ZKIZ Archives


廢紙回收 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130704/18321545

香港為擴建堆填區、興建焚化爐,民間氣溫上升。處理垃圾問題而搞成咁,梁振英當然有責任,如果大家唔記得,睇番蘋果日報季陶專欄(三月二十八日)便可更新記憶體!去年競選時,梁振英政綱寫明「採取以源頭減廢為主導的政策,降低擴建堆填區或增建焚化爐的壓力」,博得環保團體認可,在環保選舉論壇,唐英年支持曾蔭權政策在屯門興建焚化爐,梁振英話唔使,於是環保團體向梁振英大聲喝采,一啲人大罵唐英年。梁當選後,環境局長邱騰華向立法會申請撥款興建焚化爐,啲泛民議員大罵(現在亦大罵),民建聯工聯會議員要邱騰華擱置等新特首發落,於是邱騰華無功而還。
好吖,現眼報,依家梁振英知道去年口輕輕,講得出就亂噏,原來負起施政責任之後,唐英年所言係啱嘅,啲環保團體係害佢嘅,點收科呢?黃錦星、陸恭蕙咁醒,諗掂佢啦。
源頭減廢正是說易行難,上星期見到一位在內地做廢紙回收,製造包裝紙嘅老闆,問佢點解近年已放棄香港,生意全部轉往內地。佢話:「一字咁淺,造紙廠要大地皮,香港提供唔到;第二點,廢紙來源方面,內地要咁多有咁多,香港市場太細小,缺乏規模經濟,如勉強要造,因規模細,成本高,點賺錢呀?」
呢位老闆話內地有好多回收廠,想搶贏眾多對手,靠嘅係一套誠實制度,佢對供貨人誠實,供貨人對佢間公司誠實,保證廢紙來源穩定。一噸廢紙可為工廠帶來近450元人民幣利潤,當然要誠實待供應商,誠實待客戶,才是真正道理,旁門左道不足法。老闆話:「為咗鼓勵誠實,我地收一噸廢紙或幾百斤廢紙,次日下午五時前立即俾錢,絕不拖欠,但如果事後發覺廢紙內有浸過水嚟呃秤或者以廢物混雜其中,會立即將供應者除名,唔再向佢買貨。呢個制度甚為簡單,行之有效,我地嘅廢紙供應商不斷增加,保證咗貨源!」聽落好容易,點解其他人唔依樣畫葫蘆?原來有啲廠商鍾意拖數,收貨後一個月找數已算供應商夠運。供應商梗係識揀向邊間廠供應「靚」廢紙啦,找數快而準方是聰明人呀!

PermaLink: https://articles.zkiz.com/?id=63159

Next Page

ZKIZ Archives @ 2019