下午茶何處去 左丁山
2009-03-19 AppleDaily
經紀C約飲下午茶，當然一拍即合，但去邊度飲好呢？有計較。我哋好少去茶餐廳嘅，因為中環啲茶餐廳好好生意，人聲嘈雜，不利私底下談話。去酒店當然 好啦，但經紀C話o依家市道唔好，要避嫌，費事畀人話過份豪華，既然咁講，於是將文華東方酒店與置地文華、四季等摒除，仲有乜選擇呀？置地廣場飲咖啡，似 坐在金魚缸，好易畀熟人撞見。不如去「阿曼尼咖啡」啦？經紀C又話要避去豪華之嫌，況且位於證監會樓下，隨時碰到人。唉吔，講嚟講去，搵地方飲杯咖啡都咁 煩，點算好？卒之左丁山想到去Q8（皇后大道中八號），嗰度冇乜人，唔算貴，夠靜局，亦無「豪華派」標籤效應，最啱用，經紀C一口應承。落 樓之時，『車立』內碰到熟口熟面嘅送外賣阿叔，於是同佢講：「你哋間茶餐廳認真巴閉，外賣生意做唔切，由立法會去到國金二期，有邊間中環名廈你冇去過？」 阿叔話：「你有所不知，我哋生意係好好，但已經冇舊年咁好咯。」左丁山怪而問之：「照計金融業不景，應該更有益於你哋喎，大家少啲出街食，唔幫襯你哋幫襯 邊個？」阿叔好爽快咁回答：「好多人唔見咗呀，例如大摩細摩啲生意做少晒啦！」咦，大摩就話搬咗去九龍啫，細摩生意少咗，如何解釋？後來先至明白，阿叔口 中之大摩細摩其實係投資銀行之代名詞，投行裁員不絕，連叫外賣生意嘅人都少埋，影響成間茶餐廳之營業額！ 行到都爹利街，已 經碰到經紀C，與佢講起外賣阿叔之事，佢話：「佢哋生意如果少咗，仲有另一個理由，我啲下屬叫外賣都有時搵過另一間茶餐廳，便宜啲o架，外賣阿叔嗰間，喺 鏞記對面，係人都知道價錢最貴！」嘩，前年入置地文華飲杯可樂畀六十蚊，幾時見佢投訴價錢太高呀！o依家就連茶餐廳外賣也要格價，中環人開始㩒住荷包咯。 上到Q8，咦，冇開門嘅，管理員話：「執咗嘞！」兩個大男人為之愕然，真係住得背。惟有死死氣走過對面馬路，左丁山話去歷山大廈Cova，經紀C話唔好， 坐在Cova，如在路邊，人來人往，唔盞。再講就費時失事咯，立即帶佢走入Harvey Nichols，直上四樓咖啡室坐低，卒之又係要去一間貴嘅，聽佢有乜密偈傾。
Next Page