賓架W請一班老友食晚飯，席設耀華街漁一，原來「漁一」係佢嘅飯堂，但左丁山就唔知位置在那，睇住Google Map去搵，最後還是要問路兩次，先至摸到上去，真係大鄉里之至。呢度以海鮮為主，一味欖角蒸龍躉腩，食到眾人耳仔都郁埋，正正冇咁正，另一味茶香燻雞又係好嘢啫，賓架W與家人鍾意來此，係有理由嘅。
我地每次聚會，食好嘢與否，並不太重要，最緊要係吹水、吹風，各人大發謬論，一人一句，開心到暈，因眾人唔多唔少與金融界有關係，話題之一梗係張震遠啦，一提起佢，噓聲四起，過去張先生假哈佛麥肯錫之威名，大家唔睇僧面都要睇佛面，加上林鄭月娥稱讚過佢係最能幹公職人員，梗係以為佢好有料啦。嘩嘩，原來係咁嘅貨色，要由賴焯群賴焯藩兄弟介紹向詹培忠借八百萬元嘅商品交易所創辦人，在中環行走，點會有人尊重尊敬呀？高管R有古仔講：「我一位在金融機構任高職嘅朋友曾見過張震遠講商交所，佢話張震遠用洋女秘書、洋人經理、襯托得佢好威風，我位朋友幾乎俾佢嘅架勢嚇親。但返到公司仔細一諗之下，香港禮聘洋人做夥計，成本幾重噃，生意如何呢？左丁山你做過銀行，明白啦！」
哦，明白嘅，昔年師傅教落，跟師傅去拜訪一個印尼豪客，佢嘅私人辦公室佔地三千呎，擺設豪華到極，左丁山留下好深刻印象，以為搵到個大客，有功課交㖭。點知師傅返到銀行就叫左丁山不用再跟進，唔駛同呢個印尼客做生意，理由係：「佢充得好緊要，一個人用三千呎，個人租金等於半間公司租金，浮誇之人不可信也！」左丁山唯有服從命令，幾年後嗰位印尼客就要債務重組咯。
高管R又講到顧問文化，佢話：「我在大機構服務二十幾年，董事局聘請過六七次顧問公司，搵顧問提供意見其實每次都係為咗向外人交代：有獨立第三者專業意見，並非我地自把自為㗎，係咁嘅意思。最醒目嘅顧問就係只講不做，識寫報告，唔會執行（execute），總之領悟到我想佢地做乜就可以交報告，我就係代表到主席與CEO嘅共識吖嗎！見得多咯，我認為做慣大顧問嘅人，最危險嘅事就係自己下海做生意！」