ZKIZ Archives


因工受傷TVB冇買意外保王合喜傷脊椎零賠償

2013-09-05  NM
 
 

 

曾是香港滑浪風帆代表運動員的王合喜,因一場橫禍令脊椎移位,近日進一步惡化,連行路都有困難,迫使他停工養病。去年王合喜參與無綫遊戲節目受傷,留下手尾,加上無綫冇意外保險賠償,零收入的他,要貼錢醫病。打個噴嚏唔郁得

上月急剎停所有工作及做運動的王合喜,原本有份演出新片《喜愛夜蒲3》,但因脊椎出事,引致行動困難,被迫辭演。據知,上月王合喜打完噴嚏後,整個人即時不能動彈,送院檢查後,發現脊椎L4及L5兩節軟組織移位。事出有因!據了解,受傷源頭是去年為無綫拍攝樓盤《迎海尋珍奪寶》遊戲節目時,上山下海的王合喜在攀石環節中因安全繩長度計算錯誤,落地一刻chok傷腰骨;他當場痛到躺在地上,眼淚直颷。為免揸誤進度,王合喜死撐繼續拍,結果後患無窮。「佢頂到拍完先去睇醫生。佢以前係全職運動員,身體本來已經有勞損,俾條繩一chok,就借勢出事;當時佢唔知咁嚴重,未完全好番晒就開工,到早排打個噴嚏就唔郁得先知大件事,加上之前落大雨跣腳跌低,傷上加傷。醫生警告咗佢要休息至少三至六個月,如果唔好好休養,再嚴重就會半身不遂。」知情者說。

無綫冇買意外保

上週一(八月二十六日),昔日健步如飛的王合喜,如阿伯般慢行離開赤柱寓所,到市中心三分鐘路程,他花上十五分鐘才到。當日雖然無落雨,他卻撐住雨遮當柺杖,一拐一拐慢慢行,並不時露出痛苦表情。在Pacific Coffee飲完咖啡,王合喜龜速行返去他有份投資的風帆訓練中心。行平路已經夠辛苦,落樓梯更是百上加斤;只見王合喜落兩三級樓梯就要停一停,喘晒大氣。幾經辛苦,才行到去目的地。幫無綫做節目搞到手停口停,王合喜受傷後曾向無綫了解保險賠償,卻發現簽部頭合約的他,不獲公司購買意外保險。要貼埋醫藥費執手尾,公司又不聞不問,心淡的王合喜去年尾約滿後便不再續約。「佢因傷又連推兩部戲,之前拍完《飛虎出征》同《魔警》,內地又有人搵佢拍劇,原本唔錯,而家見財化水,無綫藝員部又理都唔理,所以佢心情都好差。」知情者續說。

殼王該體恤藝員

記者致電王合喜,他承認腰傷是去年拍無綫節目引起。「意外無人想嘅,我無怪佢哋(公司)!(無綫冇幫你買意外保險?)只怪自己當日簽約無睇清楚份約。其實簽部頭抑或親生藝員,都係為公司拼搏,希望新老闆陳國強先生懂得愛惜旗下藝員,照顧得全面啲。好在我十八歲已經買保險,夠頂醫藥費,否則一個星期要做三次物理治療,條數好襟計。」王合喜又續說:「其實起初有諗過搵律師幫我向佢哋追討,不過都係怕勞民傷財,就打消念頭,因為索償到嘅錢可能唔夠俾律師費。」

嚴重影響失禁

註冊脊醫及物理治療師何應輝稱,王合喜的脊椎問題,嚴重者會導致腰椎間盤凸出,壓住神經線,令腰部疼痛和麻痺,若伸延至臀部、大小腿及足部,會導致大小便失禁影響生活。他建議除咗做物理治療,也可用手法治療幫病人矯正骨骼。若病情無改善,就須由骨科醫生進行手術矯正。

PermaLink: https://articles.zkiz.com/?id=74748

Next Page

ZKIZ Archives @ 2019