史丹利街陸羽茶室對面有一間茶餐廳，叫做翠河，雖然未有「翠華」咁出名巴閉，但多年來生意都幾好，中午時分，門口經常有人排隊輪候入內。呢日在門口碰到餐飲M，似乎想推門入內，於是喝住佢：「喂，陸羽喺對面呀，摸錯門口呀！」
餐飲M話：「瞇埋眼都識行入陸羽啦，邊會搞錯，聽講呢間翠河就嚟要搬，特登走入來食吓嘢，以示紀念咋。」餐飲M素來消息靈通，聽到呢間翠河店現在舖租三十幾萬銀一個月，租約即將期滿，業主話要加租至接近八十萬咁講，加幅十分犀利，他日不知會有甚麼名店承租。近幾年史丹利街、威靈頓街、擺花街一帶突然開咗不少二綫外國名牌進駐，大概係頂唔順皇后大道中租金太貴之故，啲小型店舖、茶餐廳唯有搬走啦。
大店驅走小店，並非突然發生，林奮強兩年前創辦「黃金五十」之時，早已洞悉趨勢，發表研究報告，大聲疾呼政府要注意本地商舖租金上漲，乃本地通脹之大原因，政府應設法增加各區商業用地，促使商場店舖嘅供應增加，以免小店絕跡於繁華區域。本來拆政府西翼與中環街市興建大型甲級商廈與商場，可解燃眉之急，點知特區政府明益中環各大業主，居然保育兩幢不美貌，無價值嘅建築物，限制中環商業用地嘅供應，推高租金，中環街市丟十年仍未達致保育效果，且翻修成本不斷上升，納稅人真係睇見就眼冤。
在其他區域，梁振英政府盲目搶地興建公屋公屋又公屋，不及其餘，完全不見提及新增土地用於興建區內之商業大廈，都唔知想點，因此而催生一股情緒，有錢人佔地打波係衰人，要搶過來起公屋，一切以公平之名出之。高球迷兼粉嶺常客，上市公司董事A憤然對左丁山講：「要拆球場起公屋，粉嶺可能遠咗一啲噃，好多人嫌新界公屋太遠，輪到都唔肯搬入，係要等市區公屋。不如咁啦，有兩幅地啱用呀，第一幅係界限街警察員佐級體育會俱樂部，佔地甚廣，好近九龍仔，拆咗起公屋必受歡迎，一定係搶手貨。第二幅係近銅鑼灣嘅掃桿埔紀律人員體育協會球場，位置冇得彈，一定可以成為公屋王！」嘩，邊個有膽提出嚟呀，曾偉雄處長會同你死過！ 