ZKIZ Archives


巴士司機 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130526/18271611

會考尖子,中大優異生唔做「碧科」財務分析經理,辭工走去做巴士司機,被巴士公司公關部包裝宣傳一下,立時走紅,博得好多掌聲,從宣傳角度睇,巴士公司公關人員值得一讚。有人問左丁山點睇,左丁山認為人各有志,26歲青年人有權選擇自己鍾意嘅道路,以經濟學概念觀之,假如呢位年青人認為做司機可以將效用最大化(utility maximization),有最大工作滿足感,遠勝於冷氣房間嘅枱頭工作嘅話,旁人那可以阿吱阿咗。
不過左丁山同意李兆富(爽報,五月二十一日)嘅見解,一早想做司機,駛乜讀咁多書考大學呀?中學畢業之後就可以投身巴士公司,讀四年大學未免係有啲浪費公共資源(因香港嘅大學係公立大學),除非呢位青年並非短期過癮,而係立志長期留在巴士公司工作,索性從基層司機做起,由巴士司機起步,逐步爬升至高位,二十五年後做九巴行政總裁。成世人甘願做司機?未免對唔住自己嘅讀書天份喎。
或者會有人大駡左丁山市儈庸俗,但世界上唔少嘢並非純用感情、情緒觀察嘅,十年後至鬧左丁山都未遲,蘋果日報不妨嘜住,十年後再訪問佢(梁領彥Gary)。不容否認,世間上確有非常清高,不受名利引誘之人,左丁山同班同學之中,有一位來自長洲嘅學生,讀書勤力,九月開學時,佢已將必修科嘅指定教科書由頭讀到尾,左丁山掛住搞學生會活動,偶爾上堂抄筆記,佢會捉住左丁山隻手,細細聲講:「唔駛抄,講師講錯咗,本書第四百一十頁有解釋!」佢一舉手發問,講師詐作睇唔到,係要左丁山發問問題,同學無不掩嘴而笑。佢考學位試時唔夠一小時已經離座,後來我地問佢點解?佢話:「八條題目答五條,我答咗四條就知道一定合格,咪走先囉!」結果考試放榜,左丁山名次仲高過佢,自己為之面紅,我地個個叫佢刨托福去美國讀博士,回來做講師,但佢就覺得領悟、打開學術之門後,可以自己修為,唔駛要博士之名,卒之選擇返回長洲隱居,之後從來冇同學見過佢,令人懷念,亦覺得好可惜!

PermaLink: https://articles.zkiz.com/?id=56047

Next Page

ZKIZ Archives @ 2019