮啫，不能盡興，於是有聰明人想出租小巴出城呢條計，經熟人介紹，搵到一架二十四座位小巴，由沙田開往灣仔來回，果然方便之極，吃飯時大家飲得痛快。回程時，問司機：「平時日頭做乜㗎？」司機話：「我揸車幾十年嘅嘞，喺中電三十年，九七年吃肥雞餐被遣散，至今又十六年，當年好唔捨得離開中電，幾乎喊三聲，出到嚟，馬死落地行，用一萬蚊買咗一個私家小巴牌，勢估唔到，個牌而家炒到上三百萬，好彩離開中電合晒時機啫！而家朝早揸車送小童返幼稚園及放學返屋企，包咗兩間幼稚園嚟做，月入三萬幾，餘下時間咪送人去食飯、去迪士尼、去拜山囉，幾好搵㗎。」
點解私家小巴牌咁值錢？司機話：「九七前，係司機申請都可以攞到牌，牌照邊度值錢吖。回歸後，唔知點解，政府禁止發新牌照，咪益晒一啲大型集團儲牌、炒牌囉。我命水好，執番個便宜牌啫，賣咗牌嘅司機，現在不知幾㷫。」政府不發私家小巴牌，可能係為了保護地鐵及大巴士競爭力。政府年年㩒住巴士加價，巴士公司想話縮減，改組巴士路線，運輸局就卸膊話要徵詢區議會意見，區議會例牌反對嘅啦，如果周街都係村巴、租賃小巴、巴士公司想死嘅嘞，特區政府表面唔准巴士公司加價咁多，暗裏不發新嚟小巴/村巴牌減少競爭，算係回贈。衍生嘅實際效果就係政府逼人發達，明益大集團，為了表面民主。現在特區政府不敢取消功能組別，搞直選慢吞吞，但另一方面，又凡事諮詢區議會，區議會一反對，就唔知點算好，例如特區政府在將軍澳、大埔、南區起國際學校，就有區議會及校長會反對，城大在馬鞍山起學生宿舍，有居民及區議員反對，在公屋旁邊起新公屋，區議會反對，馬會膽敢租舖開投注站嘅話，區議會反對，骨灰龕喎，更加反對啦，莫講話堆填區、焚化爐咯，政府每每因此動彈不得，局長癱瘓，梁振英話適度有為喎，實情就係區議會治港，梁振英號令不出添馬艦！ 