中國有競爭力排名榜，瑞士有競爭力排名榜，無論邊一個，香港與新加坡呢兩個小島，都會名列前五名，互爭雄長。近來不少人話香港競爭力下滑，響起警告，唔好搞佔中，唔好搞內耗喎。
競爭力有啲抽象，不易明白，記者Ｇ識得幾位日本女士，今年嚟咗香港讀英文，講起香港，竟然問嚇啲日本女生：「香港有冇競爭力呀？」日本女生嘅標準答案就係：「香港好到冇得彈，只係租金太貴，吃不消，如果租金有新加坡咁平，香港競爭力一定世界第一！」
咁好？請佢地詳細說明之，日本女生話：「租金就最貴，我地幾個人只係住得起銅鑼灣劏房，但除咗租金之外，衣食行平到我地唔信，搭地鐵可以轉西鐵去到元朗，車費不及在東京搭兩三個站，食飯喎，每日三四千Yen已經足夠，喺東京唔夠吃一餐，衣著周街係平貨，我地唔去買LV就唔會超支啦，總之我地愛香港，唔該業主減嚇租啦！一減租，香港競爭力包保彈升！」
講到住，係香港最大弱點，外國人長居香港，最怕呢樣，租金貴之理由當然係需求多，供應少，土地不足，政府政策不對頭之故，梁振英以為有效嘅辣招，正降低香港競爭力。施永青最近講加拿大宏利保險在九龍灣買大廈，作價45億，交印花稅3.9億，令宏利鬼殺咁嘈，加拿大商會代為出頭，向政府表示嚴重關注。新加坡處處同香港競爭為跨國公司亞洲總部，新加坡向外商提供稅務優惠，為外商外籍僱員提供國際學校學位，我地香港素來是憑一味低稅率吸引人地，優惠全無，好合乎市場原則，但無稅務優惠唔緊要，香港特區政府要向外商徵額外印花稅，形同tax penalty，就認真攞命。宏利在港已久，搬唔郁就話照俾BSD啫，初到亞洲嘅外商，點肯制呀，選地區梗係以新加坡為首選啦。香港寫字樓租金已經高過新加坡大約五成，加埋買樓印花稅，外商實在搵唔到理由來港買樓設立地區總部。梁振英政府就似乎冇乜謀臣，但行政會議成員周松崗、查史美倫兩人極具國際視野，佢兩位有冇提醒梁特首呀？還是梁特首充耳不聞？ 