旅遊發展局在田北俊擔任主席時期，在西九文娛藝術區之曬太陽吉地搞美酒佳餚展，極為成功，今年田少老友林建岳接任為旅發局主席，因西九地盤已開始動工，美酒展移師中區金鐘海旁舉行，呢個地方同樣係大地盤，地底正在興建中環灣仔通道之隧道部份，尚未向公眾開放，不過旅發局去年已有預謀，一早得到政府批准，由旅發局撥款平整地盤土地，鋪好石屎路面，短短時間之內，居然將一塊泥濘地皮變成一個臨海公園，群廈環抱，左丁山於十月三十一日入內參加傳媒午宴，由天星碼頭、九號碼頭入口步行入內，越行越高興，覺得國際大城市之中，幾難搵到一塊同樣場地嚟舉辦展覽，香港市民如有時間，最好花費三十元買張入場券，入去參觀、影相，欣賞維港美景，已值回票價。
往年西九美酒展，已辦得好好，但今年中環海濱美酒展，因有地利，中區、灣仔、金鐘上班族放工後直情可散步入內，方便到極，相信更加人潮洶湧，收費三十元都不知是否可以控制人流，亦因如此，各大參展酒莊，攤位共有299個，來自16個國家；午飯時，旅發局邀請來港主持美酒品評之澳洲專家同我地講：「唔係誇張，香港已經成為世界酒都（Wine Capital of the World）。」又係誇張啲喎，七百萬人之亞洲城市，竟是世界美酒之都？唐英年當年倡議取消葡萄酒稅，曾俊華任財政司司長後玉成其事，兩人可記一功。無稅務，為香港創造了成為葡萄酒之都嘅必需條件，強國人對紅酒需求之殷切，成為充份條件，於是一個全新行業──紅酒進口轉口營銷存放行業──在香港拔地而起，帶動拍賣、旅遊、餐飲業。旅發局主席林建岳與唐少、田少同是紅酒收藏家，佢地三位推動紅酒展，人人俾面，林主席話佢上任後，冇晒朋友，因為佢成日打朋友牌揼心口，要人捐錢贊助香港旅遊推廣活動，例如今次就捉住中國建設銀行包場搞一次宴會。叫人捐，佢自己亦要捐，於是田少捐出一支Château Latour A Pomerol1998，唐少捐一支Château Mouton Rothschild1989，岳少本人就捐Château La Conseillante Pomerol2005，全部係magnum裝，價值不菲㗎。 