|
||||||
|
幾年前一場世紀 海嘯，令金融世界變天，唔少重量級銀行大班，都趁嗰一浪豹隱（咁當然仍在笑傲江湖的亦大有人在喇）！而嗰班有番幾十年功力嘅資深賓架，當年唔係出身花旗就 係獲多利（滙豐投行前身）呢兩大門派，成堆人嘅交情冇三十年都有廿載，拍人膊頭叫人出山，應該唔會係9.9分高難度動作！ 友情客串CVC顧問 好似曾做過花旗大中華區營運總裁、中銀香港副總裁等要職嘅陳子政，兩年前退休後，就做吓公職同非執行職務，好似港交所非執董同東亞銀行高級顧問咁，但近日就因為「老友」而出山！呢個「老友」就係「紅籌之父」梁伯韜！ 由 番薯梁坐鎮嘅私募基金CVC Capital Partners噚日宣佈，委任TC做佢哋嘅高級顧問！響花旗做咗27年嘅TC同華華講，係畀面番薯梁，所以應承友情客串，TC話自己職責，主要係如果 CVC日後有金融項目投資機會，佢就使出佢銀行家嘅經驗畀啲意見，幫吓盡職審查之類，總之公務及私人時間會平衡得好好，唔會畀好多時間番薯梁o架！ 退役賓架組團去西藏 至於佢同番薯梁的友情歲月係點樣開始，TC話，同番薯梁識咗十幾廿年，85年初番薯梁離開滙豐加盟萬國寶通（花旗前身），01年重投花旗做亞太區主席兼董事總經理，當時佢自己就係花旗香港區行長，兩條友，就係咁開始咗…… 除咗番薯梁，TC都有提到其他老友，佢話9月先搭完青藏鐵路去西藏旅行，成個團都係退役賓架，包括蘇格蘭皇家銀行前亞太區總裁袁鯤濤、中銀香港前副總裁李永鴻、金管局前副總裁蔡耀君，得閒成班人又會集會吹水打波……睇嚟，佢真係唔會畀好多時間番薯梁呢！ 李華華 |
||||||