| ||||||
提起郭志怡，以前總會想起Joyce Boutique創辦人郭志清胞妹、或永安百貨後人的稱號。隨着SEVVA餐廳及她設計的蛋糕成功上位，郭志怡被美國著名婚禮活動策劃專家Colin Cowie譽為「甜點女王」。表面順利，其實她亦曾被戲謔可以捱得幾耐？郭志怡喜出望外說：「初開時總經理講honeymoon兩年，我有啲朋友講做餅簡直濕碎，人哋一個電話已經賺幾億。」郭志怡不理外間閒言，繼續埋頭苦幹做創作，結果餐廳成為富豪飯堂，名人、明星生日又必訂她的蛋糕。今日她又不計成本，把蛋糕的創作靈感結集成書，展示自己的生活品味，「我而家唔係問你攞錢，是做我鍾意做的事。」求開心 郭志怡（Bonnae Gokson）最近出了首部著作《BUTTERFLIES AND ALL THINGS SWEET》，二百多頁的書，說的都是MS B'S CAKES的故事。Bonnae興奮地說：「好多時同人傾偈，佢哋話你有咁interesting嘅生活，不如寫書。呢本書睇圖畫多，內裡十頁時裝相是買相，其他相是自己team影的，就欠拍嗰吓不是自己拍。」書中相片部分在香港取景，「我自己是中國人，想擺番啲中國文化，讓外國人睇香港係怎樣。」她又去了澳洲，她的第二個家，專誠租了間大屋拍攝。追求完美的她，搵來強勁班底，其中一part由澳洲著名攝影師Petrina Tinslay操刀，「佢好出名，差唔多全澳洲影lifestyle最靚嘅攝影師。」Bonnae花盡心思親手布置場地，上至模特兒，下至繡球花，當日拍照用的vintage衫，均出自澳洲的年輕設計師，「香港搵唔到咁大隻（綉球花），我啲花係真花唔係假花，靚到呀！」其胞姊好友、時裝設計師Donna Karan說出書賺不到錢，何解仍大費周章出書？「呢啲係做嘢嘅滿足感。依家睇新聞好多事唔係咁開心，我想有本書全部睇靚嘢、開心嘢，做一本世界性嘅書。」 靈感繆思 靚的東西還包括蛋糕上的糖花和蝴蝶商標。蝴蝶比喻他們不加防腐劑的蛋糕，「蝴蝶唔長命，但喺度時好靚，我哋啲餅亦是這樣，兩三日要快快脆食咗。」為取靈感，她會逛深水埗，「我好鍾意去深水埗睇絲帶、布料，我鍾意睇啲顏色，我又會去金魚街、去花市。」她常有鬼馬創意，簡單如中秋節的燈籠和沙田柚，亦激發她推出了一對模仿紙燈籠造型的蛋糕，「我用菲律賓最好的芒果及椰子……」她的繆思來自四面八方，時裝亦啟發她不少，「有日見到Dior designer Raf Simons一件今年Haute Couture的黑衫，我好鍾意，想轉做一隻餅，大把師傅都唔係我咁諗嘢。」有時她會從藝術得到啟發，「譬如Art Basel、《The Great Gatsby》齣戲，依家冬季已經興feather，我下一步就做這些，世界潮流好緊要，我仲好catch up with這些。」母親節，她又想到已故母親英文名命名，做了一個Eleanor蛋糕，蛋糕上是一朵糖蘭花，「我媽咪好鍾意大朵蘭花，佢喺度會好開心，佢好骨子，鍾意靚嘢。」數數手指，SEVVA已開業五年，會否衝出香港？Bonnae無奈說：「好多人問，但呢個唔係求其揼出來，要好多心血放落去，management team冇我一生咁多exposure，呢啲係睇屋企點教。」 自小培養 含着金鎖匙的她，祖父郭順是永安百貨創辦人之一，她自小住在赤柱大宅，上有家姐和哥哥。Bonnae最擅長用色，多得父親訓練她對顏色的觸覺。「Daddy行山時會問：『你看到幾多種綠色？』佢要我仔細睇，是有好多tone。」其母亦很會打扮，「當時有好多party，裁縫會嚟做衫，佢著衫好骨子。有大party就用大飯廳，細飯廳都坐廿幾人，好巴閉，auntie、uncle和朋友週末來游水，我哋係咁長大，我請客都擺得好靚，朋友好鍾意好欣賞。」家姐郭志清經常帶她周遊列國放眼世界，她七七年開始跟姐姐做了十六年時裝，又曾在Chanel做亞太區形象及傳訊總監，「不只去時裝城市，去唔同鄉村，法國、意大利，印度，去好多不同地方，你deal with嘅人個個級數唔同，當然學到嘢。」她看盡花花世界，練得一副好眼光，「你覺得呢啲嘢點好，我可以俾得仲仔細。我好處是唔識整餅，我唔識咪通度諗，師傅工作時間長，仲邊度有靈感？我係佢哋精神領袖。」 | ||||||