在中銀大廈內，碰到財資界老總P，佢平時最喜歡打高爾夫球，問佢入咗會未？入邊間會，大家明白啦，當然係最近成為新聞主角嘅香港高爾夫球會。財資P話：「入會冇幾耐咋，輪候咗20年先至做咗5日（Five Day Member）會員，入會費35萬元，再等一輪可以轉為全費會員（Full Member），再交15萬元，總共就係50萬元，唔算貴咯，但依家啲反對派嘈生晒話要逼政府收回粉嶺球場，咁我又要睇定啲嘞，唔急於交15萬做全費會員噃，如果要total loss嘅話，蝕35萬夠啦。不過要講多一句，特區政府要遵守《基本法》嘅大原則嘅唧，五十年生活方式不變吖嘛，馬照跑舞照跳，波當然照打，冇理由要一間百年歷史球會收檔㗎，簡直係貽笑國際嘅bloody joke！」
行到渣打銀行外，碰到CFO（財務總監），又問佢係唔係會員，佢話入會十幾年啦，得閒先至會到粉嶺打波，因公司事忙，驚住在球場碰到公司主席就唔好意思啦。對於收回球場有何看法呢？佢連忙耍手擰頭：「我要保持低調，個人當然反對，但點敢公開講，想俾記者咬死呀？」記者不是野狼，唔會咬死人啩，點知財務P反應快，「當今豺狼當道，唔出聲為妙！」
財經界人士就是如此怕死，高球會主席張建東最近不在公眾場合出現，有傳聞話係去咗美國做手術，唔知幾時先至返嚟處理呢件事呢？次日在飯局碰到退休董事長M，問佢應唔應該拆球場起公屋，佢話：「唔反對噃，我做總經理時已申請入會，直至做到董事長退休，足足等咗二十二年都入唔到會，拆球場於我無損！」咁啱財務R坐在附近聽到，佢和應話：「我又係等咗超過二十年都入唔到會，拆咗佢啦！」
哦，入唔到會嘅有一肚氣，可以理解。球會嘅公司會籍可以買賣，炒到千幾萬，他日有乜依郁，肯定損失慘重。入會二十幾年嘅會計師L打電話嚟話：「香港係資本主義社會，商界精英肯俾錢嘅話，自然有若干平常人享受不到的權益，如果要完全消減差異，以公平為藉口拆掉球場，唔係搞馬克思主義係乜？背後嘅涵義就係將全香港變為公屋區域，唔准有豪宅，焚化爐建於山頂，堆填區設於西九龍海皮，所有私家會所變成人民公社，咁至算係真正公平！」 